1, 2. a) ¿Ima laya regalota cujpitaj canca cushicungui? b) ¿Yaya Diosca paipaj Churitaca imamantataj curca?

¿SHUJ valishca regalota chasquishcanguichu? Can minishtishca regalota cujpica ¿manachu cushicushpa diosolopagui nishpa agradicinguiman?

² Yaya Diosca paipaj Churitami ñucanchijmanta huañuchun cacharca. Chashna huañushcallamantami tucuicuna huiñaita causana oportunidadta charinchij. Caimi tucuimanta yalli valishca regalo can (Mateo 20:28-ta liyipai). Jehová Diosca ñucanchijta cꞌuyashcata ricuchingapajmi Jesustaca cai Allpaman cacharca. Caimantami cai capitulopica ashtahuan yachashun.

3. ¿Imamantataj huañunchij?

³ Juchamanta, huañuimanta ñucanchijta quishpichingapajca Diosca paipaj Churitami curca (Efesios 1:7). Pero ¿imamantataj ñucanchijta quishpichichun minishtircanchij? Chaipajca Adán Evahuan Edén huertapi ima tucushcatami yuyarina canchij. Paicunaca juchata rurashcamantami huañurcacuna. Adán Evapaj huahuacuna cashcamantami ñucanchijpish huañunchij (nota 9-ta ricui).

4. a) ¿Adanca pitaj carca? b) ¿Adán jucha illaj cashpaca ima laya causaitataj charirca?

⁴ Diosca Adán runatami puntaca rurarca. Paica yuyaipipish causaipipish jucha illajmi carca. Chaimantami  paica mana huañushpa, mana ungushpa causana carca. Jehová Dios, Adanta rurashcamantami paipaj Yaya carca (Lucas 3:38). Diosca pai munashca shina causachunmi Adanhuanca siempre parlanacuj carca. Ashtahuancarin paimanca shuj sumaj trabajotami curca (Génesis 1:28-30; 2:16, 17).

5. ¿Taita Diosca Adantaca “paiman rijchajtami rurarca” nishpaca imatataj nisha nin?

⁵ Diosca Adantaca “paiman rijchajtami rurarca” (Génesis 1:27). Chaimantami Yayitu Dios shinallataj Adanca cꞌuyaj, cashcata ruraj, yachaisapa carca. Shinallataj Diosca Adantaca mana animalitocunata shinachu rurarca. Animalcunaca ima alli cashcata ima mana alli cashcata mana yachancunachu. Pero Diosca Adantaca allita o mana allita ruranata paillataj agllachunmi rurarca. Diosta cazunata agllashca cashpaca Adanca huiñai huiñaitami paraíso Allpapi causanman carca.

6. ¿Diosta mana cazushcamantaca Adanca ima llaquicunatataj charirca?

⁶ Diosta mana cazushcamantami Adanca Diospaj ñaupajpi mana alli ricurirca. Shinallataj paica Edén huertapica ña mana causai tucurcachu. Ashtahuancarin juchayuj tucushcamantami huañuna carca (Génesis 3:17-19).

7, 8. ¿Adanpaj culpamantaca ima llaquicunatataj charinchij?

⁷ Adanpaj culpamantami ‘juchaca, cai pachamanca yaicurca. Chai juchamantami huañuipish yaicurca. Chashnami tucuicuna juchata rurashcamantaca, huañuica tucui runacunaman shamurca’ (Romanos 5:12). Adán juchata rurashcamantami tucuicuna juchaman, huañuiman esclavo shina cꞌatushca canchij. Chaimantami tucuicuna huañunchij (Romanos 7:14). Adán  Evaca Diosta mana cazushcamantami huiñai causaita chingachircacuna. Pero, ¿ñucanchijca huañuimantaca quishpiri tucunchijchu? Ari.

⁸ Juchamanta, huañuimantaca ni maijan runa mana quishpichi tucunchu. Pero, ¿Jehová Diosca ñucanchijta quishpichingapajca imatataj rurarca? ¿Caimantaca ima beneficiocunatataj charinchij?

9. ¿Ñucanchijta quishpichingapajca ima laya runataj minishtirirca?

⁹ Juchamanta quishpichingapajca Adán ima shinami paraisopi jucha illaj carca, shinallatajmi shuj jucha illaj runa minishtirirca (1 Timoteo 2:6). Pero ñajaman nishca shinaca juchayujcuna cashcamantami ñucanchijcunaca shujtajcunata mana quishpichi tucunchij (Salmo 49:7, 8).

10. ¿Ñucanchijta quishpichingapajca Diosca imatataj rurarca?

¹⁰ Jehová Diosca ñucanchijta quishpichingapajca paipaj cꞌuyashca Churitami cai Allpaman cacharca (1 Juan 4:9, 10). Jesuspish paipaj Yayata cazushpami tucuita saquishpa cai Allpaman shamurca (Filipenses 2:7). Diosmi shuj milagrota rurashpa Jesuspaj causaitaca Mariapaj huijsapi churarca. Chaimi Jesusca cai Allpapica jucha illaj huacharirca (Lucas 1:35).

11. ¿Ñucanchijta quishpichingapajca imamantataj shujlla jucha illaj runa huañuna carca?

¹¹ Adán mana cazushcamantami tucuicuna huiñai causaita chingachircanchij. Pero, ¿ñucanchijta quishpichingapajca achca runacunachu huañuna carca? Mana. Caita alli intindingapajca Romanos 5:19-ta liyipai. Jesusca jucha illajmi carca, paica ima juchataca  nunca mana rurarcachu. Chaimantami paipaj causaita cushpa tucui gentecunata quishpichi tucurca (1 Corintios 15:21, 22, 45).

12. ¿Jesusca imamantataj cꞌuyaillata sufrishpa huañuna carca?

¹² Diabloca ‘gentecunaca achca llaquicunata charishpaca Diostaca ni pi mana sirvi tucungachu’ nircami. Diablo nishcacuna llulla cashcata ricuchingapajmi Jesusca llaquinaita huañurca. Paitaca manchanaita azotishpa, caspipi clavocunahuan huarcushpami llaquinaita huañuchircacuna (Juan 19:1, 30; Hechos 10:39; nota 15-ta ricui). Jesusca huañungacamami Diosta tucui shunguhuan sirvirca. Yayitu Diosca paipaj Churi llaquicunata ahuantashcata ricushpami cushilla sintirirca (Proverbios 27:11).

13. a) ¿Diosca ñucanchijta quishpichingapajca 14 de nisán punllaca ima pasachuntaj saquirca? b) ¿Jesús causarishca qꞌuipaca jahua pachaman tigrashpaca imatataj rurarca?

¹³ Jehová Diosca ñucanchijta quishpichingapajca huata 33, 14 de nisán punllapimi Jesusta huañuchichun saquirca (Hebreos 10:10) *. Quimsa punllacuna qꞌuipami Yaya Diosca Jesustaca espirituta shina causachirca. Chai huashaca Jesusca jahua pachamanmi paipaj Yayapajman tigrarca. Chaipimi Jehová Diosmanca “ñuca causaitami cushcani” nishpa huillarca. Jesusca cai Allpapi jucha illaj runa laya causana derechotami charirca. Chashna causana derechota charishpapish Jesusca Diosmanmi chai derechotaca entregarca. Cutin, Diosca Jesuspaj causana derechotami ñucanchijman curca (Hebreos 9:24). Chaimantami ñucanchijca juchamanta, huañuimanta quishpiri tucunchij (Romanos 3:23, 24-ta liyipai).

14, 15. ¿Taita Dios perdonachunca imatataj rurana canchij?

¹⁴ Jesús huañushcamantami cunan punllacunapish, shamuj punllacunapish sumaj bendicioncunata charishun. Cunanca cai bendicioncunamantami parlagrinchij.

¹⁵ Diosca ñucanchij juchacunata perdonai tucunmi. Juchayujcuna cashcamantami allita rurasha nishpapish huaquinpica mana allita ruranchij. Pero Dios quishpichichunca ¿imatataj rurana canchij? Shungumantami arrepintirina canchij. Shinallataj mana jatun tucushpami Yayitu Diosta perdonahuai nishpa mañana canchij. Chashna rurajpimi Jehová Diosca ñucanchijtaca perdonanga (Colosenses 1:13, 14; 1 Juan 1:8, 9).

16. ¿Alli concienciata charingapajca imatataj rurana canchij?

¹⁶ Alli concienciatami chari tucunchij. Mana allita rurajpica ñucanchij concienciami mana allita rurashcata sintichin. Chashna mana alli sintirishpami imapajpish mana valij shina, llaquilla causanchij. Diospaj ñaupajpi alli concienciata charingapajca ñucanchij juchacunata perdonachunmi paita mañana canchij (Hebreos 9:13, 14). Yayitu Diosca ñucanchij problemacunata, ima debilidadta charishcata huillachunmi munan (Hebreos 4:14-16).

17. ¿Jesús huañushcamantaca ima bendicioncunatataj charishun?

¹⁷ Huiñai huiñaitami causai tucushun. Romanos 6:23-pica: “Juchaca huañuitami cun. Ashtahuanpish Taita Dios cꞌuyashpalla cushcaca, ñucanchij Mandaj Cristo Jesuspi huiñai causaimi” ninmi. Jesús huañushcamantami tucuicuna ungüicuna illaj, huiñaita causai  tucushun. (Apocalipsis 21:3, 4). Cashna laya bendicionta chasquingapajca ¿imatataj rurana canchij?

18. ¿Yaya Diosca ñucanchijta cꞌuyashcamantaca imatataj rurarca?

¹⁸ Pi ñucanchijman shuj valishca regalota cujpica ¿manachu cushilla sintirinchij? Yaya Diosca ñucanchijta quishpichingapajca shuj valishca regalota cuj shinami paipaj Churita curca. Chaimantami Yaya Diostaca diosolopagui nina canchij. Juan 3:16-pica: “Taita Diosca, cai pachapi causajcunataca yallitaj cꞌuyashpami, paipaj shujlla Churita cacharca” ninmi. Jesuspish ñucanchijta achcata cꞌuyashcamantami huañurca (Juan 15:13). Yaya Diospish, Jesuspish cai sumaj regalota cushpami cada unota cꞌuyashcata ricuchirca (Gálatas 2:20).

19. ¿Diospaj amigo tucungapajca imatataj rurana cangui?

¹⁹ Pitapish manaraj cꞌuyashpaca paitaca allimi rijsina cangui. Shinallataj Diosta cꞌuyangapajca paitaca allimi rijsina cangui. Bibliapi nishca shinaca Yaya Diostaca rijsi tucunchijmi (Juan 17:3, QC, 1989). Diosta cꞌuyai callarishpaca pai munashcacunatami rurangui. Ashtahuancarin paipaj amigomi tucungui. Chaimantami Jehovamanta yachanataca manataj saquina cangui (1 Juan 5:3).

20. ¿Jesuspi crishcata ricuchingapajca imatataj rurana canchij?

²⁰ Jesús canmanta huañushcatami crina cangui. Juan 3:36-pica: “Maijanpish Churita crijca, huiñai causaitami charin” ninmi. Pero Jesuspi crinimi nishpalla saquirinapaj randica pai yachachishcacunatami pajtachina canchij (Juan 13:15). Shinallataj alli ruraicunahuanmi paipi crishcata ricuchinchij. Chaimantami  Santiago 2:26-pica: “Ima rurashcacuna illajlla crijca” huañushca layallatajmi can nin.

21, 22. a) ¿Jesús huañushcata yuyarina tandanacuimanca imamantataj cada huata rina canchij? b) ¿Capítulo 6, 7-pica imatataj yachashun?

²¹ Jesús huañushcata yuyarina tandanacuimanmi rina cangui. Jesusca manaraj huañushpami ‘ñuca huañushcata yuyaringapajca tandanacunami canguichij’ nishpa mandarca (Mateo 26:26-28). Shinallataj Jesusca paipaj causaita cushpa ñucanchijta quishpichishcata yuyarichunmi munarca. Chaimantami paica: “Caitaca, ñucata yuyarishpa ruracunguichijlla” nirca (Lucas 22:19-ta liyipai). Jesús huañushcata yuyaringapaj cada huata tandanacushpaca Yaya Diostapish, Jesustapish agradicishcatami ricuchinchij (nota 16-ta ricui).

²² Yaya Diosmi paipaj Churita curca. Chai regaloca shujtaj regalocunamantapish yalli valishcami can (2 Corintios 9:14, 15). Jesús huañushcamantaca huaranga huaranga huañushca gentecunami causari tucungacuna. Chaitaca capítulo 6 y 7-pimi yachashun.