2 Corintios 2:1-17
-
Corinto llajtapi cajcunata Pablo cushichisha nishcamanta (1-4)
-
Juchata ruraj runata perdonanamanta, paita cutin chasquinamantapish (5-11)
-
Troas llajtapi, Macedonia llajtapi Pablo cashcamanta (12, 13)
-
Huillanaca mishashpa tigraj soldadocuna shina cashcatami ricuchin (14-17)
-
“Diospaj shimita cꞌatujcunaca mana canchijchu” (17)
-
2 Cancunata cutin visitashpaca mana llaquillata sintichisha ninichu.
2 Tucui cancunata llaquillata sintichijpica, ¿cutin pitaj ñucataca cushichingari? Llaquilla cajcunallatajmi ñucataca cushichinga.
3 Cancunapajman rishpa, cancunamanta ama llaquilla cangapaj, ashtahuanpish cushilla cangapajmi quillcarcani. Ñucata imami cushichin chaillataj cancunatapish cushichij cashcataca yachanimi.
4 Ñucaca yallitaj llaquilla cashcamanta, shungupipish nanarishca cashcamantami huacashpa cancunamanca quillcarcani. Shinapish cancuna llaquilla sintirichunca mana quillcarcanichu. Ashtahuanpish tucui shunguhuan cancunata cꞌuyashcata yachachunmi chashna quillcarcani.
5 Maijanpish llaquillata sintichishpaca mana ñucatachu llaquillata sintichishca. Ashtahuanpish tucui cancunatami llaquillata sintichishca. Shinapish chaimantaca mana achcata parlasha ninichu.
6 Juchata ruraj runataca ñami sinchita cunashcanguichij. Chaimanta paitaca chasquipaichijlla.
7 Yallitaj llaquilla cashcamanta ama shaicurichunmi tucui shunguhuan perdonashpa paitaca cushichina canguichij.
8 Paita cꞌuyashcata ricuchichunmi cancunataca rogapani.
9 Cancuna tucuipi cazuj cashcata yachasha nishpapishmi chashna quillcarcani.
10 Shuj runata cancuna perdonajpica ñucapishmi paitaca perdonani. Ashtahuanpish ñucaca ima mana allita perdonashpaca cancunata ayudangapajmi perdonarcani. Chaitaca Cristopaj ñaupajpimi rurarcani.
11 Satanás ama pandachichunca caishuj chaishuj perdonanacunami ashtahuan valishca can. Ñucanchijta pandachingapaj Satanás imata ruraj cashcataca* yachanchijmi.
12 Troas llajtapi Cristomanta alli huillaicunata huillanaman chayajpica Amito Jesuspaj obrata ruranaca shuj pungu shinami pascarirca.
13 Ñuca huauqui Titohuan mana tupashpaca mana tranquilo sintirircanichu. Chaimantami huauquicunata minchacama nishpaca Macedonia llajtaman rircani.
14 ¡Ñucanchijca Diostami pagui ninchij! Paimi ñucanchijtaca macanacuipi mishashpa tigraj soldadocunata shina Cristohuan tandalla ñaupajman pushan. Diosca paipaj yachaitapish ñucanchijmantami tucui ladocunapi rijsichin. Chai yachaica mishquijllata ashnacuj shinami.
15 Cristomanta huillajcunaca Diospajca mishquijllata ashnacuj shinami canchij. Cristomanta huillashca mishquijllata ashnacuj shimicunaca quishpirina ñanta rij gentecunapajman, chingarina ñanta rij gentecunapajmanpishmi chayan.
16 Chai shimicunaca chingarigrijcunapajca huañuimanmi ashnan, paicunataca huañuimanmi apan. Cutin quishpirigrijcunapajca causaimanmi ashnan, paicunataca causaimanmi apan. ¿Cai obrata rurangapajca pitaj allichirishca canyari?
17 Ñucanchijmi allichirishca canchij. Achca runacuna shina Diospaj shimita cꞌatujcunaca mana canchijchu. Tucui shunguhuanmi Diospaj shimimantaca huillanchij. Diosmi cai obrata rurachun cachashca. Chaimantami caitaca Cristohuan tandalla Diospaj ñaupajpi ruranchij.
Notacuna
^ O “imata yuyacujtaca”.
