Josué 17:1-18
17 Allpacunata sorteajpica Manasespaj familiapajmi urmarca. Manasesca Josepaj punta churimi carca. Makirca macanacuiman rij runa cashcamantami Galaad llajtata, Basán llajtata japirca. Makirca Manasespaj punta churimi carca. Shinallataj Galaadpaj yayami carca.
2 Manasespaj caishuj huahua huahuacunamanta cada familia allpata japijcunaca caicunami carca. Abí-Ezerpaj churicuna, Helecpaj churicuna, Asrielpaj churicuna, Siquempaj churicuna, Heferpaj churicuna, Semidapaj churicunami carca. Cai cꞌaricunami Josepaj churi Manasespaj huahua huahuacunami carca. Paicunami cada familiamanta carca.
3 Shinapish Zelofehad runaca churicunata mana charircachu, ushushicunallatami charirca. Zelofehad runaca Heferpaj churimi carca. Heferca Galaadpaj churimi carca. Galaadca Makirpaj churimi carca. Makirca Manasespaj churimi carca. Zelofehadpaj ushushicunaca Mahlá, Noá, Hoglá, Milcá, Tirzami carca.
4 Chai ushushicunaca sacerdote Eleazarpaj, Nunpaj churi Josuepaj, pushajcunapaj ñaupajman rishpaca: “Jehová Diosmi ñucanchij familiacunapaj chaupipi ñucanchijman shuj herenciata cuchun Moisesmanca mandarca” nircacunami. Jehová Dios mandashcamantami paicunapaj yayapaj huauquicunapaj chaupipi paicunaman shuj herenciata curcacuna.
5 Manasesca Galaad llajtata, Basán llajtata japishca jahuapishmi shujtaj chunga allpacunahuan japirca. Chai allpacunaca Jordán jatun yacu caishuj ladomanmi* carca.
6 Manasespaj familiamanta ushushicunapish paipaj churicuna shinallatajmi herenciata japircacuna. Galaad allpataca Manasespaj caishuj huahua huahuacunami japirca.
7 Manasespaj lindecunaca Asermanta Micmetat lugarcamami carca. Chaica Siquem llajta ladomanmi carca. Shinallataj chai lindeca ura ladotami catirca. Chai ura ladomanca En-Tapúah llajtapi causajcunapaj allpacunami carca.
8 Tapuahmanta allpacunaca Manasespajmi tucurca. Pero Manasespaj lindepi caj Tapúah llajtaca Efrainpaj huahua huahuacunapajmi carca.
9 Chai lindeca Canapaj pugru pamba ura ladocamami carca. Manasespaj familiamanta llajtacunapica Efrainpaj familiamanta llajtacunami tiyarca. Shinallataj Manasespaj lindeca pugru pamba janaj ladomantaca mama cuchapimi tucurirca.
10 Ura ladoman saquirij allpacunaca Efrainpajmi carca. Cutin janaj ladoman saquirij allpacunaca Manasespajmi carca. Manasespaj lindeca mama cuchami carca. Janaj ladopi saquirij Manasespaj allpacunaca Aserpaj allpacamami carca. Cutin inti llujshin ladoman caj allpaca Isacarcamami carca.
11 Isacarpaj, Aserpaj llajtacunapica Manasesmi allpacunata japirca. Pai japishca llajtacunapish, chai llajtacunapi causajcunapish, chai cꞌuchulla pueblocunapish caicunami carca: Bet-Seán llajta, Ibleam llajta, Dor llajta, En-Dor llajta, Taanac llajta, Meguidó llajtacunami carca. Quimsa alto llajtacunaca Manasespajmi carca.
12 Shinapish cananeocunaca chai allpacunamantaca manataj llujshisha nircacunachu. Chaimantami Manasespaj huahua huahuacunaca chai llajtacunataca mana japi tucurcacuna.
13 Israelitacuna ashtahuan poderta charishpaca cananeocunataca sinchi trabajocunata rurachunmi obligarcacuna. Pero paicunataca chai llajtamanta mana tucui cananeocunata llujshichishpa cacharcacunachu.
14 Josepaj huahua huahuacunaca Josuemanca: “¿Allpata sorteacushpaca imamantataj ñucanchijmanca ashalla allpata herenciata shina curcangui? Ñucanchijca Jehová Dios bendiciashcamantami cunancama achcacuna canchij” nircacunami.
15 Chaimi Josueca: “Cancuna achcacuna cashcamanta Efraín urcucunapi causangapaj yallitaj uchilla cajpica perizitacunapaj allpaman, refaimcunapaj allpaman huichiyaichij. Chaipi tiyaj bosqueman huichiyashpa yuracunata anchuchichij. Cancunapaj causana lugartapish ruraichij” nishpa cutichirca.
16 Chaimi Josepaj huahua huahuacunaca: “Efraín urcucunapi causanaca ñucanchijpajca mana pajtanchu. Shinallataj pugru pamba llajtapi tucui causaj cananeocunaca macanacuna carretacunata, chai carretacunapaj ruedacunapipish fierro cuchillocunatami* charincuna. Jezreel pugru pambapi causajcunapish, Bet-Seán llajtapi, chai cꞌuchulla pueblocunapi causajcunapishmi chashna laya carretacunata charincuna” nircacuna.
17 Chaimantami Josueca Josepaj huahua huahuacunamanpish, Efrainpaj familiamanpish, Manasespaj familiamanpish cashna nirca: “Cancunaca achcacuna cashcamantaca achca podertami charinguichij. Cancunaca mana ashalla allpata japinguichijchu.
18 Shinapish tucui cai urcucunaca cancunapajmi canga. Cai urcucuna bosque cajpipish yuracunata anchuchinguichij. Cai urcucunami cancunapaj lindecuna canga. Cananeocuna sinchi cajpipish, macanacuna carretacunata, chai carretacunapaj ruedacunapi fierro cuchillocunata charijpipish cancunaca paicunata llujshichishpami cachanguichij” nircami.
Notacuna
^ Caipica inti llujshin ladomantami parlacun.
^ Hebreo rimaipica: “fierromanta rurashca carretacunatami” ninmi.
