YACHAI 24
¿Bibliaca angelcunamantaca imatataj yachachin?
Jehová Diosca jahua pachapi tiyaj paipaj familiatami rijsichun munan. Angelcunataca ‘Diospaj churicuna’ nishpami rijsinchij (Job 38:7). ¿Bibliaca angelcunamantaca imatataj nin? ¿Angelcunaca gentecunata ayudai tucunchu? ¿Tucui angelcunachu Diospaj familia can?
1. ¿Angelcunaca picunataj can?
Manaraj cai Allpata rurashpaca Jehová Diosca angelcunatami rurarca. Angelcunaca Dios shinami espiritucuna can. Paicunaca jahua pachapimi causancuna (Hebreos 1:14). Achca angelcuna tiyashpapish cada unomi diferente can (Apocalipsis 5:11). Angelcunaca Jehová “mandashcata cazushpa paipaj shimi nishcata rurajcunami” can (Salmo 103:20). Ñaupa punllacunapica Jehová Diosca paita sirvijcunata ayudangapaj, paicunata quishpichingapajca angelcunatami cacharca. Paicunami Dios mandashcacunata huillajcuna carca. Cunan punllacunapica angelcunaca Diosmanta ashtahuan yachasha nij gentecunaman chayachunmi ayudancuna.
2. ¿Diablopish paipaj demoniocunapish picunataj can?
Huaquin angelcunaca Jehová Diosta cazunatami saquircacuna. Shuj angelca Diospaj contrami tucurca. “Paica Diablo, Satanás shutipishmi. Paica, allpa pachapi causajcunata umajmi” (Apocalipsis 12:9). Shujtajcunapish paita cazuchunmi munarca. Chaimantami Adantapish Evatapish shujtaj angelcunatapish pandachirca. Chai angelcunaca demoniocunami can. Jehová Diosca demoniocunataca jahua pachamantami cai Allpaman shitarca. Ñallami paicunataca tucuchinga (Apocalipsis 12:9, 12-ta liyipai).
3. ¿Diablopish, paipaj demoniocunapish ima shinataj pandachisha nin?
Diablopish demoniocunapish brujeriahuanmi achca gentecunataca pandachin. Brujeriata rurashpaca Diablopaj, demoniocunapaj ruraicunahuanmi chagrurinchij. Por ejemplo, huaquin gentecunaca lucerocunata ricushpa adivinajcunapajman, brujocunapajmanmi rincuna. Shujtaj gentecunaca brujeriahuan chagrushca tratamientocunatami mashcancuna. Huaquin gentecunaca huañushcacunahuanmi parlai tucunchij nishpami crichincuna. Pero Jehová Diosca cashna nishpami advirtin: ‘Muspachij brujocunapajman, adivinocunapajman ama richijchu’ (Levítico 19:31). Diablopish, paipaj demoniocunapish Diospaj contrami can. Paicunaca ñucanchijtaca llaquichisha nincunami.
ASHTAHUAN YACHAI
Angelcuna allicunata ruraj cashcata, brujeriamanta imamanta caruyana cashcatami yachashun. Shinallataj Diablopish, demoniocunapish ñucanchijta ama llaquichichun imata rurana cashcatapishmi yachashun.
4. Alli angelcunaca Jehová Diosta rijsichunmi ayudan
Angelcunaca mana predicashpapish Diosmanta huillajcuna alli shunguta charij gentecunapajman pushashpami ayudancuna. Apocalipsis 14:6, 7-ta liyipai. Qꞌuipaca cai catij tapuicunatami yachashun:
-
¿Predicangapajca imamantataj angelcunapaj ayudata minishtinchij?
-
Angelcuna Diosmanta yachasha nijcunapajman chayachun canta ayudajcuna cashcata yachashpaca, ¿ima shinataj sintiringui? ¿Imamantataj chashna sintiringui?
5. Brujeriamantami anchurina cangui
Satanaspish, paipaj demoniocunapish Diospaj contra, ñucanchijpaj contrami can. Lucas 9:38-42-ta liyipai. Qꞌuipaca cai catij tapuitami yachashun:
-
¿Demoniocunaca gentecunataca ima shinataj pandachin?
Demoniocuna ñucanchijta pandachichunca mana saquinachu canchij. Deuteronomio 18:10-12-ta liyipai. Qꞌuipaca cai catij tapuicunatami yachashun:
-
¿Gentecunata pandachingapajca demoniocunaca imatataj ruran? ¿Can causan llajtapica imata rurashpataj brujeriahuan chagrurincuna?
-
¿Brujeriahuan chagrushca ruraicunata Dios ama rurachun nishcaca allichu can? ¿Imamanta chashna ningui?
VIDEOTA ricui. Qꞌuipaca cai catij tapuicunatami yachashun.
-
¿Palesa shuti huarmipaj huahuapaj maquipi huatashcaca allichu carca? ¿Imamantataj chashna ningui?
-
¿Demoniocunapaj ruraicunahuan ama chagruringapajca Palesaca imatataj rurana carca?
Diosta sirvijcunaca demoniocunapaj contrami canchij. Hechos 19:19 y 1 Corintios 10:21-ta liyipai. Qꞌuipaca cai catij tapuitami yachashun:
-
¿Demoniocunahuan chagrushca cosascunataca imamantataj shitana cangui?
6. Diablopaj contra, demoniocunapaj contrami cana cangui
Demoniocunataca Diablomi mandacun. Pero Diosta cazuj angelcunataca arcángel Miguel o Jesusmi mandacun. ¿Arcángel Miguelca mashna podertataj charin? Apocalipsis 12:7-9-ta liyipai. Qꞌuipaca cai catij tapuicunatami yachashun:
-
¿Picunataj ashtahuan poderta charin, Miguel paipaj angelcunahuan o Diablo paipaj demoniocunahuan?
-
¿Diosta sirvijcunaca Diablotapish paipaj demoniocunatapish manchanachu canchij?
Canpishmi Diablopaj contra demoniocunapaj contra cai tucungui. Santiago 4:7-ta liyipai. Qꞌuipaca cai catij tapuitami yachashun:
-
¿Diablomanta, paipaj demoniocunamanta caruyangapajca imatataj rurana cangui?
HUAQUINCUNACA: “Brujeriahuan chagrushca peliculacunata ricuna, pugllaicunata pugllanaca allimi can. Ima dañotaca mana ruranchu” nincunami.
-
¿Chashna yuyanaca allichu can?
YUYARISHUNCHIJ
Diosta cazuj angelcunaca ñucanchijtaca ayudanmi. Cutin Diablopish demoniocunapish Diospaj contrami can. Chaimantami gentecunataca brujeriahuan pandachin.
Yuyaringapaj tapuicuna
-
¿Gentecuna Jehová Diosta rijsichunca angelcunaca ima shinataj ayudan?
-
¿Diablopish paipaj demoniocunapish picunataj can?
-
¿Imamantataj brujeriahuan mana chagrurina cangui?
CAICUNATAPISH RICUI
Jesusca arcángel Miguelmi can. Chaita imamanta nishcata ricui.
Diablo mana millaita rurana yuyailla cashcata yachai.
Demoniocunapaj ruraicunata shuj huarmi ima shina saquishcata ricui.
“Llaquilla canatami saquircani” (Huillaj, 1 de julio de 1993)
Diablo brujeriahuan gentecunata ima shina pandachishcata ricui.
Caitapish yachai
GENTECUNA RURASHCA TAPUICUNA
¿Testigo de Jehovacunaca ima shinataj Bibliamanta yachachincuna?
Testigo de Jehovacunahuan Bibliamanta gratis estudiacushpaca can charishca Bibliatami utilizai tucungui. Cambaj familiata o cambaj amigocunatapish canta compañachun invitai tucungui.
