Ucraniapi tiyaj macanacuimanta, chaipi tiyaj religionta pushajcuna ima nishcata ricushun:

•   ‘Rusiamanta Iglesia ortodoxata pushaj patriarca Kirillca Rusia Ucrania llajtata macanacuita rurashpa llaquichicushcamantaca imata mana nishcachu. Shinapish patriarca Kirillca Ucrania llajtamanta huaquin mana allicunatami nishca. Patriarca Kirill ima nishcata uyashpami Rusia llajtata mandajca Ucrania llajtata llaquichicushca’ (EUobserver, 7 de marzo de 2022).

•   “Patriarca Kirillca: ‘Ucrania llajtapi shuj jatun juchata rurashcamanta chai juchata anchuchingapajmi macanacuica tiyan. Chaimantami Ucrania llajtataca llaquichicun’ nircami” (AP News, 8 de marzo de 2022).

•   “Ucraniapi saquirij Kiev llajtamanta Iglesia ortodoxata pushaj, metropolitano Epifanio I runaca: ‘Rusiamanta shamuj soldadocunata huañuchinaca mana juchachu can’ nircami. Shinallataj ‘Rusiamanta shamujcunahuan macanacunaman richij’ nishpami caina lunesca bendiciarca” (The Jerusalem Post, 16 de marzo de 2022).

•   “Consejo de Iglesias y Organizaciones Religiosas de Ucrania nishca organizacionpi cajcunaca: ‘Ñucanchijca Ucrania llajtamanta soldadocunata, ñucanchij llajtata tucui difindijcunatami apoyanchij, paicunata bendiciachunpishmi Yaya Diosta mañanchij’ nircacunami” (Declaración UCCRO, a 24 de febrero de 2022).

 ¿Imatataj yuyangui? ¿Jesustami catinchij nij religioncunaca gentecunata macanacuicunaman richun apoyanachu can? ¿Caimantaca Bibliapica imatataj yachachin?

Religioncunaca macanacuicunatami apoyashcacuna

 Cai tucui huatacunatami religioncunaca tucuicunahuanmi alli apanacushpa sumajta causanata munanchij nishcacuna. Shina nishpapish macanacuicuna tiyachunmi saquishcacuna. Huaquinpicarin gentecunataca macanacuicunaman richunmi apoyashcacuna. Pero testigo de Jehovacunaca religioncuna chashna macanacuicunata apoyashcataca mana allita rurashcatami huillashcacuna. Ñucanchij publicacioncunapica religioncuna macanacuicunata apoyashcataca achca cutinmi huillashcanchij. Caimanta huaquin ejemplocunata ricushun:

•   “Las cruzadas: ‘trágica ilusión’” nishca temapica Iglesia Católica romana Diospaj shutipi, Jesuspaj shutipipish achca millai cosascunata rurashcatami huillarca.

•   “La Iglesia Católica y África” nishca temapica África llajtapi huaquin comunidadcunapi causajcuna paicunapura ama macanacushpa catichun, achca gentecunata ama huañuchichunpish religioncuna mana jarcai tucushcatami huillarca.

•   “¿Tiene la culpa la religión?”, “El papel de la religión en las guerras”, “La religión toma partido” nishca temacunapica shuj macanacui tiyajpi catolicocunapish, ortodoxocunapish, protestantecunapish macanacuiman rijcunata ima shina apoyashcatami parlarca.

¿Jesusta catijcunaca macanacuicunata apoyanachu can?

 ¿Jesusca imatataj yachachirca? Mateo 22:39-pica: “Can quiquin cꞌuyarij shinallataj shujtajcunatapish cꞌuyangui” nircami. Ashtahuanpish Jesusca: “Cancunata pꞌiñajcunata cꞌuyashpa catichij” nircami (Mateo 5:44-47).

 ¿Jesusca imatataj yachachirca? Juan 18:36-pica: “Ñuca Gobiernoca mana cai pachamantachu. Ñuca Gobierno cai pachamanta cajpica ñucata catijcunaca, judiocunaman ñucata ama entregachunmi macanacunman carcacuna” nircami. Shinallataj Jesusca: “Maijanpish espadahuan shujtajcunata llaquichijca espadallahuantajmi huañuchishca canga” nircami (Mateo 26:47-52).

 Caipi yuyai: Jesusta catijcunaca Jesusta cuidangapajca mana macanacurcacunachu. Shinaca Jesustami catinchij nij religioncunaca imamantapish macanacuicunaman mana rinachu can. Caimanta ashtahuan yachasha nishpaca “El cristianismo y la guerra: ¿son compatibles?” nishca temata ricui. Chaipimi Jesusta punta catijcuna ima shina paipaj ejemplota catishcata, paipaj yachachishcacunata ima shina pajtachishcata ricui tucungui.

¿Macanacuicunata apoyaj religioncunahuanca imataj tucunga?

 Bibliapica Jesustami catinchij nishpapish Jesús yachachishcacunata mana cazujcunataca Dios mana chasquij cashcatami yachachin (Mateo 7:21-23; Tito 1:16).

•   Apocalipsis libropica Yaya Dios tucui religioncunamanta imata yuyashcatami ricuchin. Chaipica religioncunami ‘allpa pachapi tucui huañuchishcacunapaj yahuarmantaca culpayuj’ can ninmi (Apocalipsis 18:21, 24). Caimanta ashtahuan yachangapajca “¿Qué es Babilonia la Grande?” nishca temata ricui.

•   Shuj ismushca yuraca ismushca granocunatami pꞌucun, chashna pꞌucuj cashcamantami chai yurataca pꞌitishpa ninaman shitan. Chashnallatajmi religioncuna mana allita rurashcamantaca tucuchishca canga. Jesusca Yaya Dios chaita rurana cashcatami yachachirca (Mateo 7:15-20). Panda religioncuna ima shina tucuchishca canata yachangapajca “¡Se acerca el fin de la religión falsa!” nishcata ricui (Mateo 7:15-20).

Photo credits, left to right: Photo by Sefa Karacan/Anadolu Agency/Getty Images; Maxym Marusenko/NurPhoto via Getty Images