Mateo 27:1-66
-
Pilatopajman Jesusta pushashcamanta (1, 2)
-
Judas sipi tucushcamanta (3-10)
-
Pilatopaj ñaupajpi Jesús shayacushcamanta (11-26)
-
Jesusta tucuicunapaj ñaupajpi burlarishcamanta (27-31)
-
Gólgota nishcapi Jesusta caspipi clavashcamanta (32-44)
-
Jesús huañushcamanta (45-56)
-
Pambana jutcupi Jesusta churashcamanta (57-61)
-
Pambana jutcuta cuidachun soldadocunata churashcamanta (62-66)
27 Ña pacarijpimi tucui sacerdotecunata mandajcunapish, autoridadcunapish* tucuicuna tandanacushpa Jesusta ima shina huañuchinata parlanacurcacuna.
2 Jesuspaj maquicunata huatashca qꞌuipami Judea llajtata mandaj Pilatopajman pushashpa paitaca entregarcacuna.
3 Jesusta contracunaman entregaj Judasca, Jesusta huañuchigrishcata yachashpami mana alli sintirirca. Chaimantami 30 moneda cullquitaca sacerdotecunata mandajcunaman, autoridadcunaman* tigrachinaman rirca.
4 Chaimi Judasca: “Culpata mana charij runata cancunaman entregashpaca juchatami rurashcani” nirca. Chashna nijpimi paicunaca: “¿Ñucanchijmanca imatataj huillanaman shamunguiyari? ¡Cantajchari imata ruranataca yachangui!” nircacuna.
5 Shina nijpimi Judasca chai 30 moneda cullquita Diospaj huasipi shitashpa rirca. Chai qꞌuipami paillataj sipitucurca.
6 Sacerdotecunata mandajcuna chai shitashca cullquita japishpaca: “Cai cullquica shuj runapaj yahuarmanta pagashcamari. Diosman cushca cullquita huaquichina cajapi cai cullquita churanaca mana allichu” nircacunami.
7 Paicunapura parlanacushca qꞌuipami, shujtaj llajtamanta shamujcuna huañujpi pambangapaj, chai cullquihuanca mirga allpata* randircacuna.
8 Chai allpataca cunancamami Yahuarhuan randishca Allpa nincuna.
9 Chashnami profeta Jeremías nishca shimicunaca pajtarirca. Jeremiasca: “Israelpaj huahuacunaca 30 moneda cullquita shuj runamanta pagangapajmi saquirircacuna.
10 Jehová* Dios ñucata mandashca shinallatajmi chai cullquihuanca mirga allpata* randircacuna” nircami.
11 Judea llajtata mandaj Pilatopaj ñaupajpi Jesús shayacujpimi Pilatoca: “¿Canchu judiocunata jatun mandaj cangui?” nishpa tapurca. Shina tapujpimi Jesusca: “Ari, canllatajmari chaita nicungui” nirca.
12 Shinapish sacerdotecunata mandajcuna, autoridadcuna* juchachicujpipish paica imata mana cutichircachu.
13 Chaimi Pilatoca: “¿Cai tucuita juchachishpa canta rimacujtaca manachu uyangui?” nishpa tapurca.
14 Chashna tapujpipish Jesusca shuj shimillatapish mana cutichircachu. Chaita ricushpami Pilatoca achcata mancharirca.
15 Pilatoca cada Pascua fiesta punllapimi gentecuna cacharichun munashca shuj prezuta cacharichij carca.
16 Chai punllacunapica tucuicuna rijsishca Barrabás shuti runami prezupi carca.
17 Chaimi Pilatoca chaipi tandanacushcacunataca: “¿Pitataj cacharichun munanguichij? ¿Barrabasta o Cristo nishca Jesusta?” nishpa tapurca.
18 Ashtahuanpish envidiallamanta Jesusta paiman entregashcatami Pilatoca cuentata curca.
19 Shinallataj juzgana asientopi Pilato tiyacujpimi paipaj huarmica cashna nishpa huillaj cacharca: “Chai cashcata ruraj runataca ama imata rurangui. Cunan dormicushpaca paita muscushpami achcata mancharircani” nirca.
20 Shinapish sacerdotecunata mandajcunapish, autoridadcunapish* ‘Barrabasta cacharichichun, Jesustaca huañuchichun mañaichij’ nishpami chaipi cajcunataca yachachircacuna.
21 Mandaj Pilatoca cutinllatajmi: “¿Cai ishqui runacunamantaca maijantataj cacharichichun ninguichij?” nishpa cutin tapurca. Chashna tapujpimi paicunaca: “¡Barrabastami cacharichun munanchij!” nircacuna.
22 Shina nijpimi Pilatoca: “¿Cristo nishca Jesustaca imatataj rurasha?” nirca. Chaimi tucui chaipi cajcunaca: “¡Paitaca huañuchi!”* nircacuna.
23 Chaipimi Pilatoca: “¿Imamantataj huañuchichun ninguichijyari? ¿Paica ima mana allitataj rurashcari?” nirca. Shina nijpipish chaipi cajcunaca: “¡Paitaca huañuchi!”* nishpami ashtahuan sinchita caparircacuna.
24 Tucuicuna caparirinacushpa ashtahuan bullata rurai callarijpimi Pilatoca imata mana rurai tucurca. Chaimantami yacuta japishpa gentecunapaj ñaupajpi maquicunata maillarirca. Chashna maillarishpaca: “Cai runa huañujpica* mana ñucapaj culpachu canga. Ashtahuanpish cancunami culpayuj tucunguichij” nircami.
25 Chaita uyashpami chaipi cajcunaca: “Ñucanchijpish, ñucanchij huahuacunapish paipaj huañuimantaca* culpayuj tucushunllami” nircacuna.
26 Chaimi Pilatoca Barrabasta cacharichirca. Cutin Jesustaca azotichishpami caspipi clavashpa huañuchichun soldadocunaman curca.
27 Chaimantaca Pilatopaj soldadocunaca, Pilatopaj huasi patioman pushashpami tucui soldadocunata Jesuspaj muyundijpi tandachircacuna.
28 Jesuspaj churanata llujshichishca qꞌuipaca amsa puca capatami churachircacuna.
29 Shinallataj shuj coronata cashahuan chꞌimbashpami Jesuspaj umapi churachircacuna. Paipaj alli lado maquipipish shuj carrizo caspitami charichircacuna. Chashna rurashpami paipaj ñaupajpi cungurishpaca: “¡Alabado,* judiocunata jatun mandaj!” nishpa burlarircacuna.
30 Chashnallataj chꞌucashpa, pai charicushca carrizo caspitapish quichushpami chai carrizo caspihuan umapi garrotircacuna.
31 Chashna burlarishca qꞌuipami amsa puca capata quichushpa, cutinllataj paipaj churanata churachishpa Jesustaca caspipi clavangapaj pusharcacuna.
32 Jerusalenmanta llujshicushpaca Cirene llajtamanta Simón shuti runahuanmi tuparcacuna. Chai runatami Jesusta llaquichina caspita* aparichun mandarcacuna.
33 Chaimanta rishpaca Gólgota nishcamanmi chayarcacuna. Gólgota shutica Uma Tullu nisha ninmi.
34 Chaiman chayashpaca jayaj qꞌuihuacunahuan chagrushca vinotami Jesusmanca curcacuna. Chai vinota probashpaca mana ubyasha nircachu.
35 Jesusta caspipi clavashca qꞌuipami paipaj jahua churanacunata japingapaj soldadocunaca sortearcacuna.*
36 Chashna rurashpami Jesusta cuidangapaj paicunaca tiyarircacuna.
37 Ashtahuanpish imamanta huañuna cashcata shujtajcuna ricuchunmi Jesuspaj uma jahuapica shuj tablata churarcacuna. Chai tablapica: “Caimi judiocunata jatun mandaj Jesús” nishpami quillcarcacuna.
38 Shinallataj Jesuspaj ladopimi ishqui shuhuacunata caspipi churarcacuna. Shujtaca alli ladoman, caishujtaca lluqui ladomanmi churarcacuna.
39 Chaita pasaj gentecunapish umata cuyuchishpami Jesustaca mana allita rimashpa
40 cashna nircacuna: “¡Canca Diospaj huasita urmachishpa, quimsa punllapi cutin shayachishami nircanguica. Diospaj churitaj cashpaca canllataj quishpiriyari. Cai llaquichina caspimantapish* uricuyari!” nircacunami.
41 Sacerdotecunata mandajcunapish, mandashcacunata quillcajcunapish, autoridadcunapish* tandanacushpami Jesusmanta chashnallataj burlarishpa cashna nircacuna:
42 “¡Paica shujtajcunataca quishpichircamari. Paillatajca mana quishpiri tucunchu! Israel llajtata jatun mandaj cashpaca llaquichina caspimanta* cunanllataj uriyachun. Chaipimi paitaca crishun.
43 Paipaj shungutapish Diospimi churashca. Shinaca Dios ayudasha nishpaca paita quishpichichunyari. Paica: ‘Diospaj Churimi cani’ nircami” nircacunami.
44 Jesuspaj ladopi caj caspicunapi churashca shuhuacunapishmi mana allita nishpa Jesustaca rimarcacuna.
45 Chaupi punlla shinamantaca, las tres de la tarde shinacamami tucui chai llajtaca* amsayarca.
46 Las tres de la tarde shina cajpimi Jesusca sinchita caparishpa cashna nirca: “Éli, Éli, ¿láma sabakhtháni?”. Cai shimicunaca, “ñuca Dioslla, ñuca Dioslla, ¿imamantataj ñucallata saquishcanguiyari?” nisha ninmi.
47 Chashna nijta uyashpami chaipi cajcunamanta maijancunaca: “Cai runaca Eliastamari cayacun” nircacuna.
48 Paicunapuramanta shujca callpashpa rishcahuanmi shuj esponjata japishpa jayaj vinopi satirca. Chai qꞌuipaca shuj carrizo caspipi churashpami Jesús ubyachun cꞌuchuyachirca.
49 Chashna rurajpimi caishujcunaca: “¡Saqui! Ricushunchij, Elías shamushpa paita quishpichinchu, imami” nircacuna.
50 Cutinllatajmi Jesusca sinchita caparirca. Chashna caparishpaca huañurcallami.*
51 Jesús huañujpica ñapishmi Diospaj huasi ucupi* tiyaj racu telaca* jahuamanta uriman ishquipi lliquirirca. Shinallataj allpapish chujchurcami. Rumicunapish chaupirircami.
52 Pambana jutcucunapish pascarircami. Chashna pascarijpimi Diosta sirvij achca huañushcacunapaj cuerpocunapish ricurirca.
53 Chaitaca achca gentecunami ricurca. (Jesús causarishca qꞌuipami pambana jutcucunapi puricuj gentecunaca Jerusalenman* yaicurcacuna).
54 Terremoto tiyashcata, chaipi imalla tucushcatapish ricushpaca 100 soldadocunata mandajpish, Jesusta cuidaj soldadocunapishmi achcata mancharircacuna. Chaimi paicunaca: “Cai runaca Diospaj Churitajmari cashca” nircacuna.
55 Shinallataj achca huarmicunami carullamanta ricucurcacuna. Paicunaca Jesusta ayudangapajmi Galileamanta catishpa shamushcacuna carca.
56 Paicunapurapica María Magdalena, Santiagopaj, Josespaj mama María, Zebedeopaj churicunapaj mamapishmi carca.
57 Ña chishiyajpica Arimatea llajtamanta achcata charij José shuti runami shamurca. Paipish Jesusta catijmi tucushca carca.
58 Cai runami Jesuspaj cuerpota pambangapaj Pilatota mañanaman rirca. Chashna mañajpimi Pilatoca Jesuspaj cuerpota paiman cuchun soldadocunata mandarca.
59 Chaimi Joseca Jesuspaj cuerpota japishpa linohuan rurashca alli, limpio telahuan pilluchirca.
60 Chai qꞌuipaca rumi quinripi, pai rurashca mushuj pambana jutcupimi Jesustaca churarca. Chai huashaca jatun rumita jutcu punguman singuchishpami chai jutcuta huichcashpa rirca.
61 Shinapish María Magdalena, caishuj Mariapish chai jutcu ñaupajpimi tiyarishpa saquirircacuna.
62 Allichirina punlla* qꞌuipaca sábado punllami carca. Sábado punllapimi sacerdotecunata mandajcunapish, fariseocunapish Pilatohuan tandanacurcacuna.
63 Chaipimi paicunaca cashna nirca: “Amito, cai llulla runa causacushparajca, ‘quimsa punllacuna huashaca causachishcami casha’ nishcatami ñucanchijca yuyarinchij.
64 Chaimanta, Jesusta pambashca jutcuta quimsa punllacama cuidachun soldadocunata cachai. Ñataj Jesusta catijcuna shamushpa paipaj cuerpota shuhuashpaca: ‘¡Paica huañushcacunapaj chaupimantami causachishca cashca!’ nishpa gentecunaman llullashpa huillancunaman. Chashna llullajpica, puntaman llullashcatapish yallimi canga” nircacunami.
65 Chaimi Pilatoca: “Jesusta pambashca jutcuta alli cuidachun soldadocunata pushashpa richij” nirca.
66 Chashna nijpimi paicuna rishpaca chai jutcuta huichcashca rumita alli sellashpa churarcacuna. Shinallataj soldadocunatami chaipi cuidachun saquircacuna.
Notacuna
^ Griego rimaipica: “ancianocunapish” ninmi.
^ Griego rimaipica: “ancianocunaman” ninmi.
^ Griego rimaipica: “alfareropaj allpa” ninmi. Alfarerocunaca paicunapaj trabajota rurangapajmi caimanta allpata llujshichijcuna cashcanga.
^ “Jehová” shutita huasha diccionariopi ricui.
^ Griego rimaipica: “alfareropaj allpa” ninmi. Alfarerocunaca paicunapaj trabajota rurangapajmi caimanta allpata llujshichijcuna cashcanga.
^ Griego rimaipica: “ancianocuna” ninmi.
^ Griego rimaipica: “ancianocunapish” ninmi.
^ O “¡Paitaca caspipi clavashpa huañuchi!”.
^ O “¡Paitaca caspipi clavashpa huañuchi!”.
^ Griego rimaipica: “Cai runapaj yahuarca” ninmi.
^ Griego rimaipica: “paipaj yahuarca ñucanchij jahuapi, ñucanchij huahuacunapaj jahuapipish shamuchunlla” ninmi.
^ O “Viva”.
^ “Llaquichina caspi” shimita huasha diccionariopi ricui.
^ “Sorteana” shimita huasha diccionariopi ricui.
^ “Llaquichina caspi” shimita huasha diccionariopi ricui.
^ Griego rimaipica: “ancianocunapish” ninmi.
^ “Llaquichina caspi” shimita huasha diccionariopi ricui.
^ Griego rimaipica: “tucui allpaca” ninmi.
^ Griego rimaipica: “paipaj espirituta entregarcallami” ninmi.
^ “Diospaj huasi ucu” shimita huasha diccionariopi ricui.
^ “Racu tela” shimita huasha diccionariopi ricui.
^ Griego rimaipica: “jucha illaj llajtaman” ninmi.
^ “Allichirina punlla” shimita huasha diccionariopi ricui.
