Josué 3:1-17
-
Israelitacunaca Jordán yacutami pasancuna (1-17)
3 Josueca manaraj achijyajpimi jatarirca. Paipish, tucui israelitacunapish* Sitim lugarmanta llujshishpaca Jordán jatun yacumanmi chayarcacuna. Chai jatun yacuta manaraj pasashpaca tucui tutami chai lugarpi carcacuna.
2 Quimsa punllacuna qꞌuipami pueblopi pushajcunaca israelitacunapaj carpa huasicunata pasashpa
3 gentecunamanca cashna nirca: “Ñucanchij Jehová Dioshuan ari ninacushca arcata levitacunapuramanta sacerdotecuna apacujta ricushpaca, paicuna maipi cashcaman utca catishpa ringuichij.
4 Shinapish chai Arcamanta 890 metrocuna* caru carullaman catinguichij. Chai Arcamanca ama ashtahuan cꞌuchuyanguichij. Chashnami mai ñanta rina cashcata yachanguichij. Cancunaca cai ñantaca manaraj nunca pasashcanguichijchu” nircami.
5 Chaipimi Josueca chaipi caj gentecunataca: “Chuyayarishpa jucha illaj tucuichij. Caya punllaca Jehová Diosca cancunapurapimi yallitaj sumaj allicunata ruranga” nirca.
6 Chai qꞌuipami Josueca sacerdotecunataca: “Dioshuan ari ninacushca arcata alzashpa gentecunapaj ñaupajpi shayarichij” nirca. Chashna nijpimi paicunaca Dioshuan ari ninacushca arcata alzashpa gentecunata ñaupashpa rircacuna.
7 Chaimi Jehová Diosca Josuemanca cashna nirca: “Ñucaca ima shinami Moiseshuan carcani, chashnallatajmi canhuanpish casha. Cai punllamantami tucui israelitacunapaj ñaupajpi cantaca jatunyachi callarisha.
8 Dioshuan ari ninacushca arcata apaj sacerdotecunamanca: ‘Jordán jatun yacu uriman chayashpaca, chai jatun yacu uripimi shayarishpa saquirina canguichij’ nishpami mandana cangui” nircami.
9 Shinallataj Josueca israelitacunamanca: “Shamuichij, ñucanchij Jehová Diospaj nishca shimicunata uyaichij” nircami.
10 Josueca cashnapishmi nirca: “Diosca cancunapaj ñaupajmantami cananeocunata, hititacunata, heveocunata, perizitacunata, guirgaseocunata, amorreocunata, jebuseocunatapish llujshichishpataj cachanga. Chashnami cancunaca cancunapurapi causaj Dios tiyashcata yachaj chayanguichij.
11 ¡Ricuichij! Tucui cai allpata Mandajhuan ari ninacushca arcaca cancunapaj ñaupajta rishpami Jordán jatun yacuman yaicugrin.
12 Cunanca Israelpaj familiacunamantaca 12 cꞌaricunallata agllaichij. Cada familiamanta shuj cꞌarita agllaichij.
13 Tucui cai allpata mandaj Jehová Dioshuan ari ninacushca arcata apaj sacerdotecunapaj chaquicuna Jordán jatun yacuman yaicujpica* janaj ladomanta shamuj Jordán yacucunaca shuj pata shina tucushpami saquiringa” nircami.
14 Chaimi gentecunaca paicunapaj carpa huasicunata churashca lugarmanta rircacuna. Jordán jatun yacuta manaraj pasai callarijpimi ari ninacushca arcata apaj sacerdotecunapish gentecunata ñaupashpa rircacuna.
15 (Cosecha tiempopimi tucui punllacuna Jordán yacucunaca jundarishpa caita chaita regarij carca). Arcata apaj sacerdotecuna Jordán jatun yacu uriman chayashpa chai jatun yacupi paicunapaj chaquicunata satijpica,
16 janaj ladomanta shamuj yacucunami jarcarirca. Carupi caj Adán llajtapimi yacucunaca shuj pata shina jarcarishpa saquirirca. Chai llajtaca Zaretán llajta cꞌuchupimi saquirin. Cutin mar Salado* nishca Arabá mama cuchaman uriyaj yacucunaca chaquirircami. Chai yacucuna jarcarijpimi israelitacunaca caishuj ladoman pasarcacuna. Chashnami paicunaca Jericó chꞌimba ladoman chayarcacuna.
17 Jehová Dioshuan ari ninacushca arcata apaj sacerdotecunaca Jordán jatun yacu chaquishca chaupi pambapimi shayacurcacuna. Paicuna chaipi shayacujpimi tucui israelitacunaca chaquishca pambata caishuj ladoman pasarcacuna. Chai sacerdotecunaca tucui israelitacuna Jordán jatun yacu chaquishca pambata pasangacamami chashna shayarishpa saquirircacuna.
Notacuna
^ Hebreo rimaipica: “Israelpaj churicunapish” ninmi.
^ Hebreo rimaipica: “2.000 codos” ninmi. Ayuda B14-ta ricui.
^ Hebreo rimaipica: “samacujpica” ninmi.
^ Caipica mar Muertomantami parlacun.
