Bautizarishca asha punllacuna qꞌuipaca Jesusca, ‘Dios churashca Mandanamari ña cꞌuchuyamushca’ nishpami huillai callarirca. Paita catijcunaca paihuanmi Galilea, Judea llajtacunata purircacuna. Nazaret llajtaman tigrashpaca Jesusca sinagogamanmi rirca. Chaipimi Isaías quillcashcata pascashpaca, ‘alli huillaicunata huillachunmi Diosca espíritu santota ñucaman curca’ nishpa sinchita leyirca. Gentecunaca milagrocunallata rurachunmi munarca. Pero Jesusca alli huillaicunata huillangapajmi espíritu santota chasquirca. Chaimantami uyajcunataca, ‘cai quillcapi nishcaca cunanmari pajtarin’ nirca.

Chai qꞌuipaca Galilea cuchamanmi Jesusca rirca. Chaipimi Pedrota, Andresta, Santiagota, Juantapish ricurca. Paicunaca pescadocunata japijcunami carca. Qꞌuipaca Jesusta catijcunami tucurcacuna. Jesusca, ‘ñucata catichij. Ima shinami pescadocunata japinguichij, chashnallataj gentecunata pushamujcuna cachunmi yachachisha’ nircami. Chashna nijpimi chai rato paicunapaj trabajocunata saquishpa catircacuna. Paicunaca tucui Galilea llajtata rishpami mercadocunapi, sinagogacunapi, callecunapi Dios churashca Mandanamanta huillarcacuna. Achca gentecunami maiman rijpipish paicunata catircacuna. Jesús huillashcacunaca Siria llajtacamami uyarirca.

Qꞌuipaca ungushcacunata jambichun, demoniocunata llujshichichunmi paita catijcunapuramanta huaquincunamanca Jesusca poderta curca. Shujtajcunaca Jesushuanmi cada llajtaman rishpa huillarcacuna. Shinallataj María Magdalena, Juana, Susana, shujtaj alli huarmicunapishmi Jesustapish paita catijcunatapish atindijcuna carca.

Paita catijcunaman ima shina huillanata yachachishca qꞌuipaca Jesusca huillanamanmi cacharca. Galilea pueblocunapi huillajpica achcacunami bautizarishpa Jesusta catijcuna tucurcacuna. Shinallataj achcacuna paita catisha nishcamantami Jesusca pꞌucushca granocunata cosechanalla cashcahuan chꞌimbapurarca. Paica, ‘granocunata ashtahuan cosechajcuna tiyachun Jehovata  mañaichij’ nircami. Qꞌuipaca 70 catijcunata agllashpami Judea llajtacunapi huillachun ishqui ishqui cacharca. Chaimi paicunaca Dios churashca Mandanamanta tucuicunaman huillarcacuna. Tigramushpaca imallata rurashcatami cushilla Jesusman huillarcacuna. Jesusta catijcuna huillashpa catichunca Diabloca mana jarcai tucurcachu.

Jesusca, ‘tucui llajtacunapi Dios churashca Mandanamanta huillaichij. Diospaj Shimita yachachishpa paicunata bautizaichij’ nircami. Chashna nishpami pai jahua pachaman rishca qꞌuipaca paita catijcuna huillashpa catichun tucuita allichishpa saquirca.