Joseca Jacobpaj qꞌuipa churimi carca. Paipaj punta huauquicunaca paicunapaj yaya Joseta ashtahuan cꞌuyashcatami ricurcacuna. ¿Ima shinashi sintirishcacuna canga? Paitaca achcatami envidiarcacuna pꞌiñarcacunapish. Shuj cutinca Joseca muscuicunatami charirca. Pai muscushcacunatami paipaj huauquicunaman huillarca. Paicunaman huillajpica chai muscuicunaca Josepaj ñaupajpi cumurina cashcata ricuchijtami yuyarcacuna. Chaimantami ashtahuan pꞌiñarcacuna.

Josepaj huauquicunaca Siquem llajta cꞌuchullapimi ovejacunata michicurcacuna. Jacobca Josetaca paipaj huauquicuna allilla cashcata ricunamanmi cacharca. Huauquicunaca José caruta shamucujta ricushpaca, ‘chaitaca muscuj huambramari shamucun. Huañuchishunchij’ nircacunami. Josetaca japishpami jutcupi shitarcacuna. Pero Judaca, ‘ama huañuchichijchu. Ashtahuanpish esclavo cachun cꞌatushpa cachashunchij’ nircami. Chaimantami Egipto llajtaman ricuj madianitacunaman Josetaca 20 piezas cullquipi cꞌaturcacuna.

Chai qꞌuipaca huauquicunaca paipaj churanataca chivopaj yahuarhuanmi llihuircacuna. Paicunapaj yayataca, ‘¿cai churanaca manachu cambaj churipaj?’ nircacunami. Jacobca shuj sacha animalmi Josetaca huañuchishca nishpami yallitaj llaquirirca. Paitaca pi mana cushichi tucurcachu.

Egiptoman chayajpica Potifar runami Josetaca paipaj esclavo cachun randirca. Diosca Josehuanmi carca. Joseca alli trabajador, tucuita alli ruraj cashcatami Potifarca ricurca. Chaimantami asha tiempo huashaca tucui pai charishcata Josepaj maquipi churarca.

 Potifarpaj huarmica José sumaj ñahui, munanalla cajta ricushpami cutin cutin ñucahuan siririshun nij carca. ¿Joseca imatashi rurarca? ‘Chaita rurana mana allichu. Ñuca amoca tucuitami ñuca maquipi churarca. Canca paipaj huarmimi cangui. Canhuan siririshpaca Diospaj ñaupajpimi juchata rurasha’ nircami.

Shuj punllaca Potifarpaj huarmica paihuan siririchunmi Josetaca obligasha nirca. Paipaj churanapi charirijpimi Joseca callpashpa chaimanta llujshirca. Potifar chayajpica llullashpami paipaj huarmica, ‘Joseca ñucatami japirisha nirca’ nishpami huillarca. Potifarca pꞌiñarishpami Josetaca prezupi churarca. Pero Jehová Diosca Josetaca cuidarcami.