1, 2. a) ¿Shuj religionta charinamantaca huaquin gentecunaca imatataj nincuna? b) ¿Cai yachaipica imatataj ricushun?

HUAQUINCUNACA: “Diosta adorangapajca shuj religionta charinaca mana minishtirinchu, Diospaj amigocuna canallami minishtirin” nincunami. ¿Chaica ciertochu can?

² Cai yachaipica Jehová Diosca tucuita alli rurashcata, paita servijcunatapish pai laya cachun yachachishcatami ricushun (“Alli entendishunchij” nishca cuadrota ricui). Shinallataj congregacioncunata pushaj huauquicunatapish cazuna cashcatami yachashun (1 Corintios 14:33, 40, NM). Jesusta punta catijcunaca Bibliapaj mandashcacunata cazushpami achca llajtacunapi Diosmanta huillarcacuna. Cunan punllacunapipish Bibliapaj mandashcacunata cazushpa, ñucanchijta pushaj huauquicunatapish cazushpami muyundij Allpapi Diosmanta huillanchij. Ashtahuanpish congregacioncunapipish tandalla, mana pˈiñanacushpa, Diospaj ñaupajpipish alli ricurishpami causanchij.

3. ¿Jehová Diosca tucuita alli rurashcataca ima shinataj yachanchij?

³ Jehová Diosca tucuitami cada puestopi churashpa sumajta rurashca. Proverbios 3:19-pica: “Mandaj Diosca alli yachaj cashpami, cai pachataca rurarca. Alli yuyaiyuj cashpami, jahua pachatapish sinchita churarca” ninmi. Pero Bibliapica pai rurashcacunamantaca  ashallatami yachanchij ninmi (Job 26:14). Chashna cajpipish paica tucuita sumajta, alli rurashcatami ricui tucunchij (Salmo 8:3, 4). Caipi yuyashun, Diosca achca millón estrellacunata rurashpapish cada unotami cada puestopi churashca. Shinallataj ñucanchij causana Allpapish shujtaj mundocunapish mana huajtarishpami Intita muyucuncuna. Chaicunata ricushpami Jehová Diosca tucuita mana maipishcachun rurashcata yachanchij. Jehová Diosca jahua pachatapish cai Allpatapish alli yuyashpami rurashca. Chaimantami paillata cazushpa adorana canchij (Salmo 136:1, 5-9).

4. ¿Gentecunaca cai Allpatapish estrellacunatapish estudiashca cashpapish imamantataj mana tucuita yachancuna?

⁴ Huaquin gentecunaca cai Allpatapish estrellacunatapish Intitapishmi estudiashcacuna. Dios rurashcacunata estudiashpami cai gentecunaca ñucanchij alli causachun huaquin cosascunata rurashcacuna. Pero paicunaca mana tucuita yachai tucushcacunachu. Por ejemplo, paicunaca tucui ima shina tiyai callarishcata, cai Allpapi imamanta causai tiyashcatapish mana yachancunachu. Shinallataj imamanta ni pi mana huañusha nishcatapish mana yachancunachu (Eclesiastés 3:11). ¿Imamantataj caitaca mana yachancuna? Achca gentecunaca Dios tiyashcata mana crishpami evolucionmanta yachachincuna. Pero Diosca paipaj Shimipica tucuitami yachachin.

5. ¿Imamantataj tucuicuna Dios rurashcacunataca respetana canchij?

⁵ Jehová Diosca cai Allpapica tucuitami alli charin, mana imata maipish cachun rurarcachu. ¿Imamantataj tucuicuna Dios rurashcacunataca respetana canchij? Por ejemplo, tucuicunami shuj ladollapi shunguta charinchij. Chaimantami doctorcunaca shunguta operangapajca shungu maipi cashcata alli yachan. Chashnallataj pipish shuj huasi jahuamanta urmajpica huañui tucushcataca allimi yachanchij. Chaimantami huasi jahuamanta mana shitarinchij. Chashnami Dios rurashcacunata respetashcata ricuchinchij.

6. ¿Imata ricushpataj Diostaca mana maipish cachun, tandalla servina cashcata entendinchij?

⁶ Jehová Dios rurashcacunaca mana maipish cachun, alli rurashca cashcata ricushpami ñucanchijpish mana maipish cachun, tandalla paita servichun munashcata entendinchij. Paita ima shina adoranata yachangapajca Bibliatami cushca. Shinallataj Jehová Diosta, congregacionta pushajcunatapish cazushpaca cushillami causashun.

7. ¿Biblia shujlla yuyaita charishcamantaca imatataj yachanchij?

⁷ Huaquin gentecunaca: “Librocunata tandachishpami Bibliata rurarca, pero Bibliaca mana shujlla yuyaita charinchu” nincunami. Gentecuna chashna nijpipish Bibliata Dios quillcachishcamantaca shujlla yuyaitami charin. Diosmi Bibliata picuna quillcana cashcata agllarca. Paicunamanca ima hora quillcanata, imata quillcanatapishmi huillarca. Bibliapaj librocuna shujlla yuyaita charishcamantami Diospaj nishcacunata entendi tucunchij. Bibliapica Genesismanta Apocalipsiscamaca shuj “huahua” ricurishpami cai Allpata shuj sumaj paraisota ruranga ninmi. Cai huahuaca Jesucristomi can. Chashnallataj Bibliapica Jesucristo mandashpaca Jehová Dioslla tucuita mandana cashcatami ricuchinga ninmi (Génesis 3:15; Mateo 6:10; Apocalipsis 11:15-ta leyipai).

8. ¿Israelitacuna mana maipish cachun, tandalla causashcataca ima shinataj yachanchij?

⁸ Israelitacuna ama maipish cachun causachunca Jehová Diosca huaquin leycunatami curca. Por ejemplo, ‘Diospaj carpa huasi pungupica’ huaquin huarmicunaca mana maipish cachun, alli trabajajcunami carca (Éxodo 38:8). Jehová Diosca paipaj carpa huasitapish paicunapaj carpa huasicunatapish ima shina shujtaj ladoman pasachina cashcatami israelitacunamanca huillarca. Asha tiempo qˈuipaca Diospaj huasipimi rey Davidca curacunata, levitacunatapish chˈicanchishpa chˈican chˈican ruranacunapi churarca (1 Crónicas 23:1-6; 24:1-3). Israelitacuna  Jehová Diosta cazushpaca cushilla, tandallami causarcacuna (Deuteronomio 11:26, 27; 28:1-14).

9. ¿Jesusta punta catijcunaca mana maipish cachun, tandalla Diosta servingapajca imatataj rurajcuna carca?

⁹ Jesusta punta catijcunaca mana maipishcachun, tandallami Diosta servijcunaca carca. Chai tiempopica Jerusalén llajtamanta huaquin huauquicunami tucui congregacioncunata pushajcuna carca. Puntapica apostolcunallami pushajcuna carca. Qˈuipaca shujtaj ancianocunapishmi pushajcuna tucurca (Hechos 6:1-6; 15:6). Diosca apostolcunatapish shujtaj huauquicunatapish cartacunata quillcachunmi agllarca. Chai cartacunapica mandashcacunata, consejocunatami congregacioncunaman cachangapaj quillcarcacuna (1 Timoteo 3:1-13; Tito 1:5-9). ¿Chai huauquicunapaj consejocunata cazushcamantaca huauquicuna panicunaca ima shinataj causarcacuna?

10. ¿Jesusta punta catijcunaca apostolcunata ancianocunata cazushpaca congregacioncunapica imataj tucurca? (Página 12-pi tiyaj dibujota ricui).

¹⁰ (Hechos 16:4, 5-ta leyipai). Apostolcuna, ancianocunaca Jerusalén llajtamantami congregacioncunaman cartacunata cachajcuna carca. Cai huauquicunapaj nishcacunata cazushpaca congregacioncunapi huauquicuna panicunaca, ‘ashtahuan sinchi crijcunami tucurcacuna. Crijcunapish punllantami ashtahuan mirarircacuna’. ¿Ñucanchijpish ima shinataj paicuna shina cai tucunchij?

11. ¿Cuerpo Gobernante imata rurachun mandajpica ancianocunapish siervo ministerialcunapish imatataj rurana can?

¹¹ Cuerpo Gobernante imata rurachun mandajpica Comité de Sucursalpi servijcuna, superintendentecuna, ancianocuna, siervo ministerialcunapish, cazunami can. Bibliapica congregacioncunata pushajcunata cazunami canguichij ninmi (Deuteronomio 30:16; Hebreos 13:7, 17). Jehová Diosta cˈuyashpaca ñucanchijta pushaj huauquicunatami tucui shunguhuan cazushun. Diótrefes runaca congregacionta pushajcunataca mana cazuj carcachu, pai shinaca mana casha ninchijchu (3 Juan 9, 10-ta leyipai). Pushaj huauquicunata cazushpaca congregacionpi tandalla, cushillami causashun. Chaimanta: “¿Diosta tucui shunguhuan servichunca huauquicunata panicunata animanichu?” “¿Pushaj huauquicunata utcachu cazuni?” nishpami tapurina canchij.

12. ¿Ima shinataj ancianocunata, siervo ministerialcunata shutichincuna?

¹² Asha tiempo huashallamanmi Cuerpo Gobernanteca congregacioncunapi ancianocunata, siervo ministerialcunata ima shina shutichinata cambiarca. Jesús huañushca qˈuipaca Jerusalenpi caj ancianocuna apostolcunami, anciano o siervo ministerialcunata shutichichun superintendentecunaman mingajcuna carca (La Atalaya del 15 de noviembre de 2014-pi “Preguntas de los lectores” nishcata ricui). Chaimantami superintendente huauquicunaca septiembre de 2014 huatamanta congregacioncunapi ancianocunata, siervo ministerialcunata shutichi callarircacuna. Shuj huauqui anciano shina o siervo ministerial shina servi tucushcataca ancianocunami superintendenteman huillana can. Superintendenteca chai huauquitami alli rijsina can. Chaipajca chai huauquihuanchari huillanaman llujshinga (1 Timoteo 3:4, 5). Paipaj familiatapish rijsinami can. Qˈuipaca superintendenteca ancianocunahuan tandanacushpami chai huauqui anciano shina o siervo ministerial shina servi tucushcata yachangapajca Bibliapi requisitocunata ricuna can (1 Timoteo 3:1-10, 12, 13; 1 Pedro 5:1-3).

13. ¿Ancianocunata cazushcataca ima shinataj ricuchinchij?

¹³ Ancianocunaca Bibliapaj mandashcacunata yuyachishpami ñucanchijta cuidasha nincuna. Chaimanta alli causangapajca paicunatami cazuna canchij (1 Timoteo 6:3). Jesús  huañushca qˈuipa huaquin crijcunaca ‘maipish cachunmi puricurcacuna’. Paicunaca imata mana rurashpa, shujtajcunapaj ruraicunapi satirishpallami puricurcacuna. Ancianocuna cunajpipish paicunaca mana cazusha nircacunachu. Pabloca chai congregacionpi mana cazujcunataca ima shina ricuna cashcatami nirca. Paica: ‘Maijan mana cazusha nijtaca ricuchipanguichij. Paihuanca ama tandanacuichijchu’ nircami. Paihuan ña mana tandanacuna cashpapish mana shuj enemigo shinachu tratana carcacuna (2 Tesalonicenses 3:11-15). Cunan punllacunapipish ancianocunaca Diosta mana cazusha nij huauquicunata panicunatami ayudancuna. Por ejemplo, shuj huauqui o pani Diosta mana servijhuan puricujpica consejota cushpami ayudancuna (1 Corintios 7:39). Pero ¿chai huauqui o pani mana cazusha nijpica ancianocunaca imatataj rurai tucun? Ancianocunaca shuj conferenciata cushpachari chaita rurashpaca congregacionta pingaipi churacushcata entendichinga. Ancianocuna chashna laya conferenciata cujpica, ¿ñucanchijca imatataj rurana canchij? Diosta mana cazusha nij huauquita o panita rijsishpaca tandanacuicunallapi o huaquinpica huillanaman llujshishpallami paihuan tandanacuna canchij. Diospaj mandashcata cazushpaca, mana cazusha nijta paillataj llaquipi urmacushcata cuentata cuchunmi ayudashun. Mana cazusha nijca cambiasha ningachari ^[1] (página 16-pi notata ricui).

14. ¿Congregacionpi mana alli ruraicuna ama tiyachunca ima shinataj ayudai tucunchij?

¹⁴ Congregacionpi mana alli ruraicuna ama tiyachunmi Bibliaca imata rurana cashcata yachachin. Corinto llajtapi ima tucushcata yuyarishun. Pabloca chai llajtapi causaj crijcunataca achcatami cˈuyaj carca. Paillatajmi achcacunamanca Diospaj Shimita yachachishca carca (1 Corintios 1:1, 2). Pabloca congregacionpi shuj runa huainayashpa purishcatami yachaj chayarca. Chai runa chashna causacujpipish huauquicuna panicunaca imata mana rurarcacunachu. Chaimantami Pabloca ancianocunataca chai ruranata “Satanasman cuichij” nirca. Ancianocunaca congregacionmanta chai runata llujchinami carca (1 Corintios 5:1, 5-7, 12). Cunan punllacunapipish ancianocunaca jatun juchamanta mana arrepintirijcunataca congregacionmanta llujshichi tucunmi. Congregacionmanta llujshichishcacunata Dios mandashca shina tratajpica huauquicunapish panicunapish Diosta alli, limpio adorachunmi ayudashun (“Alli entendishunchij” nishca cuadrota ricui). Congregacionmanta llushichishcacunata chashna tratajpica paicunapish arrepintirishpa Diospaj perdonta mashcasha ningacunachari.

15. ¿Huauquicunahuan panicunahuan tranquilo tandalla causangapajca imatataj rurana canchij?

¹⁵ Corinto congregacionpica shujtaj problemami tiyarca. Huaquin huauquicuna panicunaca shujtaj huauquicuna panicunatami juiciopi churajcuna carca. Chaimantami Pabloca: “Llaquichijpipish ¿ima nishpataj chai llaquitaca mana apanguichij?” nircami (1 Corintios 6:1-8). Cunan punllacunapipish huaquincunaca shujtaj huauquicuna panicunahuanmi negociocunata rurashpa, cullquita perdishcacuna o paicunata umashcatami yuyashcacuna. Chaimantami juiciopi churashcacuna. Chashna tucujpica gentecunaca Jehovamanta, paipaj servijcunamantachari mana allita rimangacuna. Congregacionpipish  problemacunachari tiyanga. Diospaj Shimipica cullquita perdina cashcapish huauquicunahuan panicunahuanca mana pˈiñanacushpa tandallami causana canguichij ninmi ^[2] (urapi tiyaj notata ricui). Jesusca problemacunata ima shina allichinatami yachachirca (Mateo 5:23, 24; 18:15-17- leyipai). Paipaj cunashcacunata cazushpaca congregacionpica tandalla tranquilomi causashun.

16. ¿Diosta servijcunaca imamantataj tandalla causanchij?

¹⁶ Bibliapica: “Riquichij, ¡Huauquindijcuna tandalla, shuj shinalla causanaca yallitaj alli, yallitaj sumajmari!” ninmi (Salmo 133:1). Israelitacunaca Jehová Diosta cazushpami paicunapura mana maipishcachun, tandalla causarcacuna. Cunan punllacunapipish Diosca paita servijcunata ovejacunata corralpi tandachij shinami tandachisha nircami (Miqueas 2:12). Shinallataj Diosca paita servijcunataca Bibliamanta mana llullacunata yachashpami ñucataca tandalla servingacuna nircami. Diosca: “Tucuicunatami ima mapata mana rimaj cˈallucunayujta rurasha. Chashna rurajpimi, tucuicuna Mandaj Dios ñucallata mañangacuna, tucuicunami tandalla ñucallata servingacuna” nircami (Sofonías 3:9). Jehová Diosta tandalla servicushcamantaca ¿manachu cushilla sintirinchij?

17. ¿Shuj huauqui o pani juchapi urmajpica ancianocunaca imatataj rurana can?

¹⁷ Maijanpish juchapi urmajpica ancianocunaca cˈuyaihuanmi consejota cushpa ayudana can. Congregacionpi mana alli ruraicunamanta cuidachun, tucuicuna tandalla causachunmi Jehová Diosca ancianocunata churashca. Chaitaca paicunaca allimi yachancuna (Proverbios 15:3). Pabloca Corinto llajtamanta huauquicunataca achcatami cˈuyarca. Paicuna pandarijpica consejota cushpami ayudaj carca. Chaicunamantami primera a los Corintios libropica quillcarca. Shinallataj Corinto llajtamanta ancianocunaca Pablopaj consejotaca utcami cazurcacuna. ¿Paicuna cazushcataca ima shinataj yachanchij? Asha quillacuna qˈuipaca, segunda a los Corintios libropica paicunata felicitashpami Pabloca quillcarca. Chaimanta maijanpish ‘pandaricushcata manaraj cuenta cujpica ancianocunaca cˈuyaihuanmi ayudana can’ (Gálatas 6:1, NM).

18. a) ¿Jesusta punta catijcunaca Diospaj Shimita cazushcamantaca ima shinataj causarcacuna? b) ¿Catij yachaipica imataj yachashun?

¹⁸ Jesusta punta catijcunaca Diospaj Shimita cazushcamantami mana maipish cachun, tandalla, tranquilo causarcacuna (1 Corintios 1:10; Efesios 4:11-13; 1 Pedro 3:8). Paicunapura tandalla cashcamantami alli huillaicunataca ‘tucui cai pachapi causajcunaman huillai’ tucurcacuna (Colosenses 1:23). Cunan punllacunapipish Diosta servijcunaca mana maipishcachun, tandallami mundo enteropi alli huillaicunata huillanchij. Catij yachaipica Jehová Diosllata jatunyachingapaj, paipaj Shimitapish cazungapaj imata ashtahuan rurana cashcatami yachashun (Salmo 71:15, 16).