2 Reyes 9:1-37
9 Profeta Eliseoca profetacunapaj churicunamanta shujta cayashpami cashna nirca: “Cambaj churanata cinturapi huatarishpa, shuj botellapi aceiteta apashpa Ramot-Galaadman utca ri.
2 Chaiman chayashpaca Nimsipaj nieto Jehosafatpaj churi Jehuta mashcai. Jehú, paipaj huauquicunahuan maipi cashcaman yaicui. Jehupajman chayashpaca paita jatarichishpa ashtahuan ucujman caj cuartoman pushai.
3 Qꞌuipaca botellapi apashca aceiteta paipaj umapi tallishpaca: ‘Jehová Diosca: “Cantaca Israel llajtapi rey cachunmi agllani” ninmi’ ningui. Chai huashaca punguta pascashpa chaimanta utca miticushpa ringui” nircami.
4 Chashna nijpimi profetata sirvijca Ramot-Galaadman rirca.
5 Pai chaiman chayajpica soldadocunata mandajcunami tiyacushcacuna carca. Chaimi paica: “Pushaj, cambajmi shuj huillaita charini” nirca. Chashna nijpimi Jehuca: “¿Cai huillaica ñucanchijpuramanta maijanpajtaj can?” nishpa tapurca. Chashna nijpimi paica: “Pushaj, cambajmi huillaita charini” nishpa cutichirca.
6 Chaimi Jehuca jatarishpa huasiman yaicurca. Profetata sirvijca Jehupaj umapimi aceiteta tallishpa cashna nirca: “Israelitacunapaj Jehová Diosca caitami nin: ‘Israelitacunapaj Jehová Diosca paipaj llajtata mandachunmi cantaca rey cachun agllashca.
7 Cambaj amo Acabpaj familiatami tucuchina cangui. Ñucaca ñucata sirvij profetacunapaj yahuarmanta, Jehová Diosta sirvijcunapuramanta Jezabel tucui huañuchishcacunapaj yahuarmantami paitapish chashnallataj tigra llaquichisha.
8 Acabpaj tucui familiacunami huañunga. Israelpica Acabpaj tucui cꞌaricunatapish, mana difindiri tucujcunatapish, debilcunatapishmi tucuchisha.
9 Acabpaj familiataca Nebatpaj churi Jeroboanpaj familiata shinami tucuchisha. Shinallataj Ahiyapaj churi Baasapaj familiata shinami tucuchisha.
10 Jezabel huarmitaca allcucunami Jezreelpaj allpapi micungacuna. Paitaca ni pi mana pambangachu’ ninmi” nircami. Chashna nishcahuanmi punguta pascashpa, chaimanta miticushpa llujshirca.
11 Reyta sirvijcunapajman Jehú tigrajpica: “¿Tucuichu alli can? ¿Imapajtaj chai lococa canta ricunaman shamushca?” nishpami tapurcacuna. Chaimi paica cashna cutichirca: “Cancunaca chai gentecuna ima shina cashcata, paicuna ima shina parlashcataca yachanguichijmi” nirca.
12 Pero reyta sirvijcunaca: “¡Chaica mana ciertochu can! Ima cajpipish verdadta ningui” nircacunami. Chaimi paica cashna nirca: “Paica caita, chaita nishca qꞌuipaca: ‘Jehová Diosca: “Cantaca Israel llajtata mandachunmi agllani” ninmi’ nircami”.
13 Chashna nijta uyashpami cada uno paicunapaj churanacunata japishpa gradacunapi tindishpa churarcacuna. Chai jahuapimi paica shayarirca. Shinallataj tocana gachupi tocashpami: “¡Jehuca reymi tucushca!” nircacuna.
14 Jehuca Jehosafatpaj churimi carca. Jehosafatca Nimsipaj churimi carca. Jehumi Jehorampaj contra jatarirca.
Jehorampish, tucui israelitacunapish Ramot-Galaadpimi Siria llajtamanta rey Hazaelmanta difindirishpa macanacucurcacuna.
15 Rey Jerohamca Siria llajtamanta rey Hazaelhuan macanacujpimi siriocuna paita chugrichirca. Chai chugrichishcacunamanta alliyangapajmi Jezreelman tigramurca.
Chaipimi Jehuca: “Cancuna ñuca lado cashpaca ni pi caimanta miticushpa richun ama saquinguichij. Shinallataj Jezreelpi ima tucushcata parlanaman richun ama saquinguichij” nirca.
16 Chai qꞌuipaca Jehuca paipaj carretapimi Jezreelman rirca. Chai llajtapimi Jehoramca chugrichishcamanta paipaj camapi carca. Judá llajtamanta rey Ocoziaspish paita ricunamanmi uriyashca carca.
17 Jezreel torre jahuapi chapaj runaca Jehú achca grupo gentecunahuan shamucujta ricushpami: “Achca runacuna shamucujtamari ricuni” nirca. Chaimi Jehoramca: “Caballopi purij shuj soldadota cayashpa paicunata tupanaman richun mandai. Shinallataj: ‘¿Tranquilo causaita mashcanamanchu shamunguichij?’ nishpa tapuchun mañai” nirca.
18 Chaimi shuj caballopi purij soldado paicunata tupanaman rishpaca: “Reyca: ‘¿Tranquilo causaita mashcanamanchu shamunguichij?’ ninmi” nirca. Chashna nijpimi Jehuca: “¿Imamantataj ‘tranquilo causaimanta’ parlangui? ¡Huashaman tucui, ñucata cati!” nishpa cutichirca.
Shina nijpimi chapaj runaca: “Huillaj runaca paicunapajman chayarcami. Pero mana tigramushcachu” nishpa huillarca.
19 Chaimi reyca segundo caballopi purij soldadotaca paicunapajman cacharca. Ña chayashpaca chai soldadoca: “Reyca: ‘¿Tranquilo causaita mashcanamanchu shamunguichij?’ ninmi” nirca. Pero Jehuca: “¿Imamantataj ‘tranquilo causaimanta’ parlangui? ¡Huashaman tucui, ñucata cati!” nishpami cutichirca.
20 Chai chapaj runaca* cutinllatajmi: “Tupanaman cachashca runaca paicunapajmanmi chayarca. Pero mana tigramushcachu. Carretata pushajca Nimsipaj nieto* Jehú shinami loco laya manejan” nirca.
21 Jehoramca: “¡Ñuca carretata allichichij!” nircami. Chashna nijpimi pai macanacuna carretata allichircacuna. Chaimi Israel llajtamanta rey Jehorampish, Judá llajtamanta rey Ocoziaspish Jehuta tupanaman llujshircacuna. Cada unomi paicunapaj propio macanacuna carretacunapi llujshircacuna. Paicunaca Jezreelmanta Nabotpaj allpacunapimi Jehuhuanca tupanacurcacuna.
22 Jehoram Jehuta ricushpaca: “¿Jehú, canca tranquilo causaita mashcanamanchu shamungui?” nircami. Chashna nijpimi Jehuca: “¿Cambaj mama Jezabel huainayashpa, tucui laya brujianacunatapish rurashpa causajpica ima shinataj tranquilo causaica tiyangari?” nirca.
23 Chai ratomi Jehoramca miticushpa ringapaj paipaj carretata vueltata cuchishpa Ocoziastaca: “¡Ocozías, shuj trampapimari urmashcanchij!” nirca.
24 Jehuca paipaj arcota japishpami Jehorampaj huashapi flechahuan shitarca. Chashna flechahuan shitajpimi chai flechaca shunguta pasashpa ñaupajman llujshirca. Chaimi Jehoramca paipaj macanacuna carretamanta urmashpa huañurca.
25 Chaimantami Jehuca paita sirvij soldado Bidcar runamanca cashna nirca: “Jehoramta japishpa Jezreelmanta caj Nabotpaj allpaman shitai. Paipaj yaya Acabpaj huashata carretata manejashpa ricushpaca ñucapish, canpish Jehová Dios paipaj contra cashna nishcatami uyarcanchij:
26 ‘Jehová Diosca: “Nabotpaj, paipaj churicunapaj yahuarca ñucapajca cainalla ricushca shinami can. Chai yahuarmantaca cai allpallapitajmi ñucaca canta llaquichisha. Ñuca, Jehová Diostajmi chashna nini” ninmi’ nircami. Chaimanta Jehová Dios nishca shina paitaca japishpa chai allpaman shitai” nircami.
27 Judá llajtamanta rey Ocoziasca chaipi ima tucushcata ricushpaca huertapi caj huasiman rina ñantami miticushpa callparca. (Qꞌuipamanca Jehuca paita catishpami: “¡Paitapish huañuchichij!” nirca. Ocozías carretapi Gur llajtaman huichiyacujpimi chugrichircacuna. Chai llajtaca Ibleam llajta cꞌuchupimi carca. Pero Ocoziasca Meguidó llajtacamami miticushpa rirca. Chaipimi paica huañurca.
28 Chaimantami paita sirvijcunaca shuj carretapi Jerusalenman aparcacuna. Chaipimi Davidpaj Llajtapi paipaj ñaupa yayacunahuan pambarcacuna.
29 Acabpaj churi Jehoram 11 huatacunata Jerusalenta mandacujpimi Ocoziasca Judá llajtata mandai callarirca).
30 Jezreelman Jehú chayajpica Jezabelca ima tucushcatami yachaj chayarca. Chaimi Jezabelca paipaj ñahuicunataca yanahuan pintarishpa, paipaj umatapish allichirishpa ventanamanta urilla ricurca.
31 Jehú chai llajtapaj punguta yaicucujpica Jezabelca: “¿Zimrí paipaj amota huañuchishcamanta paihuan ima tucushcata yuyaringuichu?” nircami.
32 Jehuca ventanata huichilla ricushpami: “¿Cancunamantaca pitaj ñuca parte canguichij? ¿Pitaj ñuca lado canguichij?” nishpa tapurca. Chashna tapujpimi palaciopi achca autoridadta charij ishqui o quimsa runacunaca jahuamanta urilla ricurcacuna.
33 Chaimi Jehuca: “¡Chai huarmitaca jahuamanta shitaichij!” nijpi, paicunaca jahuamanta shitarcacuna. Chashna shitajpimi Jezabelpaj yahuarca patamanpish, caballocunamanpish tsiraparirca.* Jehuca paipaj caballocunahuanpishmi paita saruchirca.
34 Chai qꞌuipaca Jehuca huasiman yaicushpami micurca, ubyarca. Chai huashaca: “Chai millai huarmita pambashpa mingui tucuichij. Paica ima shina cashca cashpapish reypaj ushushimi can” nircami.
35 Paicuna pambanaman rishpaca paipaj uma tulluta, paipaj chaquita, paipaj maquicunallatami japircacuna.
36 Chai pambajcuna ima tucushcata parlangapaj tigrajpica Jehuca cashnami nirca: “Jehová Diosca paita sirvij Tisbemanta Eliasman huillachishca shimicunami pajtarishca. Paica: ‘Jezabelpaj aichataca Jezreelpaj allpapimi allcucuna micunga.
37 Jezreelpaj allpapica Jezabelpaj huañushca cuerpoca allpapaj abonomi tucunga. Chashnami Jezabel pi cashcataca mana pi rijsi tucungacuna’ nircami” nirca.
Notacuna
^ “Chapaj runa” shimita huasha diccionariopi ricui.
^ Hebreo rimaipica: “churi” ninmi.
^ O “chiraparirca”.
