2 Corintios 12:1-21
12 Muscuipi shina Amito Jesús ñucaman imata ricuchishcata, pai imata huillashcatami cunanca parlagrini. Caicunamanta parlashpaca imata mana japishachu. Shinapish caicunamantami jatun tucuni.
2 Ñucaca shuj runa Cristohuan shuj shinalla cajtami rijsini. Cai runaca 14 huatacuna huashamanmi quimsa jahua pachaman apashca carca. Paipaj cuerpondij apashca cashcata o mana paipaj cuerpondij apashca cashcataca mana yachanichu. Chaitaca Diosllami yachan.
3 Ari chai runataca ñucaca rijsinimi. Paipaj cuerpondij apashca cashcata o mana paipaj cuerpondij apashca cashcataca Diosllami yachan. Paica
4 paraisomanmi apashca carca. Chaipimi mana parlaipaj shimicunata uyarca. Chai shimicunataca shujtajcunamanca ni maijan mana parlanachu can.
5 Chai runamantami ñucaca jatun tucusha. Shinapish ñucallamantatajca imata mana rurai tucuj cashcamantami jatun tucusha.
6 Jatun tucusha nishpapish yuyai illaj cashcataca mana ricuchinichu. Ñucaca imata nishpapish mana llullanichu. Maijanpish ñucata uyashcamanta, ñucata ricushcamanta ñucamanta ama yalli yuyachunmi mana jatun tucuni.
7 Muscuipi shina sumajcunata ricushcallamantaca maijanpish mana ñucamantaca yalli yuyanachu can.
Ama jatun tucungapajmi ñuca aichapica tujsicuj cashata chasquircani. Chai cashami ñuca ama yallitaj jatun tucuchun punllanta tujsishpa caticun. Chai cashaca Satanaspaj shuj ángel shinami can.
8 Quimsa cutinmi cai cashata ñucamanta anchuchihuai nishpa Diosta* mañarcani.
9 Chashna mañajpipish paica: “Ñucaca yallitaj llaquij cashcatami canmanca ricuchishcani. Ña chaillahuan canca cushicui. Mana sinchi cai horasmi ñuca poderca canta ashtahuan sinchiyachinga” nircami. Ashtahuanpish shuj carpa shina Cristopaj poder ñuca jahuapi cachunmi imata mana rurai tucuj cashcamanta jatun tucusha.
10 Cristomantami imata mana rurai tucuj cashpapish, sinchita cꞌamijpipish, imata mana charishpapish, catirashpa llaquichijpipish, llaquicunahuan cashpapish cushicuni. Ñucaca imata mana rurai tucui horasmi poderyuj tucuni.
11 Cancunamantami yuyai illaj runa shina rimani. Shinapish ñucamanta allicunata cancuna nishca cajpica mana chashna rimaimanchu carcani. Ñucaca ima mana cashpapish cancunapaj “alli nishca apostolcunamanta” imapi mana menos canichu.
12 Ñucaca achcata ahuantashpami apóstol cashcata cancunamanca ricuchircani. Shinallataj milagrocunata, mancharina ruraicunata, jatun ruraicunatami rurarcani.
13 Cancunataca imata mana mañarcanichu. Chaillapimi cancunaca shujtaj congregacioncunahuan mana igual canguichij. ¿Chaita rurashpaca mana allitachu rurarcani? Chashna rurashca cajpica ñuca pandarishcamanta perdonapaichij.
14 Ricuichij, caihuanca quimsa cutinmi cancunata visitanaman ringapaj listo cani. Cancunataca imata mana mañashachu. Cancuna imalla charishcacunataca mana mashcacunichu, ashtahuanpish cancunatami ricunata munani. Mana huahuacunachu yaya mamacunapaj imallatapish huaquichina can. Ashtahuanpish yaya mamacunami huahuacunapaj imallatapish huaquichina can.
15 Ñucaca cancunamantami tucui ñuca imalla charishcata cushicushpa cusha. Ñuca causaitapishmi cancunamantaca cusha. Ñucaca cancunataca achcatami cꞌuyani, ¿manachu ñucatapish chashnallataj cꞌuyana canguichij?
16 Ima shina cashpapish cancunataca imata mana mañarcanichu. Shinapish cancunaca paica “umashpa”, “trampacunata” churashpami pandachirca ninguichijmi.
17 ¿Shujtajcunata cachashpachu cancunapajtaca imata japircani?
18 Titotaca cancunata visitanaman richunmi rogarcani, paihuanca shujtaj huauquitapishmi cacharcani. ¿Tito rishpaca cancunapajtaca imata japircachu? ¿Manachu ñucanchijca shuj yuyailla carcanchij? ¿Manachu chai shinallataj rurarcanchij?
19 Alli saquiringapajllami chashna nicun nishpachari cancunaca yuyanguichij. Shinapish mana chashnachu can. Ashtahuanpish Cristota catijcuna cashcamantami Diospaj ñaupajpica imata mana llullashpa nicunchij. Cꞌuyashca huauqui panicuna imata rurashpapish cancunata sinchiyachingapajmi ruranchij.
20 Ñuca chayanapajca cancunaca mana ñuca munashca shina canata, ñucapish cancuna munashca shina mana canatami manchani. Ashtahuanpish cancunapurapica macanacushpa, envidianacushpa, coleranacushpa, cꞌaminacushpa, llaquichina munaihuan huashalla rimanacushpa, huashalla parlanacushpa, jatun tucushpa, bullata ruranacushpa puricujta ricunatami manchani.
21 Cancunapajman cutin rijpica ñuca Diosmi tal vez cancunapaj ñaupajpi ñucataca pingaipi churanga. Shinallataj achcacuna paicunapaj juchacunamanta mana arrepintirishcamantachari llaquirisha. Paicunaca mapa ruraicunamanta, huainayanamanta,* millai ruraicunata mana pingashpa ruranamantapish* mana arrepintirishcacunachu.
Notacuna
^ Griego rimaipica: “Amitota” ninmi.
^ Griego rimaipica: “pornéia” ninmi. “Huainayana” shimita huasha diccionariopi ricui.
^ Griego rimaipica: “asélgueia” ninmi. “Millai pinganayai ruraicuna” shimita huasha diccionariopi ricui.
