2 Corintios 4:1-18
4 Chaimantami Dios llaquishpa ñucanchijman mingashca obrata ruranataca mana shaicushpa ruracunchijlla.
2 Ñucanchijca pacallapi rurashca pinganayai ruraicunataca huashamanmi saquishcanchij. Pitapish mana umanchijchu. Diospaj shimimantapish imata mana anchuchinchijchu imata mana mirachinchijchu, ashtahuanpish chaipi imata nishcallatami yachachinchij. Tucui gentecuna* cuentata cuchunmi Diospaj ñaupajpi allita rurashcata ñucanchijca ricuchinchij.
3 Ñucanchij huillacushca alli huillaicuna shuj velohuan tapashca shina cajpica, chingarina ñanta rij gentecunapajca tapashcami can.
4 Cristomanta sumaj alli huillaicuna luz shina ama achijyachichunmi cai pachapaj* diosca Jesusta mana catij gentecunapaj yuyaitaca tapashca. Cristoca Dios ima shina cashcata ricuchijmi.
5 Ñucanchijllamantatajca mana huillanchijchu. Ashtahuanpish Jesucristo Amito cashcatami huillanchij. Jesusmantami ñucanchijca cancunata sirvij canchij.
6 Diosmi: “Amsapica luz achijyachichun” nishca carca. Paimi ñucanchij shungutaca paipaj achijnicuj yachaihuan achijyachin. Chai yachaica Cristopaj ñahuimantami luz shina ñucanchijtaca achijyachin.
7 Ashtahuanpish ñucanchijca allpa puñucuna shinalla cashpapish cai valishca obratami charinchij. Chashnami runacuna mana chari tucushca poderta charishcata ricuchinchij. Shinapish cai poderca mana ñucanchijmantachu shamun, ashtahuanpish Diosmantami shamun.
8 Tucui laya llaquicuna japijpipish mana huichcashca shina canchijchu. Caita chaita yuyacushpapish imata ruranataca yachanchijmi.*
9 Catirashpa llaquichijpipish mana shitashca canchijchu. Pambaman urmachishpa shitajpipish mana tucuchishca canchijchu.
10 Maiman rijpipish huañuica Jesusta shinallatajmi ñucanchijtapish catiracun. Chashnami gentecunamanca Jesús shinallataj llaquicunata apacushcata ricuchinchij.
11 Ñucanchij causaipica Jesusta catijcuna cashcamantami punllanta huañuchishca cana puricunchij. Chashnami ñucanchij huañujlla cuerpohuanca Jesús shinallataj llaquicunata apacushcata gentecunamanca ricuchinchij.
12 Ñucanchijtaca huañuimi catiracun. Ashtahuanpish causaica cancunapajmi.
13 Quillcachishcapica: “Feta charishcamantami parlarcani” ninmi. Ñucanchijpish chashna feta charishcamantami parlanchij.
14 Jesusta causachijca Jesushuan tandalla cachunmi ñucanchijtapish causachinga. Paimi cancunatapish, ñucanchijtapish Jesuspaj ñaupajman pushanga. Chaitaca ñucanchijca yachanchijmi.
15 Tucui caicunaca cancunapaj allipajmi chashna tucurca. Chashna tucushcamantami Diosca yallitaj llaquij cashcata achca gentecunaman ricuchinga. Chaimantami achca gentecunaca Diosta pagui nishpa jatunyachingacuna.
16 Chaimantami ñucanchijca mana shaicurinchij. Ñucanchij aicha urmarijpipish ñucanchij yuyaipish, shungupish punllantami mushujyarishpa catin.
17 Llaquicunaca ashacamalla, apanallami can. Chai llaquicunamantami bendicioncunata chasquishun. Dios cushca bendicioncunaca imahuan mana chꞌimbapuraipajmi. Chai bendicioncunaca huiñaipajmi canga.
18 Chaimantami ñucanchijca imapish ricunallacunapica mana yuyashpa catinchij. Ashtahuanpish mana ricushcacunapimi yuyashpa catinchij. Ricunallacunaca ashacamallami can, cutin mana ricushcacunaca huiñaipajmi can.
Notacuna
^ Griego rimaipica: “Paicunapaj concienciapi” ninmi.
^ Griego rimaipica: “aión” ninmi. “Cai pacha” shimita huasha diccionariopi ricui.
^ Caitaca “mana tanto sustarinchijchu” nishpapishmi traducishcacuna.
