YACHAI 09
Diosta mañashpami paipajman cꞌuchuyangui
¿Pi canman tranquilidadta cuchun, cushichichun, ayudachun minishtinguichu? ¿Diospajman cꞌuchuyanata munanguimanchu? Jehová Diosta mañajpimi paica canta cushichinga, ayudanga. Pero ¿ima shinataj Diostaca mañana canchij? ¿Paica tucui mañashcacunatachu uyan? ¿Cambaj mañashcacunata Dios uyashcata yachangapajca imatataj rurana cangui? Cai tapuicunata yachanatachari munangui.
1. ¿Pitataj mañana canchij? ¿Imacunamantataj mañana canchij?
Jesusca: ‘“Jahua pachapi caj ñucanchij Yaya” nishpami mañana canguichij’ nircami (Mateo 6:9). Paillatajmi Yaya Jehová Diosta mañaj carca. Ñucanchijpish Jehová Diosta mañashpaca paihuanmi ashtahuan amigos cashun.
Yaya Diosta mañacushpaca tucuitami parlanalla canchij. Pero ‘pai munashca shinami imatapish’ mañana canchij. Chaimi Diosca uyanga (1 Juan 5:14). Imacunamanta mañana cashcataca Jesusmi yachachirca (Mateo 6:9-13-ta liyipai). Imamanta sustarishca cashpaca Diostami mañana canchij. Ashtahuancarin pai ñucanchijmanta imallata rurashcata yuyarishpami pagui nina canchij. Shujtajcunata ayudachunpishmi mañana canchij.
2. ¿Yaya Diostaca ima shinataj mañana canchij?
Bibliapica ‘tucui shunguhuan Diospaj ñaupajpi mañaichigari’ ninmi (Salmo 62:8). Paitaca sinchita o shungu ucullapimi mañai tucunchij. Shayarishpapish, cungurishpapish, ima shinapish respetohuan mañanallami canchij. Maipi cashpapish, ima horapish mañanallami canchij.
3. ¿Diosca ñucanchij mañashcacunataca ima shinataj uyan?
Por ejemplo, Jehová Diosca ñucanchij tapuicunata Bibliapi cutichishpami ñucanchij mañashcacunata uyan. Chashnami Diospaj yachaita charinchij (Salmo 19:7; Santiago 1:5-ta liyipai). Shinallataj ñucanchij causaipi cambiocuna tiyajpica Yaya Diosca tranquilidadtami cun. Ñucanchij ima minishtishcapi ayudachunmi paipaj sirvijcunamanpish yuyaita cun.
ASHTAHUAN YACHAI
Tucui shunguhuan Yayitu Diosta mañashpa paita cushichishcata, ñucanchijpajpish alli cashcata yachai.
4. Diostaca pai munashca shinami mañana canchij
¿Jehová Dios ñucanchij mañashcacunata chasquij cashcata o mana chasquij cashcataca ima shinataj yachangui? VIDEOTA ricui.
Jehová Diosca paita mañachunmi munan. Salmo 65:2-ta liyipai. Qꞌuipaca cai catij tapuicunatami yachashun:
-
¿Mañashcacunata uyaj Dios paita mañachun munashcata cringuichu? ¿Imamantataj chaita cringui?
Yaya Dios ñucanchij mañashcacunata uyachun nishpaca paipaj mandashcacunatami cazuna canchij. Miqueas 3:4 y 1 Pedro 3:12-ta liyipai. Qꞌuipaca cai catij tapuitami yachashun:
-
¿Cambaj mañashcacunata Dios uyaj cashcataca imamantataj seguro cangui?
Shuj guerra tiyajpimi ishqui ladomanta grupocunaca ganangapaj Diosta mañacuncuna. ¿Cai mañashcacunataca Diosca uyangachu?
5. Ñucanchijca shungumantami Yaya Diostaca mañana canchij
Maijan gentecunaca chaillatataj chaillatataj mañachunmi yachachishcacuna. Pero ¿Jehová Diosca ima shina mañachuntaj munan? Mateo 6:7-ta liyipai. Qꞌuipaca cai catij tapuitami yachashun:
-
¿Chaillatataj chaillatataj ama mañangapajca imatataj rurana cangui?
Cada punlla Jehová Dios ima bendicionta cushcapi yuyai. Qꞌuipaca chai bendicionmanta Jehová Diosta pagui ni. Shuj semanacama chashna mañashpaca mana chaillatataj chaillatataj mañacushcatami ricuchingui. Sino chꞌican chꞌican cosascunamanta mañashcatami ricuchingui.
Shuj alli yayaca paipaj churi shungumanta parlachunmi munan. Chashnallatajmi Jehová Diospish tucui shunguhuan paita mañachun munan.
6. Mañanaca Dios cushca regalomi can
¿Llaquipi cajpipish cushilla cajpipish Diosta mañanaca ima shinataj sinchiyachin? VIDEOTA ricui.
Bibliapica Yaya Diosta mañajpica paica ñucanchijmanca tranquilidadtami cunga ninmi. Filipenses 4:6, 7-ta liyipai. Qꞌuipaca cai catij tapuicunatami yachashun:
-
¿Problemacunaca mana tucurijpipish imamantataj Diosta mañashpa catina canchij?
-
¿Imatataj Yaya Diosman mañanata munanguiman?
¿Caita yacharcanguichu?
Amén shimica “chashna cachun” nisha ninmi. Ñaupa tiempomantami Diosta mañanata tucuchicushpaca chashna cachun o “amén” nijcuna carca (1 Crónicas 16:36).
7. Diosta mañangapaj tiempota surcui
Huaquincunaca yallitaj ocupado cashcamantami Diosta mañanata cungarincuna. ¿Jesuspajca Diosta mañana importante cashcataca ima shinataj yachanchij? Mateo 14:23 y Marcos 1:35-ta liyipai. Qꞌuipaca cai catij tapuicunatami yachashun:
-
¿Jesusca Diosta mañangapajca imatataj rurarca?
-
¿Ima horastaj mañai tucungui?
HUAQUINCUNACA: “Diosta mañanaca alli sintirichunllami ayudan” nincunami.
-
¿Canca imatataj yuyangui?
YUYARISHUNCHIJ
Tucui shunguhuan Diosta mañashpaca paipajmanmi cꞌuchuyanchij, tranquilomi sintirinchij. Paita cazungapajpish fuerzastami charishun.
Yuyaringapaj tapuicuna
-
¿Pitataj mañana canchij?
-
¿Ima shinataj mañana canchij?
-
¿Diosta mañanaca ima shinataj ayudan?
CAICUNATAPISH RICUI
Diosta mañanamanta gentecuna rurashca tapuicunapaj respuestacunata yachai.
“Diosta mañanamanta tapuicuna” (Huillaj, 1 de octubre de 2010)
Imacunamanta Diosta mañana cashcata, paita mañangapaj imata nina cashcata yachai.
“¿Diosta mañanaca imamantataj valishca can?” (jw.org paginapi ricui)
Pita mañana cashcata Bibliapi yachachishcata yachai.
“¿Santocunata mañanaca allichu can?” (jw.org paginapi ricui)
Cai cantashca videopi ima hora, ima shina Diosta mañana cashcata ricui.
Caitapish yachai
GENTECUNA RURASHCA TAPUICUNA
¿Testigo de Jehovacunaca ima shinataj Bibliamanta yachachincuna?
Testigo de Jehovacunahuan Bibliamanta gratis estudiacushpaca can charishca Bibliatami utilizai tucungui. Cambaj familiata o cambaj amigocunatapish canta compañachun invitai tucungui.
