Judamanta caj Ester shuti solteraca Persia llajta Susa pueblopimi causarca. Paipaj familiataca Nabucodonosormi Jerusalenmanta apamushca carca. Estertaca paipaj primo Mardoqueomi huiñachirca. Mardoqueoca Persia llajtata jatun mandaj Asuerotami sirvij carca.

Asueroca mushuj reinatami charisha nirca. Chaimi paita sirvijcunaca chai llajtapi tiyaj ashtahuan sumaj huarmicunata paipajman apamurcacuna. Chaicunapurapica Esterpishmi carca. Chai huarmicunamantami jatun mandajca Esterta reina cachun agllarca. Mardoqueoca Estertaca, ‘can judía cashcata ama huillanguichu’ nircami.

Mandajcunata mandaj Amán (Hamán) runaca yallitaj jatun tucushcami carca. Paica tucuicuna paipaj ñaupajpi cumurichunmi munarca. Pero Mardoqueoca mana cumurircachu. Chaimantami yallitaj pꞌiñarishpa paita huañuchisha nirca. Mardoqueo judío cashcata yachaj chayashpaca Persia llajtapi causaj tucui judiocunata ima shina huañuchinatami yuyarca. Chaimantami Reytaca, ‘judiocunaca millaicunami can. Tucuicunatami huañuchina canchij’ nirca. Asueroca, ‘can munashcata rurailla’ nishpami shuj leyta churachun permisota curca. Chai leypica, ‘adar quilla 13 punllapica tucui judiocunatami huañuchina can’ nircami. Pero Jehová Diosca tucuitami ricucurca.

Esterca chai ley llujshishcata mana yacharcachu. Chaimantami Mardoqueoca shuj copiata cachashpaca, ‘jatun mandajhuan rimagri’ nirca. Esterca, ‘pipish mana cayajpi jatun mandajpajman rijpica huañuchingami. Ña shuj quillatami ñucataca mana cayashca. Pero rishami. Paipaj varata ñucapajman chutajpica causashami. Mana cashpaca huañushami’ nircami.

Esterca jatun mandaj Asueropaj huasimanmi rirca. Asueroca paita ricushpaca paipaj varatami chutashpa  ricuchirca. Ester cꞌuchuyajpica, ‘¿imatataj ningui?’ nircami. Paica, ‘shuj jatun micuitami rurarcani. Canpish Amanpish shamunguichij’ nircami. Ña micucushca qꞌuipaca cutinmi cayandij punllapajpish micunaman invitarca. Asueroca cutinmi, ‘¿Ester imatataj ningui?’ nirca. Paica, ‘shuj runami ñucata, ñuca llajtapuracunatapish huañuchisha nin, ama huañuchichun saquihuaichu’ nircami. Asueroca, ‘¿pitaj huañuchisha nin?’ nijpimi Esterca, ‘cai millai runa Amanmi can’ nirca. Chaimantami reyca yallitaj pꞌiñarishpa paita huañuchichun mandarca.

Amán rurashca ley ña firmashca cashcamantami reypish mana imata rurai tucurca. Chaimantami Amanpaj randi Mardoqueota mandachun churarca. Pai shuj mushuj leyta churachunpishmi permisota curca. Chai leypica judiocunaca paicunata llaquichisha nijpica macanacuna cashcatami ricuchirca. Adar quilla 13 punllapimi judiocunaca contracunata misharcacuna. Paicunaca chai punllataca cada huata yuyarishpami cushicurcacuna.