Josué 13:1-33
-
Allpacunata mishashpa japinaraj tiyashcamanta (1-7)
-
Jordán jatun yacumanta inti llujshin ladopi caj allpata chaupishcamanta (8-14)
-
Rubenman herenciata cushcamanta (15-23)
-
Gadman herenciata cushcamanta (24-28)
-
Inti llujshin ladopi Manasesman herenciata cushcamanta (29-32)
-
Jehová Dios levitacunapaj herencia cashcamanta (33)
13 Josueca ña yuyajyashcamantami causangapajca ashalla causaita charirca. Chaimantami Jehová Diosca cashna nirca: “Canca ñami yuyajyashcangui. Can causashpa catingapajca ashalla causaitami charingui. Pero achca allpata mishashpa japinaca tiyanrajmi.
2 Cai allpacunarajmi japinaca tiyan: filisteocunapaj tucui llajtacunatapish, guesuritacunapaj tucui llajtacunatapish,
3 (cai llajtacunaca Egipto inti llujshin ladoman caj Nilo jatun yacu rigramantaca* janaj lado Ecrón linderocamami carca. Cai allpacunataca cananeocunapaj allpacuna nijcunami carca), pichca mandajcunapaj llajtacunatapishmi japinaraj tiyan. Chaicunaca Gaza, Asdod, Asquelón, Gat, Ecronmi can. Shinallataj avimcuna causan ura ladocunata,
4 cananeocunapaj tucui allpatapish, sidoniocunapaj Meará allpatapish, Afec llajtacamami japinaraj tiyan. Afec llajtaca amorreocunapaj lindepimi carca.
5 Guebalitacunapaj allpacunatapish, inti llujshin ladoman caj tucui Líbano urcucunapi tiyaj allpacunatapish, Hermón urcu chaquipi caj Baal-Gadmantaca Lebó-Hamatcamapishmi* japinaraj tiyan.
6 Shinallataj Líbano urcucunamantaca Misrefot-Maim allpacama, sidoniocuna causan allpacamapishmi japinaraj tiyan. Ñucami israelitacunapaj ñaupajmanta paicunataca llujshichishpa cachasha. Canca ñuca mandashca shinami chai allpacunataca israelitacunaman herenciata shina chaupishpa cuna cangui.
7 Chai allpacunataca iscun* familiacunamanpish, Manasespaj chaupi familiamanpishmi herenciata shina chaupishpa cuna cangui” nircami.
8 Moisesca Jordán jatun yacu inti llujshin ladopimi Manasespaj caishuj chaupi familiamanpish, rubenitacunamanpish, gaditacunamanpish herencia allpata curca. Paicunaca chai allpacunataca Jehová Diosta sirvij Moisés cushca shinami japircacuna.
9 Chai allpacunaca Aroer llajtamantami callarirca. Aroer llajtaca Arnón pugru pamba uripimi carca. Chai allpacunaca Arnón pugru pamba chaupipi tiyaj llajtapishmi carca. Medebá tucui loma pambamanta Dibón llajtacamapishmi carca.
10 Shinallataj amorreocunata mandaj rey Sehonpaj llajtacunatapishmi japircacuna. Rey Sehonca Hesbonmanta ammonitacunapaj lindecamami mandaj carca.
11 Galaad allpacunatapish, guesuritacunapaj allpacunatapish, maacatitacunapaj allpacunatapish, tucui Hermón urcutapishmi japircacuna. Shinallataj tucui Basán llajtamanta Salecá llajtacamapishmi japircacuna.
12 Basán llajtamanta rey Ogca Astarot llajtapi, Edréi llajtapimi mandaj carca. Tucui pai mandashca llajtacunatami japircacuna. (Rey Ogca refaimcunapaj familiapuramanta saquirij shujmi carca). Moisesca paicunata mishashpami chai allpacunamanta llujshichishpa cacharca.
13 Pero israelitacunaca guesuritacunata, maacatitacunataca mana llujshichishpa cacharcacunachu. Chaimantami Guesurmanta, Maacatmanta gentecunapish israelitacunapaj chaupipi cunancama causancuna.
14 Moisesca levitacunapaj familiallamanmi ima herenciata mana curca. Levitacunapaj herenciaca israelitacunapaj Jehová Diosman cushca ninahuan rupachishca ofrendacunami can. Chaitaca Diosmi levitacunaman cusha nishca carca.
15 Qꞌuipaca Moisesca rubenitacunapaj familiamanmi shuj herenciata curca. Paicunaca cada familia japina cashca herenciatami chasquircacuna.
16 Paicunapaj allpacunaca Arnón pugru pamba uripi caj Aroer llajtamanta callarishpaca, Arnón pugru pamba chaupipi tiyaj llajtapish, Medebá cꞌuchupi tiyaj tucui loma pambapishmi carca.
17 Shinallataj Hesbón llajtapish, loma pambapi tiyaj tucui pueblocunapish, Dibón llajtapish, Bamot-Baal llajtapish, Bet-Baal-Meón llajtapish,
18 Jáhaz llajtapish, Quedemot llajtapish, Mefaat llajtapish,
19 Quiryataim llajtapish, Sibmá llajtapish, Zéret-Sáhar lugarpishmi carca. Zéret-Sáhar lugarca pugru pamba cꞌuchupi caj urcu jahuapimi carca.
20 Shinallataj Bet-Peor llajtapish, Pisgá quinricunapish, Bet-Jesimot lugarpish,
21 loma pambapi tiyaj tucui llajtacunapish, amorreocunamanta rey Sehón mandashca tucui llajtacunapishmi carca. Rey Sehonca Hesbonpimi mandaj carca. Moisesca rey Sehontapish, madianitacunamanta Eví, Réquem, Zur, Hur, Reba pushajcunatapishmi misharca. Chai mandajcunaca rey Sehonta sirvishpami chai llajtallapitaj causajcuna carca.
22 Israelitacuna espadahuan huañuchishcacunapurapica Beorpaj churi adivinaj Balaammi carca.
23 Rubenitacunapaj allpa lindeca Jordán jatun yacucamami carca. Paicunapaj allpacunaca chai cꞌuchullapi tiyaj llajtacunahuan, chai uchilla pueblocunahuanpishmi carca. Chai allpacunatami rubenitacunapaj cada familiamanca herenciata cushca carca.
24 Shinallataj Moisesca Gadpaj familiamanpishmi herenciata curca. Paicunaca cada familia japina cashca herenciatami chasquircacuna.
25 Paicunapaj allpacunaca Jazer llajtapish, Galaadpi tiyaj tucui llajtacunapish, ammonitacunapaj chaupi allpapishmi Aroer llajtacama carca. Aroer llajtaca Rabá llajta chꞌimbapimi carca.
26 Shinallataj Hesbón llajtamantaca Ramat-Mizpé llajtacama, Betonim llajtacamami carca. Mahanaim llajtamantapish Debir lindecamami carca.
27 Pugru pambapi caj Bet-Haram llajtapish, Bet-Nimrá llajtapish, Sucot llajtapish, Zafón llajtapishmi carca. Hesbón llajtata mandaj rey Sehón mandashca huaquin llajtacunapishmi carca. Paicunapaj allpacunapaj lindeca Jordán yacu inti llujshin ladocamami carca. Chai lindeca Jordán yacu urita rishpa Kinéret mama cucha* ura ladocamami carca.
28 Cai allpacunatami llajtacunahuan, chai uchilla pueblocunahuan gaditacunapaj cada familiamanca herenciata curca.
29 Shinallataj Moisesca Manasespaj chaupi familiamanmi shuj herenciata curca. Chai allpacunami paicunapajpish, paicunapaj familiacunapajpish tucurca.
30 Paicunapaj allpaca Mahanaim llajtapish, tucui Basán llajtapish, Basán llajtamanta rey Og mandashca tucui llajtacunapish, Basanpi saquirij Jairpi tiyaj tucui carpa huasicunapish, 60 pueblocunapishmi carca.
31 Cutin Galaadpaj chaupi llajtapish, Astarot llajtapish, Edréi llajtapish, Basanmanta mandaj rey Og mandashca tucui llajtacunapish, Manasespaj churi Makirpaj huahua huahuacunapajmi carca. Chai allpacunaca Makirpaj chaupi huahua huahuacunapaj cada familiapajmi carca.
32 Cai allpacunatami Moisesca Moab chaquishca pambapi paicunaman herenciata curca. Moab chaquishca pambaca Jericó chꞌimba ladopi, Jordán jatun yacu inti llujshin ladopimi carca.
33 Pero levitacunapaj familiacunamanca Moisesca ima herenciata mana curcachu. Israelitacunapaj Jehová Diosmi levitacunapaj herencia can. Chaitaca Diosmi levitacunaman cusha nishca carca.
Notacuna
^ O “Sihormantaca”.
^ O “Hamat yaicuncamapishmi”.
^ O “nueve”.
^ Caipica Genesaret cuchamanta o Galilea mama cuchamantami parlacun.
