1, 2. a) ¿Cunanlla cazarashcacunaca ima shinataj causanata munan? b) ¿Cai yachaipica ima tapuicunatataj yachagrinchij?

 NOVIO noviaca cazarai punllaca cushillami sintirincuna. Paicunaca, “cazarashca qꞌuipaca alli causaitami mashcashun, unitami cushilla causashun” nincunami.

² Mana tucui cazadocunachu cazarashca punllapi shina cushilla unita causancuna. Cushilla causangapajca Dios mandashcacunatami alli pajtachina can. ¿Cazarashpaca ima beneficiocunatataj chari tucunchij? ¿Ima shinataj alli huarmita, alli cusata agllai tucunchij? ¿Alli cusa, alli huarmi cangapajca imatataj rurana canchij? ¿Cazarashpa unita causangapajca imatataj rurana canchij? Cai tapuicunataca Bibliapimi yachashun (Proverbios 3:5, 6-ta leyipai).

3. ¿Cazarashpallachu cushilla causai tucunchij?

³ Maijancunaca, “cazarashpallami cushilla causashun” nincunami. Chaica mana ciertochu. Jesusca, soltero causaica sumaj regalo shinami can nircami (Mateo 19:11, 12). Pablopish soltero causanaca allimi  can nircami (1 Corintios 7:32-38, NM). Ñucanchij culturapi cazaranaca obligado shina ricurishcallamanta, familiacuna, amigocuna cazaranami cangui nishcallamantaca mana cazaranachu canchij. Ashtahuancarin cada unomi cazaranata, mana cazaranata decidina canchij.

4. ¿Cazadocunaca ima beneficiocunatataj charincuna?

⁴ Bibliapica, cazado causanaca Dios cushca sumaj bendicionmi can ninmi. ¿Cazadocunaca ima beneficiocunatataj charin? Jehová Diosca, Adán pailla cajta ricushpami: “Cꞌarilla canaca mana allichu. Chaimanta paita ayudaj, pai imapaj minishticushcata rurasha” nirca (Génesis 2:18). Diosmi Evataca Adanpaj huarmi cachun rurarca. Paicunami punta familia tucurca. Cazarashpa huahuacunata charishpaca allimi huiñachina can. Huahuacuna imalla minishtishcatapishmi cuna can. Pero huahuacunata charinapajllaca mana cazaranachu canchij (Salmo 127:3; Efesios 6:1-4).

5, 6. ¿Cazadocunaca ima shinataj quimsata caupushca huasca shina cai tucun?

⁵ Rey Salomonca: ‘Shujlla causanapaj randica, ishqui causanami ashtahuan alli. Ishqui cashpami trabajashpapish, alli pagota japincuna. Shuj urmajpipish, caishujca jatarichinmi. Ashtahuanpish ¡aij, shujlla causaj runalla! Paitaca urmajpipish ¿pitaj jatarichingari? Quimsata caupushca huascaca mana jahualla pꞌitirinchu’ nircami (Eclesiastés 4:9-12).

⁶ Cazadocunaca cꞌuyaita charishcamantami ishquindij alli apanacuncuna. Caishujmanta chaishujmanta ayudanacushpami alli cuidarincuna. Jehová Diosta ishquindij sirvishpacarin ashtahuanmi  cushilla causangacuna. Por ejemplo, quimsa huascata caupushcami ishqui huascatapish yalli sinchi can. Cazadocunapish Jehová Diosta paicunapaj causaipi charishpaca quimsata caupushca huasca layami sinchi canga.

7, 8. ¿Cazaranamantaca apóstol Pabloca imatataj nirca?

⁷ Cazarashca huashami cusa huarmica aichapi chayarishpa cushicui tucun (Proverbios 5:18). Huambraraj cajpimi shuj cꞌarihuan, huarmihuan cana munaicunaca achca tiyan. Pero aichapi chayarina munaillahuan cazarashpaca mana alli cusata, mana alli huarmitachari agllashun. Chaimantami Bibliapica, chairaj huambraraj cashpaca mana cazaranachu can nin (1 Corintios 7:36, NM). Cazarangapaj edadta charijpimi aichapi chayarina munaicunaca ña mana tanto tiyan. Chaipimi pihuan cazaranata alli yuyarishpa agllai tucushun (1 Corintios 7:9; Santiago 1:15).

⁸ Cazaranata munajcunaca apóstol Pablo ima nishcatami yuyarina can. Paica: “Cazarashcacunaca, paicunapaj causaipimi llaquita charingacuna” nircami (1 Corintios 7:28). Alli huarmita, alli cusata japishpapish huaquinpica problemacunatami charishun. Chaimantami manaraj cazarashpaca pihuan cazaranata alli agllana canchij.

9, 10. ¿Diosta mana sirvijhuan cazarashpaca imataj tucushun?

⁹ Pihuan cazaranata agllacushpaca, 2 Corintios 6: 14-tami yuyarina canchij. Chaipica: “Cancunaca mana crijcunahuan yugushca shina ama tandanacuichijchu” ninmi. Caita yuyashun. Yapungapajca shuj  jatun animalhuan, shuj uchilla animalhuanca mana yuntai tucunchijchu. Chai animalcunaca mana igual fuerzata charinchu. Chaimantami ama llaquita charichunca ishquindijta mana yuntai tucunchij. Shinallatajmi Diosta mana sirvij huarmihuan, cꞌarihuan cazarashpaca achca llaquicunata charishun. Chaimantami Bibliapica Diosta sirvijcunallahuan cazarachun nin (1 Corintios 7:39).

¹⁰ Maijancunaca sololla mana saquirisha nishpami Diosta mana sirvijcunahuan cazaranata yuyancuna. Pero Diospaj mandashcacunata ladoman saquishpaca achca llaquicunatami chari tucushun. Ñucanchijpajca Jehová Diosta sirvinami ashtahuan importante can. Chaimanta, “Diosta mana sirvijhuan cazarashpaca, ¿Yaya Diostaca cushillachu sirvisha?” nishpami tapurina canchij. Achcacunami Diosta mana sirvijhuan cazaranapaj randica soltero saquirinata agllashcacuna (Salmo 32:8-ta leyipai).

11. ¿Alli cusata, alli huarmitaca ima shinataj agllai tucungui?

¹¹ Diosta sirvij cashpapish mana tucuicunachu cambajca alli huarmi, alli cusa canga. Chaimanta cazaranata yuyacushpaca pihuanmi alli apanacungui, pitami shungumanta cꞌuyangui, paihuanmi cazarana cangui. Shinallataj can laya causaipi imata ruranata munajhuanmi cazarana cangui. Chashna huarmi o cꞌari ricuringacamami shuyana cangui. Ashtahuancarin Diosta alli sirvij huarmita, cꞌarita ricushpami agllana cangui. Chaipajca ‘alli cazuj alli yuyaiyuj sirvij’ rurashca publicacioncunapimi cazaranamanta imata yachachishcata alli yachana cangui (Salmo 119:105-ta leyipai).

12. a) ¿Huaquin culturacunapica yaya mamacunaca imatataj rurancuna? b) ¿Chai yaya mamacunaca imamantataj Abrahampaj ejemplota catina can?

 ¹² Huaquin culturacunapica yaya mamacunami huahuacuna pihuan cazaranata agllancuna. Huahuacuna alli causachun munashpami chashna rurancuna. Ñaupa tiempopipish yaya mamacunami huahuacuna pihuan cazaranata agllajcuna carca. Chaimantami chai costumbrecunata catishun nishpaca, yaya mamacunaca Bibliapi ima yachachishcacunata catina can. Chashnami paicunapaj churipaj, ushushipaj alli cusata, alli huarmita agllangacuna. Por  ejemplo, Abrahamca paipaj churi Isaacpaj shuj huarmita mashcacushpaca mana achca cullquita charijtachu agllarca. Chaipaj randica Diosta alli sirvij huarmitami agllarca (Génesis 24:3, 67). Nota 25-ta ricui.

13-15. a) ¿Shuj cꞌarica manaraj cazarashpaca imatataj rurana can? b) ¿Shuj huarmica manaraj cazarashpaca imatataj rurana can?

¹³ “Cazaranapaj ñami listo cani” nishpachari yuyangui. Pero, ¿cazaranapaj listo cashcataca ima shinataj yachai tucungui? Cunanca chaimantami ashtahuan yachashun.

¹⁴ Bibliapica, cusapish huarmipish chꞌican chꞌican responsabilidadcunatami charin ninmi. Chaimantami cꞌari cashpa, huarmi cashpapish cazarangapajca listo cashcata ricuchina canchij. Por ejemplo, cꞌarica, “¿familiata ñaupajman pushangapajca ñachu listo cani?” nishpami tapurina can. Jehová Diosca cusacuna paicunapaj huarmicunata huahuacunata cꞌuyachun, imalla minishtishcata cuchunmi munan. Tucuimanta yallica cusami Jehovamanta familiaman yachachina can. Bibliapica, cusacuna familiata mana alli cuidashpaca ‘crishcata saquishpa mana crijtapish yallimi tucun’ ninmi (1 Timoteo 5:8). Chaimanta cazaranata munacushpaca, Proverbios 24:27-tami yuyarina cangui. Chaipica: “Llujshirishpa imatapish mashcaringuiraj. Cambaj maquihuan chagrata ruranguiraj. Chashna rurashpami cambaj quiquin huasita shayachingui” ninmi. ¿Cai versoca imatataj yachachin? Manaraj cazarashpami Jehová Dios munashca shina alli cusa cangapaj esforzarina cangui.

 ¹⁵ Shuj huarmi cazaranata yuyacushpaca, “¿cusata ayudangapajca ñachu lista cani? ¿huahuacunata charishpapish alli huiñachinata valishachu?” nishpami tapurina can. Bibliapimi huarmica cusata ima shina ayudana cashcata, huahuacunata ima shina huiñachina cashcata yachachin (Proverbios 31:10-31). Achcacunaca, “cazarashpaca ñuca huarmi o ñuca cusaca caita o chaitami rurana can” nincunami. Pero Jehová Diosca ñucanchijrajmi paicunapaj imatapish rurachun munan.

16, 17. ¿Cazaranata munacushpaca imatataj alli yuyarina cangui?

¹⁶ Manaraj cazarashpami alli cusa cangapaj, alli huarmi cangapaj Jehová imata yuyajta alli yachana canchij. Por ejemplo, cusacunaca familiapaj uma cashpapish paipaj huarmita huahuacunataca mana maipish cachun tratanachu can. Chaipaj randica Jesuspaj ejemplotami catina can. Jesusca cꞌuyaihuanmi ñucanchijtaca cuidan (Efesios 5:23). Huarmipish paipaj cusatami ayudana can. Ima decisionta cusa agllacujpipish apoyanami can (Romanos 7:2). Chaimantami shuj huarmi manaraj cazarashpaca, “¿ñuca cusa juchayuj cajpipish tucuipichu cazui valisha?” nishpa tapurina can. Cusata mana cazui pudinata yuyashpaca tal vez cazaranapaj shuyanarajmi can.

¹⁷ Cazadocunaca paicunallapaj alli canata mashcanapaj randica paicunapaj huarmi o cusa alli cachunmi sustarina can (Filipenses 2:4-ta leyipai). Apóstol Pabloca: ‘Cusacuna, quiquin cꞌuyarij shinallataj, paicunapaj quiquin huarmitapish cꞌuyachun. Huarmipish, paipaj cusata respetachun’ nircami (Efesios 5:21-33). Cꞌari cashpapish huarmi cashpapish cꞌuyaita, respetota  ricuchichunmi munanchij. Chaimantami cusaca paipaj huarmi respetachun munan. Cutin, huarmipish paipaj cusa cꞌuyaita ricuchichunmi munan. Chashna rurashpallami alli causaita charingacuna.

18. ¿Noviocuna cashpaca imamantataj cuidadota charina can?

¹⁸ Manaraj cazarashpami noviocunaca imata munashcata, imata mana munashcata paicunapura alli rijsina can. Chaipajca alli parlanacunatami yachana can. Shinallataj noviocunaraj cashpami, “¿paihuanca ciertotajchu cazarasha nini?” nishpa yuyarina can. Ishquindij ashtahuan rijsinacushpaca ashtahuanmi  munaringacuna. Pero cꞌuyaita ricuchicushpapish cuidadotami charina canchij. Ñucanchij novio o noviata shungumanta cꞌuyashpaca juchapi ama urmangapajmi jarcarishun. Chashnami Jehová Diospaj ñaupajpi alli ricurishun (1 Tesalonicenses 4:6, NM).

19, 20. ¿Diosta sirvijcunaca cazaramantaca imatataj yuyanchij?

¹⁹ Achca librocunapi, peliculacunapica noviocuna cazarana punllacamalla cushilla cashcatami ricuchin. Pero cazarashca qꞌuipapish cushilla causanatami mashcashpa catina canchij. Jehová Diosca cazadocunaca huiñaipaj cushilla causachunmi munan (Génesis 2:24).

²⁰ Achca gentecunami mana alli yuyashpa cazaranllacuna. Cutin shujtajcunacarin problemacuna ricurijpica divorciarinllacunami. Pero Jesusca, “Dios tandachishcataca, ni pi amataj chꞌicanyachichun” nircami (Mateo 19:6). Quimsata caupushca huascamanta Biblia parlashcataca mana cungarinachu canchij. Chai huasca sinchi cashcamantami ni pi mana pꞌiti tucun. Jehovapaj ayudata mashcashpaca cazadocunaca chai caupushca huasca layallatajmi mana separarishpa cushilla causangacuna.

21. ¿Cusandij huarmindij cꞌuyanacushpa causangapajca imatataj rurana canchij?

²¹ Tucuicunami juchayujcuna canchij. Chaimantami huaquin cazadocunaca huarmi o cusa pandarijllata ricuncuna. Ñucanchijpish chaita rurashpaca llaquillami causashun. Pero ñucanchij huarmi o cusa alli rurajta ricushpaca cushillami causashun. Jehová Diosca  juchayujcuna cashcata yachashpapish pandarishcacunallataca mana ricunchu. Salmo 130:3-pica: “Jatun Dioslla, ñucanchij juchacunata quiquin ricuracujllapica, ¿pitaj quiquinpaj ñaupajpica shayari tucungari?” ninmi. Cazadocunaca Jehovapaj ejemplota catishpami paicunapaj huarmi o cusa allita rurajta ricuna can. Paicuna pandarijpipish shungumantami perdonana can (Efesios 4:32-ta leyipai).

22, 23. ¿Abrahammanta Saramantaca imatataj yachanchij?

 ²² Huatacuna pasajpimi cazadocunaca ashtahuan cushilla causai tucungacuna. Por ejemplo, Abrahampish Sarapish huañungacamami ishquindij cushilla causarcacuna. Jehová Diosca Abrahamtaca Ur llajtamantami rina cangui nircami. Chashna mandai horasca Saraca ñami 60 huatacunata charishcanga. Sarapajca huasita saquishpa carpa huasicunapi causanaman rinaca sinchimi ricurishcanga. Sinchi ricurijpipish Abrahamta respetashcamanta, cꞌuyashcamantami paitaca apoyarca. Shinallataj Abrahampaj rurashcacuna alli llujshichun munashpami paitaca tucuipi ayudarca (Génesis 18:12; 1 Pedro 3:6).

²³ Cusandij huarmindij alli causanata munashpapish mana siempre imapipish de acuerdo cashunchu. Por ejemplo, shuj punllaca Abrahamca Sara ima nishcata mana uyasha nircachu. Chaimantami Jehová Diosca: “Sara imallata nishcata rurailla” nirca (Génesis 21:9-13). Cambaj huarmihuan o cusahuan imapi mana de acuerdo cashpaca ama desanimarichu. Chaipaj randica cꞌuyaita, respetotami ricuchishpa catina cangui.

24. ¿Cazarashpa Diospaj ñaupajpi alli ricuringapajca imatataj rurana canchij?

²⁴ Congregacionpica achca cusa huarmicunami cushilla causancuna. Cazaranaca mana shuj pugllaichu can. Chaimantami cazarasha nishpaca alli ricushpa agllana cangui. Tucui vidapaj cazarana cashcamantami Jehovapaj ayudata mashcana cangui. Chashnami cazarangapaj preparado cangui. Shinallataj alli huarmita, alli cusatami agllangui. Cambaj huarmihuan o cusahuan cꞌuyanacushpami causangui. Ashtahuantajca Jehová Diostami jatunyachingui.