Josué 2:1-24
2 Nunpaj churi Josueca ishqui runacunatami Sitimmanta pacalla Canaán allpata ricunaman cacharca. Paicunata cachashpaca: “Canaán allpata ricunaman richij. Ashtahuantajca Jericó allpata ricumunguichij” nircami. Paicuna chaimanta rishpaca Rahab shuti huainayaj huarmipaj huasimanmi chayarcacuna. Chaipimi paicunaca saquirircacuna.
2 Jericó llajtamanta reymanca: “¡Ricui! Israelmanta huaquin runacunami cai allpata pacalla ricunaman cunan tuta shamushcacuna” nishpami huillarcacuna.
3 Chaita uyashpami Jericó llajtamanta reyca Rahab huarmimanca: “Cambaj huasiman shamushpa saquiricuj runacunata llujshichi. Paicunaca tucui cai allpata pacalla ricunamanmi shamushcacuna” nishpa huillachun cacharca.
4 Shinapish Rahab huarmica chai ishqui cꞌaricunatami pacarca. Chai qꞌuipaca paica: “Ari, chai cꞌaricunaca ñucata visitanamanmi shamurcacuna. Pero paicuna maimanta cashcataca mana yacharcanichu.
5 Chai runacunaca ña tutayacujpimi cai llajtapaj pungucuna manaraj huichcarijpi llujshishpa rircacuna. Paicuna maiman rishcataca mana yachanichu. Utca paicunata catishpa richij, japinguichijmi” nircami.
6 (Shinapish chai huarmica paipaj huasi jahua terrazaman paicunata pushashpami lino plantacuna montonashca chaupipi miticuchishca carca).
7 Shina nijpimi rey cachashca runacunaca Jordán jatun yacuta chꞌimbana ñancunata catishpa rircacuna. Catij runacuna chai llajtamanta llujshincami chai llajtapaj pungucunataca huichcarcacuna.
8 Pacalla ricunaman shamuj runacuna manaraj dorminaman rijpimi Rahabca huasi jahua terrazaman paicuna maipi cashcaman llujshirca.
9 Chaipimi paica cashna nirca: “Jehová Dios cai allpata cancunaman cunataca allimi yachani. Ñucanchijca cancunataca yallitajmi manchanchij. Cancuna shamushcamantami tucui cai llajtapi causajcunaca yallitaj mancharishcacuna can.
10 Shinallataj cancuna Egipto llajtamanta llujshijpi, Jehová Dios cancunapaj ñaupajpi Puca mama cucha yacuta ima shina chaquichishcatami uyashcanchij. Amorreocunata mandaj ishqui reycunahuan cancuna imata rurashcatapishmi uyashcanchij. Rey Sehonta, rey Ogtaca cancunami Jordán jatun yacu caishuj ladopi* huañuchircanguichij.*
11 Chaita uyashpami ñucanchijca mancharircanchij.* Cancunahuan macanacungapajca ni pi mana munanchu. Cancunapaj Jehová Diosca jahua pachapajpish, cai allpapajpish Diosmi can.
12 Cancunaman mana tucurij cꞌuyaita ñuca ricuchishca shinallataj cancunapish mana tucurij cꞌuyaita, ñuca yayapaj familiaman ricuchinguichij, Jehová Diospaj shutipi jurapaichij. Chaita cancuna pajtachina cashcata yachangapajca shuj señalta ricuchichij.
13 Ñuca yayapaj, ñuca mamapaj, ñuca turicunapaj, ñuca ñañacunapaj, tucui paicunapaj huasi ucupi causajcunatapishmi quishpichina canguichij. Ñucanchijtaca huañuimantami quishpichina canguichij” nircami.
14 Chashna nijpimi chai runacunaca: “¡Ñucanchij causaitaca cancunamantami cushun! Cancuna ñucanchij imata ruragrishcata mana huillajpi, Jehová Dios cai allpata ñucanchijman cujpica cancunamanca mana tucurij cꞌuyaitami ricuchishun. Ñucanchij ima nishcatapishmi pajtachishun” nircacuna.
15 Chai qꞌuipaca Rahabca paicunatami shuj huascahuan ventanata uriyachirca. Paipaj huasica chai llajtapaj pirca jahuapimi carca. Chaipimi paica causaj carca.
16 Qꞌuipaca Rahabca: “Urcucunaman richij. Chaipi quimsa punllata miticuichij. Chashnami cancunata catishpa rijcunaca mana japingacuna. Paicuna cai llajtaman tigramujpica cancunapaj ñanta ringuichijllami” nircami.
17 Chashna nijpimi chai runacunaca: “Ñucanchij nishcata can pajtachijllapimi can jurachishcata pajtachingapaj obligados canchij.
18 Ñucanchij cai allpaman yaicujpica ñucanchijta uriyachishca ventanapica cai pucanicuj huascatami huatana cangui. Shinallataj cambaj huasipica cambaj yayatapish, cambaj mamatapish, cambaj turicunatapish, cambaj yayapaj familiatapishmi tandachina cangui.
19 Maijanpish cambaj huasimanta llujshishpa huañujca paillatajmi paipaj causaimanta culpayuj canga.* Ñucanchijca chaimantaca ima culpata mana charishunchu. Shinapish cambaj huasi ucupi canhuan saquirijcunamanta, paicunahuan ima tucujpica ñucanchijmi paicunapaj causaimantaca culpayuj cashun.
20 Shinapish ñucanchij cai allpaman imapaj shamushcata can huillajpica canhuan juramentota rurashcataca mana pajtachishunchu” nircacunami.
21 Chaimi Rahabca: “Cancuna nishca shina pajtarichun” nishpa cutichirca.
Rahab cayacama nijpimi chai runacunaca paicuna rina ñanta rircacuna. Chai huashaca Rahabca paipaj ventana huasipimi pucanicuj huascata huatarca.
22 Paicunata mashcaj runacuna Jericó llajtaman tigrangacamami ricunaman shamuj ishqui runacunaca quimsa punllacunata urcucunapi miticunaman rircacuna. Chai mashcaj runacunaca tucui ñancunapimi mashcarcacuna. Chashnapish paicunataca mana japircachu.
23 Qꞌuipaca chai ishqui runacunaca urcucunamanta uriyashpami Jordán jatun yacuta chꞌimbarcacuna. Chashnami paicunaca Nunpaj churi Josuepaj ñaupajman rishpa paicunahuan imalla tucushcata parlarcacuna.
24 Josuemanca: “Jehová Diosca tucui cai allpatami ñucanchijman cushca. Cai llajtapi tucui causajcunaca ñucanchijmantami yallitaj manchashcacuna can” nircacunami.
Notacuna
^ Caipica inti llujshin ladomantami parlacun.
^ O “tucui tucuchircanguichij”.
^ Hebreo rimaipica: “ñucanchij shungucunaca yacuyarca” ninmi.
^ Hebreo rimaipica: “paipaj yahuarca paipaj uma jahuapimi canga” ninmi.
