Jueces 15:1-20
-
Sansón filisteocunata llaquichishcamanta (1-20)
15 Asha tiempo qꞌuipaca trigota cosechana punllacunapimi Sansonca shuj huahua chivota apashpa paipaj huarmita ricunaman rirca. Chaiman chayashpaca Sansonca paipaj huarmipaj yayataca: “Ñuca huarmipaj dormina cuartomanmi yaicusha nini” nircami. Pero chai huarmipaj yayaca mana yaicuchun saquircachu.
2 Chai huarmipaj yayaca: “Canca paita mana cꞌuyashcatami yuyarcani. Chaimantami cambaj amigoman paitaca curcani. Pero ¿manachu paipaj qꞌuipa ñaña ashtahuan sumaj can? Paipaj randi paihuan saquirichunmi rogapani” nircami.
3 Ashtahuanpish Sansonca: “Filisteocunata cunan llaquichijpica paicuna ñucataca mana culpai tucungacunachu” nircami.
4 Sansón chaimanta rishpaca 300 zorrocunatami japirca. Qꞌuipaca mechacunatami japirca. Shinallataj zorrocunataca ishqui ishqui japishpami paicunapaj chupacunata huatarca. Chashna huatashpaca zorrocunapaj chupa chaupipimi shuj mechata churarca.
5 Chai huashaca mechacunapi ninata japichishpami filisteocunapaj granocunata tarpushca chagracunapi zorrocunata cacharirca. Chashnami Sansonca trigo gavillacunatapish, espigapi caj granota manaraj cuchushcatapish, uva chagracunatapish, olivo chagracunatapish tucui rupachirca.
6 Filisteocunaca: “¿Caitaca pitaj rurashcayari?” nishpami tapurcacuna. Chaimi: “Caitaca Timná llajtapi causaj runapaj yerno Sansonmi rurarca. Timná llajtapi causaj runaca Sansonpaj huarmita quichushpami jatun micuiman compañaj jovenman curca” nishpa cutichircacuna. Chaita uyashpami filisteocunaca chaiman huichiyashpa chai huarmitapish, paipaj yayatapish rupachircacuna.
7 Chaimi Sansonca filisteocunamanca: “Cancuna caita rurashcamantaca ñucapish cancunata llaquichingacama manataj samarishachu” nirca.
8 Chashna nishpami paica shuj shuj huajtai callarishpa achcacunata huañuchirca. Qꞌuipa chaimanta uriyashpami Etampi tiyaj jatun cꞌaca jutcupi* saquirirca.
9 Chai huashaca filisteocunaca Judá llajtaman huichiyashpami carpa huasicunapi saquirircacuna. Chashnami paicunaca Lehí allpapi shuj ladomanta caishuj ladocama purircacuna.
10 Chaimi Judapaj familiamanta runacunaca paicunataca: “¿Ñucanchijpaj contraca imapajtaj shamushcanguichijyari?” nishpa tapurcacuna. Chashna tapujpimi paicunaca: “Ñucanchijca Sansonta japishpa ima shinami pai ñucanchijta rurarca, chashnallataj rurangapajmi shamushcanchij” nircacuna.
11 Chaimi Judapaj familiamanta 3.000 runacunaca Etampi tiyaj cꞌaca jutcuman rishpa Sansontaca: “¿Filisteocuna ñucanchijta mandajcuna cashcataca manachu yachangui? ¿Imamantataj canca cai llaquita ñucanchijpaj apamushcangui?” nishpa tapurcacuna. Chashna tapujpimi Sansonca: “Paicuna ñucata imata rurashcallatami paicunatapish rurarcani” nirca.
12 Chaimi chai runacunaca: “Canta japishpa* filisteocunaman entregangapajmi shamushcanchij” nircacuna. Chashna nijpimi Sansonca: “Cancuna ñucata mana huañuchina cashcata juraichij” nishpa mañarca.
13 Chashna nijpimi chai runacunaca: “Cantaca mana huañuchishunchu. Canta huatashpa filisteocunaman entreganallatami munanchij” nircacuna.
Chaimi chai runacunaca ishqui mushuj huascacunahuan Sansonta huatashpa chai cꞌacamanta llujshichishpa paita apashpa huichiyarcacuna.
14 Lehí lugarman Sansón shamujta ricushpami filisteocunaca mishashcanchijmi nishpa caparircacuna. Paicuna chashna caparicujpimi Jehová Diospaj espirituca Sansonman poderta curca. Chaimi paipaj rigracunapi huatashca huascacunaca ninahuan rupachishca lino puchca shina pꞌitirirca. Shinallataj cadenacunaca paipaj maquicunamantaca yacuyaj shinami urmarca.
15 Sansonca shuj burropaj quijada manaraj chaquishcatami japirca. Chai burropaj quijada tulluhuanmi 1.000 cꞌaricunata huañuchirca.
16 Chaimi Sansonca:
“¡Shuj burropaj quijada tulluhuanmi contracunata huañuchishpa montón montonta rurarcani!
Shuj burropaj quijada tulluhuanmi 1.000 runacunata huañuchishcani” nirca.
17 Chashna rimanata tucuchishpami burropaj quijadata shitarca. Chai lugartapish Ramat-Lehí* nishpami shutichirca.
18 Sansonca yallitaj yacunaihuan cashpami Jehová Diostaca: “Canta sirvijtaca quishpichishpamari canca ayudashcangui. Cunanca ñuca yacunaihuan huañuchunpish, circunsicionta mana rurashcacunapaj maquipi urmachunpish ama saquihuaichu” nishpa mañarca.
19 Chaimi Diosca Lehí lugarpi tiyaj shuj jutcu pascarichun saquirca. Chai jutcu pascarijpica yacumi llujshi callarirca. Sansonca chai yacuta ubyashpami cutin alli tucushpa fuerzata japirca.* Chaimantami Sansonca Lehí lugarpi tiyaj chai pugyu yacutaca En-Hacore* nishpa shutichirca. Chai lugarca cunan punllacunacamami chai shutita charin.
20 Filisteocuna mandacun punllacunapica Sansonca 20 huatacunatami Israelpi juzgaj carca.
Notacuna
^ O “chijtarishcapi”.
^ O “huatashpa”.
^ “Ramat-Lehí” shutica ‘quijada urcu’ nisha ninmi.
^ Hebreo rimaipica: “paipaj espíritu tigrarca” ninmi.
^ “En-Hacore” shutica ‘cayajpaj pugyu’ nisha ninmi.
