Nehemías 6:1-19
6 Sanbalatpish, Tobiaspish, Arabiamanta Guésem runapish, ñucanchijta pꞌiñaj caishuj runacunapishmi pircacunata ñuca cutin shayachishcata, jutcucunatapish tucui tapachishcata yachaj chayarcacuna. (Pero pungucunataca manaraj churarcanichu).
2 Chai ratomi Sanbalatpish, Guesempish: “Shamui, Onó pambapi tiyaj shuj uchilla pueblopi tandanacungapaj shuj punllata agllashun” nishpa huillanaman cacharcacuna. Ashtahuanpish ñucata llaquichingapajllami chaitaca nicurcacuna.
3 Chaimi ñucapish huillajcunata cachashpaca: “Ñucaca shuj importante trabajotami ruracuni. Cancunapajmanca mana ri tucunichu. Maitataj cai obrata chaipi shitashpa cancunata ricunallamanca rishayari” nircani.
4 Paicunaca chuscu cutinmi chaillatataj huillanaman cacharcacuna. Ñucapish chuscu cutinmi chaillatataj cutichircani.
5 Shinapish Sanbalatca caihuanca pichca* cutinmi chaillatataj huillachun paita sirvijta ñucapajman cacharca. Chai sirvijca paipaj maquipica shuj pascashca cartatami charicurca.
6 Chai cartapica: “Cai cꞌuchulla llajtapi causaj gentecunaca canpish, judiocunapish reypaj contra jatarinata yuyacushcatami nincuna. Guesempish chaillatatajmi nin. Chaimantami pircacunataca cutin shayachicungui. Canmi paicunapaj rey tucusha nicungui nincunami.
7 Shinallataj: ‘¡Judá llajtapica shuj reymi tiyan!’ nishpa tucui Jerusalenpi canmanta huillachunmi profetacunata agllashcangui. Chaitaca reyca yachaj chayangami. Chaimanta shamui caicunamanta parlanacungapaj” nishpa quillcashcami carca.
8 Shinapish ñucaca: “Can nishcacunaca mana ciertochu. Cambaj yuyaillamantami nicungui” nishpa huillachunmi cacharcani.
9 Paicunaca manchachishun nishpami ñucanchijtaca: “Paicunapaj maquicunaca shaicuringami. Chai obrataca mana nunca tucuchingacunachu” nijcuna carca. Chashna nicujpipish ñuca Dioslla, ñuca maquicunata sinchiyachihuai.
10 Chaimantaca Delayapaj churi Semayapaj huasimanmi rircani. Paipaj abueloca Mehetabelmi carca. Semayaca paipaj huasipimi huichcarishca carca. Paica: “Diospaj huasipi tupangapaj shuj punllata agllashun. Chai ucuman yaicushpa pungucunata huichcashun. Cantaca huañuchinamanmi shamungacuna. Tutami huañuchinaman shamungacuna” nircami.
11 Shinapish ñucaca: “¿Mandaj cashca jahuachu miticunaman risha? ¿Ñuca laya runa Diospaj huasiman yaicushpaca causashpa catingachu? ¡Ñucaca mana yaicushachu!” nircanimi.
12 Chai profetata Dios mana cachashcatami cuentata curcani. Ashtahuanpish pai huillashca shimicunahuan ñucata llaquichichunmi Tobiaspish, Sanbalatpish pagashca carcacuna.
13 Paicunaca ñucata manchachingapaj, juchapi urmachingapajmi pagashca carcacuna. Chashnami ñucata pingaipi saquichinata, ñucamanta mana allita rimanata yuyarcacuna.
14 Ñuca Dioslla, Tobiaspish, Sanbalatpish imallata rurashcataca ama cungarichu. Profeta huarmi Noadiaspish, caishuj profetacunapish imallata rurashcataca ama cungarichu. Paicunaca achca cutinmi ñucata manchachisha nircacuna.
15 Pircacunata cutin shayachinataca 52 punllacunapimi tucuchircanchij. Elul* quillapaj 25 punllapimi tucuchircanchij.
16 Ñucanchijta pꞌiñajcunapish caita yachaj chayashpa, cꞌuchulla llajta gentecunapish caita ricushpaca tucuicunami achcata pingarircacuna. Ñucanchij Dios ayudashcamanta cai pircacunata cutin shayachishcatami cuentata curcacuna.
17 Chai punllacunapica Judá llajtata pushajcunaca achca cartacunatami Tobiasman cachajcuna carca. Chai cartacunatami paica cutichij carca.
18 Tobiasca Ará runapaj churi Secaniaspaj yernomi carca. Tobiaspaj churi Jehohananpish Berekiaspaj churi Mesulampaj ushushihuanmi cazarashca carca. Chaimantami Judá llajtapica achca gentecuna Tobiasta apoyanata jurashcacuna carca.
19 Paicunaca siempremi Tobiasmantaca allicunata ñucaman parlajcuna carca. Qꞌuipaca ñuca ima nishcatami chai runaman huillagrijcuna carca. Chaimi Tobiasca ñucata manchachingapaj cartacunata cachaj carca.
