Josueca Jehová Diospaj llajtataca achca huatacunatami pushashca carca. 110 huatacunata charishpami huañurca. Israelitacunaca Josué causacujpica Diostami adorarcacuna. Pero pai huañujpica Canaanpi causaj gentecuna shinami yanga dioscunata adorai callarircacuna. Diosca paita mana cazushcamantami Canaanta mandaj Jabín israelitacunata llaquichichun saquirca. Chaipimi israelitacunaca Diostaca ayudahuai nishpa rogarircacuna. Chaimi Diosca shuj mushuj pushajta agllarca. Paica Barac runami carca. Paimi israelitacunataca Jehovata cutin adorachun ayudana carca.

Débora huarmica shuj profetami carca. Paica Dios ima nishcata huillangapajmi Baracta cayaj cacharca. Pai chayajpica, ‘10.000 runacunata pushashpa Cisón yacuman ri. Chaipimi mandaj Jabinpaj soldadocunahuan macanacungui. Soldadocunata mandaj Sísara runatapish mishanguimi’ nircami. Baracca, ‘can ñucahuan rijllapimi ñucaca risha’ nircami. Débora huarmica, ‘shinashpaca rishami. Sísara runataca shuj huarmipaj maquipimi Mandaj Diosca churanga. Mana canchu huañuchingui’ nircami.

Débora huarmica Barachuan, paipaj soldadocunahuanmi Tabor urcuman rircacuna. Chaipimi macanacunapaj allichirircacuna. Sísara runa chaita yachaj chayashpaca macanacuna carrocunata, soldadocunatami  pugru pambapi tandachirca. Débora huarmica Baractaca, ‘cunanmi Mandaj Diosca cantaca mishachinga’ nircami. Chaipimi Baracca paipaj 10.000 soldadocunandij Sísara runapaj soldadocunahuan macanacunaman urcumanta uriyarcacuna.

Qꞌuipaca Jehová Diosca Cisón yacuta jundachishpami jichachirca. Chaipimi Sísara runapaj macanacuna carrocunaca lodopi pambarishpa saquirirca. Sísara runaca paipaj carromanta uriyashpami callpashpa rirca. Baracca paipaj soldadocunahuanmi Sísara runapaj soldadocunata misharcacuna. Pero Sísara runaca Jael shuti huarmipaj carpa huasipimi miticurca. Jaelca asha lecheta ubyachun cushpami mantahuan cꞌatachirca. Shaicushca cashcamantami Sísara runaca dormirca. Chaipimi Jaelca allilla cꞌuchuyashpaca carpa huasita charichina estacahuan umapi clavarca. Chashnami Sísara runaca huañurca.

Qꞌuipaca Baracca Sísara runata mashcashpami chayarca. Jaelca paipaj carpa huasimanta llujshishpaca, ‘can mashcacushca runata shamui ricuchisha’ nirca. Barac yaicushpaca Sísara runa huañushca siricujtami ricurca. Chaimi Baracpish Deborapish contracunata mishachun ayudashcamanta Jehová Diosta alabashpa cantarcacuna. Chashnami israelitacunaca 40 huatacunata tranquilo causarcacuna.