Apocalipsis 7:1-17
7 Chai qꞌuipaca allpa chuscu esquinacunapi chuscu angelcuna shayacujtami ricurcani. Paicunaca allpapipish, mama cuchapipish, shuj yurallapipish ima huaira ama pꞌucuchunmi allpa chuscu ladomanta shamuj huairata jarcacurcacuna.
2 Inti llujshin ladomanta shujtaj ángel Dios cushca sellota apashpa shamucujtapishmi ricurcani. Cai allpatapish, mama cuchatapish llaquichingapaj autoridadta chasquij chuscu angelcunataca sinchitami caparirca.
3 Chashna caparishpaca: “¡Ñucanchij Diosta sirvijcunata frentepi sellangacama cai allpatapish, mama cuchatapish, yuracunatapish ama llaquichichijchu!” nircami.
4 Mashnacunalla sellashca cashcatami uyarcani. Israelpaj huahuacunapaj tucui familiacunamantami 144.000 sellashca carcacuna.
5 Judapaj familiamantaca 12.000 sellashcacunami carca.Rubenpaj familiamantaca 12.000 sellashcacunami carca.Gadpaj familiamantaca 12.000 sellashcacunami carca.
6 Aserpaj familiamantaca 12.000 sellashcacunami carca.Neftalipaj familiamantaca 12.000 sellashcacunami carca.Manasespaj familiamantaca 12.000 sellashcacunami carca.
7 Simeonpaj familiamantaca 12.000 sellashcacunami carca.Levipaj familiamantaca 12.000 sellashcacunami carca.Isacarpaj familiamantaca 12.000 sellashcacunami carca.
8 Zabulonpaj familiamantaca 12.000 sellashcacunami carca.Josepaj familiamantaca 12.000 sellashcacunami carca.Benjaminpaj familiamantaca 12.000 sellashcacunami carca.
9 Chai qꞌuipaca pi mana yupai tucuipaj achca gentecunatami ricurcani. Paicunaca tucui llajtacunamanta, tucui familiacunamanta, tucui pueblocunamanta, tucui rimaicunamantami carcacuna. Shinallataj jatun tiyarinapaj ñaupajpi, Malta Ovejapaj ñaupajpimi shayacurcacuna. Paicunaca yurajlla suni churanacunata churarishcami carcacuna, maquicunapipish palmera ramacunatami apacurcacuna.
10 Shinallataj: “¡Ñucanchij quishpirinaca jatun tiyarinapi tiyacuj ñucanchij Diosmanta, Malta Ovejamantapishmi shamun!” nishpami sinchita caparicurcacuna.
11 Jatun tiyarina muyundijpipish, ancianocunapaj muyundijpipish, chuscu querubincunapaj muyundijpipishmi tucui angelcuna shayacurcacuna. Paicunaca jatun tiyarina ñaupajpi cungurishpami Diosta adorarcacuna.
12 Paicunaca: “¡Chashna cachun!* Ñucanchij Diosca huiñai huiñaitami alli yachaitapish, podertapish, fuerzatapish charin. Paillami alabashca, jatunyachishca, alli nishca cana can. Paillatami pagui nina canchij. Chashna cachun” nircacunami.
13 Shinaca ancianocunamanta shuj ancianoca: “¿Yurajlla suni churanacunata churarishcacunaca picunataj canyari? ¿Paicunaca maimantataj shamurcacunari?” nishpami ñucataca tapurca.
14 Chashna tapujpimi chai rato: “Ñuca Amito, canmari yachangui” nishpa cutichircani. Chaimi paica cashna nirca: “Paicunaca jatun llaquimanta quishpirijcunami. Paicunapaj suni churanacunata tajshashpami Malta Ovejapaj yahuarpi yurajyachishcacuna.
15 Chaimantami paicunaca Diospaj jatun tiyarina ñaupajpi can. Paipaj huasipimi tutapish, punllapish Diosta adorancuna. Jatun tiyarinapi tiyacuj Diosca paicunata cuidangapajmi shuj carpa huasita allichinga.
16 Paicunaca ña mana yaricachingachu, ña mana yacunachingachu. Intipish, ima calorpish mana rupachingachu.
17 Jatun tiyarina chaupipi* caj Malta Ovejami paicunataca michinga. Causaita cuj pugyu yacucunamanmi pushanga. Diosmi paicunapaj ñahuicunamantaca tucui huiquita pꞌichanga” nircami.
