Tucui religioncunapimi alli shungu gentecuna tiyan. Chai gentecunataca Diosca mana cungarishcachu. Shinapish, religioncunaca achca mana allicunatami rurashca (2 Corintios 4:​3, 4; 11:​13-​15). Noticiacunapica huaquin religioncuna terrorismocunapi, gentecunata huañuchinapi, jatun macanacuicunapi chagrurishcata, huahuacunata violashcatami uyashcanchij. Chaicunata uyashpami alli shungu gentecunaca ¡achcata llaquirishca! Mateo 24:​4, 5, 11, 12-ta rezapai.

Alli religionca Jehová Diostami jatunyachin. Cutin panda religionca Diostami pingaipi churan. Panda religionca Diosmanta, huañushcacunamantaca llullacunatami yachachin. Shinallataj, Biblia mana yachachishca yuyaicunatami yachachin. Diosca tucui gentecuna paimanta alli yachachunmi munan. Eclesiastés 9:​5, 10; 1 Timoteo 2:​3-5-ta rezapai.

Diostami cꞌuyanchij nishpa Diablopaj munaita ruraj religioncunaca Diosta mana cushichinchu (Santiago 4:4). Noepaj punllacunapi yacu juillu tiyashca qꞌuipami Babilonia llajta tiyarca. Babiloniapimi panda religioncunaca tiyai callarirca. Chaimantami Bibliapica tucui panda religioncunata “Babilonia jatun pueblo” nishpa shutichin. Gentecunata llaquichij, llullaj religioncunataca Diosca ñallami tucuchinga. Apocalipsis 17:​1, 2, 5, 16, 17; 18:8-ta rezapai.

Tucui panda religionpi caj alli shungu gentecunataca, Jehová Diosca mana cungarishcachu. Chaimantami Bibliamanta alli yachachishpa panda religioncunamanta llujshichun ayudacun. Miqueas 4:​2, 5-ta rezapai.

Jehová Diosca paimanta yachasha nijcunata, allita rurasha nijcunataca mana cungarinchu. Chaimantami panda religioncunamanta llujshichun nin. Diosta cꞌuyashpa, paita cushichisha nishpaca mana alli causaita, panda crishcacunatami saquina can. Apocalipsis 18:4-ta rezapai.

Jesús huañushca qꞌuipa, apostolcuna yachachijpica alli shungu gentecunaca cushicushpami alli huillaicunata chasquirca. Jehová Diosmi paicunataca mushuj, cushilla, alli causaita charichun yachachirca. Chai gentecuna shinami ñucanchijpish Bibliamanta yachashpa Jehovata puntapi churashpa causana canchij. 1 Tesalonicenses 1:​8, 9; 2:​13-ta rezapai.

Panda religionta saquishpa alli religionta catijpica, Diosca cushicushpami chasquin. Chaita rurajcunaca Diospaj amigomi tucun. Shinallataj achca huauqui panicunapaj cꞌuyaitami charin. Shamuj punllacunapipish huiñai causaitami charingacuna. ¿Cai bendicioncunata chasquisha ninguichu? Marcos 10:​29, 30; 2 Corintios 6:​17, 18-ta rezapai.

Panda religioncunata tucuchishpami Diosca cushilla, alli causaita apamunga. Chaimantami panda religioncunaca ña mana pandachinga. Gentecunatapish mana chꞌicanyachingachu. Tucui gentecunami mana llullaj Jehová Diosllata adorangacuna. ¿Manachu caica shuj alli huillai can? Apocalipsis 18:​20, 21; 21:​3, 4-ta rezapai.