Juan 4:1-54
4 Fariseocunaca Juantapish yalli achca catijcunata Jesús charishcata, Juantapish yalli bautizacushcatami* uyashcacuna carca. Paicuna chaita uyashcatami Jesuspish* yachaj chayarca.
2 (Shinapish Jesusca mana bautizacurcachu, paita catijcunami bautizacurcacuna).
3 Chaita yachaj chayashpami paica Judeamanta llujshishpa cutin Galileaman rirca.
4 Shinapish Galileaman ringapajca Samaria* llajtatami pasana carca.
5 Chaita pasacushpami Samariapi caj Sicar shuti llajtaman chayarca. Chai llajtaca Jacob paipaj churi Joseman cushca allpa cꞌuchullapimi carca.
6 Chaipica Jacob rurashca yacu pugyumi tiyarca. Jesusca viajemanta shaicushca cashpami chai pugyu cꞌuchupi tiyarirca. Chaipajca ñami casi chaupi punlla carca.
7 Chashna tiyacujpimi Samariamanta shuj huarmi yacuta huishinaman shamurca. Chai huarmitami Jesusca: “Asha yacuta ubyangapaj cuhuai” nirca.
8 (Jesusta catijcunaca pueblopimi micunata randinaman rishcacuna carca).
9 Chashna nijpimi Samariamanta huarmica: “¿Canca judío cashca jahuachu, Samaria llajtamanta ñuca cajpipish yacuta cuchun mañangui?” nirca. (Judiocunaca Samaria llajtapi causajcunahuanca mana apanacuncunachu).
10 Chashna nijpimi Jesusca: “Dios canman imata cusha nishcata yachashpa, ‘Ubyangapaj asha yacuta cuhuai’ nishpa pi mañacujta yachashpaca canrajmi yacuta mañanguiman carca. Paica causaita cuj yacutami canmanca cunman carca” nirca.
11 Chashna nijpimi chai huarmica cashna nirca: “Amito, yacuta huishingapajca imata mana charinguica, yacu pugyupish ucujmanmari. ¿Maimantataj causaita cuj yacutaca cunguiyari?
12 ¿Canca ñucanchij ñaupa yaya Jacobta yallichari cangui? Paimari cai pugyutaca ñucanchijman saquirca. Paipish, paipaj huahuacunapish, paipaj animalcunapish cai pugyumantami ubyarcacuna” nirca.
13 Shina nijpimi Jesusca paimanca cashna cutichirca: “Cai yacuta ubyajcunaca cutinmi yacunachingacuna.
14 Ñuca cushca yacuta ubyajca mana ashtahuan yacunachingachu. Ashtahuanpish ñuca cushca yacuca, paipica pugyumanta llujshicuj yacu shinami paimanca huiñai causaita cunga” nircami.
15 Chashna nijpimi chai huarmica: “Amito, ama cutin yacunachingapaj, cai pugyumanpish ama cutin cutin shamucungapaj chai yacuta cuhuai” nirca.
16 Shina nijpimi Jesusca: “Ri, cambaj cusata cayamugri” nirca.
17 Chashna nijpimi chai huarmica: “Mana cusayuj canica” nishpa cutichirca. Chaimi Jesusca: “‘Mana cusayuj cani’ nishpaca allitami nishcangui.
18 Canca pichca cusacunatami charircangui. Cunan canhuan causacuj cꞌaripish mana cambaj cusachu. Chashna nishpaca mana llullashcanguichu” nirca.
19 Chaimi chai huarmica: “Amito, canca profetami caj yuyachingui.
20 Ñucanchij ñaupa yayacunaca cai urcupimi Diostaca adorajcuna carca. Ashtahuanpish cancunaca Jerusalenllapimi Diostaca adorana canchij ninguichijmi” nirca.
21 Chaimi Jesusca: “Huarmi, ñuca huillashcata criyari. Cancunaca cai urcupipish, Jerusalenpipish Diostaca* ña mana adoranguichijchu. Chai punllaca ñamari chayamucun.
22 Cancunaca pita adoracushcataca mana yachanguichijchu. Ñucanchijca pita adoracushcataca yachanchijmi. Gentecuna quishpirinaca judiocunamantami shamun.
23 Diosta* alli adorajcunaca espíritu santo yuyaita cushca shina, mana llullashpa yachachishca shinami adorangacuna. Chai punllaca chayamungami. Cunanmari chai punllaca ña chayamushca. Diosca* paita chashna adorasha nijcunatami mashcacun.
24 Diosca shuj espiritumi can. Diosta adorajcunaca paipaj espíritu yuyaita cushca shina, mana llullashpa yachachishca shinami adorana can” nircami.
25 Chashna nijpimi chai huarmica: “Cristo nishca Mesías shamuna cashcataca yachanimi. Pai shamushpami tucuita huillanga” nirca.
26 Shina nijpimi Jesusca: “Chaica ñucamari cani. Canhuanmari parlacuni” nirca.
27 Jesús chai huarmihuan parlacujpimi paita catijcunaca chayamurcacuna. Chai huarmihuan parlacujta ricushpami mancharircacuna. Chashnapish paicunamantaca ni maijan “¿Imatataj ruracungui? ¿Imamantataj chai huarmihuanca parlacungui?” nishpallapish Jesustaca mana tapurcacunachu.
28 Chai huarmica paipaj puñu yacuta chaipi saquishpami, puebloman rishpa gentecunaman cashna nirca:
29 “Shamuichij shuj runata ricunguichij. Paica ñuca tucui imalla rurashcatami huillarca. ¿Manachu paica Cristo canga imashi?” nircami.
30 Chaita uyashcahuanmi gentecunaca chai pueblomanta llujshishpa Jesusta ricunaman rircacuna.
31 Chaicamaca Jesusta catijcunaca cutin cutinmi: “Yachachij,* imallatapish micui” nicurcacuna.
32 Shinapish Jesusca: “Ñuca micungapajca cancuna mana yachashca micunatami charini” nircami.
33 Chashna nijpimi Jesusta catijcunaca, caishuj chaishuj parlanacushpaca: “¿Pishi paipajca micunata apamurca?” nircacuna.
34 Chaimi Jesusca: “Ñuca micunaca ñucata cachaj Yayapaj munaita rurana, pai rurai nishcatapish tucui pajtachinamari.
35 Cancunaca granota tandangapajca chuscu quillacunami illan ninguichijmi ¿nachu? Shinapish ñucaca cashnami nini: chagracunata huichilla ricuichij, granocunaca yurajllami ña tandangapaj tiyacun. Ñami
36 tandaj runaca paipaj pagota japicun, huiñai causaipaj granotapish ñami tandacun. Chaimantami tarpujpish, tandajpish ishquindij cushicuncuna.
37 Chashnami caipica “Shujca tarpujmi, caishujca tandajmi” nishca pajtarin.
38 Ñucaca cancuna mana tarpushcatami tandanaman cacharcani. Shujtajcunami trabajarcacuna. Shinapish paicuna rurashcamantami cancunaca allicunata japicunguichij” nirca.
39 Samaria llajtapi causajcunaca achcacunami chai huarmi huillajpica Jesuspi feta churarcacuna. Chai huarmica: “Ñuca imalla rurashcatami tucuita huillarca” nishcami carca.
40 Samaria llajtamanta gentecuna Jesusta ricunaman rishpaca, paicunahuan saquirichunmi mañarcacuna. Chashna mañajpimi Jesusca ishqui punllacunata paicunahuan saquirirca.
41 Jesús yachachishcata uyashpaca achcacunami paipi crircacuna.
42 Chaimantami chai huarmitaca: “Ña mana can huillashcallamantachu crinchij. Ñucanchijllatajmi paitaca uyashcanchij. Pai quiquintaj cai pachata quishpichij cashcatapish cunanca yachanchijmi” nircacuna.
43 Jesusca ishqui punllacuna huashami chai llajtamanta llujshishpa Galilea llajtaman rirca.
44 (Jesusllatajmi shuj profetataca quiquin llajtapica mana alli chasquincunachu nishpa huillarca).
45 Galilea llajtaman chayajpica chaipi causajcunaca Jesustaca allimi chasquircacuna. Paicunapishmi Jerusalén fiestaman rishcacuna carca. Chaipimi Jesús tucui imalla rurashcata ricushcacuna carca.
46 Chai qꞌuipami Jesusca Galileapi caj Caná puebloman cutinllataj tigrarca. Chai pueblopimi yacumanta vinota rurashca carca. Chaipica reyta sirvij shuj runami tiyarca. Paipaj churica Capernaúm llajtapimi ungushca carca.
47 Judeamanta Galileaman Jesús shamushcata uyashpami chai runaca paita ricunaman rirca. Jesusta ricushpaca Capernaúm llajtaman uriyashpa, paipaj ungushca churita alliyachichunmi mañarca. Paipaj churica ñallami huañugrirca.
48 Ashtahuanpish Jesusca chai runataca: “Cancunaca milagrocunata, jatun mancharinacunata mana ricushpaca manataj cringuichijchu” nircami.
49 Shinapish reyta sirvijca: “Amito, ñuca huahua manaraj huañujpi utca jacupai” nircami.
50 Chashna nijpimi Jesusca: “Cambaj huasiman tigrailla. Cambaj churica ñami alliyashca” nirca. Chai runaca Jesús nishcata crishpami chaimanta rircalla.
51 Pai huasiman tigracujpimi paita sirvijcuna tupanaman shamushpaca, cambaj churica ñami alliyashca nishpa huillarcacuna.
52 Chashna huillajpimi chai runaca, ¿ima horastaj paica alliyarcari? nishpa tapurca. Shina tapujpimi paicunaca: “Caina casi la una de la tarde cajpimi fiebre ungüica paimanta anchurca” nircacuna.
53 Chashna nijpica chai horasllataj cajpi: “Cambaj churica ñami alliyashca” nishpa Jesús nishcatami chai yayaca yuyarirca. Chaimantami paipish, paipaj huasipi tucui cajcunapish Jesusta catijcuna tucurca.
54 Jesusca Judeamanta Galileaman cutin shamushpaca, caihuanca ñami ishqui milagrocunata rurarca.
Notacuna
^ “Bautizana” shimita huasha diccionariopi ricui.
^ Griego rimaipica: “Amitopish” ninmi.
^ “Samaria” shimita huasha diccionariopi ricui.
^ Griego rimaipica: “Yayataca” ninmi.
^ Griego rimaipica: “Yayata” ninmi.
^ Griego rimaipica: “Yayaca” ninmi.
^ O “Rabí”.
