Lucas 2:1-52
-
Jesús huacharishcamanta (1-7)
-
Michijcunapaj ñaupajpi angelcuna ricurishcamanta (8-20)
-
Circuncisionmanta, chuyayarinamantapish (21-24)
-
Simeón runaca Cristotami ricurca (25-35)
-
Anaca Jesusmantami huillarca (36-38)
-
Josepish, Mariapish Nazaretmanmi tigrarcacuna (39, 40)
-
Jesús 12 huatacunata charishpa Diospaj huasipi cashcamanta (41-52)
2 Chai punllacunapica Roma llajtata mandaj* Augustoca, chai llajtapi causajcuna censota* rurashpa tucuicuna quillcarichunmi mandarca.
2 (Quirinio shuti runa Siria llajtata mandacujpimi, punta cutin censota rurarcacuna).
3 Chashna mandajpimi shuticunata quillcachingapaj tucuicuna paicunapaj huacharishca llajtaman tigrarcacuna.
4 Chaimantami Josepish Galileapi caj Nazaret llajtamanta, Judeapi caj Belén shuti puebloman rirca. Cai llajtaca Davidpaj llajta nishcami carca. Joseca Davidpaj familiapura cashcamantami chaimanca rirca.
5 Joseca paipaj huarmi Mariandijmi shuticunata quillcachingapaj rircacuna. Chai punllacunapimi Mariaca ñalla huahuata huachagrirca.
6 Paicuna Belenman chayashca huashami Mariapajca huachana punlla pajtarca.
7 Chaipimi paipaj punta cꞌari huahuataca huacharca. Samarina huasicuna junda cashcamantami huahuata huachashpaca telacunahuan maitushpa animalcunaman caranapi sirichirca.
8 Chai cꞌuchulla llajtacunapica michijcunami causajcuna carca. Paicunaca cada tutami paicunapaj ovejacunata cuidashpa canllapi pacarijcuna carca.
9 Chaipimi Jehová* Diospaj angelca ñapish ricurirca. Jehová* Diospaj luzpish tucui paicunapaj muyundijpimi achijyachirca. Chaita ricushpami paicunaca achcata mancharircacuna.
10 Shinapish chai angelca cashnami nirca: “Ama manchaichijchu. ¡Ricuichij! Alli huillaicunata huillangapajmi shamushcani. Cai huillashcata uyashpaca, tucui gentecunami cushicungacuna.
11 Cunanmi Davidpaj llajtapica shuj quishpichij huacharishca. Paica Cristo, Amitopishmi can.
12 Cancuna rishpaca animalcunaman caranapimi telahuan maitushca shuj huahua siricujta ricunguichij. Chashnami pai cashcata yachanguichij” nircami.
13 Chai ángel chashna nicujpimi ñapish achca angelcuna* shamushpaca chai angelhuan Diosta alabashpa cashna nircacuna:
14 “Diosca jahua pachapi alabashca cachun. Cai allpapipish Diospaj ñaupajpi alli cajcunaca sumaj causaita charichun” nircacunami.
15 Chashna nishca qꞌuipami angelcunaca jahua pachaman tigrarcacuna. Chai huashami michijcunaca paicunapura parlanacushpaca: “Jehová* Dios ñucanchijman huillashcata ricungapaj imalayapish Belenman jacuchij” nircacuna.
16 Chaimantami paicunaca utca rishpa Mariahuanpish, Josehuanpish tuparcacuna. Animalcunaman caranapi llullu huahua siricujtami ricurcacuna.
17 Chaita ricushpami paicunaca chai huahuamanta ángel imalla nishcata huillarcacuna.
18 Michijcuna huillashcata uyashpaca tucuicunami mancharircacuna.
19 Ashtahuanpish Mariaca imalla uyashcataca paipaj shungupimi huaquichirca. Chai nishcacuna ima nisha nishcatapish yuyaricurcallami.
20 Michijcunaca paicunaman huillashca shinallataj tucushcata ricushpa, uyashpaca Diosta jatunyachishpa, pagui nishpami tigrarcacuna.
21 Pusaj punllacuna qꞌuipami huahuataca circuncisionta* rurachishpa Jesús shutita shutichircacuna. María manaraj chichu saquirijpimi angelca chai shutita churachun mandashca carca.
22 Ashtahuanpish Moisesman cushca leypi nishca shinami paicuna chuyayarina punlla pajtashca qꞌuipa, Jehová* Diosman ricuchingapaj huahuataca Jerusalenman aparcacuna.
23 Jehová* Diospaj Leypi quillcashca shinallatajmi rurarcacuna. Leypica: “Punta cꞌari huahuacunaca Jehová* Diospajmi chꞌicanyachishca canga” ninmi.
24 Shinallataj Jehová* Diospaj Leypi nishca shinami paicunaca shuj sacrificiota rurarcacuna. Leypica: “Ishqui urpita cashpapish, ishqui uchilla palomata cashpapish cungui” ninmi.
25 Chai punllacunapica cashcata ruraj, Diosta tucui shunguhuan sirvij Simeón shuti runami Jerusalenpica causarca. Israel llajtata Dios quishpichichunmi paica shuyacurca. Paica Diospaj espíritu santohuan jundami carca.
26 Shinallataj Diosca paipaj espíritu santohuanmi Jehová* cachashca Cristota ricungacama mana huañuna cashcata Simeonman huillarca.
27 Diospaj espíritu santo yuyachijpimi Simeonca Diospaj huasiman yaicurca. Pai chaipi cajpimi, Jesuspaj yaya mamaca Leypi nishca shina rurangapaj Diospaj huasiman Jesustaca pushamurcacuna.
28 Chaipimi Simeonca huahuata marcashpa, Diosta alabashpaca cashna nirca:
29 “Tucuita Mandaj Amito, can nishca shinami huahuataca ricushcani. Cunanca ña cushilla huañui tucunillami.
30 Quishpichinaman shamujtaca ñuca ñahuihuantajmi ricushcani.
31 Canmi tucui gentecuna ricuchun paitaca cachashcangui.
32 Paica shujtaj llajtamanta gentecuna ricuchun achijyachij luzmi. Cambaj llajta Israeltapish shujtaj llajtacunata yallimi ruranga” nircami.
33 Huahuamanta chashna nijta uyashpami huahuapaj yaya mamaca achcata mancharircacuna.
34 Ashtahuanpish Simeonca paicunata bendiciashca qꞌuipami huahuapaj mama Mariataca: “¡Ricui! Diosmi cai huahuataca cachashca. Israelpica paimantami huaquincunaca urmangacuna, cutin shujtajcunaca jataringacuna. Dios paihuan cashcata ricuchijpipish, achcacunami paitaca pꞌiñashpa rimangacuna.
35 Chashnami achcacunaca shungupi ima charishcata ricuchingacuna. (María, cambaj shunguta* shuj jatun espada chaupij shinami achcata llaquiringui)” nircami.
36 Chaipica Fanuelpaj ushushi Ana shuti profetapishmi carca. Paica Aserpaj familiamantami carca. Chai huarmica ñami yuyaj carca, cazarashcamantaca canchis huatacunallatami paipaj cusahuan causashca carca.
37 Cunanca chai viuda huarmica ñami 84 huatayuj carca. Paica siempremi Diospaj huasiman shamuj carca. Chaipimi tutapish, punllapish ayunashpa, rogarishpa Diosta mañashpa adoraj carca.
38 Chai huarmipish chai horasllatajmi paicunapajman cꞌuchuyashpaca Diosta pagui nirca. Shinallataj Jerusalenta quishpichichun shuyacujcunamanmi chai huahuamanta huillarca.
39 Jehová* Diospaj Leypi nishcata tucui pajtachishpaca Josepish, Mariapish Galileapi caj paicuna causacushca Nazaret llajtamanmi tigrarcacuna.
40 Chai huahuaca huiñashpa, sinchi tucushpami catirca. Shinallataj ashtahuan alli yachajpishmi tucurca. Diospaj ñaupajpipish alli ricurishpami catirca.
41 Jesuspaj yaya mamaca cada huatami Jerusalenpi Pascua fiestaman rijcuna carca.
42 Ñaupa huatacunaman rij shinallatajmi Jesús 12 huatacunata charijpica chai fiestaman rircacuna.
43 Chai fiesta punllacuna tucurijpimi paicunaca huasiman tigracurcacuna. Shinapish Jesús Jerusalenpi saquirishcataca paipaj yaya mamaca mana cuentata curcacunachu.
44 Tucui gentecunapurapi Jesús shamucushcata yuyashpami, shuj punlla enterota purishpa rircallacuna. Chaimantami paicunapaj familiacunata, rijsishcacunata tapushpa mashcai callarircacuna.
45 Shinapish mana japishpami Jerusalenman tigrashpaca tucui ladocunapi mashcarcacuna.
46 Quimsa punllacunata mashcashca qꞌuipami Diospaj huasipi japircacuna. Paica yachachijcunata uyashpa, tapushpami paicunapaj chaupipi tiyacurca.
47 Chaipi uyajcunaca tucuicunami Jesús mashnata yachaj cashcata ricushpa, tapuicunatapish ima shina cutichijta ricushpa mancharircacuna.
48 Chaipi cajta ricushpami paipaj yaya mamaca achcata mancharircacuna. Chaimantami paipaj mamaca: “Huahua, ¿ima nishpataj chashnaca rurarcanguiyari? Cambaj yayapish, ñucapish yallitaj sustarishpamari mashcacushcanchij” nirca.
49 Chashna nijpimi Jesusca: “¿Ima nishpataj ñucataca mashcacurcanguichij? ¿Ñuca Yayapaj huasipi cana cashcataca manachu yacharcanguichij?” nirca.
50 Chashna nijpipish paicunaca imata nicushcata mana intindircacunachu.
51 Jesusca paicunahuan Nazaretman tigrashpaca paicuna ima nishcatami cazushpa catirca. Paipaj mamapish tucui imalla nishcatami shungupi huaquichirca.
52 Jesusca huiñashpa, ashtahuan alli yachaj tucushpa, Diospaj ñaupajpipish, gentecunapaj ñaupajpipish alli ricurishpami catirca.
Notacuna
^ Griego rimaipica: “César” ninmi. Roma llajtata maijan mandajcunatami cai shutihuan rijsijcuna carca.
^ Mashna gentecuna causashcata yachangapaj, impuestota cobrangapaj, soldadocuna tucuchun gentecunata japingapajmi censota rurachun mandaj carca.
^ “Jehová” shutita huasha diccionariopi ricui.
^ “Jehová” shutita huasha diccionariopi ricui.
^ Griego rimaipica: “jahua pacha soldadocuna” ninmi.
^ “Jehová” shutita huasha diccionariopi ricui.
^ “Circuncisión” shimita huasha diccionariopi ricui.
^ “Jehová” shutita huasha diccionariopi ricui.
^ “Jehová” shutita huasha diccionariopi ricui.
^ “Jehová” shutita huasha diccionariopi ricui.
^ “Jehová” shutita huasha diccionariopi ricui.
^ “Jehová” shutita huasha diccionariopi ricui.
^ O “cambaj almata”. “Alma” shimita huasha diccionariopi ricui.
^ “Jehová” shutita huasha diccionariopi ricui.
