Josué 20:1-9
-
Huañuchij runacunapaj miticuna llajtacunamanta (1-9)
20 Jehová Diosca Josuemanca cashnami nirca:
2 “Israelitacunamanca caita ni: ‘Moisesman ñuca nishca shina cancunapaj miticuna llajtacunata* agllaichij.
3 Chashnami maijanpish mana munashpa pita huañuchishpa* o shuj accidentemanta* huañuchishpaca chai llajtacunapi miticunaman ri tucunga. Cai miticuna llajtacunaca huañuchishcapaj familiamanta miticungapajmi cancunapajca sirvinga.
4 Chai huañuchij runaca chai miticuna llajtacunamanta shuj llajtaman rishpaca chai llajta pungupi shayarishpami imalla tucushcata chai llajtapaj autoridadcunaman* huillana can. Chaimi autoridadcunaca chai runataca chai llajtapi chasquishpa pai saquirichun shuj lugarta cuna can. Chai huañuchij runaca paicunapurapimi causashpa catinga.
5 Autoridadcunaca huañuchishcapaj familia chai huañuchij runata huañuchichunca mana saquinachu can. Chai huañuchij runaca mana pai pꞌiñashcamanta, mana pai munashcamantachu huañuchishca carca. Chaimantami ayudana can.
6 Chai huañuchij runaca juezcunapaj ñaupajpi paita juzgangacamami chai llajtapi causana can. Shinallataj chai tiempopi causaj sacerdotecunata jatun mandaj huañungacamami chaipi causashpa saquirina can. Chai qꞌuipami chai huañuchij runaca pai miticushpa llujshishca llajtamanca cutin tigrai tucunga. Chashnami paipaj llajtaman tigrashpa, paipaj huasiman yaicui tucunga’ ningui” nircami.
7 Chashnami cai miticuna llajtacunataca Diospaj chꞌicanyachircacuna. Neftalí urcucunapi saquirij Galileapi caj Quedes llajtata, Efraín urcucunapi saquirij Siquem llajtata, Judá urcucunapi saquirij Quiryat-Arbá llajtatapishmi agllarcacuna. Quiryat-Arbá llajtataca Hebrón nishpapishmi rijsincuna.
8 Jordán jatun yacu caishuj ladoman, Jericó llajta inti llujshin ladopica Bézer llajtatami paicunaca agllarcacuna. Bézer llajtaca chaquishca pambapi, Rubenpaj familiapaj loma pambapimi carca. Ramot llajtatapishmi agllarcacuna. Chaica Gadpaj familiapaj, Galaad llajtapimi carca. Shinallataj Golán llajtatapishmi agllarcacuna. Chaica Manasespaj familiapaj Basán llajtapimi carca.
9 Cai llajtacunami tucui israelitacunapajpish, paicunapurapi causaj shujtaj llajtamanta shamushca runacunapajpish miticuna llajtacuna carca. Maijanpish mana munashpa pita huañuchijca chai llajtacunapimi miticunaman ri tucurca. Chashnami juezcunapaj ñaupajpi manaraj juzgashca cajpica huañuchishcapaj familiaca chai runata mana huañuchi tucurca.
Notacuna
^ “Miticuna llajta” shimita huasha diccionariopi ricui.
^ O “shuj almata chugrichishpa”.
^ O “mana yachashcamanta”.
^ Hebreo rimaipica: “ancianocunaman” ninmi.
