Sauloca Tarso llajtapimi huacharirca. Fariseo cashcamantami judiocunapaj leycunata alli yacharca. Paica Jesusta catijcunata pꞌiñajmi carca. Chaimantami huasin huasin yaicushpa cꞌaricunata, huarmicunatapish llujshichishpa carcelpi churarca. Shuj cutincarin pꞌiñaj gentecuna Jesusta catij Estebanta rumicunahuan shitashpa huañuchicujpimi Sauloca ricushpalla saquirirca.

Sauloca Jerusalenpi caj Jesusta catijcunata llaquichishca jahuapish sacerdotecunata mandajtaca, ‘Damasco pueblopi Jesusta catijcunata llaquichingapaj saquihuai’ nircami. Chaiman chayagricujpimi ñapish paipaj muyundijpi achijlla ricurirca. Chaimi Sauloca pambaman urmarca. Qꞌuipaca, ‘Saulo, ¿ima nishpataj ñucataca llaquichisha ningui?’ nishcami uyarirca. Paica, ‘¿pitaj cangui?’ nijpimi chai rimajca, ‘ñucaca Jesusmi cani. Damascoman ri. Chaipimi can imata ruranata huillanga’ nirca. Chai ratomi Sauloca ciego saquirirca. Chaimantami paitaca maquimanta aisashpa puebloman pusharcacuna.

Damascopica, Jesusta catij Ananías shuti runami causarca. Paimanmi Jesusca muscuipi shina ricurishpaca, ‘Ananías Recta shuti ñanman ri. Judaspaj huasipi Saulo runata mashcagri’ nirca. Chaimi Ananiasca, ‘amito, chai runaca canta catijcunataca prezupi churacushcatami uyashcani’ nirca. Pero Jesusca, ‘rilla, achca llajtacunapi Diosmanta shamuj alli huillaicunata huillachunmi paita agllarcani’ nircami.

Chashna nijpimi Ananiasca Saulopajman rishpa, ‘Saulo ñuca huauqui, Jesusmi can cutin ricuchun ñucataca cacharca’ nirca. Sauloca chai ratomi cutin ricurca. Paica Jesusmanta yachashpami paita catij tucurca. Qꞌuipaca bautizarishpami sinagogacunapi Jesusta catijcunahuan huillai callarirca. Saulo Jesusmanta yachachicushcata judiocuna ricushpaca achcatami  mancharishcacuna canga ¿nachu? Judiocunaca, ‘¿manachu cai runaca Jesusta catijcunata llaquichij carca?’ nircacunami.

Damascopica quimsa huatacunatami Sauloca Diosmanta huillarca. Judiocunaca paita pꞌiñashcamantami huañuchinata yuyarircacuna. Chaimi Jesusta catijcunaca Saulotaca pirca jutcuta pasachishpa shuj canastapi uriyachishpa cacharcacuna.

Jerusalenman chayashpaca Jesusta catijcunahuanmi Sauloca tandanacusha nirca. Pero paicunaca Saulotaca mancharcacunami. Chaimi Jesusta catij Bernabeca Saulota apostolcunapajman pushashpa, mana ñaupa runa laya cashcata parlarca. Qꞌuipaca Sauloca Jerusalenpi caj huauqui panicunahuan tandanacushpami cushicuihuan Diosmanta huillai callarirca. Qꞌuipa punllacunaca paitaca Pablo nijcunami carca.