Juan 9:1-41
9 Jesús chaita pasacushpaca huacharishca punllamanta mana ricuj runatami ricurca.
2 Chaimi Jesusta catijcunaca: “Yachachij,* ¿cai runa mana ricuj huacharichunca pitaj juchata rurarca, pai o paipaj yaya mama?” nishpa tapurcacuna.
3 Chashna tapujpimi Jesusca: “Cai runapish, paipaj yaya mamapish ima juchata mana rurarcacunachu. Ashtahuanpish Dios imata rurai tucushcata gentecuna ricuchunmi chashna tucurca.
4 Punllaraj cajpimi ñucata cachaj rurai nishcataca rurana canchij. Tutayajpica ni pi mana trabajai tucunchu.
5 Ñucaca cai pachapi cashparajca gentecunapaj* luzmi cani” nirca.
6 Chashna nishca qꞌuipami Jesusca pambapi chꞌucashpa allpahuan chapushpa lodota rurarca. Chashna rurashpami chai runapaj ñahuicunapi lodota churarca.
7 Chai huashami Jesusca: “Siloam cucha yacuman rishpa maillarigri” nirca. Chaimi chai runaca Siloam yacuman rishpa maillarirca. Chaimanta tigramushpaca paica ñami ricui tucurca. (Siloam shimica “cachashca” nisha ninmi).
8 Chaimi paipaj vecinocunapish, caridadta mañashpa tiyacuj cashcata ricujcunapish: “Cai runaca caridadta mañashpa tiyajmi ¿nachu?” ninacurcacuna.
9 Maijancunaca: “Paitajmari” nircacunami. Cutin shujtajcunaca: “Mana paichu. Shinapish pai layami ricurin” nircacunami. Chaimi alliyashca runaca: “Ñucallatajmari cani” nirca.
10 Chashna nijpimi paicunaca: “¿Ima shinataj ricui callarircangui?” nishpa tapurcacuna.
11 Shina tapujpimi paica: “Jesús shuti runami allpahuan lodota rurashpa ñuca ñahuicunapi churarca. Chai huashaca: ‘Siloam yacuman rishpa maillarigri’ nircami. Chashna nijpimi chaiman rishpa maillarircani. Qꞌuipaca ña ricui callarircanillami” nishpa cutichirca.
12 Chashna nijpimi paicunaca: “¿Maipitaj chai runaca?” nishpa tapurcacuna. Chaimi paica: “Mana yachanichu” nirca.
13 Paicunaca ñaupaman mana ricuj runataca fariseocunapajmanmi pusharcacuna.
14 Jesús allpahuan lodota rurashpa chai runata alliyachishca* punllaca sábado punllami carca.
15 Chaipimi fariseocunapish pai ima shina ricui callarishcata tapurcacuna. Shina tapujpimi chai runaca: “Ñuca ñahuicunapi lodota churajpimi maillarircani. Chaimi cunanca ña ricui tucuni” nirca.
16 Shina nijpimi huaquin fariseocunaca: “Chai runaca mana Diosmantachu shamun. Chaimantami paica sábado punllamanta mandashcataca mana pajtachin” nircacuna. Cutin shujtajcunaca: “¿Shuj juchayuj runaca ima shinataj cashna milagrocunataca rurai tucungari?” nircacunami. Chashna ninacushpami paicunapuraca mana shuj yuyailla tucurcacuna.
17 Cutinllatajmi ñaupaman mana ricuj runataca: “Chai runami cantaca alliyachirca.* ¿Paimantaca imatataj yuyangui?” nircacuna. Shina nijpimi chai runaca: “Paica shuj profetamari can” nirca.
18 Shinapish judiocunaca pai mana ricuj cashcata, cunanca ña ricui tucushcatapish mana crircacunachu. Chaimantami chai runapaj yaya mamata cayanaman cacharcacuna.
19 Chaipimi paicunaca: “¿Caichu cancunapaj churi? Mana ricujmi huacharirca ninguichijmi ¿nachu? ¿Cunanca ima shinataj ricui tucunyari?” nishpa tapurcacuna.
20 Chashna tapujpimi chai runapaj yaya mamaca cashna cutichirca: “Ari, ñucanchij churimi. Paica mana ricujmi huacharirca.
21 Shinapish pai ima shina cunan ricujtaca mana yachanchijchu. Pi alliyachishcatapish* mana yachanchijchu. Paica ñami mayor de edad can. Paillataj huillachun paita tapuichijlla” nircacuna.
22 Chai runapaj yaya mamaca judiocunata manchashcamantami chashna cutichircacuna. Judiocunaca maijanpish Jesusta Cristomi can nijtaca sinagogamanta* llujshichishpa cachanatami yuyarishcacuna carca.
23 Chaimantami chai runapaj yaya mamaca: “Paica ñami mayor de edad can. Paita tapuichijlla” nircacuna.
24 Cutinllatajmi ñaupaman mana ricuj runata cayashpaca: “Diosca ricucunmi, mana llullashpa huillai.* Ñucanchijca chai runa juchayuj cashcataca yachanchijmi” nircacuna.
25 Chashna nijpimi paica: “Chai runa juchayuj cashcataca mana yachanichu. Ñucaca ñaupaman mana ricuj cashpapish cunanca ricuj cashcallatami yachani” nirca.
26 Shina nijpimi paicunaca: “¿Imatataj rurarcari? ¿Paica ima shinataj cantaca alliyachircari?”* nishpa tapurcacuna.
27 Chashna tapujpimi ñaupaman mana ricuj runaca: “Ñami cancunamanca huillarcani. Shinapish cancunaca mana uyashun nircanguichijchu. ¿Imamantataj cutin uyasha ninguichijyari? ¿Cancunapishchu paita catij tucushun nicunguichij?” nishpa cutichirca.
28 Chashna nijta uyashpami paicunaca pꞌiñarishpa cashna nircacuna: “Canmi chai runata catij cangui. Ashtahuanpish ñucanchijca Moisesta catijcunami canchij.
29 Ñucanchijca Moisesman Dios rimashcataca yachanchijmi. Shinapish cai runa maimanta shamushcataca mana yachanchijchu” nircacunami.
30 Chaipimi chai runaca cashna nirca: “Paimi ñucataca alliyachirca.* ¿Chai jahuachu pai maimanta shamushcataca mana yachanguichij? Chaitaca manataj crinichu.
31 Ñucanchijca juchayujcuna mañashcata Dios mana uyaj cashcataca yachanchijmi. Shinapish paita manchajta, paipaj munaita rurajtaca Diosca uyanmi.
32 Huacharishca punllamanta shuj mana ricuj runata pi alliyachishcataca* nunca mana uyashcanchijchu.
33 Cai runa Diosmanta mana shamushca cashpaca imata mana rurai tucunmanchu” nircami.
34 Chashna nijpimi paicunaca: “Canca yallitaj juchayujmi huacharircangui. ¿Chashna jahuachu ñucanchijtaca yachachisha ningui?” nircacunami. Chashna nishca qꞌuipaca chaimanta llujshichishpami cacharcacuna.
35 Jesusca chai runata llujshichishpa cachashcatami yachaj chayarca. Paihuan tupashpaca: “Canca, ¿Runapaj Churipi cringuichu?” nishpami tapurca.
36 Shina tapujpimi chai runaca: “Amito, ¿paica pitaj canyari? Ñuca paipi cringapaj huillahuai” nirca.
37 Chashna nijpimi Jesusca: “Paitaca ñami ricushcangui. Paihuanmi parlacungui” nirca.
38 Chashna nijpimi chai runaca: “Amito, canpica crinimi” nishpa Jesuspaj ñaupajpi cungurirca.
39 Chaimi Jesusca: “Cai pachamanca gentecuna* juzgashca cachunmi shamurcani. Mana ricujcuna ricuchun, ricujcunapish ama ricuchunmi shamurcani” nirca.
40 Chaipi caj fariseocuna chaita uyashpaca: “¿Ñucanchijpish mana ricujcuna cashcatachu yuyangui?” nircacunami.
41 Chashna nijpimi Jesusca: “Mana ricujcuna cashpaca ima juchamanta mana culpayuj canguichijmanchu. Ashtahuanpish cancunaca ‘Ricujcunami canchij’ nishcamantami juchamanta culpayuj canguichij” nirca.
Notacuna
^ O “Rabí”.
^ Griego rimaipica: “cai pachapaj” ninmi.
^ Griego rimaipica: “ñahuicunata pascashca” ninmi.
^ Griego rimaipica: “cambaj ñahuicunata pascarca” ninmi.
^ Griego rimaipica: “paipaj ñahuicunata pascashcatapish” ninmi.
^ O “tandanacuna huasimanta”.
^ Griego rimaipica: “Diosta jatunyachi” ninmi.
^ Griego rimaipica: “cambaj ñahuicunata pascarcari” ninmi.
^ Griego rimaipica: “ñuca ñahuicunata pascarca” ninmi.
^ Griego rimaipica: “ñahuicunata pascashcataca” ninmi.
^ Griego rimaipica: “Cai pacha” ninmi.
