2 Corintios 1:1-24
1 Ñucaca Diospaj munaimanta Cristo Jesuspaj apóstol Pablomi cani. Ñucanchij huauqui Timoteondijmi Corinto llajtapi caj Diospaj congregacionman, Acaya llajtapi caj jucha illaj huauquicunamanpish cai cartata cachanchij:
2 Ñucanchij Yayitu Diospish, Amito Jesucristopish yallitaj llaquij cashcata ricuchichun, sumaj causaitapish cancunaman cuchun.
3 Ñucanchij Amito Jesucristopaj Yaya Diosca alabashca cachun. Paica yallitaj llaquij Yayami. Shinallataj tucuipi cushichij Diosmi.
4 Diosca tucui ñucanchij llaquicunapimi cushichin.* Pai chashna cushichijpimi ñucanchijpish shujtajcuna ima llaquipi cajpica Dios cushichishca shinallataj cushichi tucunchij.
5 Cristota catijcuna cashcamantami ñucanchijca achca llaquicunata charinchij. Chashnallatajmi Cristomantaca achca cushicuita chasquinchij.
6 Cancunata cushichingapaj, quishpichingapajmi ñucanchijca llaquicunata apacunchij. Shinallataj cancunata cushichingapajmi ñucanchijpish cushicuita chasquishcanchij. Chai cushicuimi cancunatapish ñucanchij shinallataj llaquicunahuan cajpica ahuantachun ayudan.
7 Ñucanchijca allimi yachanchij, cancunaca ñucanchij shinallataj llaquicunata apacushcamantami ñucanchij shinallataj cushichishca canguichij. Chaimantami Diosmanta cancuna mana caruyana cashcataca tucui shunguhuan crinchij.
8 Huauquicuna, Asia llajtapi ima llaquicunata ñucanchij charishcata cancunapish yachachunmi munanchij. Chai llaquicunaca yallitaj sinchimi carca, ñucanchij propio fuerzallamantaca mana ahuantai tucurcanchijchu. Causanatapish, huañunatapish mana yacharcanchijchu.
9 Ñucanchijca ñami huañugrinchij nishpami yuyarcanchij. Shinapish cai llaquicunaca ñucanchijllapitaj mana confianata, ashtahuanpish huañushcacunata causachij Diospi confianatami yachachirca.
10 Paimi huañuna jatun llaquimanta quishpichirca. Cutinllatajmi ñucanchijtaca quishpichinga. Ñucanchijca llaquicunamanta pai quishpichishpa catinatami tucui shunguhuan shuyacunchij.
11 Cancunapishmi ñucanchijmanta Diosta mañashpa ayudai tucunguichij. Ñucanchijmanta achcacuna mañajpica Diosca uyashpami ñucanchijta ayudanga. Chaimantami achcacuna Diosta pagui ningacuna.
12 Cai pachapica chuya causaitami charinchij, Dios yachachishca shinami mana llullashpa causanchij. Cancunahuancarin Dios llaquij shinallataj llaquijcunami canchij. Cai pacha gentecunapaj yachaitapish mana catinchijchu. Chaimantami ñucanchijca chuya concienciata charishcamanta jatunyarinchij.
13 Cancuna mana liyi tucushcata, mana intindi tucushcataca mana quillcanchijchu. Ashtahuanpish caicunata tucuita* intindichunmi munani.
14 Shinapish cancunaca ñami ashata intindishcanguichij. Cancunamanta maijancunaca ñucanchijmantami cushicunguichij. Shinallatajmi ñucanchijpish Amito Jesús shamui punllaca cancunamanta cushicushun.
15 Chaita yachashpami cutinllataj cushichingapaj cancunataraj visitanaman risha nircani.
16 Macedonia llajtaman ricushpami cancunataca visitasha nircani. Macedoniamanta tigracushpapishmi cancunataca visitasha nircani. Chai qꞌuipaca Judea llajtaman ñuca ricujpi cancuna ñucata ashata compañachunmi munarcani.
17 Caita ruranata yuyarishpaca mana yangamantachu nicurcani ¿nachu? ¿Ñuca munashcallata ruranata yuyashpachu shuj ratoca “ari”, cutin caishuj ratoca “mana” nicuni?
18 Diospi confiaichij, ñucanchij nishcaca ciertomi can. Ñucanchijca ñaupaman “ari” nishpaca qꞌuipamanca “mana” nishpaca mana ninchijchu.
19 Diospaj Churi Jesucristoca ari nishca jahuaca mana nishpaca mana ninchu. Ashtahuanpish pai ari nishcaca siempremi ari nishca canga. Paimantami Silvanopish,* Timoteopish, ñucapish cancunamanca huillashcanchij.
20 Dios cusha nishcacunaca Jesusmantami tucui* pajtarishca. Chaimantami Diosta jatunyachingapaj Jesuspaj shutipi chashna cachun* nishpa mañanchij.
21 Ashtahuanpish Diosmi cancunatapish, ñucanchijtapish Cristopaj cashcata ricuchishca. Diosmi ñucanchijtaca agllashca.
22 Shinallataj Diosca shuj sellotami ñucanchijpica churashca. Shamuj punllacunapi imata japina cashcata ricuchingapajmi paipaj espirituta ñucanchij shungupi churashca.
23 Diospaj ñaupajpimi ñuca causaimanta jurani. Cancunata llaquishcamantami Corinto llajtamanca manaraj rishcani.
24 Cancunaca feta charishcamantami ña sinchi canguichij. Ñucanchijca cancunapaj feta mandaj amocunaca mana canchijchu. Ashtahuanpish cancuna cushilla cachunmi cancunahuan tandalla sirvicunchij.
Notacuna
^ O “animan”.
^ Griego rimaipica: “tucuringacama” ninmi.
^ “Silvano” shutica Silaspaj caishuj shutimi.
^ Griego rimaipica: “ari” ninmi.
^ O “amén”.
