Josué 19:1-51
19 Sorteajpica puntapaj qꞌuipaca Simeonpaj familiamanta cada familiapajmi urmarca. Paicunapaj herenciaca Judapaj familia japishca herencia chaupipimi carca.
2 Paicunapaj herenciaca Beer-Seba, Seba, Moladá,
3 Hazar-Sual, Balá, Ézem,
4 Eltolad, Betul, Hormá,
5 Ziclag, Bet-Marcabot, Hazar-Susá,
6 Bet-Lebaot, Saruhén llajtacunami carca. Tucuica 13 llajtacuna, chai uchilla pueblocunandijmi carca.
7 Shinallataj Ain, Rimón, Éter, Asanmi carca. Tucuica chuscu llajtacuna, chai uchilla pueblocunandijmi carca.
8 Chai llajtacunapaj muyundijpi caj tucui uchilla pueblocunandij, ura ladoman caj Baalat-Beer llajtacamami carca. Baalat-Beer llajtataca Ramá nishpapishmi rijsincuna. Cai llajtacunami Simeonpaj familiamanta cada familiapaj herencia carca.
9 Judaman cushca allpaca paicunapajca yallitaj jatunmi carca. Chaimantami Simeonpaj huahua huahuacunamanca chai allpamanta shuj parteta paicunaman herenciata curca. Chashnami Simeonpaj huahua huahuacunaca Judaman cushca allpapi herenciata japircacuna.
10 Cutin sorteajpica ishquipaj qꞌuipaca Zabulonpaj huahua huahuacunamanta cada familiapajmi urmarca. Paicunaman cushca herencia allpa linderoca Sarid llajtacamami carca.
11 Paicunapaj linderoca inti huashicun ladoman caj Mareal llajtata huichiyashpami Dabéset llajtaman chayarca. Chaimantaca Jocneam chꞌimba ladopi caj pugru pambacamami chayarca.
12 Chai linderoca Sarid llajtamanta callarishpaca inti llujshin ladota rishpa Kislot-Tabor llajta linderocamami chayarca. Daberat llajtata rishpaca Jafía llajtacamami huichiyarca.
13 Chaimanta inti llujshin ladota catishpaca Gat-Héfer llajtata pasashpa, Et-Cazín llajtata pasashpami Rimón llajtacama chayarca. Shinallataj chai linderoca Neá llajtacamami carca.
14 Chai linderoca janaj ladota muyushpaca Hanatón llajtaman chayashpami Iftá-El pugru pambapi tucurirca.
15 Shinallataj chai linderoca Catat, Nahalal, Simrón, Idalá, Belén llajtacunacamami carca. Tucuica 12 llajtacuna, chai uchilla pueblocunandijmi carca.
16 Cai llajtacunapish, chai uchilla pueblocunapishmi Zabulonpaj huahua huahuacunamanta cada familiapaj herencia carca.
17 Sorteajpica quimsapaj qꞌuipaca Isacarpaj huahua huahuacunamanta cada familiapajmi urmarca.
18 Paicunapaj linderoca Jezreel, Kesulot, Sunem,
19 Hafaraim, Shion, Anaharat,
20 Rabit, Quisión, Ébez,
21 Rémet, En-Ganim, En-Hadá, Bet-Pazez llajtacunacamami chayarca.
22 Chai linderoca Tabor, Sahazuma, Bet-Semes llajtacamami chayarca. Chai huashaca Jordán jatun yacucamami carca. Tucuica 16 llajtacuna, chai uchilla pueblocunandijmi carca.
23 Cai llajtacuna, chai uchilla pueblocunandijmi Isacarpaj familiamanta cada familiapaj herencia carca.
24 Sorteajpica chuscupaj qꞌuipaca Aserpaj familiamanta cada familiapajmi urmarca.
25 Paicunapaj linderoca Helcat, Halí, Beten, Acsaf,
26 Alamélec, Amad, Misal llajtacunami carca. Cutin inti huashicun ladoman caj linderoca Carmelo llajtacama, Sihor-Libnat jatun yacucamami chayarca.
27 Qꞌuipaca inti llujshin ladota rishpaca Bet-Dagón llajtamanmi chayarca. Chaimantaca Zabulonpaj allpa cꞌuchucamami chayarca. Shinallataj Iftá-El pugru pamba janaj ladocama, Bet-Émec llajtacama, Neiel llajtacamami chayarca. Chai linderoca Cabulmanta lluqui ladocamami carca.
28 Shinallataj chai linderoca Ebrón, Rehob, Hamón, Caná, Jatun llajta Sidoncamami chayarca.
29 Chai linderoca Ramata rishpaca Tiropi tiyaj muyundijta pircashca llajtacamami chayarca. Qꞌuipaca Hosá llajtata rishpaca mama cuchapimi tucurirca. Chaica Aczib llajtapimi carca.
30 Shinallataj Umá, Afec, Rehob llajtacunami carca. Tucuica 22 llajtacuna, chai uchilla pueblocunandijmi carca.
31 Cai llajtacunapish, chai uchilla pueblocunapishmi Aserpaj familiamanta cada familiapaj herencia carca.
32 Sorteajpica pichcapaj qꞌuipaca Neftalipaj huahua huahuacunamanta cada familiapajmi urmarca.
33 Paicunapaj linderoca Helefmanta, Zaananimpi tiyaj jatun yuramanta, Adamí-Nequebta, Jabneelta pasashpami Lacum lugarcama chayarca. Chaimantaca Jordán jatun yacupimi tucurirca.
34 Chai linderoca inti huashicun ladoman caj Aznot-Taborta rishpaca Hucoc llajtacamami chayarca. Cutin ura ladomanca Zabuloncamami chayarca. Cutin inti huashicun ladomanca Asercamami chayarca. Inti llujshin ladomanca Judami carca. Judá llajtaca Jordán jatun yacu cꞌuchupimi carca.
35 Muyundijta pircashca llajtacunaca Zidim, Zer, Hammat, Racat, Kinéret,
36 Adamá, Ramá, Hazor,
37 Quedes, Edréi, En-Hazor,
38 Yirón, Migdal-El, Horem, Bet-Anat, Bet-Semes llajtacunapishmi carca. Tucuica 19 llajtacuna, chai uchilla pueblocunandijmi carca.
39 Cai llajtacunapish, chai uchilla pueblocunapishmi Neftalipaj familiamanta cada familiapaj herencia carca.
40 Sorteajpica sujtapaj qꞌuipaca Danpaj familiamanta cada familiapajmi urmarca.
41 Paicunaman cushca herencia allpa linderocunaca Zorá, Estaol, Ir-Semes,
42 Saalabín, Ayalón, Itlá,
43 Elón, Timná, Ecrón,
44 Eltequé, Guibetón, Baalat,
45 Jehúd, Bene-Berac, Gat-Rimón,
46 Me-Jarcón, Racón llajtacunapishmi carca. Chai linderoca Jope cꞌuchutami pasarca.
47 Pero Danpaj allpacunaca paicunapajca yallitaj uchillami carca. Chaimantami paicunaca Lésem llajtahuan macanacungapaj llujshircacuna. Chai llajtapi causajcunatapish espadahuan huañuchishpami chai allpata mishashpa japircacuna. Chashnami paicunaca chai allpata japishpa, chaipi causashpa saquirircacuna. Shinallataj Lésem llajtataca Dan shutimanmi cambiarcacuna. Chaitaca paipaj ñaupa yaya Danmantami chashna cambiarcacuna.
48 Cai llajtacuna, chai uchilla pueblocunandijmi Danpaj familiamanta cada familiapaj herencia carca.
49 Chashnami chai allpacunataca cada familia herenciata shina japichun chaupircacuna. Israelitacunaca Nunpaj churi Josuemanmi paicunapaj herencia chaupipi shuj herenciata curcacuna.
50 Jehová Dios mandajpimi israelitacunaca Efraín urcucunapi saquirij Timnat-Sérah llajtata Josué mañashca shina curcacuna. Chaipimi Josueca chai llajtata cutin shayachishpa, chaipi causashpa saquirirca.
51 Cai allpacunatami sacerdote Eleazarpish, Nunpaj churi Josuepish, yayacunapaj familiacunata pushajcunapish Israelmanta cada familiaman Siló llajtapi herenciata sorteashpa curcacuna. Chaitaca Jehová Diospaj ñaupajpi, tandanacuna carpa huasi yaicunapimi chashna chaupishpa curcacuna. Paicunaca chashnami allpacunata chaupinata tucuchircacuna.
