Josué 10:1-43
10 Jerusalén llajtamanta rey Adoni-Zedecca Hai llajtata Josué mishashpa japishcata, tucuchishcatapishmi uyarca. Jericó llajtahuan, chai llajtapaj reyhuan rurashca shinallataj Hai llajtahuanpish, chai llajtapaj reyhuanpish Josué imata rurashcatami uyarca. Gabaón llajtapi causajcunapish israelitacunahuan sumajta cuasangapaj parlanacushpa shuj ari ninacuita rurashcata, israelitacunapurapi causacushcatapishmi rey Adoni-Zedecca yachaj chayarca.
2 Gabaón llajta shuj jatun llajta cashcamanta, chai llajtapish shujtaj jatun llajtacuna shinallataj shuj mandajta charishcamantami rey Adoni-Zedecca achcata preocuparirca. Gabaón llajtaca Hai llajtatapish ashtahuan yalli jatunmi carca. Chaipi caj cꞌaricunapish tucuicunami macanacujcuna carca.
3 Chaimi Jerusalén llajtamanta rey Adoni-Zedecca Hebrón llajtamanta rey Hohamman, Jarmut llajtamanta rey Piramman, Lakís llajtamanta rey Jafiaman, Eglón llajtamanta rey Debirmanca cashna huillachun mandarca:
4 “Gabaón llajtapi causajcunaca Josuehuan, israelitacunahuanmi sumajta causangapaj ari ninacushcacuna. Chaimanta ñucata ayudangapaj shamuichij. Gabaón llajtata llaquichishunchij” nircami.
5 Chaimi amorreocunapaj pichca* reycunaca paicunapaj soldadocunahuan tandanacurcacuna. Paicunaca Jerusalén llajtamanta, Hebrón llajtamanta, Jarmut llajtamanta, Lakís llajtamanta, Eglón llajtamantami carcacuna. Tucui paicuna llujshishpaca Gabaonpaj contra macanacungapajmi carpa huasicunapi saquirircacuna.
6 Josué Guilgalpi caj carpa huasicunapi cajpimi Gabaón llajtamanta cꞌaricunaca paimanca cai huillaita cacharca: “Cambaj esclavocunataca ama saquichu.* ¡Utca shamui! ¡Ñucanchijta quishpichihuai, ayudahuai! Urcucunamanta amorreocunapaj tucui reycunamari ñucanchijpaj contra tandanacushcacuna” nircacuna.
7 Chaimi Josueca Guilgal llajtamanta tucui soldadocunahuan, sinchi macanacuj cꞌaricunahuan huichiyarca.
8 Jehová Diosca Josuemanca: “Paicunataca cambaj maquipimi cushcani. Chaimanta paicunataca ama manchaichu. Paicunamantaca ni pi canta mana mishai tucungachu” nircami.
9 Josueca Guilgalmanta llujshishpa Gabaonman chayangapajca tucui tutami purirca. Chaiman chayashpaca Josueca paipaj contracunataca mana yuyashcapimi llaquichirca.
10 Jehová Diosca israelitacunapaj ñaupajpi amorreocuna manchaita charichunmi saquirca. Chaimantami israelitacunaca Gabaón llajtapi achca amorreocunata huañuchircacuna. Israelitacunaca paicunataca Bet-Horón huichiman rina ñantami catishpa rircacuna. Paicunaca Azecá, Maquedá llajtacama catirashpa rishpami huañuchircacuna.
11 Amorreocuna israelitacunamanta Bet-Horón urita miticushpa ricujpimi Jehová Diosca jahua pachamanta jatun rumicuna shina runduta urmachirca. Azecá llajtacama chashna rurajpimi paicunaca huañurcacuna. Chai runduca israelitacuna espadacunahuan huañuchishcatapish yallimi gentecunata huañuchirca.
12 Jehová Dios amorreocunata israelitacunapaj ñaupajpi mishashca punllami Josueca israelitacunapaj ñaupajpi Jehová Diosta mañashpaca:
“¡Intita Gabaón jahuapi casijllata shayachipai,lunata Ayalón pugru pambapi casijllata shayachipai!” nirca.
13 Tucui israelitacuna paicunapaj contracunata mishangacamami intica casijlla saquirirca, lunapish mana cuyurircachu. ¿Chaica manachu Jasar shuti libropi quillcashca can? Jahua pacha chaupipi inti shayarishpaca mana maiman cuyurircachu. Casi shuj punlla enterotami intica mana huashicurca.
14 Chai punllapimi Jehová Diosca shuj cꞌari mañashcata uyarca. Chai punlla shinaca ñaupa tiempopish, qꞌuipapish mana nunca tiyashcachu. Jehová Diosca israelitacunamantami macanacucushca carca.
15 Chai qꞌuipaca Josueca tucui israelitacunahuanmi Guilgalpi caj carpa huasicunaman tigrarcacuna.
16 Chaicamaca pichca reycunaca pacalla rishpami Maquedá llajtapi caj jutcupi miticurcacuna.
17 Chaimi Josuemanca: “Pichca reycunatami Maquedá llajtapi caj jutcupi miticushcata japircacuna” nishpa huillarcacuna.
18 Josueca cashnami nirca: “Jutcu yaicunman jatun rumicunata singuchichij. Cꞌaricunatapish chaipi cuidachun churaichij.
19 Pero cancunamanta caishujcunaca ama chaipi saquirichijchu. Cancunapaj contracunata catishpa, miticushpa ricujta japishpa huañuchichij. Paicunapaj llajtacunaman yaicuchunca ama saquichijchu. Cancunapaj Jehová Diosca paicunataca cancunapaj maquipimi churashca” nircami.
20 Josuepish, israelitacunapish paicunapaj contracunataca achcacunatami huañuchircacuna. Paicunataca casi tucuicunatami huañuchircacuna. Huaquincunaca miticushpa rishcamantami quishpirircacuna. Chashnami paicunaca muyundijta pircashca llajtacunaman yaicurcacuna.
21 Chai qꞌuipaca tucui israelitacunami Maquedapi saquirij carpa huasicunaman, Josuepajmanca alli, sano tigrarcacuna. Shuj cꞌarillapish israelitacunapaj contraca imatapish mana ni tucurcachu.
22 Chaimi Josueca: “Jutcuta pascashpa pichca reycunata surcushpa ñucapajman apamuichij” nirca.
23 Chashna nijpimi pichca reycunataca jutcumanta llujshichircacuna. Jerusalén llajtamanta, Hebrón llajtamanta, Jarmut llajtamanta, Lakís llajtamanta, Eglón llajtamanta reycunatami llujshichircacuna. Paicunataca Josuepajmanmi pusharcacuna.
24 Chai reycunata pushamujpica Josueca tucui Israelmanta cꞌaricunatami tandachirca. Shinallataj macanacunaman paihuan rij soldadocunata pushajcunataca: “Caiman shamuichij. Cai reycunapaj cunga huasha ladopi cancunapaj chaquicunahuan saruichij” nircami. Chaimi paicuna cꞌuchuyashpaca paicunapaj chaquicunataca chai reycunapaj cunga huasha ladopi churarcacuna.
25 Josueca: “Ama manchaichijchu, ama chujchuichijchu. Sinchi caichij, ama manchaichijchu. Jehová Diosca cancunapaj contra tucui macanacujcunataca chashnami ruranga” nircami.
26 Josueca chai pichca reycunatami chugrichishpa huañuchirca. Qꞌuipaca cada unotami shuj caspipi* huarcurca. Paicunaca chishiyangacamami chashna huarcushca carcacuna.
27 Inti huashicujpica Josueca caspipi huarcushca pichca reycunata uriyachishpami paicuna miticushca jutcullapitaj shitachun mandarca. Qꞌuipamanca chai jutcu yaicunpica jatun rumicunatami churarcacuna. Chashnami cunan punllacunacama can.
28 Chai punllapica Josueca Maquedá llajtatami mishashpa japirca. Shinallataj chai llajtapi causaj gentecunatapish* espadahuanmi huañuchishpa tucuchirca. Chai llajtapaj reytapish, chai llajtapi causaj tucui gentecunatapishmi huañuchirca. Shujllapish mana saquirircachu. Jericó llajtamanta reyta ima shinami huañuchirca, chashnallatajmi Maquedá llajtamanta reytapish huañuchirca.
29 Chaimantaca Josueca Maquedá llajtamantami tucui israelitacunahuan Libná llajtaman rirca. Chaipimi paica Libnapaj contra macanacurca.
30 Jehová Diosca chai llajtatapish, chai llajtapaj reytapish israelitacunapaj maquipimi curca. Chaimi paicunaca chai llajtata tucuchircacuna. Shinallataj chai llajtapi causaj tucui gentecunatapish espadahuanmi huañuchircacuna. Shujllapish causashpa catichunca mana saquircacunachu. Jericó llajtamanta reyta huañuchishca shinallatajmi Libná llajtamanta reytapish huañuchircacuna.
31 Chai huashallami Josueca tucui israelitacunahuan Libná llajtamantaca Lakís llajtaman rirca. Chaiman chayashpaca paica carpa huasicunapi saquirishpami Lakís llajtahuan macanacurca.
32 Jehová Diosca Lakís llajtataca israelitacunapaj maquipimi curca. Chaimantami israelitacunaca ishqui punlla qꞌuipa Lakís llajtata mishashpa japircacuna. Ima shinami Libná llajtata tucuchircacuna, chashnallatajmi chai llajtatapish tucuchircacuna. Chaipi causaj tucui gentecunatapish espadahuanmi huañuchircacuna.
33 Chaita uyashpami Guézer llajtamanta rey Horamca Lakís llajtata ayudangapaj huichiyarca. Pero Josueca rey Horamta, paipaj gentecunatapish tucuita huañuchishpami shujllatapish mana saquirca.
34 Chaimantaca Josueca tucui israelitacunahuanmi Lakís llajtamantaca Eglón llajtaman rirca. Chaiman chayashpaca carpa huasicunapi saquirishpami qꞌuipaca paicunahuan macanacurca.
35 Chai punllallatajmi Eglón llajtataca mishashpa japircacuna. Shinallataj chai llajtapi causaj gentecunatapish espadahuanmi huañuchircacuna. Chai punllaca chai llajtapi causaj tucui gentecunatapish ima shinami Lakís llajtapi huañuchircacuna, chashnallataj paicunatapish huañuchircacuna.
36 Chai qꞌuipaca Josueca tucui israelitacunahuanmi Eglón llajtamanta, Hebrón llajtaman huichiyarca. Chaipimi chai llajtahuan macanacurca.
37 Chashnami cai llajtataca mishashpa japircacuna. Chai llajtapaj reytapish, chai muyundij llajtapi caj tucui pueblocunatapish, Hebronpi causaj tucui gentecunatapish, shujllapish ama causashpa catichunmi espadahuan tucui huañuchircacuna. Eglón llajtata ima shinami tucuchirca, chashnallatajmi chai llajtata, chaipi causaj gentecunatapish tucui tucuchirca.
38 Chai qꞌuipaca Josueca tigrashcahuanmi tucui israelitacunahuan Debir llajtaman rirca. Chaipimi chai llajtahuan macanacurca.
39 Chashnami chai llajtataca mishashpa japirca. Shinallataj chai llajtapaj reytapish, chai llajtapaj muyundijpi caj tucui pueblocunatapish, chai llajtapi causaj tucui gentecunatapish shujllapish ama causashpa catichunmi tucuita espadahuan huañuchircacuna. Debir llajtahuanpish, chai llajtata mandajhuanpish Hebrón llajtahuan, Libná llajtahuan, chai llajtapaj reyhuanpish tucuchishca shinallatajmi tucuchirca.
40 Josueca urcucunapi saquirij allpacunata, Neguebpi saquirij allpacunata, Sefelapi saquirij allpacunata, quinricunapi saquirij allpacunata mishashpami japirca. Shinallataj tucui chai llajtacunapaj reycunatapishmi tucuchirca. Chashnami shujllapish causashpa catichunca mana saquirca. Israelitacunapaj Jehová Dios mandashca shinami tucui gentecunata huañuchirca.
41 Josueca Cadés-Barneamanta Gaza allpacamami mishashpa japirca. Shinallataj Gosenpi saquirij tucui allpacunatapish, Gabaón llajtacamami mishashpa japirca.
42 Josueca tucui cai reycunatami mishashpa tucuchirca. Shinallataj paicunapaj allpacunatapish mishashpami japirca. Israelitacunapaj Jehová Dios paicunamanta macanacucushcamantami Josueca shuj cutin mishashpa allpacunata japirca.
43 Chai qꞌuipami Josueca tucui israelitacunahuan Guilgalpi saquirij carpa huasicunaman tigrarca.
Notacuna
^ O “cinco”.
^ Hebreo rimaipica: “cambaj maquita ama urmachichu” ninmi.
^ O “yurapi”.
^ O “tucui almacunatapish”.
