Caipi yuyai: Albertoca paipaj ishqui compañerocuna shamucujta ricushpami manchaihuan can. Paitaca ñami ishqui cutin tabacota fumachun nishcacuna. Cunanpish cutinmi chashnallataj ningacuna.

Shuj compañero cꞌuchuyashpaca:

Bolsillomanta tabacota surcushpami: “¡Alberto ama shina caichu fumailla!” nin.

Albertoca: tabacota surcujta ricushpami ashtahuan manchan.

Can Alberto cashpaca, ¿imatataj ruranguiman?

¿Albertopaj compañerocunaca fumanaca mana alli cashcata yachangacunachu? ¿Paicunapaj munaimantachu chaita ruracungacuna? Mana. Shujtajcunapaj ñaupajpi alli ricurisha nishpallami paicunaca chaita ruracuncuna.

Albertota laya mana allita rurachun nijpica ¿Paicuna nishcata mana rurangapajca imatataj ruranguiman?

1.  

   Bibliapica: “Alli yuyaiyuj runaca, ima llaqui japina cajpica anchurinmi. Ashtahuanpish yachai illaj runaca, quiquin chaquihuan llaquipi yaicunllami” ninmi (Proverbios 22:3).

   Mana allita rurachun nijcuna manaraj ricurijpimi imata ninata yuyana cangui. Yuyashun: Ñanta ricushpami huaquin jovencuna tabacota fumacujta ricungui. ¿Fumachun nijpica imatataj ninguiman? Imata ninata ña yuyashca cashpami mana ninaca jahualla canga.

2.  

   Bibliapica: “alli yuyaiyuj caichij” ninmi (1 Pedro 3:16).

   “¿Shujtajcuna nishcata rurashpaca ima shinataj sintirisha?” nishpa tapuri. Paicuna nishcata rurashpaca paicunapaj ñaupajpica allimi ricuringui. Shinapish: ¿Qꞌuipaca ima shinashi sintiringui? ¿Paicunapaj ñaupajpi alli ricurisha nishpallachu cambaj crishcacunata huashaman saquinguiman? (Éxodo 23:2.)

3.  

   Bibliapica: “Yachaisapa runaca millaita ruranataca, manchashpa jarcarinmi” ninmi (Proverbios 14:16).

   Ima horapish imata agllanami cangui. Mana allita agllashpaca llaquicunatami charingui. Bibliapica José, Job, Jesuspish allita ruranata agllashcatami parlan. Shinallataj Caín, Esaú, Judaspish mana allita ruranata agllashcatami parlan. ¿Canca imatataj agllagringui?

Bibliapica: “Imatapish allita rurai” ninmi (Salmo 37:3). Mana allita rurashpa ima llaquicunata charinata yuyai. Chashnami mana manchashpa imamanta chaita mana rurashcata ninaca jahualla canga.

Imamanta mana chaita rurashcataca mana tucuita parlana minishtirinchu. Mana manchashpami mana rurashachu ni tucungui. Caitapishmi ni tucungui:

• “Cancunalla ruraichij”.

• “Chaitaca mana rurashachu”.

• “Imata ñuca yuyashcataca yachanguichijmi”.

Mana allita rurachun nijpica chai ratomi mana manchashpa chaitaca mana rurashachu nina cangui. Chashna nijpica manachari paicunaca ashtahuan molestangacuna.

Cambaj compañerocunaca: “¿Imamantataj manchangui? ¡Mana manchanachu cangui!” nishpachari asishpa burlarincuna. Chashna nishpami paicunaca pingaipi churancuna ¿Imatataj ruranguiman? Caitami rurai tucungui:

• Paicuna nishcata catishpami: “Ari manchanimi” ni tucungui. Qꞌuipaca imamanta chaita mana rurashcatami ashata parlai tucungui.

• Imamanta mana chaita rurashcata parlashca qꞌuipaca, mana pꞌiñarishpami: “Can shina alli jovencunaca mana fumancunachu” ni tucungui.

Paicuna molestashpa catijpica chai ratomi caruyashpa rina cangui. Paicunahuan saquirijpica paicuna munashcata rurachunmi ashtahuan molestangacuna. Paicunamanta caruyashpaca imata ruranata alli yachashcatami ricuchingui.

Mana allita rurachun nijcunaca siempremi tiyanga. Shinapish mana manchanachu cangui. Imata ruranata, imata ninatapish canllatajmi agllai tucungui (Josué 24:15).