Lucas 21:1-38
-
Huajcha viuda huarmi ishqui uchilla cullquita churashcamanta (1-4)
-
IMALLA TUCUNAMANTA SEÑALCUNA (5-36)
-
Macanacuicuna, jatun terremotocuna, tucui laya ungüicuna, yaricaipish tiyanamanta (10, 11)
-
Jerusalén llajta muyundijpi soldadocuna shayacushcamanta (20)
-
“Shujtaj llajtamanta gentecunapaj agllashca tiempo” (24)
-
Runapaj Churi shamunamanta (27)
-
Higo yuramanta chꞌimbapurai (29-33)
-
“Rijcharishca caichij” nishcamanta (34-36)
-
-
Diospaj huasipi Jesús yachachishcamanta (37, 38)
21 Jesusca cullquita churana cajacunata ricucushpami achcata charij gentecuna chaipi cullquita churacujta ricurca.
2 Chaipica shuj huajcha viuda huarmipish ishqui uchilla cullquita* churacujtami ricurca.
3 Chaita ricushpami Jesusca cashna nirca: “Cancunamanca mana llullanichu. Cai huajcha viuda huarmimi tucui paicunamanta yalli churarca.
4 Charij gentecunaca tucuicunami sobrashcallata churarcacuna. Ashtahuanpish cai viuda huarmica huajcha cashpapish* pai causangapaj tucui charishcatamari churarca” nircami.
5 Chai qꞌuipami huaquincunaca Diospaj huasi alaja rumicunahuan, Diosman cushca cosascunahuanpish sumajta allichishca cashcata parlanacucurcacuna.
6 Chashna parlanacucujpimi Jesusca: “Tucuita tucuchina punllacunaca chayamungami. Cancuna ricucushcaca shuj rumillapish caishuj rumi jahuapica mana saquiringachu” nirca.
7 Chashna nijpimi paicunaca: “Yachachij, ¿ima horataj caicunaca chashna tucungari? ¿Ima señalta ricushpataj caicuna pajtamucushcataca yachashunyari?” nishpa tapurcacuna.
8 Chashna tapujpimi Jesusca cashna nirca: “Cancunata ama pandachichunca alli yuyaihuan canguichij. Achcacunami ñuca shutipi shamushpaca: ‘Ñucami Cristo cani’ ningacuna. Shinallataj ‘agllashca tiempoca ñamari chayamucun’ ningacunami. Chashna nijpipish paicunataca ama catinguichijchu.
9 Shinallataj jatun macanacuicunata, llaquicunata* uyashpaca ama mancharinguichijchu. Puntapica caicunami pajtarinataj can. Shinapish cai pachapaj ruraicunaca manaraj tucuringachu” nircami.
10 Jesusca caitapishmi nirca: “Shuj mama llajtaca caishuj mama llajtahuanmi macanacunga. Shuj gobiernoca caishuj gobiernohuanmi macanacunga.
11 Jatun terremotocunami tiyanga. Chꞌican chꞌican llajtacunapimi yaricaipish, tucui laya ungüicunapish tiyanga. Gentecunaca yallitaj mancharinacunatami ricungacuna. Shinallataj jahua pachamantaca jatun señalcunami ricuringa.
12 Shinapish caicuna manaraj pajtarijpimi gentecunaca cancunata japishpa, catirashpa llaquichingacuna. Shinallataj sinagogacunaman* pushashpami cancunataca juzgangacuna. Prezupipish churangacunami. Ñucata catijcuna cashcamantami jatun mandajcunapaj, llajtata mandajcunapaj ñaupajman pushashca canguichij.
13 Chashna rurajpipish cancunaca shujtajcunamanmi huillanguichij.
14 Chaimanta cancunapaj shungupica paicunaman ima shina cutichinataca ama ñaupaman yuyaringuichijchu.
15 Ñucami alli yachaita cushpa, imata ninatapish yachachishpa ayudasha. Chaipimi cancunata pꞌiñajcunaca imata mana cutichi tucungacuna.
16 Ashtahuanpish cancunapaj propio yaya mamacuna, huauquicuna, familiacuna, amigocunapishmi contracunapaj maquipi cancunataca churangacuna. Cancunamanta maijancunatacarin huañuchingacunami.
17 Ñucata catijcuna cashcamantami cancunataca tucui gentecuna pꞌiñangacuna.
18 Chashna cajpipish cancunapaj umamantaca shuj ajchallapish mana chingaringachu.
19 Tucuringacama ahuantashpaca cancunapaj causaitami* quishpichinguichij.
20 Jerusalén llajta muyundijpi soldadocuna shayacujta ricushpaca, chai llajtata tucuchina ñalla chayamucushcatami yachanguichij.
21 Chaita ricushpaca Judeapi cajcunaca urcucunapi miticugrichun. Jerusalenpi cajcunapish chaimanta llujshishpa richun. Campopi cajcunapish Jerusalenmanca ama yaicuchun.
22 Chai punllacunaca gentecunata Dios llaquichina punllacunami canga. Quillcachishcapi nishca shimicuna tucui pajtarichunmi chashna tucunga.
23 ¡Chichu huarmicunapish, huahuata chuchuchicuj huarmicunapish chai punllacunapica aij imachari tucungacuna! Cai allpapica achca llaquicunami tiyanga. Gentecunapish llaquichishcami cangacuna.
24 Maijancunataca espadahuanmi huañuchingacuna. Shujtajcunataca tucui llajtacunamanmi prezu apangacuna. Shujtaj llajtamanta gentecunapaj* agllashca tiempo tucui pajtangacamami Jerusalentaca shujtaj llajtamanta gentecunaca* sarungacuna.
25 Ashtahuanpish intipi, lunapi, estrellacunapimi señalcuna ricuringa. Muyundij allpapimi gentecunaca achca llaquicunata charingacuna. Mama cucha yacu caiman chaiman cuyurishpa manchanaita huajiacujpica imata ruranata mana yachangacunachu.
26 Jahua pachapi tiyashcacunaca cuyuchishcami cangacuna. Chaimantami cai pachapi jatun llaquicuna tiyagrishcamanta gentecunaca achcata mancharishpa, yallitaj sustarishpa chahuata huañungacuna.
27 Chai qꞌuipami gentecunaca Runapaj Churitaca pꞌuyupi poderhuan, dimastij achijnicuj shamucujta ricungacuna.
28 Tucui chaicuna ricuri callarijpica shayarishpa, cancunapaj umata jatarichichij. Cancunata quishpichina punllaca ñamari chayamucun” nircami.
29 Chashna nishca qꞌuipami Jesusca cai chꞌimbapuraita churashpaca: “Higo yuratapish, tucui caishuj yuracunatapish ricuichij.
30 Pꞌangacuna ña huiñamujta ricushpaca usia punllacuna chayamucushcatami yachanguichij.
31 Shinallatajmi caicuna pajtacushcata ricushpaca Diospaj Gobierno ña caillapi cashcata cancunapish yachanguichij.
32 Cancunamanca mana llullanichu. Cai punllapi causaj gentecunaca tucui caicuna pajtaringacama manataj huañungacunachu.
33 Jahua pachapish, cai pachapish chingaringami. Ashtahuanpish ñuca nishca shimicunaca manataj chingaringachu.
34 Chaimanta cancunallataj alli yuyaihuan causaichij. Cancunapaj shungupica achcata micuna yuyailla, achcata ubyana yuyailla ama canguichijchu. Cancunapaj causaimantapish ama sustarishpalla causanguichijchu. Ñataj chai punllaca cungashcapi cancunata japinman.
35 Chai punllaca tucui cai allpapi causajcunatami shuj trampa japij shina mana yuyashcapi ñapish japinga.
36 Chaimanta rijcharishca caichij. Tucui imalla tucunamanta quishpiringapaj, Runapaj Churipaj ñaupajpi shayaringapajpish Diosta rogarishpa mañaraichij” nircami.
37 Punllaca Diospaj huasipimi Jesusca yachachij carca. Cutin tutaca chaimanta rishpami Olivos yuracuna tiyan urcupi samarij carca.
38 Tucui gentecunami tutamanta ladoca Jesús yachachishcata uyangapaj Diospaj huasiman rijcuna carca.
Notacuna
^ Griego rimaipica: “ishqui leptones” ninmi. Ishqui leptontaca casi chunga minutocunata trabajashcamantami pagajcuna carca.
^ Griego rimaipica: “minishticushpapish” ninmi.
^ Caipica shujtajcunata llaquichij gentecunamantami parlacun.
^ O “tandanacuna huasicunaman”.
^ O “cancunapaj almatami”. “Alma” shimita huasha diccionariopi ricui.
^ O “Mana judiocunapaj”.
^ O “mana judiocunaca”.
