2 Reyes 19:1-37
19 Ezequiasca chaita uyashcahuanmi paipaj churanata lliquirishpa, racu sacota* churarishpa Jehová Diospaj huasiman yaicurca.
2 Chaipimi paipaj huasita* ricuj Eliaquimta, secretario Sebnata, sacerdotecunata pushajcunataca* racu sacota churarishpa Amozpaj churi profeta Isaiasta ricunaman richun cacharca.
3 Paicunaca cashnami nircacuna: “Ezequiasca caitami nin: ‘Shuj huarmi paipaj huahuata huachana horas fuerzata mana charij shinami ñucanchijpish canchij. Chaimantami cunan punllaca ñucanchijpajca llaquirina punlla, cꞌamirina punlla, humillarina punlla can.
4 Rabsaqué nishca tucui shimicunata Jehová Dios uyangapishchari. Paipaj amo Asiriamanta reyca rabsaquetami causaj Diosta cꞌamichun cacharca. Chaimanta Jehová Dios cai shimicunata uyashpa paita cuentata mañachun. Caipi tucui causashpa saquirijcunamanta shuj mañaita rurapai’ ninmi” nircacunami.
5 Chashnami rey Ezequiaspaj sirvijcunaca Isaías maipi cashcaman yaicurcacuna.
6 Chaipimi Isaiasca paicunataca: “Cancunapaj amitomanca caita nichij: ‘Jehová Diosca caitami nin: “Asiriamanta reyta sirvijcuna ñucapaj contra cꞌamishcacunata uyashcamanta, paicunapaj nishca shimicunata cancuna uyashcamantaca ama manchaichijchu.
7 Ñucami paipaj shungupi shuj yuyaita* churagrini. Chaimantami paica shuj noticiata uyashpa paipaj llajtaman tigranga. Paipaj llajtallapitajmi espadahuan huañuchun saquisha” ninmi’ ninguichij” nircami.
8 Asiriamanta rey, Lakís llajtata saquishpa rishcatami rabsaqueca uyarca. Chaimi rabsaqué reyta ricunaman rishpaca Libnapaj contra macanacucushcata ricurca.
9 Shinapish Asiria llajtamanta reyca Etiopía llajtamanta rey Tirhacá paipaj contra macanacunaman llujshishcatami uyarca. Chaimantami paica Ezequiasman huillajcunata cutin cachashpaca cashna nirca:
10 “Cancunaca Judamanta rey Ezequiasmanca caitami nina canguichij: ‘Can confiashca Dios umachunca ama saquichu. Paica “Jerusalenca Asiriamanta reypaj maquipica mana urmangachu” nishpami umacun.
11 ¡Ricui! Canca Asiriamanta reycuna tucui llajtacunata imallata rurashpa tucuchishcataca uyashcanguimi. Chaita yachashpaca, ¿canca quishpiri tucunguichu?
12 ¿Ñucanchij ñaupa yayacuna tucuchishca llajtacunapaj dioscunaca paicunata quishpichi tucurcachu? ¿Gozanpish, Haranpish, Rezefpish, Edén llajtamanta Tel-Asarpi causaj gentecunapish cunanca maipitaj canyari?
13 ¿Hamat llajtamanta reypish, Arpad llajtamanta reypish, Sefarvaim, Hená, Ivá llajtacunamanta reycunapish maipitaj can?’ ninguichij” nircami.
14 Ezequiasca huillajcunapaj maquimanta cartacunata japishpami liyirca. Qꞌuipaca Jehová Diospaj huasiman rishpami Jehová Diospaj ñaupajpi chai quillcashca cartacunata pascashpa churarca.
15 Ezequiasca Jehová Diospaj ñaupajpimi mañai callarirca. Paica caitami nirca: “Querubincunapaj jahuapi* cambaj jatun tiyarinapi tiyacuj israelitacunapaj Jehová Dioslla, canllami cai allpapi tiyaj tucui llajtacunapaj, mandajcunapaj Dios cangui. Canmi jahua pachatapish, cai allpatapish rurarcangui.
16 ¡Jehová Dioslla, cambaj rinrinta mañachishpa uyahuai! ¡Jehová Dioslla, cambaj ñahuicunata pascashpa ricuhuai! Can causaj Diosta cꞌamingapaj Senaquerib cachashca huillaita uyahuai.
17 Jehová Dioslla, Asiria llajtamanta reycunaca llajtacunata, paicunapaj allpacunatapishmi tucuchishca.
18 Paicunapaj dioscunataca mana dioscuna cashcamantami ninapi shitarcacuna. Chai dioscunaca maderamanta, rumimanta runacunapaj maquihuan rurashcacunallami carca. Chaimi chai dioscunataca tucuchi tucurcacuna.
19 Cunanca ñucanchij Jehová Dioslla, Asiriamanta reypaj maquimanta ñucanchijta quishpichihuayari. Jehová Dioslla, cai allpapi caj tucui mandajcuna canlla Dios cashcata yachachun quishpichihuayari” nircami.
20 Amozpaj churi Isaiasca Ezequiasmanca cashna nishpami huillaj cacharca: “Israelitacunapaj Jehová Diosca cashnami nin: ‘Asiria llajtamanta rey Senaqueribmanta can mañashcataca uyashcanimi.
21 Jehová Diosca rey Senaqueribpaj contrami cai shimicunata nin:
“Cꞌarihuan manaraj chayarishca Sionpaj ushushica canta pꞌiñashpami canmanta burlarin.
Jerusalenpaj ushushica canta ricushpaca umatami cuyuchin.
22 ¿Canca pitataj cꞌamircangui? ¿Pipaj contrataj maldicircangui?
¿Canca pipaj contrataj sinchita rimarcangui?
¿Canca pipaj contrataj jatun tucushpa ricurcangui?
¡Jucha illaj Israelpaj contrami chashna rurashcangui!
23 Cambaj huillajcunata cachashpami Jehová Diosta cꞌamishpaca cashna nircangui:
‘Ñucaca achca macanacuna carretacunahuanmi
alto urcucunaman llujshisha.
Ashtahuan caruman caj Líbano urcucunamanmi llujshisha.
Paicunapaj cedro alto yuracunatami pꞌitisha, paicunapaj enebro alli yuracunatami pꞌitisha.
Ashtahuan carupi caj pꞌangasapa bosquecunapimi miticunaman yaicusha.
24 Pozocunata allashpami shujtaj llajtamanta yacucunata ubyasha.
Ñuca chaquihuan sarushpami Egipto llajtapi tucui larca yacucunata* chaquichisha’ nircanguimi.
25 ¿Manachu uyashcangui? Caitaca achca tiempocuna huashamanmi ña decidircani.*
Ñuca cashna allichishcamantaca achca punllacunami ña pasashca.
Cunanmi chaita rurasha.
Canca muyundijta pircashca llajtacunataca urmachishpami rumicuna montonta rurangui.
26 Chaipi causajcunaca pi difindijta mana charingacunachu.
Yallitaj manchaihuan, yallitaj pingaihuanmi cangacuna.
Chagracunapi sisacuna shina, verdijlla qꞌuihuacuna shinami tucuringacuna.
Inti llujshin ladomanta huaira shamushpa terraza jahuapi tiyaj qꞌuihuacunata tucuchij shinami tucuringacuna.
27 Pero ñucaca can tiyarijta, can llujshijta, can yaicujtaca allimi yachani.
Shinallataj can ñucahuan pꞌiñarishca cashcatapish allimi yachani.
28 Can ñucahuan pꞌiñarishca cashcapish, caparishpa rimashcapishmi ñuca rinrincunaman chayashca.
Chaimi cambaj singapica fierro ganchota churasha. Cambaj shimipipish frenotami churasha.
Chashnami cantaca can maimanta shamushcaman tigrachishpa cachasha” ninmi.
29 Rey Ezequías ñuca nishcacuna ciertotaj cashcata yachachunmi cai señalta cuni: cai huatataca cancunaca granocuna urmashpa paicunallataj huiñashcatami micunguichij. Cutin segundo huatapica cai grano pꞌucushcatami micunguichij. Pero tercer huatapica cancunaca tarpushpami cosechanguichij. Uva yuracunatapish plantashpami chaimanta micunguichij.
30 Judapi caj familiamanta cajcunaca granocunata pꞌucuj yuracuna shinami canga. Ucujta sapiyashpami jahuamanca granocunata pꞌucunga.
31 Jerusalenmantaca causaj gentecunami llujshingacuna. Sión urcumantapish causashpa catij gentecunami llujshingacuna. Jahua pacha soldadocunata mandaj Jehová Diosmi chaitaca rurangataj.
32 Jehová Diosca Asiria llajta reymantaca caitami nin:
“Paica cai llajtamanca mana yaicungachu.
Shuj flechallatapish cai llajtapaj contraca mana shitangachu.
Shuj escudollahuanpish paica mana macanacungachu.
Cai allpata llaquichingapajpish montonashca allpata mana churangachu.
33 Pai maitami shamurca chaillatatajmi tigrashpa ringa.
Cai llajtamanca mana yaicungachu” ninmi Jehová Diosca.
34 “Ñucaca cai llajtataca difindishami. Ñuca shutimanta,
ñucata sirvij Davidmantami cai llajtataca quishpichisha”’ ninmi” nircami.
35 Chai tutallatajmi Jehová Diospaj ángel* llujshishpa asirio soldadocunapaj carpa huasicunapi 185.000 cꞌaricunata huañuchirca. Tutamanta lado utca jatarijcunaca chai cuerpocuna huañushca siricujtami ricurcacuna.
36 Chaita ricushpami Asiria llajtamanta rey Senaqueribca chaimanta rishpa Nínive llajtaman tigrarca. Chaipimi paica saquirirca.
37 Rey Senaquerib Nisroc diospaj adorana huasipi cunguricujpimi paipaj propio churicuna Adramélec, Sarezerca espadahuan paita huañuchircacuna. Qꞌuipaca paicunaca Ararat allpacunamanmi miticushpa rircacuna. Chai qꞌuipaca Senaqueribpaj churi Esar-Hadonmi catij rey tucurca.
Notacuna
^ O “pꞌaza sacota”, “cañamazu sacota”.
^ O “palaciota”.
^ Hebreo rimaipica: “ancianocunataca” ninmi.
^ Hebreo rimaipica: “paipi shuj espirituta” ninmi.
^ Caitaca “chaupipi” nishpapishmi traducishcacuna.
^ O “Nilo tucui larca yacucunata”.
^ Hebreo rimaipica: “rurarcani” ninmi.
^ “Ángel” shimita huasha diccionariopi ricui.
