Juan 18:1-40
-
Jesustaca contracunamanmi Judasca entregarca (1-9)
-
Pedro espadata llujshichishcamanta (10, 11)
-
Jesusta Anaspaj ñaupajman pushashcamanta (12-14)
-
Pedro Jesusta punta cutin mana rijsinichu nishcamanta (15-18)
-
Anaspaj ñaupajpi Jesús cashcamanta (19-24)
-
Pedro Jesusta ishqui cutin, quimsa cutin mana rijsinichu nishcamanta (25-27)
-
Pilatopaj ñaupajman Jesusta pushashcamanta (28-40)
-
“Ñuca Gobiernoca mana cai pachamantachu” nishcamanta (36)
-
18 Jesusca chaicunata mañashca qꞌuipami paita catijcunandij Cedrón pugru pamba* caishuj ladoman rirca. Chaipica shuj huertami tiyarca. Chai huertamanmi Jesusca paita catijcunandij yaicurca.
2 Jesús paita catijcunahuan chai huertapi tandanacuj cajpimi, Jesusta contracunaman entregagrij Judaspish chai huertataca rijsirca.
3 Chaimantami Judasca soldadocunahuan, sacerdotecunata mandajcuna, fariseocuna cachashca guardiacunahuanpish chaiman chayarca. Paicunaca mechacunahuan,* lamparacunahuan, espadacunahuan, caspicunahuanmi chayarcacuna.
4 Jesusca paihuan ima tucunata yachashpami shuj pasota ñaupajman cushpaca: “¿Pitataj mashcacunguichij?” nishpa tapurca.
5 Shina tapujpimi paicunaca: “Nazaret llajtamanta Jesustami mashcacunchij” nircacuna. Chashna nijpimi Jesusca: “Ñucami cani” nirca. Contracunaman Jesusta entregagrij Judaspishmi paicunahuan carca.
6 Shinapish Jesús “Ñucami cani” nijpimi paicunaca siquiman tigrarishpa pambapi urmarcacuna.
7 Cutinllatajmi Jesusca: “¿Pitataj mashcacunguichij?” nishpa tapurca. Chashna tapujpimi paicunaca: “Nazaret llajtamanta Jesustami mashcacunchij” nircacuna.
8 Chaimi Jesusca: “Ñamari cancunamanca ñucami cani nircani. Ñucata mashcacushpaca cai runacuna richun saquichij” nishpa cutichirca.
9 Jesusca: “Ñucaman can cushcacunataca shujllatapish mana chingachishcanichu” nishcami carca. Chai shimicuna pajtarichunmi chashnaca tucurca.
10 Simón Pedroca pai charicushca espadata llujshichishpami, sacerdotecunata jatun mandajpaj sirvijtaca alli lado rinrinta pꞌitirca. Chai sirvij runaca Malco shutimi carca.
11 Shina rurajpimi Jesusca Pedrotaca: “Espadataca espadata huaquichinapi churai. ¿Ñuca Yaya cushca copamantaca manachu ubyana cani?” nirca.
12 Chai qꞌuipaca soldadocunapish, 1.000 soldadocunata mandajpish, judiocuna cachashca guardiacunapish Jesusta japishpami paipaj maquicunata huatarcacuna.
13 Callaripica Jesustaca Caifaspaj suegro Anaspaj ñaupajmanmi pusharcacuna. Chai huataca Caifasmi sacerdotecunata jatun mandaj carca.
14 Caifasmi judiocunamanca cancunapajca tucui gentecunamanta shujlla runa huañunami ashtahuan alli canga nishca carca.
15 Simón Pedropish, Jesusta catij caishuj runapishmi Jesusta catishpa rircacuna. Jesusta catij caishuj runaca sacerdotecunata jatun mandajpaj rijsishcami carca. Chaimantami sacerdotecunata jatun mandajpaj huasi patioman Jesushuan yaicurca.
16 Ashtahuanpish Pedroca canllapimi pungu cꞌuchullapi* saquirirca. Chaimi sacerdotecunata jatun mandajpaj rijsishca Jesusta catij caishuj runaca, punguta cuidaj huarmihuan parlashpa Pedrotapish yaicuchirca.
17 Chaipimi pungupi cuidashpa tiyaj sirvij huarmica Pedrotaca: “¿Manachu canpish chai runata catijcunapuramanta cangui?” nishpa tapurca. Chaimi Pedroca: “Mana, mana chaichu cani” nirca.
18 Achca chiri cajpimi sirvijcunapish, guardiacunapish ninata japichishpa chai cꞌuchullapi cunushpa shayacurcacuna. Pedropishmi chaipica paicunahuan ninapi cunucurca.
19 Sacerdotecunata mandajmi* Jesustaca paita catijcunamanta, pai imata yachachishcamantapish tapurca.
20 Chashna tapujpimi Jesusca cashna cutichirca: “Tucui gentecunapaj ñaupajpimi parlashcani. Ñucaca sinagogacunapi,* Diospaj huasipimi* tucui judiocuna tandanacujpi punllanta yachachircani. Pacallaca imata mana nishcanichu.
21 ¿Imamantataj ñucataca tapunguiyari? Ñuca ima nishcata uyajcunata tapui. ¡Ricui! Paicunami ñuca ima nishcataca alli yachancuna” nirca.
22 Jesús chashna nijpimi paipaj cꞌuchullapi shayacuj guardiaca quijadospi huajtashpa: “¿Sacerdotecunata mandaj tapujpica chashnachu cutichingui?” nirca.
23 Chashna nijpimi Jesusca: “Imata mana alli nishca cajpica huillai. Shinapish ñuca nishca cierto cajpica, ¿imamantataj ñucataca macanguiyari?” nishpa cutichirca.
24 Chai qꞌuipami Anasca Jesustaca maquicuna huatashcata sacerdotecunata jatun mandaj Caifaspajman cacharca.
25 Simón Pedroca chaillapitajmi cunushpa shayacurca. Chashna cunushpa shayacujpimi: “¿Manachu canpish chai runata catijcunapuramanta cangui?” nishpa tapurcacuna. Chashna tapujpimi Pedroca: “Mana, mana chaichu cani” nishpa negarca.
26 Chaipica Pedro rinrinta pꞌitishca runapaj shuj familiapishmi carca. Paica sacerdotecunata jatun mandajpaj sirvijmi carca. Chai runami Pedrotaca: “¿Manachu cantaca huertapi chai runahuan cajta ricurcani?” nirca.
27 Shinapish Pedroca cutinllatajmi negarca. Chashna negacujpimi ñapish shuj gallo cantarca.
28 Tutamantaca utcami Jesustaca Caifaspaj huasimanta, Judea llajtata mandaj Pilatopaj mandana huasiman pusharcacuna. Shinapish Pascua* micuita micungapaj mana mapayashun nishpami paicunaca Pilatopaj mandana huasimanca mana yaicurcacuna.
29 Chaimantami Pilatoca paicuna maipi cashcaman llujshishpaca: “¿Ima mana allitataj cai runaca rurashcari?” nishpa tapurca.
30 Chashna tapujpimi paicunaca: “Cai runa mana millaita ruraj cajpica cambajmanca mana pushamuimanchu carcanchij” nircacuna.
31 Shina nijpimi Pilatoca: “Paita pushashpa, cancunapaj leypi nishca shina juzgaichij” nirca. Chashna nijpimi judiocunaca: “Ñucanchijca pitapish huañuchingapaj poderta mana charinchijchu” nircacuna.
32 Pai ima shina huañuna cashcata Jesusllataj huillashca shimicuna pajtarichunmi chashnaca tucurca.
33 Pilatoca cuntinllataj paipaj mandana huasiman yaicushpami Jesusta cayashpaca: “¿Canchu judiocunata jatun mandaj cangui?” nishpa tapurca.
34 Chashna tapujpimi Jesusca: “¿Cambaj yuyaimantachu tapucungui o shujtajcunachu ñucamanta parlarca?” nirca.
35 Chaimi Pilatoca: “¿Ñucaca judiochari cani? Cambaj llajta gentecunallataj, sacerdotecunata mandajcunapishmi cantaca ñucapajman pushamurcacuna. ¿Imatataj rurarcanguiyari?” nirca.
36 Chashna nijpimi Jesusca: “Ñuca Gobiernoca mana cai pachamantachu. Ñuca Gobierno cai pachamanta cajpica ñucata catijcunaca, judiocunaman ñucata ama entregachunmi macanacunman carcacuna. Shinapish ñuca Gobiernoca mana cai pachamantachu” nishpa cutichirca.
37 Chashna cutichijpimi Pilatoca: “¿Ciertotajchu canca jatun mandaj cangui?” nishpa Jesusta tapurca. Shina tapujpimi paica: “Ari, canllatajmari ñuca jatun mandaj cashcataca nicungui. Ñucaca chaipajmi huacharishcani. Mana llullata huillangapajmi cai pachamanca shamushcani. Maijanpish mana llulla nishca shina causajca ñuca nishcatami uyan” nirca.
38 Chashna nijpimi Pilatoca: “¿Mana llullaca imataj canyari?” nishpa tapurca.
Chaita nishca qꞌuipami Pilatoca judiocuna maipi cashcaman cutinllataj llujshishpaca cashna nirca: “Cai runa ima culpata charishcataca mana japinichu.
39 Ashtahuanpish cancunapaj costumbreta catishpami Pascua fiestapica prezumanta shuj runata cacharigrini. Shinaca ¿judiocunata jatun mandajtachu cacharichun munanguichij?” nirca.
40 Chashna nijpimi paicunaca sinchita caparishpa: “¡Cai runataca mana cacharichun munanchijchu! ¡Barrabastami cacharichun munanchij!” nircacuna. Barrabasca shuhuami carca.
Notacuna
^ Cedrón pugru pambaca tamya punllacunapipish chaquishcami can. Shinapish yallitaj tamyajllapimi mana chaquishca can.
^ O “antorchacunahuan”.
^ O “pungu yaicunllapi”.
^ Paica Anasmi carca.
^ O “tandanacuna huasicunapi”.
^ “Diospaj huasi” shimita huasha diccionariopi ricui.
^ “Pascua” shimita huasha diccionariopi ricui.
