1, 2. a) ¿Huatashca shina ama cangapajca gentecunaca imatataj rurancuna? b) ¿Chashna rurashcamantaca imataj tucushcacuna?

MUYUNDIJ Allpapica gentecunaca tucuicunata igualta tratanamanta, mana huatashca shina causanamantami parlancuna. Huaquincunaca problemacunamanta, pobrezamantami librarinata munancuna. Cutin shujtaj gentecunaca cada uno imata yuyashcata ninatami munancuna, paicuna munashca shina causanatapishmi munancuna. Maipi cashpapish gentecunaca mana huatashca shina causanatami mashcancuna.

² Gentecunaca chaicunamanta cacharichishca cangapajmi parocunata rurancuna. Leycunatapish cambiasha nincuna. Pero, ¿paicuna munashcata rurai valishcacunachu? Mana. Chaipaj randica ashtahuan llaquicuna, huañuicunami tiyashca. Chaicunata ricushpami rey Salomón nishcacuna pajtarishcata crinchij. Paica: “Shujcunaca caishujcunata llaquichishpa causashpaca, quiquinpaj llaquipajllatajmi chashna rurancuna” nircami (Eclesiastés 8:9).

3. ¿Cushilla causangapajca imatataj rurana canchij?

³ Bibliapica cushilla causangapaj imata ruranatami yachachin. Jesusta catij Santiagoca: “Cashcata ruraj mandashcaca,  huatashcamanta cacharijmi. Chaita ricurashpa, uyarashpa, mana cungarishpa chaitataj rurashpa catirajca, pai imata ruracunpi cushichishcami canga” nircami (Santiago 1:25). Jehová Diosca ñucanchijcuna cushilla causangapaj imata minishtishcataca allimi yachan. Chaimantami paica ‘cashcata ruraj mandashcata’ curca. Diosca Adán Eva ama huatashca shina sintirichun ashtahuanpish cushilla causachunmi tucuita curca.

4. ¿Adán Evaca ima shinataj causarcacuna? (Página 3-pi tiyaj dibujota ricui).

⁴ Génesis capítulo 1 y 2-pi nishca shinaca Adán Evaca mana huatashca shina causarcachu. Paicunaca tucuitami charirca. Micunamanta, trabajomanta, ungüimantapish mana preocuparinachu carca. Ima llaqui, ima pobreza mana tiyarcachu. Pi llaquichijpish mana tiyarcachu. Cunan punllacuna gentecunapajca chashna causanaca shuj muscuillami can (Génesis 1:27-29; 2:8, 9, 15). Adán Eva chashna causaita charishpapish ¿tucui paicuna munashcatachu rurai tucurcacuna?

5. ¿Huatashcamanta cacharirishca shina causangapajca gentecunaca imatataj minishtin?

⁵ Maijancunaca: ‘Ñucanchij munashcata rurashpami mana huatashca shina sintirinchij’ nincunami. Chashna yuyashpaca qꞌuipa ima tucunatapish mana yuyancunachu. Shuj libropica: “Imatapish agllai tucushpa, chai agllashcata pajtachishpami mana huatashca shina canchij” ninmi. Ashtahuanpish cashnapishmi nin: “Gobiernocunaca mana llaquichij, minishtirishca, pajtachinalla leycunatami churana can. Chashnami, gentecunaca mana huatashca shina sintiringacuna” ninmi (The World Book Encyclopedia). Cai libropi nishca shinaca gentecuna huatashcamanta cacharirishca shina causangapajca pajtachinalla leycuna tiyachunmi minishtirin. Pero, ¿pitaj mana llaquichij, minishtirishca, pajtachinalla leycunata churanata pudin?

6. a) ¿Imamantataj Jehová Dioslla tucui munashcata rurai tucun? b) ¿Imamantataj mana tucui ñucanchij munashcata rurai pudinchij?

⁶ Caitami yuyarina canchij, Jehová Diosllami tucui munashcata rurai pudin. ¿Imamanta? Tucuita rurai tucuj, Tucui poderta charij, Tucuita Mandaj Dios cashcamantami imata rurasha nishpapish rurai tucunlla (1 Timoteo 1:17; Apocalipsis 4:11). Rey Davidca sumaj shimicunahuanmi Jehová Dios tucuita rurai tucushcatapish, pai ima shina cashcatapish nirca (1 Crónicas 29:11, 12-ta leyipai). Cutin jahua pachapipish cai pachapipish causajcunaca mana ñucanchij tucui munashcata rurai pudinchijchu. Jehová Dioslla mana llaquichij, minishtirishca, pajtachinalla leycunata churana derechota charishcataca allimi intindina canchij. Paica callari pachamantami leycunata churarca.

7. ¿Imallata rurashpataj cushilla sintirinchij?

⁷ Adán y Evaca achca cosascunata rurai pudijpipish Jehová Diosca huaquin leycunatami curca. Maijan leycunaca mana sinchichu carca. Por ejemplo, causashpa catingapajca samaita aisana, micuna, dorminapishmi carcacuna. Caicunata rurashpaca paicunaca mana huatashca shina sintirircacunachu. Ashtahuanpish Adán y Evaca chaicunata rurashpaca cushillami sintirircacuna. Diosca chaitami munarca (Salmo 104:14, 15; Eclesiastés 3:12, 13). Tucui ñucanchijcunapish samaita aisashpa, ñucanchij munashca micunacunata micushpa, samarishpaca mana huatashca shina sintirinchijchu. Ashtahuanpish cushillami sintirinchij ¿nachu? Adán Evapish chashnallatajmi sintirircacuna.

8. a) ¿Jehová Diosca Adán y Evamanca ima mandatotataj curca? b) ¿Imamantataj chaita mandarca?

 ⁸ Jehová Diosca Adán Evataca ‘huahuacunayuj tucushpa, cai pachapi jundarichij, cai pachata cuidanguichij’ nishpami mandarca (Génesis 1:28). ¿Chaita mandajpica Adán Evaca huatashca shina sintirircacunachu? Mana. Ashtahuanpish cai mandashcata pajtachishpaca cai Allpa shuj paraíso tucuchun, paicunapaj huahuacunapish huiñaita causachun ayudana oportunidadtami charircacuna. Chashna causachunmi Jehová Diosca munarca (Isaías 45:18). Cunan punllacunapica maijancunaca solteromi causancuna. Shujtajcunaca cazarashpapish huahuacunata mana charincunachu. Chashna causanapish mana ima juchachu can. Cutin achcacunaca problemacuna tiyanata yachashpapish cazarancunami, huahuacunata charincunami (1 Corintios 7:36-38). ¿Imamantataj chaita rurancuna? Paicunaca cushilla causasha nishpami cazarancuna, huahuacunata charincuna (Salmo 127:3). Caipi ricushca shinaca Adán Evapish paicunapaj huahuacunandij cushillami huiñai huiñaita causanman carca.

9. ¿Génesis 2:17-pi mandashcaca imamantataj alli carca?

⁹ Jehová Diosca Adán Evamanca shujtaj mandashcatami curca. Shinallataj chaita mana cazushpaca ima tucunatapishmi huillarca. ¿Imatataj mandarca? Diosca, “huerta chaupipi tiyaj yuraca allita mana allita yachaj chayachijmi. Chai yuramantaca ama micungui. Chai yuramanta micushpaca, chai punllallatajmi huañungui” nishpami mandarca (Génesis 2:17). ¿Chaica llaquichij, mana minishtirishca, mana pajtachinalla mandashcachu carca? ¿Adán Evaca chaita mandajpica huatashca shinachu sintirircacuna? Mana. Bibliamanta parlaj gentecunaca: “Génesis 2:17-pi mandashcaca allimi carca. Chaipica gentecunapaj ima alli cashcata o mana alli cashcataca Dioslla yachaj cashcatami ricuchin. Allita rurashpa, cushilla causangapajca Diospi tucui shunguta churashpami paita cazuna canchij. Pero mana cazushpaca ñucanchijllatajmi ima alli cashcata o mana alli cashcata decidina canchijman” ninmi. Pero gentecunaca chaita rurangapajca mana rurashca canchijchu.

10. a) ¿Imatataj agllai tucunchij? b)  ¿Imatataj mana agllai tucunchij?

¹⁰ Achca gentecunaca ‘Jehová Diosca Adán y Eva tucui paicuna munashcata rurachun mana saquircachu. Chaimantami Génesis 2:17-pi nishcata mandarca’ nincunami. Pero chaica mana ciertochu. ¿Imamanta? Ñucanchijcuna imata ruranataca agllai tucunchijllami. Shinapish “ima alli cashcata o ima mana alli cashcata” decidina derechotaca mana charinchijchu. Adán Evapi yuyashun. Paicunaca Diosta cazunata o mana cazunataca agllai tucurcacunallami. Shinapish Edén huerta chaupipi tiyaj yuraca Jehová Dioslla ima alli cashcata o ima mana alli cashcata decidina derechota charishcatami paicunaman ricuchirca (Génesis 2:9). Cunanca ñucanchijpi yuyashun. Ima decisioncunata  japishca qꞌuipa ima tucunataca mana siempre yachanchijchu. O ñucanchij allipaj canata mana yachanchijchu. Chaimantami huaquinpica alli yuyashpa decisioncunata japijpipish llaquicunaca ricurinlla (Proverbios 14:12). Ima shinami ricushcanchij gentecunaca mana tucuita alli rurai tucunchu. Adán Evaca ama huatashca shina causangapajca Diostami cazuna carca. Chaimantami huerta chaupipi tiyaj yuramanta mana micuna carca. Pero ¿imatataj agllarcacuna?

11, 12. ¿Imamantataj Adanpish Evapish llaqui tucurcacuna? Shuj ejemplota churashpa cutichi.

¹¹ Adán y Evaca Diosta mana cazunatami. Diabloca Evataca: ‘Cancunapaj ñahuicuna pascarijpi Taita Dios shinami, allitapish, mana allitapish yachaj tucunguichij’ nircami. Evaca Diablo nishcata ruranatami decidirca (Génesis 3:5). Shinapish, ¿Diablota uyashpaca Adán Evaca Dios shinachu tucurca? Mana. Ashtahuanpish paicunaca Diosta mana cazushpa paicuna munashcata rurashcamantami achca llaquicunata charishcata cuentata curca (Génesis 3:16-19). Jehová Diosca ima alli cashcata o ima mana alli cashcata gentecunallataj decidichunca mana rurarcachu (Proverbios 20:24; Jeremías 10:23-ta leyipai).

¹² Shuj avionta manejaj runapi yuyashun. Mai ricushcaman alli chayangapajca maita richun nishcatami rina can. Avionta manejanapaj tiyaj aparatocunatapishmi cazuna can. Shinallataj maita rinata o ima shina rinata, ima hora avionhuan uriyanata huillajcunahuanpishmi parlanacuna can. Chaicunata mana cazushpaca maipish cachun rishpaca llaquimi tucunga. Adán Evapish avionta manejaj runa layami Diospaj mandashcacunata  cazuna carca. Pero mana chaita rurarcacunachu. Chaimantami llaqui tucurcacuna. Paicunaca juchayuj tucushpami huañurcacuna, paicunapaj huahuacunapish chashnallataj tucurcacuna (Romanos 5:12). Adán Evaca paicuna munashca shina rurasha nishcamantami huatashca shina causarcacuna.

13, 14. ¿Huatashca shinamanta cachariringapajca imatataj rurana canchij?

¹³ Achca gentecunaca “mana tanto leycuna tiyajpica mana huatashca shina canchijmanchu. Ashtahuanpish allimi causanchijman” nincunami. Leycuna illaj causanaca alli ricurij layami. Pero, ¿leycuna mana tiyajpi, ñucanchij ima munashcatapish rurashpaca manachu llaquicunapi urmanchijman? Párrafo 5-pi parlashca libropica caitapishmi nin: “Leycunaca gentecunapaj derechocunatami difindina can. Pero chai leycunallatajmi gentecuna tucui paicuna munashcata rurachun mana saquina can. Chaimantami gobiernocunapajca leycunata churanaca sinchi can” ninmi. Yuyashun. Gobiernocunaca achca leycunatami churashcacuna. Leycuna ima nishcata yachangapaj, ima shina pajtachinata yachangapajpish achca abogadocuna, juezcuna tiyachunmi minishtirin.

¹⁴ Jesusca huatashca shina ama causangapaj imata ruranatami yachachirca. Paica: “Ñuca yachachishcacunata catirashpaca, ñuca yachacujcunatajmi canguichij. Chashna cashpami, mana llullataca rijsinguichij. Chai mana llullami huatashca shinamanta cacharichinga” nircami (Juan 8:31, 32). Cai  consejota pajtachingapajca cai ishqui yuyaicunatami rurana canchij: 1) Jesús yachachishcacunatami chasquina canchij. 2) Jesusta catijmi tucuna canchij. Chaicunata rurashpaca huatashca shinamanta cacharichishcami cashun. Jesusca caitapishmi nirca: ‘Pipish juchata rurana yuyailla causajca, huatashca shinami juchapi causan. Shinapish Taita Diospaj Churi cacharichijpica ña cacharichishcatajmi canguichij’ nircami (Juan 8:34, 36).

15. ¿Imamantataj juchamanta cacharichichun minishtinchij?

¹⁵ Jesús nishca shinaca tucuicunami juchapi huatashca shina causanchij. ¿Ima shinataj juchapi huatashca shina causanchij? Juchami mana allicunata rurachin. Allita rurangapajpish jarcan. Shinallataj Juchayuj cashcamantami ñucanchijllataj pandarishpa mana alli sintirinchij, sufrinchij, huañunchijpish (Romanos 6:23). Apóstol Pabloca juchapi huatashca shina causana ima shina cashcataca allimi yacharca (Romanos 7:21-25-ta leyipai). Adán Eva Diosta mana cazushcamantapishmi tucuicuna juchapi huatashca shina causanchij. Shinapish, Jesusca: “Diospaj Churi cacharichijpica ña cacharichishcatajmi canguichij” nircami. Chashna nishpaca juchapi huatashca shina cacharichinamantami parlacurca. Shinashpaca, juchayujcuna ña mana cashpallami cacharichishcataj cashun.

16. ¿Ima horastaj juchamantaca cacharichishca cashun?

¹⁶ Jesusca ‘ñuca yachachishcata catiraichij’ nishpaca ñucanchijta cacharichingapaj cada uno imata pajtachina cashcatami nicurca. ¿Imatataj pajtachina canchij? Ñucanchij munashcacunata huashaman saquishpa Jesús mandashcacunatami tucuita pajtachina canchij (Mateo 16:24). Jesusca ñucanchijmantami huañurca. Pai huañushcamantami shamuj punllacunapipish juchapi huatashca shinamanta cacharichishcataj cashun.

17. a) ¿Cushilla causangapajca imatataj rurana canchij? b) ¿Catij temapica imatataj yachashun?

¹⁷ Ima shinami yachashcanchij Jesús mandashcacunata cazushpallami cushilla causashun. Shamuj punllacunapipish juchamanta huañuimanta cacharichishcataj cashun (Romanos 8:1, 2, 20, 21-ta leyipai). Catij temapica Jehová Diosta jatunyachingapaj ima decisioncunata japina cashcatami yachashun.