2 Crónicas 3:1-17
3 Shinallataj Salomonca Jerusalenpi caj Moria urcupimi Jehová Diospaj shuj huasita shayachi callarirca. Chaipimi Jehová Diosca Salomonpaj yaya Davidmanca ricurishca carca. Chai lugarllapitajmi Davidca jebuseocunapuramanta Ornán runapaj trillana pambapi Diospaj huasita shayachingapaj allichishca carca.
2 Salomonca chuscu huatacunata ña mandacushpami segundo quillapaj ishqui punllapi chai huasita shayachi callarirca.
3 Salomonca Diospaj huasita shayachingapajca cimientocunatami churarca. Chai cimientocunaca largomanca 26 metrocuna yallita,* anchomanca casi iscun* metrocunatami* midirca. Chai medidacunaca ñaupa medidami* carca.
4 Diospaj huasiman yaicuna corredorca anchomanca huasi midishca shinallatajmi casi iscun metrocunata charirca. Altomanpish 120-tami* charirca. Paica chai huasitaca oro purohuanmi jahuata churarca.
5 Chai jatun huasitaca enebro tablacunahuanmi churachirca. Qꞌuipamanca alli orohuanmi jahuata churarca. Patacunapipish palmera dibujocunata, cadena dibujocunata rurashpami sumajyachirca.
6 Ashtahuanpish chai huasipica sumaj rumicunatami churarca. Shinallataj Parvaimpi tiyaj orotapishmi churarca.
7 Huasitapish, vigacunatapish, pungu umbralcunatapish, patacunatapish, pungucunatapish orohuanmi jahuata churarca. Pata quinricunapipish querubin dibujocunatami rurarca.
8 Qꞌuipamanca Diospajlla ashtahuan chꞌicanyachishca ucutami* rurarca. Chai cuartoca largomanca huasi ancho shinallatajmi casi iscun metrocunata midirca, anchomanpish casi iscun metrocunatami midirca. Chaitaca 600 talento* alli orohuanpishmi jahuata churarca.
9 Cutin clavocunapaj oroca 50 siclotami* pesarca. Terrazapi tiyaj cuartocunatapish orohuanmi jahuata churarca.
10 Shinallataj paica Diospajlla ashtahuan chꞌicanyachishca ucupi churangapajmi ishqui querubincunata rurashpa orohuan jahuata churarca.
11 Chai ishqui querubincunapaj alascunaca tucuica largomanca casi iscun metrocunatami midirca. Punta querubinpaj shuj alasca largomanca ishqui metrocuna yallitami* midirca. Shinallataj chai alasca huasipaj patatami tupacurca, caishuj alasca largomanca ishqui metrocuna yallitami midirca. Chai alasca caishuj querubinpaj alashuanmi tupacurca.
12 Cutin caishuj querubinpaj shuj alasca largomanca ishqui metrocuna yallitami midirca. Chai alasca huasipaj caishuj lado patatami tupacurca. Shinallataj chaishuj alasca largomanca ishqui metrocuna yallitami midirca. Chai alasca punta querubinpaj caishuj alastami tupacurca.
13 Chai ishquindij querubincunapaj pascashca alascunaca casi iscun metrocunatami charirca. Chai querubincunaca shayacurcacunami, paicunapaj ñahuicunapish Diospajlla chꞌicanyachishca ucu ladomanmi carca.
14 Shinallataj cortinatapish* azul puchcahuan, morado puchcahuan, puca carmesí puchcahuan, alli telahuanmi rurarca. Querubín dibujocunatapishmi bordarca.
15 Huasi ñaupajpipish ishqui columnacunatami rurarca. Chai columnacunaca largomanca 15 metrocuna yallitami* midirca. Shinallataj columna jahuapi tiyaj capitelca ishqui metrocuna yallitami midirca.
16 Ashtahuanpish cadenacunata huallcata laya rurashpami columnacuna jahuapi churarca. 100 granadacunatapishmi rurarca. Chai granadacunataca cadenacunapimi churarca.
17 Pilarcunatapish Diospaj huasi ñaupajpimi shayachirca. Shuj pilartaca alli ladoman,* caishuj pilartaca lluqui ladomanmi* churarca. Alli ladoman caj pilartaca Jakintami* shutichirca. Cutin lluqui ladoman caj pilartaca Boaztami* shutichirca.
Notacuna
^ Hebreo rimaipica: “60 codos” ninmi.
^ O “nueve”.
^ Hebreo rimaipica: “20 codos” ninmi.
^ Shuj codoca 44.5 centimetrocunatami charirca. Shinapish huaquincunaca “ñaupa medida” nishpaca jatun codomanta parlacushcatami yuyancuna. Chai jatun codoca 51.8 centimetrocunatami charirca. Ayuda B14-ta ricui.
^ Caipica ima medida cashca mana yacharinchu.
^ Hebreo rimaipica: “huasitami” ninmi.
^ Shuj talentoca 34.2 kilogramocunatami charirca.
^ Shuj sicloca 11.4 gramocunatami charirca.
^ Hebreo rimaipica: “5 codos” ninmi.
^ “Cortina” shimita huasha diccionariopi ricui.
^ Hebreo rimaipica: “35 codos” ninmi.
^ O “ura ladoman”.
^ O “janaj ladomanmi”.
^ “Jakín” shutica ‘Jehová Dios sinchita shayachichun’ nisha ninmi.
^ “Boaz” shutica ‘fuerzahuan’ cashcatami nisha nicuj yuyachin.
