Marcos 3:1-35
3 Jesusca cutinllatajmi shuj sinagoga* ucuman yaicurca. Chaipica maqui chaquirishca* shuj runami tiyacurca.
2 Chai runata sábado punllapi Jesús jambijpi, paita juchachingapajmi fariseocunaca ricuracurcacuna.
3 Paicuna ricuracujpipish Jesusca maqui chaquirishca* runataca: “Jatari, cai chaupiman shamui” nircami.
4 Chashna nishca huashami Jesusca: “¿Sábado punllapica imata ruranataj alli canga? ¿Allita rurana o mana allita rurana? ¿Shuj runata* salvana o huañuchina?” nirca. Jesús chashna nijpimi paicunaca upalla saquirircacuna.
5 Chaipimi Jesusca pꞌiñarishpa muyundijta ricushpaca, paicunapaj shungu chꞌahuanyashca cajta ricushpa yallitaj llaquirishpa, chai runataca: “Cambaj maquita chutai” nirca. Chai runa maquita chutajpica paipaj maquica alliyarcallami.
6 Chashna rurajta ricushpami fariseocunaca chaimanta llujshishcahuan, Herodesta* catijcunahuan tandanacushpa Jesusta huañuchinata yuyarircacuna.
7 Chaimantaca paita catijcunandijmi Jesusca mama cucha ladoman rirca. Chaiman rijpimi Galileamanta, Judeamanta achca gentecuna paita catishpa rircacuna.
8 Shinallataj Jerusalenmanta, Idumeamanta, Jordán yacu caishuj ladomanta, Tiro, Sidón cꞌuchulla llajtacunamantapishmi Jesús imata ruracujta yachaj chayashpaca, achca gentecuna paipajman shamurcacuna.
9 Chai tucui gentecuna jundarishpa ama llapichunmi Jesusca paita catijcunataca shuj uchilla barcota listota charichun mandarca.
10 Achca ungushcacunata jambijta ricushpami, ancha ungushcacunapish tucuicuna Jesusta tuparishun nishpa tꞌangarinacucurcacuna.
11 Millai espíritu japishcacunapish Jesusta ricushpami paipaj ñaupajpi cungurishpaca: “¡Canca Diospaj Churimari cangui!” nishpa caparircacuna.
12 Shinapish Jesusca ñuca pi cashcataca ñataj piman huillanguichijman nishpami cutin cutin sinchita mandarca.
13 Chai qꞌuipami Jesusca shuj urcuman huichiyarca. Chaipimi paita catijcunapuramanta maijancunallata cayaj cacharca. Shina cayajpimi paicunaca Jesuspajman shamurcacuna.
14 Chashnami Jesusca 12 runacunata agllashpa, paicunataca apostolcuna nishpa shutichirca. Chai 12 apostolcunami Jesushuan purijcuna carca. Paicunatami Jesusca huillanaman cacharca.
15 Shinallataj demoniocunata* llujshichichunpishmi poderta curca.
16 Chai 12 apostolcunapaj shuticunaca: Simón (Jesusca paitami Pedro nishpa shutichirca),
17 Zebedeopaj churi Santiago, paipaj huauqui Juan (Jesusca paicunatami Boanerges nishpa shutichirca. Boanerges shutica “truenopaj churicuna” nisha ninmi),
18 Andrés, Felipe, Bartolomé, Mateo, Tomás, Alfeopaj churi Santiago, Tadeo, Cananita* nishca Simón,
19 Judas Iscariotepishmi carca (paimi qꞌuipaca contracunaman Jesusta entregarca).
Chai qꞌuipami Jesusca shuj huasiman yaicurca,
20 chai huasipica achca gentecunami cutinllataj jundarircacuna. Chaimantami Jesuspish, paita catijcunapish micungapajllapish tiempota mana charircacuna.
21 Chaita yachaj chayashpami Jesuspaj familiacunaca: “Paica locomari tucushca” nishpa Jesusta pushanaman shamurcacuna.
22 Mandashcacunata quillcajcunapish Jerusalenmanta shamushpaca: “Belcebumi* paitaca japishca. Paica demoniocunata mandaj poderta cujpimi demoniocunataca llujshichin” nircacunami.
23 Shina nicujpipish Jesusca paicunata cayashpami chꞌimbapuraicunata churashpa cashna nishpa parlai callarirca: “¿Ima shinataj Satanasca Satanasllatataj llujshichingayari?
24 Maijan llajtapipish gentecuna paicunapurallataj macanacujpica chai llajtapaj gobiernoca urmangami.
25 Shinallataj maijan familiapi paicunapura pꞌiñanacushpaca mana tandalla causai tucungachu.
26 Chashnallatajmi Satanaspish paillahuantaj macanacushpaca paipaj contra tucunga. Paihuan cajcunapish mana tandalla cangachu. Paipish mana ñaupajman cati tucushpami tucuringa.
27 Maijanpish sinchi runapaj huasimanta imalla charishcacunata shuhuasha nishpaca chai sinchi runatarajmi huatana can. Chashna rurashpallami huasipi ima tiyashcataca shuhuai tucunga.
28 Cancunamanca mana llullanichu. Diosca runacunapaj juchacunataca ima juchata rurajpipish tucuitami perdonanga. Paita ima shina cꞌamijpipish perdonangami.
29 Shinapish espíritu santota cꞌamijcunataca Diosca manataj perdonangachu. Paicunaca huiñaipajmi juchayuj nishca cangacuna” nircami.
30 Chaipi caj gentecuna: “Cai runataca millai espiritumi japishca” nishcamantami Jesusca chashna nirca.
31 Jesús chashna nicujpimi paipaj mamapish, paipaj huauquicunapish paita ricunaman shamurcacuna. Shinapish paicunaca canllapi saquirishpami, Jesusta cayachun shuj runata cacharcacuna.
32 Jesuspaj muyundijpica achca gentecunami tiyacurcacuna. Paicunaca: “Ricui, cambaj mamapish, cambaj huauquicunapishmi canllapi canta cayacuncuna” nircacunami.
33 Chashna nijpimi Jesusca: “¿Pitaj ñuca mama, pitaj ñuca huauquicunaca?” nishpa cutichirca.
34 Paipaj muyundijpi tiyacujcunata ricushpami Jesusca cashna nirca: “¡Ricuichij! ¡Caicunami ñuca mama, ñuca huauquicunapish!
35 Maijanpish Diospaj munaita rurajllami ñuca huauqui, ñuca pani, ñuca mamapish” nircami.
Notacuna
^ O “tandanacuna huasi”.
^ O “maquita mana cuyuchi tucuj”.
^ O “maquita mana cuyuchi tucuj”.
^ O “almata”. “Alma” shimita huasha diccionariopi ricui.
^ “Herodes” shimita huasha diccionariopi ricui.
^ O “supaicunata”.
^ O “Cushicuihuan ruraj”.
^ “Belcebú” shutica Satanaspaj caishuj shutimi. Paica demoniocunata mandajmi.
