1, 2. a) ¿Rijsishcacunapaj shutita yachashpapish imamantataj paicunataca mana alli rijsinchij? b) ¿Jesusmantaca gentecunaca ima chˈican chˈican yuyaicunatataj charin?

MUYUNDIJ Allpapimi rijsishca gentecuna tiyan. Huaquincunaca paicunapaj llajtallapimi rijsishca can. Shujtajcunaca muyundij Allpapimi rijsishca can. Paicunapaj shutita yachashpapish paicuna ima shina cashcata, imata ruraj cashcata, paicunapaj ñaupa causaitaca mana yachanchijchu.

² Jesús cai Allpapi causashcamantaca casi 2.000 huatacunami pasashca. Shina cajpipish Jesusmanta parlashpaca muyundij Allpapimi gentecunaca chˈican chˈican yuyaicunata charin. Huaquincunaca shuj alli runallami carca, shuj profetallami carca nincunami. Cutin shujtajcunaca Jesusca Diosllatajmi can, paitami adorana canchij nincunami. ¿Chaica ciertochu can?

3. ¿Ima nishpataj Jehová Diosmanta, Jesusmantapish alli yachana cangui?

³ ¿Ima nishpataj Jesusmanta alli yachana cangui? Bibliapica cashnami yachachin: “Huiñai causaita charingapajca can shujlla Diostapish, can cachashca Jesucristotapishmi rijsina can” ninmi (Juan 17:3, NM). Shinashpaca, Jehová Diosmanta, Jesucristomantapish alli yachashpami paraíso Allpapi huiñai huiñaita causangui (Juan 14:6). Shinallataj  Jesusca pai laya causachun, pai laya shujtajcunahuan apanacuchunmi yachachirca (Juan 13:34, 35). Cai libropaj punta capitulopica ñami Diosmanta yacharcanchij. Cunanca Jesusmanta Biblia imata yachachishcata ricushun.

4. ¿Mesías o Cristo nishpaca imatataj nisha nin?

⁴ Jesús huacharinapaj achca huatacuna faltajpimi Dios cachashca Mesías o Cristo shamunataca Bibliaca ña huillarca. Hebreo rimaipi Mesías nishpa o griego rimaipi Cristo nishpaca “Agllashca” nisha ninmi. Shinashpaca Dios cachashca Mesías o Cristoca rey cangapajmi  agllashca can. Catij capitulocunapimi Diospaj munaita pajtachingapaj Mesías imallata ruracushcata ricushun. Shinallataj cunan punllacunapipish ñucanchijta bendiciai tucushcatami ricushun. Shinapish Jesús manaraj huacharijpica ¿Mesiasca pishi canga? nishpami gentecunaca tapurishca canga.

5. ¿Jesusta catijcunaca imatataj crircacuna?

⁵ Punta siglopica, Jesusta catijcunaca Mesiastami shuyacurca. Paicuna shuyacushca Mesiasca Jesús cashcatami crircacuna (Juan 1:41). Simón Pedroca mana manchashpami: ‘Canca Cristomari cangui’ nirca (Mateo 16:16). ¿Jesusta catijcunaca ima nishpataj Jesusca Mesías o Cristo cashcata crircacuna? ¿Ñucanchijpish imamantataj chaita crina canchij?

6. Shuj chˈimbapuraihuan Mesiasta rijsingapaj Jehová ima shina ayudashcata ricuchi.

⁶ Jesús manaraj huacharijpimi profetacunaca Mesiasta ima shina rijsinata ña huillarcacuna. Shuj chˈimbapuraita rurashun: Canca mana rijsishca runata terminalpi tupanaman rina cashcanguiman. Chai runata rijsingapajca ¿manachu pai ima shina cashcata huillachun munanguiman? Shinallatajmi Jehová Diosca paipaj profetacunata cachashpa Mesías imata ruranata, ima tucunata tucuita huillarca. Chaimantami Diosta servijcunaca profetacuna huillashca pajtarijpica Mesiasta jahualla rijsi tucurcacuna.

7. ¿Ima ishqui profeciacunataj Jesuspi pajtarirca?

⁷ Ishqui ejemplocunata ricushun: Jesús huacharinapaj 700 yalli huatacuna faltajpimi profeta Miqueasca Mesías maipi huacharinata ña huillarca. Mesiasca Judá llajtapi caj Belén uchilla pueblopimi huacharinga nircami (Miqueas 5:2). ¿Jesusca maipitaj huacharirca? Belén uchilla pueblopimi huacharirca (Mateo 2:1, 3-9). Profeta Danielpish 500 yalli huatacuna faltajpimi, Mesiasca huata 29-pimi ricuringa  nishpa huillarca. * Cai profeciapish pajtarircami. Chaimantami Jesusca Mesías cashcata yachanchij.

8, 9. ¿Jesús bautizarishca punllaca ima señalcunataj Mesías cashcata ricuchirca?

⁸ ¿Jesusca ima shinataj huata 29-pica Mesías tucurca? Chai huatapimi Jesusca Jordán yacuman rishpa bautizaj Juantaca ñucata bautizahuai nishpa mañarca. Jehová Diosca Mesiasta rijsichunmi shuj señalta Juanman cusha nirca. Jesús bautizarishca punllami chai señalta curca. Bibliapi nishca shinaca, Jesús bautizarishpa yacumanta llujshicujpica, jahua pacha pascarijpimi Taita Diospaj espirituca paloma shina paipajman shamurca. Jahua pachamantapish: “Caimi ñuca c’uyashca Churi. Paipimi cushicuni” nishpa rimashcami uyarirca (Mateo 3:16, 17). Chaita ricushpami Juanca Dios cachashca Mesiasca Jesús cashcata yacharca (Juan 1:32-34). Chai punllami Jehová Diosca paipaj fuerzahuan o paipaj espíritu santohuan Jesustaca Mesías o Cristo tucushpa rey cachun agllarca (Isaías 55:4).

⁹ Bibliapi tiyaj profeciacuna pajtarishcamanta, Jehová Diospish rimashpa uyachishcamantami Jesusca Mesías cashcata yachanchij. Shinapish Bibliaca shujtaj ishqui tapuicunatami cutichin: ¿Jesusca maimantataj shamurca? ¿Jesusca ima shinataj carca?

10. ¿Bibliapi yachachishca shinaca cai Allpaman manaraj shamushpaca Jesusca maipitaj causarca?

¹⁰ Bibliapi yachachishca shinaca, Jesusca manaraj cai Allpaman shamushpami jahua pachapi ña causarca. Colosenses 1:17-pica: “Tucui imalla tiyajcunapaj ñaupami Cristoca ña tiyarca” ninmi. Jesusca cutin cutinmi, runa aichayuj shina  manaraj huacharishpaca jahua pachapimi causarcani nirca (Juan 3:13; 6:38, 62-ta rezai; Juan 17:4, 5). Jahua pachapica espíritu shina causashpami Jehová Dioshuan alli apanacurca.

11. ¿Bibliapica ima shinataj Jesusca Jehová Diospaj ashtahuan cˈuyashca churi cashcata ricuchin?

¹¹ Jesusmi Jehová Diospaj ashtahuan cˈuyashca churi can. Bibliapi yachachishca shinaca Jesusca imapish manaraj tiyajpimi ña tiyarca. Chaimantami Jesusca Jehovapaj punta Churi can (Proverbios 8:22; Colosenses 1:15). * Shinallataj Jesusca Diospaj ‘shujlla Churimi’ can (Juan 3:16). ¿Imamantataj Diospaj shujlla Churi can? Jehová Diosca Jesusllatami paipaj maquihuan rurarca. Chaimantami Diospaj shujlla Churi can. Shinallataj Jesusllami tucui imalla tiyashcata rurashpa Jehová Diosta ayudarca (Colosenses 1:16). Ashtahuanpish Bibliapica Jesustaca ‘Rimai’ nishpami shutichin (Juan 1:14). Dios mingashcata huillashcamantami Jesustaca ‘Rimai’ nishpa shutichin. Jesusca angelcunamanpish, cai pachapi causaj gentecunamanpishmi Dios mingashcata huillarca.

12. ¿Jesusca imamantataj mana Diosllataj can?

¹² ¿Jesusca Diosllatajchu can? Huaquin gentecuna chaita nijpipish Bibliaca mana chaita yachachinchu. Diosmi Jesustaca rurarca. Chaimantami Jesusca callarita charin, shinapish Jehová Diosca callaritapish, tucuritapish mana charinchu (Salmo 90:2). Jesuspish mana ñucami Dios cani nircachu. Biblia yachachishca shinaca Yayaca Churita yallimi can (Juan 14:28-ta rezai; 1 Corintios 11:3). Jehová Diosllami “Tucuita rurai tucuj Dios” can (Génesis 17:1). Chaimantami Jehová Dioshuanca ni pi mana igualan. *

13. ¿Bibliapica imamantataj ‘Cristoca mana ricuipaj Dios ima shina cashcatami ricuchin’ nin?

 ¹³ Cai pachatapish luzerocunatapish manaraj rurashpaca, Jehová Diosca achca huaranga huaranga huatacunatami paipaj Churi Jesushuan jahua pachapi causarca. Paicunaca alli apanacushpa, achcata cˈuyanacushpami causashca canga (Juan 3:35; 14:31). Jesusca paipaj Yaya shinami carca. Chaimantami Bibliapica ‘Cristoca mana ricuipaj Dios ima shina cashcatami ricuchin’ nin (Colosenses 1:15). Ima shinami shuj churica paipaj yaya shina can, chashnallatajmi Jesuspish paipaj Yaya shina can.

14. ¿Jehová Diospaj Churica ima shinataj runa aichayuj shina huacharirca?

¹⁴ Jehová Diospaj Churi Jesusca cushicushpami runa aichayuj tucushpa cai Allpaman shamurca. ¿Ima shinataj runa aichayuj tucushpa cai Allpaman shamurca? Jehovami shuj milagrota rurarca. Paipaj Churipaj causaitami soltera Mariapaj huijsapi churarca. Runa aichayuj yayata mana charishcamantami Mariapaj churica jucha illaj huacharirca. Chai churitami Mariaca Jesús nishpa shutichirca (Lucas 1:30-35).

15. ¿Jesusta rijsishpaca ima shinataj Jehová Diostapish rijsinchij?

¹⁵ Cai Allpapi cashpa Jesús imata rurashcata, imata nishcata yachashpami paita alli rijsi tucunchij. Shinallataj Jesusmanta yachashpaca Jehová Diostami alli rijsishun. ¿Ima shinataj chaita rurai tucunchij? Jesusca Dios ima shina cashcatami ricuchirca. Chaimantami paita catij Felipemanca: “Ñucata rijsijca, ñuca Yayatapish ñami rijsin” nirca (Juan 14:9). Mateo, Marcos, Lucas, Juan librocunapimi Jesús ima shina causashcata, imata rurashcata, pai ima shina cashcata yachai tucunchij.

16. a) ¿Jesusca imatataj yachachirca? b) ¿Pipaj yuyaicunatataj yachachirca?

 ¹⁶ Jesustaca “Yachachij” nishpapishmi shutichin (Juan 1:38; 13:13). ¿Jesusca imatataj yachachirca? Diospaj Mandanamanta alli huillaicunatami yachachij carca. Diospaj Mandanami jahua pachamanta mandashpa, cai Allpapi Diosta alli servijcunataca achcata bendicianga (Mateo 4:23). ¿Jesusca pipaj yuyaicunatataj yachachirca? Jesusca ‘ñucaca mana ñuca yuyaimantachu yachachini. Ñucata cachaj Yaya yachachi nishcallatami yachachini’ nircami (Juan 7:16). Yaya Diosca tucui gentecuna alli huillaicunata uyachunmi munan. Chaimantami Jesusca yachachishpa purirca. Capítulo 8-pimi Diospaj Mandanamantapish, chai mandana imallata ruranatapish ashtahuan yachashun.

17. a) ¿Jesusca maipitaj yachachij carca? b) ¿Imamantataj paipaj tiempota, paipaj tucui fuerzata cushpa yachachij carca?

¹⁷ ¿Jesusca maipitaj yachachij carca? Urcucunapi, pueblocunapi, jatun llajtacunapi, plazacunapi, huasicunapimi yachachij carca. Jesusca gentecuna paipajman shamuchunca mana shuyarcachu. Paimi gentecunata mashcaj carca (Marcos 6:56; Lucas 19:5, 6). ¿Imamantataj Jesusca paipaj tiempota, paipaj tucui fuerzata cushpa yachachij carca? Paipaj Yaya yachachichun cachashcamantami Jesusca yachachij carca (Juan 8:28, 29). Shinallataj paita caticuj gentecunata cˈuyashcamantami yachachij carca (Mateo 9:35, 36-ta rezai). Chai punllacunapi Diosmanta yachachijcunaca, Diospaj munai maijan cashcata, Dios ima shina cashcatami gentecunaman yachachina carca, shinapish mana yachachircacunachu. Shina cajpipish Jesusca Diospaj Mandanamanta gentecuna uyana cashcata entendishcamantami yachachishpa purirca.

18. ¿Jesusmanta imata yachashpataj ashtahuan cushicungui?

¹⁸ Jesusca cˈuyaj, llaquij, alli shungumi carca. Gentecunataca cˈuyaihuan, llaquishpami ricuj carca. Mana ñahuita  ricushpallachu imatapish ruraj carca. Millaita rurajcunataca pˈiñajmi carca (Mateo 21:12, 13). Chai punllacunapi huarmicunata ashalla respetota ricuchijpipish, Jesusca cˈuyaitami ricuchij carca (Juan 4:9, 27). Huahuacunapish paipajman cˈuchuyashpaca cushicurcacunami (Marcos 10:13-16). Jesusca mana jatun tucushcachu carca. Shuj punllaca apostolcunapaj chaquitami maillarca. Chaitaca yanga esclavocunallami ruraj carca.

19. ¿Llaquipi caj gentecunataca, Jesusca ima shinataj llaquishcata ricuchirca?

¹⁹ Llaquipi caj gentecunataca Jesusca llaquishpami ricuj carca. Chaimantami Diospaj espíritu santohuan milagrocunata rurashpa jambij carca (Mateo 14:14). Shuj punllaca, leprahuan ungushca shuj runami Jesustaca: “Ñucata alliyachisha ninguipishchari” nirca. Chashna nijpimi Jesusca paita llaquishpa, maquita chutashpa tuparishpaca: “Ari alliyachisha ninimi” nishpa jambirca (Marcos 1:40-42). ¿Chai runa alliyashpaca ima shinashi sintirirca?

20, 21. ¿Jesusca ima shinataj tucui shunguhuan Jehová Diosta cazurca?

²⁰ Jesusca tucui shunguhuanmi Jehová Diosta cazurca. Llaquipi cashpapish, jarcaicunata charishpapish paipaj Yayallatami servirca. Diablo pandachisha nijpipish mana urmarcachu (Mateo 4:1-11). Callaripica paipaj familiapish paita mana catircachu. ‘Yuyai illaj tucushpami puricun’ nishpami paicunapish yuyarca (Marcos 3:21). Shinapish Jesusca mana llaquirishpami Diospaj munaita rurashpa catirca. Paita pˈiñajcuna rimacujpipish, llaquichicujpipish mana pˈiñarircachu, mana chashnallataj tigrachisha nircachu (1 Pedro 2:21-23).

²¹ Jesusca paita pˈiñajcuna llaquinaita huañuchijpipish, huañungacamami Diosta alli servirca (Filipenses 2:8-ta rezai). ¿Último punllata runa aichayuj shina cai Allpapi cashpaca Jesusca imataj tucurca? Jatun mandajcunami  paita prezu japirca. Llulla gentecunami paita juchachircacuna. Mana alli juezcunami paita huañuchichun cacharca. Gentecunapish asishpami rimarca. Soldadocunapish manchanaitami macarcacuna. Caspipi huarcushca cashpaca: ‘Ñami tucui pajtarishca’ nishpami Jesusca huañurca (Juan 19:30, NVI, 1999; Hechos 5:30; páginas 204 a 206-ta ricui). Quimsa punlla qˈuipaca paipaj Yayami espíritu cuerpota cushpa causachirca (1 Pedro 3:18). Shinapish 40 punllacuna qˈuipami jahua pachaman tigrarca. Chaipica ‘Diospaj alli ladopi tiyarishpami’ mandana poderta cungacama shuyarca (Hebreos 10:12, 13).

22. ¿Huañungacama Diosta alli servishpaca Jesusca imatataj pajtachirca?

²² ¿Huañungacama Diosta alli servishpaca Jesusca imatataj pajtachirca? Jesús huañushcamantami shamuj punllacunapica, callaripi Dios munashca shina, paraíso Allpapi huiñai huiñaita causashun. Catij capitulopimi Jesús huañushcamanta huiñai causaita ima shina charinata yachashun.