Mateo 4:1-25
4 Chai qꞌuipami Diospaj espíritu yuyachijpi Jesusca chaquishca pambaman rirca. Chaipimi Diabloca* paita pandachisha nirca.
2 Jesusca 40 punllacunata, 40 tutacunata ayunashca huashami yaricachirca.
3 Chaimi Jesuspajman Diablo cꞌuchuyamushpaca: “Diospaj churitaj cashpaca cai rumicunata tanda tucuchun niyari” nirca.
4 Chashna nijpimi Jesusca: “Quillcachishcapica: ‘Runaca mana tandallahuan causanchu. Ashtahuanpish Jehová* Dios rimashca shimicunahuanmi causan’ ninmi” nirca.
5 Chai qꞌuipami Diabloca Jesusta Jerusalén* llajtaman pushashpa Diospaj huasi pirca jahuapi* churarca.
6 Chaipimi Diabloca: “Diospaj churitaj cashpaca ucuman huashicui. Quillcachishcapica: ‘Paica, paipaj angelcunatami cachanga. Cambaj chaqui shuj rumillapipish ama huajtarichunmi paicunapaj maquicunapi japingacuna’ ninmi” nirca.
7 Chashna nijpimi Jesusca: “Quillcachishcapica caitapishmi nin: ‘Jehová* Diostaca ama yangamanta caita chaita rurai nishpa mañangui’ ninmi” nirca.
8 Cutinmi Diabloca Jesusta shuj jatun urcu jahuaman pusharca. Chai jahuamantami cai pachapi tiyaj tucui gobiernocunata, chaipi tiyaj munanalla cosascunatapish ricuchirca.
9 Chashna ricuchishpami Diabloca: “Shuj cutinlla ñucata adorajpica tucui caicunatami canman cusha” nirca.
10 Chaimi Jesusca: “¡Anchui caimanta Satanás!* Quillcachishcapica: ‘Jehová* Diosta adorangui, paillata sirvingui’ ninmi” nirca.
11 Chashna nijpimi Diabloca paimanta anchurishpa rircalla. Chai qꞌuipami angelcuna shamushpa Jesusta ayudarcacuna.
12 Bautizaj Juan prezupi cashcata yachaj chayashpami Jesusca Galileaman rirca.
13 Chai huashaca Nazaretmanta shamushpami Capernaúm pueblopi causai callarirca. Chai puebloca mama cucha* ladopi caj Zabulón, Neftalí llajtacuna cꞌuchullapimi carca.
14 Profeta Isaías nishca shimicuna pajtarichunmi chashnaca tucurca.
15 Isaiasca: “¡Zabulón llajtapi, Neftalí llajtapi causajcunalla. Cancunaca Jordán chꞌimba ladopi mama cuchaman rina ñanpimi causanguichij. Shujtaj llajtamanta shamushpa Galileapi causajcunapurapimi causanguichij!
16 Cancunaca amsa tutapi shina causacushpapish pacarimuj shina achijyachij luztami ricushcanguichij” nircami.
17 Chai punllamantami Jesusca: “Arrepintirichij, jahua pacha Gobiernoca* ñamari chayamucun” nishpa huillai callarirca.
18 Jesusca Galilea mama cucha ladota puricushpami Pedro nishca Simonta, Simonpaj huauqui Andrestapish ricurca. Paicunaca pescadocunata japijcunami carca. Chaimantami pescadota japingapaj mama cucha yacupi mallata* shitacurcacuna.
19 Chaita ricushpami Jesusca: “Ñucata catichij. Cancunataca pescadocunata mashcaj shina gentecunata mashcanatami yachachisha” nirca.
20 Chaita uyashpami paicunaca pescadota japina mallacunata* saquishcahuan Jesusta catircacuna.
21 Chaimanta ashata rishpami Jesusca shujtaj ishqui huauquicunata ricurca. Paicunaca Zebedeopaj churi Santiago, paipaj huauqui Juanmi carca. Paicunaca, paicunapaj yaya Zebedeohuanmi pescadota japina mallacunata barcopi allichicurcacuna. Chaita ricushpami Jesusca paicunatapish cayarca.
22 Chashna cayajpimi paicunapaj yayatapish, barcotapish chaipi saquishcahuan Jesusta catircacuna.
23 Jesusca tucui Galilea llajtata rishpami sinagogacunapi* yachachishpa, Diospaj Gobiernomanta alli huillaicunatapish huillashpa purirca. Shinallataj tucui laya ungüihuan cajcunatapish, nanaihuan cajcunatapishmi alliyachirca.
24 Jesús imallata rurashcataca tucui Siria llajtapi causajcunapishmi yachaj chayarcacuna. Paicunaca tucui laya ungüihuan cajcunata, achca nanaihuan cajcunata, demonio* japishcacunata, ataque ungüihuan cajcunata, mana cuyuri tucujcunatapishmi apamurcacuna. Shina apamujpimi Jesusca ungushcacunata alliyachirca.
25 Chaita ricushpami Galileamanta, Decapolismanta,* Jerusalenmanta, Judeamanta, Jordán yacu chꞌimbapuramantapish achca gentecuna Jesusta catircacuna.
Notacuna
^ “Diablo” shimita huasha diccionariopi ricui.
^ “Jehová” shutita huasha diccionariopi ricui.
^ Griego rimaipica: “Diospajlla agllashca llajta” ninmi.
^ O “pretilpi”.
^ “Jehová” shutita huasha diccionariopi ricui.
^ “Satanás” shimita huasha diccionariopi ricui.
^ “Jehová” shutita huasha diccionariopi ricui.
^ Caipica Galilea mama cuchamantami parlacun.
^ Caipica Diospaj Gobiernomantami parlacun.
^ O “linchita”, “atarrayata”.
^ O “linchicunata”, “atarrayacunata”.
^ O “tandanacuna huasicunapi”.
^ O “supai”.
^ O “Chunga Llajtacunamanta”.
