1, 2. a) ¿Apóstol Pablopaj punllacunapica imamantataj gentecunaca preocuparishca carca? b)  ¿Huatashca shinamantaca Pabloca imatataj quillcarca?

ROMA mandashca llajtacunapi causaj gentecunaca paicunapaj leycunamanta, derechocunamantapishmi jatun tucushca sintirijcuna carca. Achca esclavocunata sinchita trabajachishpami Roma llajtaca jatun, sinchi tucurca. Shuj tiempoca chai llajtapica casi 30% gentecunami esclavocuna carca. Chaimantami chai punllacunapica esclavo shina causacushcamanta cacharichishca canamanta casi tucui gentecuna, Jesusta catijcunapish preocuparishpa parlanacujcuna carca.

² Apóstol Pabloca mana huatashca shina causanamantami achcata escribirca. Chai tiempopica achca gentecunaca problemacunata, llaquicunatami allichisha nishpa purijcuna carca. Pero Jesusta catijcunaca mana chaita rurarcacunachu. Chaipaj randica Diospaj Mandanamanta, Jesús ñucanchijmanta huañushcamanta yachachingapajmi esforzarircacuna. Pabloca huatashca shina ama causangapaj imata rurana cashcatami ricuchirca. Por ejemplo, Corinto llajtapi causaj huauqui  panicunamanca: “Jehová Diospaj espíritu maipi cajpica huatashca shinamanta cacharichinmi” nishpami escribirca (2 Corintios 3:17, NM).

3, 4. a) ¿2 Corintios 3-pica Pabloca imamantataj parlarca? b) ¿Dios ñucanchijta cacharichichunca imatataj rurana canchij?

³ Segunda a los Corintios capítulo 3-llapitajmi Pabloca Sinaí urcupi Moisés ima tucushcata parlarca. Chaipica Moisesca Jehová Diospaj angelpaj ñaupajpimi carca. Urcumanta uriyamujpica paipaj ñahui achij nicuj cashcatami israelitacunaca ricurcacuna. Chaita ricushpaca achcatami mancharircacuna. Chaimantami Moisesca shuj linsohuan taparirca (Éxodo 34:29, 30, 33; 2 Corintios 3:7, 13). Pabloca ‘pipish Diospajman cutirijpica chai linsoca anchuchishcami canga’ nircami (2 Corintios 3:16, NM). Chashna nishpaca Pabloca ¿imatataj nisha nirca?

⁴ Caishuj temapica Jehová Dioslla pai tucui munashcata rurai tucushcatami yacharcanchij. Chaimantami paipaj espíritu maipi cajpica huatashca shinamanta cacharichin. Jehová Dios ñucanchijta cacharichichunca paihuanmi alli apanacuna canchij. Yuyashun, israelitacunataca Jehová Diosmi Egipto llajtamanta esclavocuna shina causacujpi cacharichirca. Pero jatun chaquishca pambata ricushpaca israelitacunaca cacharichishcami canchij nishpami paicunapaj munaillata rurasha nircacuna. Paicunapaj shungupish, yuyaipish shuj linsohuan tapashca shinami carcacuna (Hebreos 3:8-10).

5. a) ¿Imacunamantataj Jehová Diospaj espirituca cacharichin? b) ¿Esclavocuna cajcunapish, carcelpi cajcunapish ima shinataj cacharichishca shina sintiri tucuncuna? c) ¿Ima tapuicunatataj cutichigrinchij?

⁵ Jehová Dios paipaj espirituhuan ayudajpillami huatashcamanta cacharichishcataj cai tucunchij. Jehová Diospaj espirituca panda religionmanta, juchamanta, huañuimantami cacharichin. Gentecunaca chaita mana rurai tucuncunachu (Romanos 6:23; 8:2). Chashna cacharichishca cashcamantaca achcatami cushicunchij. Esclavocuna cajcunapish, carcelpi cajcunapish cacharichishca shinami sintiri tucuncuna (Génesis 39:20-23). Por ejemplo, huauqui Eric Frostpish, huauqui Harold Kingpish Diosta sirvishcamantami achca huatacunata prezu carcacuna. Chashna cashpapish cacharichishca shinami sintirircacuna. Paicunamanta ashtahuan yachasha nishpaca JW Broadcasting nishcaman yaicui. (VIDEOCUNA > EXPERIENCIACUNA, ENTREVISTACUNA > LLAQUICUNATAMI CHꞌIMBAPURASHCACUNA). Cunanca ishqui tapuicunamanta yachashun: 1) ¿Dios ñucanchijta cacharichishcamantaca imatataj mana rurana canchij? 2) ¿Dios ñucanchijta cacharichishcamantaca ima shinataj agradicishcata ricuchi tucunchij?

6. ¿Egiptomanta Dios cacharichijpipish ima shinataj israelitacunaca paita mana agradicishcata ricuchirca?

⁶ Pi ñucanchijman shuj valishca regalota  cujpica achcatami agradicinchij ¿nachu? Pero israelitacunaca Jehová Dios Egiptomanta llujshichijpipish mana agradicircacunachu. Asha quillacuna qꞌuipaca cacharichishca cashcamanta Diosta tucui shunguhuan sirvinapaj randica israelitacunaca Egiptopi tiyaj micunacunata, ubyanacunatami munai callarircacuna. Paicunaca pescadocunata, pepinocunata, meloncunata, cebollacunata, ajo micunacunata yuyarishpami Jehová Dios cushca micunamanta quejarishpa cutin Egiptoman tigrasha nircacuna. Chaimantami Diosca paicunahuan pꞌiñarirca (Números 11:5, 6, 10; 14:3, 4). ¿Caimantaca imatataj yachanchij?

7. a) ¿2 Corintios 6:1-pi nishca consejotaca Pabloca ima shinataj pajtachirca? b) ¿Ñucanchijpish ima shinataj 2 Corintios 6:1-pi nishcata pajtachi tucunchij?

⁷ Jehová Diosca paipaj churita cachashpami ñucanchijta cacharichirca. Chaita mana cungarishpa Diosta agradicichunmi apóstol Pabloca huauqui panicunataca animarca (2 Corintios 6:1-ta leyipai). Pabloca juchapi, huañuipi esclavo cashcata yuyarishpami llaquilla sintirij carca. Pero paica: “¡Ñucanchij Mandaj Jesucristomantaca, Taita Diostami pagui nini!” nircami. ¿Imamantataj chashna nirca? Paillatajmi: ‘Cristo Jesuspi causaita cuj espíritu mandashcami, ñucataca juchapajta rurachijmanta, huañuimantapish cacharichirca’ nircami (Romanos 7:24, 25; 8:2). Ñucanchijtapish Jehová Diosmi juchamanta, huañuimantapish cacharichishca. Chaimantami paita agradicinataca mana cungarina canchij. Jesús huañushcamantami cushilla Diosta sirvi tucunchij (Salmo 40:8).

8, 9. a) ¿Cacharichishca canamantaca apóstol Pedroca ima consejotataj curca? b) ¿Cunan punllacunapica imamantataj alli decidinaca sinchi can?

⁸ Ñucanchijta cacharichishcamantami Jehová Diostaca pagui nina canchij. Chai jahuapish alli decisioncunata agllangapajmi esforzarinami canchij. Apóstol Pedroca ña cacharichishca cashcamanta ‘millai munaicunata rurai tucunchijllami’ nishpa ama  yuyanguichijchu nircami (1 Pedro 2:16-ta leyipai). Cai consejoca chaquishca pambapi israelitacuna imata rurashcatami yuyachin. Cunan punllacunapica chꞌican chꞌican ropacuna, micunacuna, ubyanacuna, diversioncunapishmi tiyan. Munashca cosascuna cashcamantami, chaicunapi jahualla dedicari tucunchij. Diabloca chaitami munan. Empresacunaca rijsishca, sumaj ricurij gentecunata utilizashpami mana minishtirishca cosascunata randichun gentecunata animan. Cai trampacunapi urmanaca jahuallami can.

⁹ Imata estudianata, imapi trabajanata agllagricushpapish Pedropaj consejotami pajtachi tucunchij. Por ejemplo, colegiocunapi profesorcunaca ‘shuj alli universidadpimi estudianataj canguichij’ nishpami jovencunata cutin cutin rimancuna. Shinallataj alli universidadcunapi estudiashpaca alli trabajota, achca cullquita charinguimi nishpami crichincuna. Ashtahuancarin universidadpi estudiajcunaca shujtajcunata yalli cullquita ganajcuna cashcatami ricuchincuna. Jovencunaca alli causanatami munancuna. Chaimantami universidadpi estudianaca shuj alli decisión laya ricuringa. Shinapish, ¿imatataj jovencunapish paicunapaj yaya mamacunapish yuyarina can?

10. ¿Huaquin decisioncunata ñucanchijllataj agllai tucushpapish imatataj yuyarina canchij?

¹⁰ Maijan gentecunaca ‘ñucallatajmi imata estudianata, imapi trabajanata decidina cani, pipish imata mana ninachu can’ nincunami. Pero, huaquin decisioncunata ñucanchijllataj agllai tucushpapish mana ñucanchij tucui munashcallata rurai tucunchijchu. Shinallataj, ñucanchij ima decisioncunata japijpi qꞌuipa ima tucunataca mana yachanchijchu. Chaitaca yuyarinami canchij. Chaimantami apóstol Pabloca: “Tucui imatapish rurai tucunimi, ashtahuanpish chaica mana tucui allichu. Tucui imatapish rurai tucunimi, ashtahuanpish chaica mana tucui sinchiyachinchu” nircami (1 Corintios 10:23). Cai versocunaca ima decisionta agllagricushpapish mana ñucanchij munaicunallapi yuyana cashcatami yachachin.

11. ¿Jehová Diosca imapajtaj ñucanchijta cacharichishca?

¹¹ Apóstol Pedroca cacharichishca cashpapish millaita ama ruranguichij nishpami consejarca. Shinallataj alli decisioncunata japishpa, “Diospajta rurajcuna” shina causaichij nircami. Jehová Diosca paita sirvishpa causachunmi Jesusta cachashpa juchamanta, huañuimanta ñucanchijta cacharichirca.

12. ¿Noemantapish paipaj familiamantapish imatataj yachai tucunchij?

¹² ¿Cai pachapaj munaicunata catishpa ama huatashca shina cangapajca imatataj rurana canchij? Diostami tucui shunguhuan, tucui almahuan, sirvina canchij (Gálatas 5:16). Noé runamanta yachashun. Paipish paipaj familiapish millai, huainayaj gentecunapurapimi causarca. Chashnapish, ¿chai gentecuna laya ama tucungapajca paicunaca imatataj rurarcacuna? Paicunaca Jehová mandashcata rurashpami ocupados carcacuna. Por ejemplo, arcatami rurana carca, paicunapajpish animalcunapajpishmi micunata tandana carcacuna. Shinallataj yacu juillu shamunamantapishmi gentecunaman huillana carca. Bibliapica: “Noeca,  chashnatajmi rurarca. Taita Dios mandashca shinami tucuita rurarca” ninmi (Génesis 6:22). Noepish paipaj familiapish chashna rurashcamantami quishpirircacuna (Hebreos 11:7).

13. ¿Jehová Diosca imata rurachuntaj mandashca?

¹³ Jehová Diosca gentecunaman huillachunmi Jesustaca cai Allpaman cacharca. Jesús cai Allpapi cashpaca paita catijcunamanpishmi huillachun mandarca (Lucas 4:18, 19-ta leyipai). Cunan punllacunapica Diabloca casi tucui gentecunatami pandachicun. Chaimantami gentecunaca cullquipi yalli yuyashpa, panda religioncunapi purishpa, politicapi participashpa esclavocuna shina causancuna (2 Corintios 4:4). Ñucanchijcunaca Jesús shinami huillashpa, Diosta rijsichun, paita sirvichunpish gentecunata ayudai tucunchij (Mateo 28:19, 20). Caita ruranaca mana jahuallachu. Maijan ladocunapica gentecunaca mana uyasha nincunachu. Huaquinpicarin Diosmanta huillajpica pꞌiñarincunami. Cashna jahuapish: ‘¿Diosta ashtahuan sirvingapajca imatataj rurai tucuni?’ nishpa tapurishunchij.

14, 15. ¿Achca huauqui panicunaca imata ruranatataj decidishcacuna? (Página 9-pi tiyaj fotocunata ricui).

¹⁴ Achca huauqui panicunaca Jehová Diospaj jatun punlla ña caillapi cashcata intindishpami minishtirishcallahuan causanata decidishcacuna. Chaita rurashpami Diosta ashtahuan sirvi tucushcacuna. Chaita ricushpami cushilla sintirinchij (1 Corintios 9:19, 23). Maijancunaca paicunapaj congregacionllapitajmi ashtahuan ayudacuncuna. Shujtajcunaca shujtaj llajtapi huillashpa ayudangapajmi rishcacuna. Cai último 5 huatacunapica 250.000 yalli huauqui panicunami precursorcuna tucushca. Cunanca ñami 1.100.000 yalli precursorcuna tiyan. Cai huauqui panicunaca huatashcamanta cacharichishca cashcamantaca Diostami ashtahuan sirvicuncuna. Chaimantami achcata cushicunchij (Salmo 110:3).

¹⁵ ¿Diosta ashtahuan sirvingapajca imatataj rurashcacuna? Cunanca Johnmanta paipaj huarmi Judithmantapish parlashun. Paicunaca ña 30 huatacunatami chꞌican chꞌican llajtacunapi sirvishcacuna. Cai cusa huarmica: “1977 huatapimi Escuela del Servicio de Precursor tiyai callarirca. Chai escuelaman rijcunataca shujtaj llajtacunapi huillashpa ayudanaman richunmi animajcuna carca” nincunami. Johnca cashnapishmi nin: “Shujtaj ladopi huillanaman risha nishpami cutin cutin trabajota cambiana carcani. Minishtirishcalla cosascunahuan causanatami decidircanchij. Chaita rurashpami asha tiempo qꞌuipaca shujtaj llajtapi huillashpa ayudanaman rircanchij” ninmi. Johnpish y Judithpish chai mushuj llajtapi costumbrecunata, mushuj shimitami yachana carcacuna. ¿Chai jarcaicunata mishangapajca imatataj rurarcacuna? Diospimi  tucui shunguta churarcacuna. Mañanatapish mana saquircacunachu. Johnca caitapishmi nin: “Tucuimanta ashtahuan alli trabajopimi cashcanchij. Jehová Diosca ñucanchij ladopi cashca shinami ayudashca. Paica cꞌuyaj yaya layami can. Cunanmi Santiago 4:8-pi nishcata ashtahuan alli intindini. Chaipica, ‘Diospajman cꞌuchuyaichij, paipish cancunapajman cꞌuchuyamungallami’ ninmi. Ñucaca cushi causaitami tarishcani” ninmi.

16. ¿Achca huauqui panicunaca Jehová Dios cacharichishcamantaca ima shinataj agradicishcata ricuchincuna?

¹⁶ Maijancunaca mana achca huatacunatachu precursores shina sirvi tucuncuna. Chashna jahuapish achcacunaca mundo enteropimi Tandanacuna Huasicunata shayachingapaj ayudana oportunidadta aprovechancuna. Por ejemplo, casi 27.000 huauqui panicunami Estados Unidos llajtapi mushuj betelta rurangapaj ayudarcacuna. Maijancunaca ishqui semanatami ayudarcacuna, cutin shujtajcunaca huaquin quillacunata, shuj huata o huata yallitami ayudarcacuna. Chaipi ayudangapajca achca huauqui panicunaca huaquin sacrificiocunatami rurarcacuna. Chashnami huatashcamanta cacharichij Jehová Diosta jatunyachishcata, agradicishcatapish ricuchicuncuna. Chaimantami paicunaca ñucanchijpaj shuj alli ejemplo can.

17. ¿Alli decisioncunata japishpaca ima bendicioncunatataj charishun?

¹⁷ Jehová Diosca paita rijsichunmi saquishca. Shinallataj ñucanchijta cacharichishpa paita cushilla adorachunmi saquishca. Chaimantami alli decisioncunata japishpa paita diosolopagui nina canchij. Ñucanchij munaillata rurashpa causanapaj randica Dios munashca shina causangapaj esforzarishunchij. Chashna rurashpaca Romanos 8:21-pi nishca bendicioncunatami chasquishun. Chaipica: ‘Tucui imallata Dios rurashcacunaca huatashca shina chingarinapajlla ruracushcamantaca cacharishcami canga’ ninmi (Romanos 8:21, QC, 1989).