2 Reyes 20:1-21
20 Chai punllacunapimi Ezequiasca ungushpa ñalla huañugrirca. Chaimi Amozpaj churi profeta Isaías paita ricunaman shamushpaca: “Jehová Diosca: ‘Canca huañugringuimi. Mana cai ungüimantaca sanoyanguichu. Chaimanta cambaj huasi ucupuramanta cajcunaman mandashcacunata cui’ ninmi” nirca’.
2 Chaita uyashpami Ezequiasca paipaj ñahuita pata ladoman churashpa, Jehová Diosta cashna nishpa mañai callarirca:
3 “Ñuca Jehová Dioslla, cambaj ñancunapi mana caruyashpa tucui shunguhuan purishcata, cambaj ñaupajpi allita rurashcata yuyaripai” nircami. Chashna nishpami Ezequiasca yallitaj huacai callarirca.
4 Isaiasca chaupi patioman manaraj llujshishpami Jehová Diosmanta cashna huillashcata chasquirca:
5 “Ñuca pueblota pushaj Ezequiaspajman tigrashpaca cashna ni: ‘Cambaj ñaupa yaya Davidpaj Jehová Diosca cashnami nin: “Can mañashcataca uyashcanimi, cambaj huiquitapish ricushcanimi. Chaimantami cantaca sanoyachigrini. Quimsa punllapimi canca Jehová Diospaj huasiman huichiyangui.
6 Can 15 huatacunahuan causashpa catichunmi saquisha. Asiria llajtamanta reypaj maquimantami cantapish, cai llajtatapish quishpichisha. Ñuca shutimanta, ñucata sirvij Davidmantami cai llajtataca cuidasha” ninmi’ ningui” nircami.
7 Isaiasca: “Chaquishca higocunamanta masata* apamuichij” nircami. Chashna nijpimi chai masata apamurcacuna. Chai masahuanmi úlcera ungüi jahuapi churarcacuna. Chai qꞌuipami Ezequiasca asha asha alliyashpa catirca.
8 Ezequiasca: “¿Jehová Dios ñucata jambina cashcatapish, quimsa punllapi Jehová Diospaj huasiman huichiyana cashcatapish ima señalta ricushpataj yachai tucuni?” nishpami Isaiastaca tapushca carca.
9 Chashna nijpimi Isaiasca: “Jehová Diosca pai nishca shimicunata pajtachinataj cashcata ricuchingapajca Jehová Diosca cai señaltami* cushca: ¿Llandu escalerapi* chunga gradacunata ñaupajman richunchu munangui? Mana cashpaca, ¿chai llandu chunga gradacunata huashaman tigrachunchu munangui?” nishpa cutichirca.
10 Chashna nijpimi Ezequiasca: “Llanduca chunga gradacunata ñaupajmanmi ri tucun. Shinapish chunga gradacunataca mana tigrai tucunchu” nirca.
11 Chaimi profeta Isaiasca Jehová Diosta rogarishpa mañarca. Chashna mañajpimi Diosca chai llandutaca Acazpaj escalerapi chunga gradacunacama tigrachirca.
12 Chai tiempopica Baladanpaj churi Berodac-Baladanmi Babilonia llajtata mandaj carca. Paica Ezequías ungushca cashcatami yachaj chayarca. Chaimantami paica cartacunatapish, shuj regalotapish Ezequiasman cacharca.
13 Ezequiasca huillajcunataca allimi chasquirca. Shinallataj paipaj achca valij cosascunata huaquichina huasitapishmi ricuchirca. Chaipica cullquita, orota, aceite balsamicota, shujtaj achca valishca aceitecunatapish, macanacunacunata huaquichina ucutapish, achca valij cosascunata huaquichina cuartocunapi tucui imalla tiyashcacunatapishmi ricuchirca. Ezequiasca paipaj propio huasipi* imalla tiyashcata, paipaj tucui mandana allpacunapi imalla tiyashcacunatami mana pacashpa tucuita ricuchirca.
14 Chai qꞌuipami profeta Isaiasca rey Ezequías maipi cashcaman yaicushpaca: “¿Chai runacunaca imatataj nircacuna? ¿Maimantataj shamurcacuna?” nishpa tapurca. Shina tapujpimi Ezequiasca: “Babilonia caru llajtamantami shamushcacuna” nirca.
15 Chashna nijpimi Isaiasca: “¿Cambaj huasipica imatataj ricurcacuna?” nishpa tapurca. Chaimi Ezequiasca: “Ñuca huasipi tucui imalla tiyashcacunatami ricurcacuna. Ñucapaj achca valishca cosascunatapishmi tucuita ricuchircani” nirca.
16 Isaiasca Ezequiasmanca cashnami nirca: “Jehová Diospaj nishcacunata uyai:
17 ‘¡Ricui! Cambaj huasipi imalla tiyashcacunatapish, cambaj ñaupa yayacuna cunancama tucui imalla charishcacunatapish Babiloniamanmi apanga. Chashna apana punllacunami chayamucun. Imapish mana saquiringachu ninmi Jehová Diosca.
18 Shinallataj cambaj huaquin dueño huahuacunapaj yayami tucungui. Paicunataca Babilonia llajtamanmi prezu apangacuna. Chaipimi paicunaca Babilonia reypaj palaciopi achca autoridadta charijcuna tucunga’ ninmi” nircami.
19 Chaita uyashpami Ezequiasca Isaiasmanca: “Jehová Diospaj nishca shimicunaca allimi can” nirca. Shinallataj Ezequiasca: “Ñuca causangacama sumaj, tranquilo causai tiyanaca allimi canga” nircami.
20 Ezequiaspaj causaipish, paipaj poderpish, jatun tanque yacuta pai ima shina rurashcapish, yacuta regana jatun larcata ima shina rurashcapish, yacuta chai llajtaman ima shina apashcapish Judá llajtamanta reycunapaj causaimanta parlaj libropimi quillcashca tiyacun.
21 Ezequiasca huañurcami.* Qꞌuipaca paipaj churi Manasesmi catij rey tucurca.
Notacuna
^ O “chaquishca higocunata llapishpa rurashca tortata”.
^ “Señal” shimita huasha diccionariopi ricui.
^ Chai escaleracunaca tiempota ricungapajmi inti reloj laya cashca yuyachin.
^ O “palaciopi”.
^ O “paipaj ñaupa yayacunahuanmi samarirca”.
