2 Samuel 7:1-29
7 Rey David paipaj propio huasipi* ña causai callarijpimi Jehová Diosca Davidpaj muyundijpi caj tucui contracunamanta quishpichishpa paimanca tranquilo causaita curca.
2 Rey Davidca profeta Natanmanca: “Ñucaca cedromanta rurashca huasipimi causacuni. Shinapish Diospaj Arcaca telacunahuan rurashca carpa huasi chaupipimi tiyacun” nircami.
3 Natanca reymanca: “Rilla, cambaj shungu ima nishcata rurailla, Jehová Diosca canhuanmi” nishpami cutichirca.
4 Jehová Diosca chai tutallatajmi Natanmanca cashna nirca:
5 “Ñucata sirvij Davidpajman rishpa cashna ni: ‘Jehová Diosca caitami nin: “¿Ñuca causangapajca shuj huasitaca canchu shayachina cangui?
6 Ñucaca israelitacunata Egiptomanta llujshichimushca punllamanta cunancamaca shuj huasipica mana causashcanichu. Ashtahuanpish caiman chaiman apajpimi carpa huasicunapi causacushcani.
7 Tucui punllacunami ñucaca israelitacunahuan* carcani. Ñuca pueblota michichunca Israelpaj familiacunamanta pushajcunatami agllarcani. Paicunataca ‘¿imamantataj ñucapaj cedro caspihuan shuj huasita mana rurashcanguichij?’ nishpa ima horapish mana tapushcanichu” ninmi’ ningui.
8 Cunanca ñucata sirvij Davidmanca cashna ni: ‘Jahua pacha soldadocunata mandaj Jehová Diosca caitami nin: “Ñucami cantaca ñuca pueblo Israelta pushaj cachun ovejacunata michishpa puricushca pambamantaca pushamurcani.
9 Can maiman rijpipish ñucaca canhuanmi casha. Cambaj tucui contracunatapish cambaj ñaupajpimi tucuchisha. Shinallataj cambaj shutitami jatunyachisha. Canca tucui cai allpapi causaj gentecunamanta ashtahuan rijsishcami tucungui.
10 Ñuca pueblo Israelpajca shuj lugartami agllasha, chaipimi paicunataca churasha. Paicuna chaipi causacujpica mana pi nunca molestangachu. Millaicunapish ñaupa shinaca paicunataca mana cutin llaquichingachu.
11 Ñuca pueblo Israelpaj juezcunata nombrai punllacunamantami millaicunaca chashna llaquichircacuna. Canmanca tucui cambaj contracunamanta quishpichishpami tranquilo causaita cusha.
Ashtahuancarin Jehová Diosca cambajmi shuj huasita ruranga. Chaitaca Jehová Diostajmi canman chashna nishca.
12 Can huañushpaca cambaj ñaupa yayacunahuanmi samaringui. Ñucaca cambaj qꞌuipami cambaj huahua huahuacunamanta cambaj propio churita rey cachun churasha. Paipaj mandanapish huiñaipaj cachunmi churasha.
13 Paimi ñuca shutita jatunyachingapaj shuj huasita shayachinga. Cutin ñucaca pai mandana jatun tiyarinataca huiñai huiñaipajmi churasha.
14 Ñucaca paipaj yayami casha. Paica ñuca churimi canga. Pai mana allita rurajpica paitaca runacunapaj varahuanmi corregisha. Runacuna azotishpa corregij shinami paitaca corregisha.
15 Cambaj propio churitaca siempremi cꞌuyasha.* Saulmanta cꞌuyaita anchuchij shinaca paimantaca mana anchuchishachu. Saultaca cambaj ñaupajmantami anchuchircani.
16 Cambaj huasipish, cambaj mandanapish huiñai huiñaitami cambaj ñaupajpi canga. Cambaj jatun tiyarinapish huiñai huiñaipajmi canga” ninmi’ ni” nircami.
17 Natanca muscuipi shina Dios imallata ricuchishcatami Davidmanca tucuita huillarca.
18 Chashna nijpimi rey Davidca Jehová Diospaj ñaupajpi tiyarishpa cashna nishpa mañarca: “Tucuita Mandaj Amito Jehová Dioslla, ¿ñucaca pitaj caniyari? ¿Ñuca familia* ima cajpitaj cai tucuitaca ñucamanta rurarcanguiyari?
19 Tucuita Mandaj Amito Jehová Dioslla, cai tucuica cambajca ashalla shinamari ricurishca. Canta sirvijpaj huahua huahuacunapish shamuj punllacunacamami unita tiyanga ninguimari. Tucuita Mandaj Amito Jehová Dioslla, caitami shuj leyta shina tucui gentecunaman cushcangui.
20 Tucuita Mandaj Amito Jehová Dioslla, ñucataca allimari rijsingui. ¿Ñuca, canta sirvij Davidca caimantaca imatataj ashtahuan nishari?
21 Can nishca shina, cambaj shungupi munashca shinami cai tucui jatun cosascunata rurashcangui. Cashnami canta sirvijmanca cai jatun cosascunata ricuchishcangui.
22 Chaimantami canca yallitaj jatun cangui. Tucuita Mandaj Amito Jehová Dioslla, can shinaca pi mana tiyanchu. Can shina Diosca pi shujtajca mana tiyanchu. Chaitaca ñucanchij rinrincunahuanmi siempre uyashcanchij.
23 ¿Maijan shujtaj llajtataj cambaj pueblo Israel* shina canyari? Ñuca Dioslla, cambaj pueblo cachunmi paicunata quishpichinaman rircangui. Paicunamanta jatun cosascunata rurashpa, mancharina ruraicunata rurashpami cambaj shutitaca tucuicunaman rijsichishcangui. Cambaj pueblomantami shujtaj llajtacunata, paicunapaj dioscunatapish llujshichishpa cacharcangui. Cambaj pueblotaca cambaj cachunmi Egipto llajtamanta quishpichircangui.
24 Israelitacunataca cambajlla pueblo cachunmi huiñaipaj agllarcangui. Jehová Dioslla, canca paicunapaj Diosmari tucushcangui.
25 Cunanca Jehová Dioslla, canta sirvijhuanpish, paipaj huahua huahuacunahuanpish ari nishcataca huiñaipaj pajtachingui. Imata cusha nishcatapish pajtachingui.
26 Cambaj shutica huiñai huiñaipaj jatunyachishca cachun. Chashnami gentecunaca: ‘Jahua pacha soldadocunata mandaj Jehová Diosca israelitacunapaj Diosmi can’ ningacuna. Canta sirvij Davidpaj familiapish huiñai huiñaita cambaj ñaupajpi churashca cachun.
27 Jahua pacha soldadocunata mandaj Jehová Dios, canca israelitacunapaj Diosmi cangui. Canta sirvijmanmi: ‘Cambajmi shuj huasita rurasha’ nishpa huillashcangui. Chaimantami canta sirvijca cambaj ñaupajpi mana manchashpa mañai tucun.
28 Tucuita Mandaj Amito Jehová Dioslla, canca Dios verdaderomi cangui. Can nishca shimicunapish verdadmi can. Cai sumaj cosascunatami canta sirvijmanca cusha nishcangui.
29 Chaimanta canta sirvijpaj familiata bendiciapai. Cai familiapish cambaj ñaupajpica huiñai huiñaipaj cachun. Tucuita Mandaj Amito Jehová Dioslla, chaita ruranataca canmi ari nishcangui. Canta sirvijpaj familiaca canmanta huiñaipaj bendiciashca cachun” nircami.
Notacuna
^ O “palaciopi”.
^ Hebreo rimaipica: “Israelpaj churicunahuan” ninmi.
^ O “mana tucurij cꞌuyaitami ricuchisha”.
^ Hebreo rimaipica: “huasi” ninmi.
^ “Israel” shimita huasha diccionariopi ricui.
