1. ¿Shamuj punllacunapi ima tucunataca maipitaj yachai tucunchij?

NOTICIACUNATA ricushpaca “¿cai mundoca imapishi paranga?” nishpachari tapuringui. Achca llaquicuna, mana alli ruraicuna mirarijta ricushpami gentecunaca cai mundoca ñallami tucurigrin nishpa yuyancuna. ¿Chai nishcacunaca ciertochu canga? ¿Shamuj punllacunapi ima tucunata yachai tucunchijchu? Ñucanchijca shamuj punllacunapi ima tucunataca mana yachanchijchu. Pero Jehová Diosca ñucanchijhuan, cai Allpahuan shamuj punllacunapi ima tucunataca Bibliapimi huillashca (Isaías 46:10; Santiago 4:14).

2, 3. a) ¿Jesusta catijcunaca imatataj yachanata munarcacuna? b) ¿Jesusca paita catijcunamanca imatataj cutichirca?

² Bibliapi cai pacha tucuringa nishpaca mana cai Allpa tucurinamantachu parlacun. Ashtahuanpish cai pachapi mana alli ruraicuna tucurinamantami parlacun. Jesusca Diospaj gobiernomi mana alli ruraicunata tucuchinga nircami (Lucas 4:43). Jesusta catijcunaca chai gobierno ima hora shamunata yachasha nishpami Jesustaca: “¿Ima punllataj chashna tucungari? Can cutin shamunapajpish, cai shina causai tucurinapajpish ¿ima ricunata ricushpataj tucui chaicuna pajtamucushcataca yachashun?” nishpa tapurcacuna (Mateo 24:3). Jesusca ima hora chai gobierno shamunataca mana huillarcachu. Pero tucurimui punllacunapi imalla pasanatami  huillarca. Chaica cunan punllacunapimi pajtaricun (nota 24-ta ricui).

³ Cai capitulopica tucurimui punllacunapi causacushcatami yachashun. Pero, imamanta achca llaquicuna tiyashcata intindingapajca, shuj jatun macanacui jahua pachapi tiyashcatami yachanaraj canchij.

4, 5. a) ¿Jesús jahua pachapi mandai callarishca huashallaca imatataj rurarca? b) ¿Jesús cai Allpaman Diablota shitashcamantaca ima shinataj causacunchij?

⁴ Capítulo 8-pica, 1914 huatamanta Jesús cielopi mandai callarishcatami yacharcanchij (Daniel 7:13, 14). Chai qꞌuipaca, ‘cielopica jatun macanacuimi tiyarca: Miguelmi paipaj angelcunandij dragonhuan macanacurca. Dragonpish paipaj angelcunandijmi macanacurca’. Miguelca Jesusmi can. Cutin, dragonca Diablomi can. * Diablopish millai angelcunapish chai macanacuipi pirdishpami, jahua pachamanta shitashca carcacuna. Chaimantami alli angelcunaca dimastij contentarishcangacuna. Pero ¿cai Allpapica imataj tucuna carca? Bibliapica, “Diabloca pai munashcata rurana punllacuna ashalla cashcata yachashpami” yallitaj pꞌiñarishca can ninmi. Chaimantami llaquinaita causacunchij (Apocalipsis 12:7, 9, 12).

⁵ Diablo mana allita rurashpa catichunca Jehová Diosca ñallami mana saquinga. Chaimantami Diabloca dimastij pꞌiñarishpa achcata llaquichicun. Cunanca tucurimui punllacunamanta Jesús imata yachachishcata ricushun.

6, 7. a) ¿Macanacuicuna tiyashcamantaca ima shinataj causanchij? b) ¿Yaricaicuna tiyashcamantaca ima shinataj causanchij?

⁶ Macanacuicunamanta parlashun. Jesusca: “Mama llajtaca caishuj mama llajtahuan macanacungacunami, shinallataj jatun mandajcunapurapish macanacungacunami” nircami (Mateo 24:7). Cunan punllacunapi achca macanacuicuna tiyashcamantami llaquicuna, huañuicunaca mirarishpa caticun. 1914 huatacamaca casi 30 millón gentecunami macanacuicunapi huañushcacuna carca. Pero, 1914 huatamanta 2000 huatacamaca 100 millón yalli gentecunami macanacuicunapi huañushcacuna.

⁷ Yaricaicunamanta parlashun. Jesusca: ‘Jatun yaricaimi’ tiyanga nircami (Mateo 24:7). Cunan punllacunapi achca micuna tiyajpipish achca gentecunaca yaricaihuanmi causacuncuna. ¿Imamanta? Gentecunaca micunata randingapaj cullquita o maipi tarpuna Allpatami mana charincuna. Por ejemplo, 1.000 millón gentecunami cada punlla micungapajca casi ni shuj dolarllatapish  mana charincuna. Organización Mundial de la Saludca, ‘micunata mana charishcamantami cada huata achca millón huahuacuna huañun’ ninmi.

8, 9. a) ¿Terremotocuna tiyashcamantaca gentecunaca ima llaquicunatataj charishca? b) ¿Millai ungüicunaca ima shinataj mirarishca?

⁸ Terremotocunamanta parlashun. Jesusca: “Chꞌican chꞌican llajtacunapi pamba chujchushpa Allpa tꞌimburicunami tiyanga” nircami (Lucas 21:11). Cada huatami achca terremotocuna tiyan. Terremoto tiyanata ricuchij aparatocuna tiyajpipish, achca gentecunami jatun terremotocunapi huañushpa caticun. 1900 huatamantaca 2 millón yalli gentecunami terremotocunapi huañushcacuna.

⁹ Ungüicunamanta parlashun. Jesusca: “Millai ungüicunapishmi tiyanga” nircami. Millai ungüicuna rato mirarishpa catishcamantami achca gentecuna huañushcacuna (Lucas 21:11). Doctorcunaca huaquin ungüicunataca mana jambi tucushcacunachu. Por ejemplo, cáncer, tuberculosis, shujtaj millai ungüicuna tiyashcamantami cada huata achca  gentecuna huañun. Cai último 40 huatacunapicarin 30 yalli mana rijsishca ungüicunami ricurishca.

10. ¿Tucurimui punllacunapica ima laya gentecunataj causana carca?

¹⁰ Bibliapica: “Cai punllacuna tucurinapajca llaqui punllacunami shamunga” ninmi (2 Timoteo 3:1-5). Apóstol Pabloca, tucurimui punllacunapica gentecunaca cashnami canga nircami:

• Quiquinpajlla charinata munajcuna.

• Cullquiyuj tucunallata yuyajcuna.

• Jatun tucushcacuna.

• Yaya mamata mana cazujcuna.

• Rumi shungucuna.

• Mana jarcari tucujcuna.

• Pꞌiña millaicuna.

• Diosta mashcanapaj randica aicha munaillata mashcajcuna.

• Ñahui ricuillapi Diosta yuyarij tucushcacuna.

11. ¿Salmo 92:7-pi nishca shinaca mana alli gentecunahuanca imataj tucunga?

¹¹ Tucui ladocunapimi chashna mana alli gentecuna  causan. Pero Diosca ñallami paicunata chingachinga. Bibliapica: “Diosta mana rijsijcunaca qꞌuihua shina yallitaj huiñashpapish huiñaipaj chingachishca canapajllami. Millaita tucui rurajcunaca mana jahualla sumajtami sisan. Ashtahuanpish huiñaipaj chingachishca canapajllamari” ninmi (Salmo 92:7).

12, 13. ¿Diospaj yachachishcacunaca tucuri punllacunapi ima shinataj mirarishca?

¹² Tucurimui punllacunapica mana llaquicunalla, nanaicunallachu tiyana carca. Bibliapi nishca shinaca alli ruraicunapishmi tiyana carca.

¹³ Profeta Danielca, ‘tucuri punllacunapica Bibliamanta alli yachaipish ashtahuanmi miranga’ nircami (Daniel 12:4). Chaimantami 1914 huatamanta Diosta sirvijcunaca Bibliata ashtahuan alli intindishcanchij. Por ejemplo, Jehová Diosca paipaj shuti importante cashcata, cai Allpahuan imata ruragrishcata, Jesús imamanta huañushcata, gentecuna huañushpa ima tucushcata, huañushcacuna causarinatami Diosca alli intindichishca. Shinallataj Dios munashca shina causanata, Diospaj gobierno llaquicunata tucuchina cashcatapishmi yachashcanchij. Pero cai yachashcacunahuanca ¿imatataj rurana canchij? Shujtaj profeciata ricushun (nota 21 y 25-ta ricui).

14. a) ¿Alli huillaicunataca picunataj huillacuncuna? b) ¿Testigo de Jehovacunaca maillapitaj huillacuncuna?

¹⁴ Tucurimui punllacunamanta parlashpami Jesusca: “Dios mandacun alli huillaitaca, tucui cai pachapi causajcunamanmi huillashpa yachaj chayachishca canga” nirca (Mateo 24:3, 14). Testigo de Jehovacunaca Diospaj gobiernomantaca 240 yalli llajtacunapi,  900 yalli shimicunapimi gratis yachachinchij (Apocalipsis 7:9). Jesús nishca shina achca gentecuna pꞌiñashpa, catirashpa llaquichijpipish Diosmanta huillanataca manataj saquinchijchu (Lucas 21:17).

15. a) ¿Imamantataj tucurimui punllacunapi causacushcata crinchij? b) ¿Diosta mana cazuj gentecunaca imataj tucunga? c) ¿Diospaj gobiernota apoyajcunaca imatataj chasquingacuna?

¹⁵ ¿Tucurimui punllacunapi causacushcata cringuichu? Tucurimui punllacunamanta Bibliapi nishcacunami tucui pajtaricun. Jehová Diosca ñallami alli huillaicunata ama huillashpa catichun ninga. Chai qꞌuipami, “cai shina causaica tucuringa” (Mateo 24:14). Yaya Diosta, Jesusta mana cazujcunaca Armagedón macanacuipimi chingachishca cangacuna. Chaipajca Jehová Diosca Jesusta, shujtaj angelcunatapishmi utilizanga (2 Tesalonicenses 1:6-9). Armagedón huashaca Diablopish, millai angelcunapish gentecunataca ña mana ashtahuan engañangacunachu. Cutin, Diospaj gobiernota apoyajcunaca achca bendicioncunatami chasquingacuna (Apocalipsis 20:1-3; 21:3-5).

16. ¿Tucurimui punllacunapi causacushcata yachashpaca imatataj rurana cangui?

¹⁶ Cai Allpapica ñallami tucui mana alli ruraicuna tucuringa. Caita yachashpaca ¿imatataj rurana cangui? Jehová Diosca Bibliata alli yachachunmi munan. Chaimantami tucui shunguhuan Bibliata yachana cangui (Juan 17:3, QC, 1989). Testigo de Jehovacunaca tucui semanacunami Bibliamanta ashtahuan yachangapaj tandanacunchij. Chai tandanacuicunaman ringapaj esforzari (Hebreos 10:24, 25-ta liyipai). Cambaj causaipi ima cambiocunata rurana cashpaca utcami cambiana  cangui. Chashna rurashpami Yaya Dioshuanca alli apanacungui (Santiago 4:8).

17. ¿Achca gentecunaca Diospaj punlla chayamujpica imamantataj mancharingacuna?

¹⁷ Diospaj punllaca gentecuna mana yuyashcapimi shamunga. Chaimantami apóstol Pabloca, millai gentecunata tucuchina punllaca tuta shuhua shamuj shinami shamunga nirca (1 Tesalonicenses 5:2, NM). Jesuspish: “Noé causai punllacunapi ima shinami carca, Runa Aichayuj tigramuna punllacunapipish, chai shinallatajmi canga. Dios manaraj yacuhuan tucuchijpica, tucuicunami allita micushpa, ubyashpa, cazaranacushpa, cazarachishpa causacurcacuna. Jatun huambuj huasiman Noé yaicuna punllacamami, chashnalla catircacuna. Dios llaquichingapaj cachashca yacu shamushpa tucuicunata tucuchingacamaca, chashna imata mana yuyashpa causacurcallacunami. Runa Aichayuj shamuna punllapajpish shinallatajmi canga” nircami (Mateo 24:37-39, NVI, 1999).

18. ¿Jesusca imatataj nirca?

¹⁸ Jesusca, ‘jatun micuita ruranallapi, machanallapi, cai causaipi imatapish charinallapi cancunapaj shunguta churashpa ama causanguichijchu. Diospaj punllaca, mana yuyashcapimi cai Allpamanca shamunga. Punllanta Taita Diosta mañashpa yuyaipi caichij. Chaimi chai llaquicuna shamujpica quishpiri tucunguichij. Runa Aichayuj shamujpipish paipaj ñaupajpi shayari tucunguichij’ nircami (Lucas 21:34-36). Cai pachapaj millai ruraicuna ñalla tucurina cashcata yachashpami Jesús nishcata cazuna canchij. Yaya Dioshuan, Jesushuan alli apanacujcunallami chai jatun llaqui punllacunamanta quishpirishpa, paraíso Allpapi sumajta causangacuna (Juan 3:16; 2 Pedro 3:13).