1, 2. a) ¿Imamantataj testigo de Jehovacunaca mana shujtaj religioncuna shina canchij? b) ¿Cai yachaipipish catij yachaipipish imatataj ricushun?

ACHCA gentecunaca “¿cancunataca pitaj pushan?” nishpami testigo de Jehovacunata tapuncuna. Achca religioncunapica cꞌaricuna o huarmicunami pushan. Chaita ricushcamantami chashna tapuncuna. Pero ñucanchijtaca mana shuj runachu pushan. Jesusmi ñucanchijtaca pushan. Jesusca Yaya Dios nishcatami cazun. Chaimantami cushilla sintirinchij (Mateo 23:10).

² Cunan punllacunapish ‘alli cazuj alli yuyayuj servij’ nishca huauquicunami Diospaj pueblota pushacun (Mateo 24:45, QC, 1989). Chashna cajpipish Jehová Diosllataj paipaj Churita agllashpa ñucanchijta pushacushcataca ¿ima shinataj yachanchij? Caita yachangapajca quimsa yuyaicunatami ricushun. Shinallataj Jehová Dios paipaj pueblota pushangapaj huaquin cꞌaricunata agllashca cashpapish paillataj Pushaj cashcatami ricushun (Isaías 58:11).

3. ¿Israel llajtata Moisés alli pushachunca Diosca imamantataj curca?

³ Diospaj pueblota pushajcunaca espíritu santota chasquishpami  poderta charircacuna. Diosca Moisestami Israel llajtata pushachun agllarca. Israel llajtata Moisés alli pushachunmi Jehová Diosca ‘paipaj jucha illaj espirituta’ curca (Isaías 63:11-14-ta leyipai). Moisesman espíritu santota cushpaca Diosllataj paipaj pueblota pushacushcatami ricuchirca.

4. ¿Moisés espíritu santota charishcataca israelitacunaca ima shinataj yacharcacuna? (Página 14-pi tiyaj dibujota ricui).

⁴ ¿Moisés espíritu santota charishcataca israelitacunaca ima shinataj yacharcacuna? Moisesca espíritu santota charishcamantami milagrocunata rurarca. Faraonman Diospaj shuti maijan cashcatapishmi huillarca (Éxodo 7:1-3). Shujtaj mandajcunaca sinchi shungu, mitsacunami carca. Pero Moisesca mana chaicuna shinachu carca. Moisesca espíritu santota charishcamantami cꞌuyaita ricuchishpa mana utca pꞌiñarishpa Israel llajtata pusharca (Éxodo 5:2, 6-9). Moisestaca Jehová Diosmi paipaj pueblota pushachun agllashca carca.

5. ¿Jehová Diosca paipaj pueblota pushachunca picunallamantaj espíritu santota curca?

⁵ ¿Jehová Diosca paipaj pueblota pushachunca picunallamantaj espíritu santota curca? Diospaj Shimipica: ‘Josueca Diospaj espirituhuanpish, alli yachaihuanpish jundami carca’ ninmi (Deuteronomio 34:9). Shinallataj Gedeón runapish Diospaj espíritu santotami chasquirca (Jueces 6:34). Rey Davidpish Diospaj espirituta chasquishpami poderta charirca (1 Samuel 16:13). Cai runacunaca mana paicunallapi confiarcacunachu. Ashtahuanpish Diospaj espíritu santo ayudanatami crircacuna (Josué 11:16, 17; Jueces 7:7, 22; 1 Samuel 17:37, 50). Dios paipaj espíritu santohuan ayudajpimi achca cosascunata rurai tucurcacuna. Chaimantami Diosllata jatunyachina carcacuna.

6. ¿Imamantataj Jehová Diosca israelitacunataca pushajcunata respetachun nirca?

⁶ Moisés, Josué, Gedeón, Davidpish Diospaj espíritu santota charishcamantami israelitacunaca paicunata respetana carca. Shuj punllaca israelitacunaca Moisesmantami quejaricurcacuna. Chaimantami Jehová Diosca: ‘Cai israelitacunaca ¿maicamataj ñucataca pꞌiñachicungallari?’ nircami (Números 14:2, 11). Jehová Diosmi paipaj pueblota pushachun chai cꞌaricunata agllashca carca. Israelitacuna paicunata cazushpaca Jehová Dios pushachun saquishcatami ricuchircacuna.

7. ¿Moisestaca angelcunaca ima shinataj ayudarca?

⁷ Diospaj pueblota pushajcunataca angelcunami ayudarca (Hebreos 1:7, 14-ta leyipai). Jehová Diosca Moisesta ayudachunmi angelcunata cacharca. Diospaj Shimipica, ‘yurapi shuj ángel ricurishpami’ Moisestaca mandaj cachun, Egiptomanta israelitacunata cacharichichunpish mandarca ninmi (Hechos 7:35). Shinallataj Diosca angelcunata cachashpami Moisesman leycunata curca. Moisesca chai leycunatami  israelitacunaman yachachina carca (Gálatas 3:19). Jehová Diosca Moisestaca: “Cunanca israelcunata ñuca maiman pushashpa richun nishcaman pushashpa rilla. Ñuca angelmi canta ñaupashpa ringa” nircami (Éxodo 32:34). Bibliapica angelcuna ayudacushcata israelitacuna paicunapaj ñahuillahuantaj ricushcataca mana ninchu. Pero Moisés paicunata ima shina pushashcata, yachachishcata ricushpaca angelcuna paita ayudacushcatami yacharcacuna.

8. ¿Diosca Josuetapish Ezequiastapish ima shinataj ayudarca?

⁸ Angelcunaca shujtajcunatapishmi ayudarca. Por ejemplo, Bibliapica ‘Mandaj Diospaj soldadocunata mandajca’ cananeo gentecunata macanacuipi mishachunmi Josueta ayudarca ninmi (Josué 5:13-15; 6:2, 21). Achca huatacuna qꞌuipaca rey Ezequías mandacujpimi Asiria llajtamanta soldacunaca Jerusalenta tucuchisha nirca. Pero Mandaj Diospaj angelca shuj tutallapimi 185 mil asirio soldadocunata huañuchirca (2 Reyes 19:35).

9. ¿Diospaj pueblota pushajcuna juchayuj cajpipish israelitacunaca imatataj rurana carca?

⁹ Angelcunaca jucha illajmi can. Pero paicuna ayudashca gentecunaca juchayujmi carca. Shuj punllaca Moisesca Jehová Diosta mana jatunyachircachu (Números 20:12). Josuepish gabaonita gentecunahuan ari ninacushpaca Dios ayudachun mana mañarcachu (Josué 9:14, 15). Shinallataj Ezequiaspish shuj tiempopica jatun tucushca carca (2 Crónicas 32:25, 26). Chai pushajcuna juchayujcuna cajpipish israelitacunaca cazunami carca. Jehová Dios angelcunata cachashpa paipaj pueblota pushajcunata ayudacushcataca israelitacunaca yacharcacunami. Jehová Dios paipaj pueblota pushacushcata ricunallami carca.

10. ¿Diospaj Shimica ima shinataj Moisesta ayudarca?

¹⁰ Diospaj pueblota pushajcunaca Diospaj Shimitami cazuna carca. Bibliapica israelitacunaman cushca leytaca ‘Moisespaj leymi’ can ninmi (1 Reyes 2:3, NM). Pero Bibliallapitajmi Jehová Diosca chai leycunata curca ninmi. Chaimantami Moisespish chai leycunata cazuna carca (2 Crónicas 34:14). Por ejemplo, Jehová Dios paipaj carpa huasita rurachun mandajpica ‘Moisesca Mandaj Dios mandashca shinallatajmi tucuita rurarca’ (Éxodo 40:1-16).

11, 12. a) ¿Josuepish Diospaj pueblota mandajcunapish imatataj rurana carca? b) ¿Diospaj Shimita leyishpaca israelitacunata pushajcunaca imatataj rurarcacuna?

¹¹ Israel llajtata pushai callarimantami Josueca Diospaj huaquin quillcashcacunata charirca. Chaimantami Jehová Diosca: “Cai libropi quillcashca tiyacuj ñuca mandashcataca tutapish punllapish rezanataca amataj saquingui. Chashna cashpa yuyaipi charishpami, imalla mandashcataca chaitataj pajtachingui” nirca (Josué 1:8). Israel llajtata qꞌuipa mandajcunapish tucui punllacunami Dios quillcachishcacunataca leyina carca. Shinallataj chai quillcachishcacunata shuj copiata rurashpami, chaipi tiyacuj mandashcacunatapish cazuna carca (Deuteronomio 17:18-20-ta leyipai).

¹² ¿Diospaj Shimita leyishpaca israelitacunata pushajcunaca imatataj rurarcacuna? Rey Josiasta yuyarishun. Moisespaj leycunata tarishca huashaca Josiaspaj secretarioca chai quillcashcacunatami Josiaspaj  ñaupajpi leyi callarirca * (urapi tiyaj notata ricui). ‘Chai quillcashcata uyashpaca, Josiasca paipaj churanata lliquircami’. Qꞌuipaca quillcashcapi ima nishcata cazushpami tucui yanga dioscunata tucuchirca. Pascua fiestatapish rurarcacunami. Chai shina jatun fiestataca chai punllacamaca mana rurashcacunachu carca (2 Reyes 22:11; 23:1-23). Josiaspish shujtaj alli pushajcunapish Diospaj Shimi nishcatami cazurcacuna. Diospaj pueblota alli pushangapaj imata cambiana cajpica cambiarcunami. Chaimantami israelitacunaca Dios munashca shina causarcacuna.

13. ¿Imamantataj Diospaj pueblota pushajcunaca mana shujtaj mandajcuna laya carca?

¹³ Shujtaj llajtacunata mandajcunaca paicunapaj yuyaicunata catishpami imatapish rurajcuna carca. Por ejemplo, Canaán llajtata mandajcunapish chaipi causaj gentecunapish millai ruraicunatami rurajcuna carca. Paicunaca animalcunahuan, cꞌaripura, huarmipurami siririjcuna carca. Familiapurapish mapatami rurajcuna carca. Shinallataj yanga dioscunatami adorajcuna carca. Paicunapaj huahuacunatapish chai yanga dioscunamanmi cujcuna carca (Levítico 18:6, 21-25). Israelitacuna alli causachunmi Diosca leycunata curca. Cutin Babiloniata Egiptota mandajcunaca chai leycunataca mana charircacunachu (Números 19:13). Diospaj pueblota pushajcunaca mana chai mandajcuna shinachu carca. Paicunaca Yaya Diosllata adorachun, limpio causachun, huainayanapi, shujtaj mapa ruraicunapi ama urmachunmi israelitacunata animajcuna carca. Chaica Jehová Dios paicunata pushacushcatami ricuchirca.

14. ¿Imamantataj Diosca huaquin pushajcunata cunarca, rimarcapish?

¹⁴ Huaquin reycunaca Dios nishcataca mana cazurcacunachu. Espíritu santohuan, angelcunahuan, paipaj Shimihuan Dios ayudajpipish mana cazurcacunachu. Chaimantami Jehová Diosca paicunata cunarca, rimarca, mana cashpaca paicunapaj randi shujtaj mandajtami agllarca (1 Samuel 13:13, 14). Pero qꞌuipamanca Diosca tucuicunamanta ashtahuan alli pushajtami agllarca.

15. a) ¿Shuj alli pushaj shamunamantaca profetacunaca imatataj nircacuna? b) ¿Pitaj chai agllashca alli pushajca carca?

¹⁵ Achca huatacunatami Diosca ‘ñuca pueblota pushachun tucuicunamanta ashtahuan alli pushajta agllagrini’ nirca. Por ejemplo, Moisesca israelitacunamanca: ‘Mandaj Diosca ñuca shinallataj shujtaj profetatami jatarichinga, paita uyanguichij’ nircami (Deuteronomio 18:15). Isaiasca chai profetaca mandaj o pushajmi canga nircami (Isaías 55:4). Danielpish “Mesías nishca Mandaj” shamunamantami quillcarca (Daniel 9:25). Jesusllatajmi ñucami Diospaj pueblotaca “yachachij” o mandaj cani nirca (Mateo 23:10-ta leyipai). Jesusta catijcunaca Jehová Dios paipaj pueblota pushachun Jesusta agllashcatami crircacuna. Chaimantami tucui shunguhuan Jesusta catircacuna (Juan 6:68, 69). ¿Jesús agllashca cashcataca imamantataj crircacuna?

16. ¿Espíritu santota charishcataca ima shinataj Jesusca ricuchirca?

 ¹⁶ Jesusca Diospaj espíritu santota chasquishpami poderta charirca. Jesús bautizarishca qꞌuipaca bautizaj Juanca ‘jahua pacha pascarijpi, Diospaj espíritu santo paloma shina shamushpa Jesuspaj jahuapi tiyarijtami ricurca. Chai qꞌuipaca espíritu santoca Jesustaca shitashca pambamanmi pusharca’ (Marcos 1:10-12). Jesús cai Allpapi cashpaca espíritu santota charishcamantami milagrocunata rurarca, gentecunamanpish yachachirca (Hechos 10:38). Chashnallataj espíritu santota charishcamantami cꞌuyaj carca, cushi carca, sinchi crij carca (Juan 15:9; Hebreos 12:2). Jesús layaca espíritu santotaca ni pi mana charircachu. Jehová Dios Jesusta pushaj cachun agllashcata ricunallami carca.

17. ¿Angelcunaca ima shinataj Jesusta ayudarcacuna?

¹⁷ Angelcunami Jesusta ayudarca. Jesús bautizarishca qꞌuipaca huaquin angelcuna shamushpami paita servircacuna (Mateo 4:11, QC, 1989). Manaraj huañujpipish ‘jahua pachamanta shuj angelmi Jesusta sinchiyachingapaj ricurirca’ (Lucas 22:43). Shinallataj minishticushca horaspi Jehová Dios angelcunata cachashpa paita ayudanatami Jesusca yacharca (Mateo 26:53).

18, 19. ¿Diospaj Shimi valishca cashcataca Jesusca ima shinataj ricuchirca?

¹⁸ Diospaj Shimi nishcatami Jesusca cazurca. Jesusca huañuna horascamami paipaj Yaya nishcata cazurca. Ña huañugricushpapish Mesiasmanta huaquin profeciacunatami Jesusca parlarca (Mateo 4:4; 27:46; Lucas 23:46). Pero religionta pushajcunaca  mana Jesús shinachu carca. Paicunaca Diospaj Shimipi mana huillajpipish paicunapaj yuyaicunatami yachachijcunalla carca. Chaimantami Jesusca Diospaj Shimimanta parlashpa paicunataca cashna nirca: “Cai llajtapi causajcunaca, ñucataca shimillahuanmi allimari cangui nincuna. Ashtahuanpish paicunapaj shunguca ñucamanta carupimi. Ñucataca yangallami allimi cangui nij tucunguichij. Runacuna yachachishcallatami Dios mandashcami nishpa yachachinguichij” nircami (Mateo 15:7-9). Jehová Diosca paipaj Shimita mana cazujcunataca paipaj pueblota pushachunca nunca mana agllanchu.

¹⁹ Religionta pushajcuna pandachisha nishpa imatapish tapujpica Jesusca mana pai yuyashcatachu nirca. Ashtahuanpish Diospaj Shimipi ima nishcatami paicunaman yachachij carca (Mateo 22:33-40). Jahua pachapi causacushpa imata rurashcata o tucui imalla tiyashcacuna ima shina tiyai callarishcata parlanapaj randica Jesusca Diospaj Shimimantami yachachirca. Jesuspajca Diospaj Shimica achca valishcami carca. Chaimantami gentecuna Diospaj Shimita “alli entendichun paicunapaj yuyaicunata pascarca” (Lucas 24:32, 45).

20. a) ¿Jesusca ima shinataj Diosta alabarca? b) ¿Herodesca ima laya runataj carca?

²⁰ “Sumaj shimicunallata Jesús rimajta uyashpaca, tucuicuna mancharinacushpami paica allitamari nin” nijcuna carca (Lucas 4:22). Pero Jesusca paita Yachachij Jehová Diostami siempre alabaj carca. Shuj charij runaca Jesusta alli yachachijmi cangui nishpami paita alabasha nirca. Pero Jesusca humilde cashcamantami chai charij runataca: “¿Ima nishpataj ñucataca alli ningui? Allica pi mana tiyanchu, shujllami tiyan, chaica Taita Diosmi” nishpami paiman cutichirca (Marcos 10:17, 18). 8 huatacunata Jesús huañushca qꞌuipaca mandaj Herodes Agripa I-ca Judea llajtatami mandai callarirca. Shinapish Herodesca mana Jesús shinachu carca. Shuj punllaca achca gentecuna tandanacushca cajpimi Herodesca alhaja churanata churarishpa sumajta rimarca. Chaimantami gentecunaca Herodestaca: “¡Canca diosmi cangui, mana runachu cangui!” nishpa alabarca. Gentecuna “chashna nijpica Taita Diosta jatunyachinapaj randica pairaj jatun tucushcamantami Jatun Diospaj shuj ángel ungüita cujpi Herodesca cꞌurucuna micushca huañurca” (Hechos 12:21-23). Diosca Herodestaca mandaj cachunca mana agllashcachu carca. Diosca Jesustami mandaj cachun agllashca carca. Jesusllatajmi Jehová Dios paita agllashcata ricuchirca. Chaimantami jatun Pushaj Jehová Diosta siempre alabarca.

21. ¿Catij yachaipica ima tapuicunatataj yachashun?

²¹ Jesús causarishca qꞌuipaca paita catijcunamanca cashnami nirca: ‘Jahua pachapi, cai pachapipish tucuita mandanataca Diosca ñucamanmi curca. Ashtahuanpish cai shina causai tucuringacama, tucui punllacunami ñucaca cancunahuan casha’ nircami. Caica achca huatacunata Jesús pushaj cachun Dios munashcatami ricuchin (Mateo 28:18-20). ¿Jesusca jahua pachapi cashpapish ima shinataj cai Allpapica Diospaj pueblota pushacun? ¿Jesusta ayudachunca Diosca maijan runacunatataj agllarca? ¿Chai runacunata Diospaj pueblota pushachun Dios agllashcataca ima shinataj yachanchij? Cai tapuicunataca catij yachaipimi yachashun.