Filipenses 4:1-23
4 Ñuca huauquicuna, cancunatami cꞌuyani. Shinallataj cancunata ricuna yuyaillami cani. Cancunami ñucataca cushichinguichij. Cancunaca ñucapajca shuj corona shinami canguichij. Ñuca cꞌuyashca huauquicuna Amitota tucui shunguhuan sirvishpa catichunmi rogapani.
2 Evodiatapish, Sintiquetapish Amitota sirvijcuna cashcamantaca shuj yuyailla cachunmi rogapani.
3 Ñucahuan igual tucui shunguhuan sirvicuj huauqui, cantaca chai panicunata ayudashpa catichunmi rogapani. Paicunaca Clementehuanpish, ñucata ayudaj shujtaj huauquicunahuanpishmi alli huillaicunata huillangapaj ñucahuan tandalla sinchita trabajashcacuna. Tucui paicunapaj shuticunaca causaita chasquinapaj libropimi quillcashca tiyacun.
4 Amitomanta siempre cushicuichij. Cutinllatajmi nini: ¡cushicuichij!
5 Cancuna alli shungu cashcata tucuicuna yachachun. Amito ña caillapi cashcatapish amataj cungaringuichij.
6 Imamantapish ama yallitaj sustarichijchu. Ashtahuanpish Diosta mañashpa, pagui nishpa, rogarishpa tucuita paiman huillaichij.
7 Chashna rurajpimi Diosca pi mana intindipaj sumaj* causaita cancunaman cunga. Shinallataj Cristo Jesusmantami cancunapaj shungutapish, yuyaitapish Diosca huaquichinga.
8 Chaimanta huauquicuna, tucui caicunapi siempre yuyaichij: mana llulla cashcacunapi, valishca cashcacunapi, cashcata ruranacunapi, chuya cashcacunapi, cꞌuyaita ricuchina cashcacunapi, alli nishca cashcacunapi, allita rurana cashcacunapi, alabashca cashcacunapipish yuyaichij.
9 Shinallataj ñucamanta yachashcata, ñucamanta chasquishcata, ñucamanta uyashcata, ñuca imata rurashcata, ricushcatapish ruraichijlla. Chashna rurajpimi sumaj causaita cuj Diosca cancunahuan canga.
10 Cancuna cutinllataj ñucamanta sustarishcamantami achcata cushicuni. Shinallataj Amitotapishmi pagui nini. Ñucamanta sustarishca cashpapish chashna sustarishcataca cancunaca mana ricuchi tucurcanguichijchu.
11 Caitaca imata minishticushcamantaca mana nicunichu. Ñucaca ima tiyajpipish, ima illajpipish cushilla canatami yachashcani.
12 Ashallata charishpa causanatapish, achcata charishpa causanatapishmi yachashcani. Ashalla gentecuna yachashcatami yachashcani: micunata charishpapish, yaricaihuan cashpapish, achcata charishpapish, mana imata charishpapish cushilla canatami yachashcani.
13 Dios poderta cujpimi ñucaca tucuita rurangapaj fuerzata charini.
14 Shinapish llaqui punllacunapi ñucata ayudashpaca cancunaca allitami rurarcanguichij.
15 Filipos llajtapi causaj huauquicuna punta cutin alli huillaicunata uyashca qꞌuipaca, cancunallami Macedoniamanta ñuca rijpica ñucata ayudarcanguichij. Shujtaj congregacioncunaca ñucataca mana ayudarcacunachu. Chaitaca yachanguichijmi.
16 Tesalónica llajtapi ñuca cajpica cancunami ñuca ima minishtishcata cachashpa ayudarcanguichij. Mana shuj cutinllachu chashna rurarcanguichij. Ashtahuanpish ishqui cutinmi chashna rurarcanguichij.
17 Ñucaman regalocunata cuchunca mana mashcacunichu. Ashtahuanpish cancunapaj alli ruraicuna Diospaj ñaupajpi mirarishpa catichunmi munani.
18 Shinapish cunanca ñucapajca ima mana illanchu. Tucui ima minishtishcatapish yallimi charini. Epafroditoman cancuna imallata cachashcatami ñucaca chasquircani. Cancuna cushca regaloca mishquijllata ashnacuj sacrificio shinami can. Chai sacrificiotaca cushicushpami Diosca chasquin.
19 Chashna rurashcamantami achcata charij ñuca Diosca Cristo Jesusmanta tucui minishtishcata cancunamanca cunga.
20 Ñucanchij Yaya Diosca huiñai huiñaita jatunyachishca cachun. Chashna cachun.*
21 Cristo Jesushuan shuj shinalla caj tucui jucha illajcunamanmi saludocunata cachani. Ñucahuan caj huauquicunapishmi cancunamanca saludocunata cachancuna.
22 Tucui jucha illaj huauquicunapish, ashtahuantajca Cesarpaj huasipi cajcunami cancunamanca saludocunata cachancuna.
23 Cancuna alli yuyaita ricuchishcamanta Amito Jesucristoca yallitaj llaquij cashcata cancunaman ricuchichun.
