Josué 14:1-15
14 Israelitacunaca Canaán allpapimi herencia allpata japircacuna. Sacerdote Eleazarpish, Nunpaj churi Josuepish, familiacunata* pushajcunapishmi paicunaman herenciata curcacuna.
2 Paicunami Moisesman Jehová Dios mandashca shina iscun familiacunamanpish, Manasespaj chaupi familiamanpish allpata sorteashpa herenciata curcacuna.
3 Moisesca caishuj ishqui familiamanpish, Manasespaj caishuj chaupi familiamanpish Jordán jatun yacu caishuj ladopimi* herenciata cushca carca. Cutin levitacunamanca chai allpapica ima herenciata mana curcachu.
4 Josepaj huahua huahuacunataca ishqui familiacunata shinami yuparca. Paicunaca: Manasés, Efrainmi carcacuna. Cutin levitacunamanca ima allpataca mana curcacunachu. Paicunamanca causangapaj llajtacunata, paicunapaj huagracunata, animalcunapaj michina allpacunallatami curcacuna.
5 Chashnami israelitacunaca Jehová Dios Moisesman mandashca shina chai allpacunataca chaupircacuna.
6 Judá llajtamanta runacunaca Josué Guilgalpi cajpimi paipajman cꞌuchuyarcacuna. Paicunapurapica quenizitacunapuramanta Jefunepaj churi Calebmi chaipi carca. Calebca: “Canmantapish, ñucamantapish Jehová Dios paita sirvij Moisesman Cadés-Barnea lugarpi ima nishcataca allimi yachangui.
7 Ñucaca 40 huatacunata charishpami Jehová Diosta sirvij Moisés Cadés-Barneamanta allpacunata pacalla ricunaman cachajpi rircani. Chaimanta tigramushpaca imata ricushcatami mana pacashpa tucuita huillarcani.
8 Ñucahuan rij huauquicuna gentecunata manchachijpipish* ñucaca, ñuca Jehová Diostaca tucui shunguhuanmi cazurcani.
9 Chai punllami Moisesca: ‘Canca ñucanchij Jehová Diostami tucui shunguhuan cazushcangui. Chaimantami cambaj chaquicuna purishca allpaca cambajpish, cambaj huahuacunapajpish achca tiempopaj herencia canga’ nishpa jurarca.
10 Israelitacuna chaquishca pambapi puricujpimi Jehová Diosca Moisesmanca chai shimicunata pajtachisha nirca. Chaita nishcamantaca Jehová Dios huillashca shinatajmi ñucaca 45 huatacunata causacushcani. Cunanca ñucaca 85 huatacunatami charini.
11 Moisés ricunaman cachashca punllacunapi shinallatajmi cunanpish fuerzata charishpa catini. Chaimantami macanacungapajpish, shujtaj cosascunata rurangapajpish chai punllacunapi shinallataj fuerzayuj cani.
12 Chaimanta chai punllacunapi Jehová Dios ñucaman cusha nishca urcucunata cuhuai. Chai punllacunapica Anacpaj huahua huahuacuna chai urcucunapi muyundijta pircashca jatun llajtacunapi causacushcatami canca uyarcangui. Pero Jehová Diosca ñucahuanmi canga. Jehová Dios nishca shinami paicunataca chaimanta llujshichishpa cachasha” nircami.
13 Chaimi Josueca Calebta Dios bendiciachun mañarca. Josueca Calebmanca Hebrón llajtatami herenciata shina curca.
14 Israelitacunapaj Jehová Diosta Caleb tucui shunguhuan cazushcamantami Hebrón llajtaca quenizitacunapuramanta Jefunepaj churi Calebpaj can. Chai allpaca cunan punllacunacamami paipaj herencia can.
15 Ñaupaca Hebrón llajtaca Quiryat-Arbá shutimi carca (Anacpaj huahua huahuacunapuramantaca Arbá runami ashtahuan rijsishca carca). Israelitacunapaj llajtapica macanacui ña mana tiyashcamantami tranquilo causai tiyarca.
Notacuna
^ Caipica yayacunapaj familiacunamantami parlacun.
^ Caipica inti llujshin ladomantami parlacun.
^ Hebreo rimaipica: “gentecunapaj shungucunata yacuyachijpipish” ninmi.
