1-3. a) ¿Jovencunaca paicunapaj causaipica imatataj agllana? Shuj chꞌimbapuraihuan parlai (Jahuapi tiyaj fotota ricui). b) ¿Diosta sirvij jovencunaca alli decisioncunata agllangapajca imatataj rurana can?

CAIPI yuyai: Canca caru llajtapichari shuj importante tandanacuiman rina cangui. Chaipajca shuj bustami japina cangui. Terminalman chayashpaca achca gentecunata, achca buscunata ricushpami imata ruranata mana yachangui. Pero maiman rina cashcata ña yachashcamantaca mana shujtaj llajtaman apaj bustachu japinguiman. Ashtahuanpish chai llajtaman apaj bustami japinguiman ¿nachu?

² Causaica caru llajtaman ricushca shinami can. Cutin jovencunaca terminalpi caj gentecuna layami can. Jovencunaca causaipica achca decisioncunatami agllana can. Chaimantami maipica imata ruranata mana yachancuna. Pero paicunapaj causaipi imata ruranata alli yachashpaca decisioncunata agllanaca jahuallami canga.

³ Cai yachaica Diosta ashtahuan sirvichunmi jovencunataca animanga. Chaipajca jovencunaca imata estudianata, imapi trabajanata, pihuan cazaranata agllagricushpaca Yaya Diostami yuyaipi charina canguichij. Chashna rurajpica  Yaya Diosca cancunata achcatami bendicianga. Shinallataj cushillami causanguichij (Proverbios 16:3-ta leyipai).

4. ¿Cai yachaipica imatataj yachashun?

⁴ Cai yachaipica joven cashparaj Diosta ashtahuan sirvingapaj imata rurana cashcatami yachashun. Shinallataj cushilla causangapaj imata rurana cashcatami ricushun.

5. ¿Imamantataj Diosta ashtahuan sirvina cangui?

⁵ Joven, Jehová Diosca canmanca tucuita cushpami cꞌuyaita ricuchishca. Canta cꞌuyashcamanta agradicishcata ricuchingapajca paitami ashtahuan sirvina cangui. Ñaupa tiempopi Diosta sirvij runaca: ‘Mandaj Dioslla quiquinta pagui ninaca allimari’ nishpami escribirca. Shinallataj: “Mandaj Dioslla, quiquin rurashcacunami ñucataca cushichin. Quiquinpaj maquihuan rurashcacunapimi ñucaca cushicuni” nircami (Salmo 92:1, 4). Joven, Jehová Dios canmanta imallata rurashcata yuyari. Paimi canmanca causaita, congregacionpi huauqui panicunata cushca. Paita rijsichunpish Bibliatami cushca. Shamuj punllacunapicarin shuj sumaj causaitapishmi canmanca cusha nin. Tucuita cushcamanta agradicingapajca, Diospaj munaitarajmi rurana cangui. Shinami paipaj alli amigo tucungui.

6. a) ¿Diosta tucui shunguhuan sirvishpaca paipaj ñaupajpica ima shinataj ricuringui? b) ¿Jovencitocuna, Diosta ashtahuan sirvingapajca imatataj rurana canguichij?

⁶ Diosta tucui shunguhuan sirvingapaj esforzarishpaca paipaj ñaupajpica allimi ricuringui. Paica cambaj tucui alli rurashcacunatami ricucun. Apóstol Pabloca: ‘Diosca cashcata ruraj cashcamantaca, cancunapaj rurashcacunata paipaj shutipi cꞌuyaihuan trabajashpa ricuchishcataca manataj cungaringachu’ nircami (Hebreos 6:10). Jovencitocuna, cancuna uchilla cashpapish Diosta ashtahuanmi sirvi tucunguichij. Por ejemplo, Cristine shuti jovencitaca 10 huatacunata charishpami Huillaj revistapi huauqui panicunapaj causaimanta siempre leyinata decidirca. Toby shuti jovencitoca 12 huatacunata charishpami Bibliata tucuita leyinata decidirca. Chaipajca manaraj bautizarishcachu carca. Cutin Maxim shuti jovencitoca 11 huatacunata charishpami bautizarirca. Paipaj pani Noemipish 10 huatacunata charishpami bautizarirca. Paicunaca Betelpi sirvinatami munarcacuna. Chaita ama cungaringapajca Betelpi sirvina solicitud cushca hojataca paicunapaj huasi patapimi pigachircacuna. ¿Diosta ashtahuan sirvingapajca imatataj canca rurasha ningui? (Filipenses 1:10, 11-ta leyipai *).

7, 8. a) ¿Proverbios 21:5-mantaca imatataj yachanchij? b) ¿Imamantataj shuj joven panica universidadpi mana estudianata decidirca?

⁷ Joven cashpaca imata estudianata, maipi trabajanatami decidina cangui. Shinallataj shujtaj importante decisioncunatami agllana cangui. Shuj decisionta agllanaca ishqui ñan ricurijpi maijan ñanta rinata agllana layami can. Maiman rinata alli yachashpaca, maijan ñanta rinata  agllanaca jahuallami canga. Chashnallatajmi, causaipi imata ruranata alli yachashpaca decisioncunata agllanaca cambajca jahualla canga. Proverbios 21: 5-pica: ‘Imatapish alli yuyarishpa chai yuyai trabajaj runaca allimi causanga’ ninmi. Chaimantami Diosta ashtahuan sirvingapaj can churashca metacunata utca pajtachina cangui. Shinami cambajllataj alli cashcata cuentata cungui. Cunanca Damaris panimanta parlashun. Joven cashpaca shuj importante decisiontami agllanaca carca. ¿Paica imatashi decidishcanga?

⁸ Cai panica alli estudiantemi carca. Chaimantami colegiota tucuchishca qꞌuipaca abogada tucuchun shuj becata cusha nircacuna. Pero paica precursora canatami decidirca. ¿Imamantataj chaita decidirca? Paica cashnami nin: ‘Ñucaca siempremi precursora canata munarcani. Chaipajca semanapi huaquin punllacunallatami trabajanata munarcani. Becata chasquishpaca achca cullquitami ganaiman carcani. Pero mana precursorachu caiman carcani’ nircami. Cunanca Damarisca ñami 20 huatacunata precursora shina sirvicun. ¿Chai decisionta agllashcamantaca arrepintirishcachu? Mana. Ashtahuanpish paica cashnami nin: ‘Huaquin abogadocunaca alli trabajota charishpapish mana cushilla causacushcatami ricushcani. Pero ñucaca precursora canata decidishcamantami Jehová Diosta sirvishpa cushilla causani’ nircami.

9. ¿Diosta sirvij jovencunataca imamantataj felicitana canchij?

⁹ Mundo enteropimi achca jovencunaca Diosta tucui shunguhuan sirvicuncuna. Chaimantami felicitana canchij. Cai jovencunaca imata estudianata, imapi trabajanata agllagricushpaca Jehová Diostami yuyaipi charincuna. Rey Salomonca: “Mandaj Diospi cambaj tucui shunguta churangui. Imata rurangapajpish, Diosta yuyaipi charingui. Paimi cantaca alli ñanta pushanga” nircami (Proverbios 3:5, 6). Jovencuna, Jehová Diosca cancunataca achcatami cꞌuyan. Chaimantami cancunataca cuidacun, bendiciacun.

10. a) ¿Diosmanta huillanaca imamantataj importante can? b) ¿Huillanata mana munashpaca imatataj rurana cangui?

¹⁰ Diosta ashtahuan sirvisha nishpaca shujtajcunamanmi paimanta parlana cangui. Jesusca: “Alli huillairajmi tucui cai pachapi huillashca canga” nircami (Marcos 13:10). Chashna nishpaca Diosmanta huillana importante cashcatami ricuchirca. Chaimanta, ¿ashtahuan huillanata yuyashcanguichu o precursor canata yuyashcanguichu? Pero huillanaman rinataca mana achcata munanichu  ninguichari. Chashna yuyashpaca ¿imatataj rurai tucungui? Allimi allichirina cangui. Shinallataj shujtajcunaman Diosmanta huillanataca mana saquinachu cangui. Chaita rurashpami huillacushpaca cushilla sintiringui.

11, 12. a) ¿Huillanata mana munashpaca imatataj rurai tucungui? b) ¿Shuj punllaca clasespica Lucasca imatataj rurarca?

¹¹ Escuelapi o colegiopi compañerocunaca cambaj crishcacunamanta tapuicunatami ruranga. Chai tapuicunata cutichingapajca allimi allichirina cangui. ¿Ima shinataj allichiri tucungui? Publicacioncunapipish jw.org paginapipish alli yuyaicunami tiyan. Chai publicacioncunamanta yachashpami tapuicunata alli cutichi tucungui. Por ejemplo, ¿Imamantataj Diospi cringui? nijpica Joven cai 10 tapuicunapi ¿yuyashcanguichu? nishca folletota ricui. Página 27 a 29-pimi chai tapuimanta ima shina cutichinata yachai tucungui (1 Pedro 3:15-ta leyipai).

¹² Cambaj compañerocunataca jw.org paginaman yaicuchunmi animai tucungui. Lucasca chaitami rurarca * (urapi tiyaj notata ricui). Shuj punllaca paipaj clasespica religioncunamantami parlanacucurcacuna. Estudiacushca libropica testigo de Jehovacunamanta pandata yachachicushcatami ricurca. Lucasca chai yachaicuna mana cierto cashcatami huillasha nirca. Pero manchaitami charirca. Chashna jahuapish paipaj maestrataca imamanta chai libropi tiyaj yachaicuna mana cierto cashcata ricuchingapajmi permisota mañarca. Tucuicunapaj ñaupajpimi paipaj crishcacunata intindichirca. Shinallataj jw.org  paginaman ima shina yaicunatapishmi yachachirca. Clases tucurijpica maestraca Canmanta burlarijpica ¿imatataj rurana cangui? nishca videota ricuchunmi shuj deberta huambracunaman cacharca. Lucasca Jehová Diosmanta parlashcamantami cushilla sintirirca.

13. ¿Problemacuna ricurijpica imamantataj mana desanimarina cangui?

¹³ Diosta ashtahuan sirvingapaj jarcaicuna ricurijpica ama desanimaringuichu. Ashtahuanpish ñaupajmanmi catina cangui (2 Timoteo 4:2). Katharinaca chaitami rurarca. Paica 17 huatacunata charishpami trabajopi tucui compañerocunaman Diosmanta huillanata decidirca. Huillacujpica shuj compañeroca cutin cutinmi ajaj carca. Pero Katharinaca alli comportarishpami catirca. Huillanatapish mana saquircachu. Chaita ricushpami shuj compañero Hans shutica ñucanchij publicacioncunata leyi callarirca. Bibliatapish yachai callarirca. Qꞌuipaca bautizarircami. Katharinaca shujtaj llajtapi causanaman rishcamantami paimantaca mana imata yacharca. 13 huatacuna qꞌuipaca Hansca cai panipaj Tandanacuna Huasimanmi shuj conferenciata cunaman rirca. Paita ricushpami Katharinaca dimastij cushicurca. Paipaj compañerocunaman Diosmanta huillanata mana saquishcamantami achcata cushicurca.

14, 15. a) ¿Shujtajcuna mana allita rurachun inquitajpica imatataj yuyarina cangui? b) ¿Shujtaj jovencuna mana allita rurachun cutin cutin nijpica imatataj rurai tucungui?

¹⁴ Caicamaca cai yachaipica Diosta ashtahuan sirvingapaj metacunata churarina cashcatami ricushcangui. Shujtaj jovencunaca paicunapaj munashcallata rurashpa cushicunallapimi yuyancuna. Cantapish chaillatataj rurachunmi invitangacuna. Chashna inquitajpica caita yuyari: Cada cualmi ñucanchij causaihuan imata ruranata agllana canchij. Chaimanta, cambaj metacunata pajtachingapaj shujtajcuna jarcachunca ama saquinguichu. Párrafo 1-pi tiyaj chꞌimbapuraipi yuyai. Bus ucupi pasajerocuna cushilla cajta ricushpallaca mana chai busman llujshinguimanchu ¿nachu?

¹⁵ Shujtaj jovencuna mana allita rurachun cutin cutin nijpica ¿imatataj rurai tucungui? Chai jovencunahuanca mana tandanacunachu cangui (Proverbios 22:3). Chashnallataj mana alli cosascunata rurashpaca llaquicunapi urmana cashcatami yuyarina cangui (Gálatas 6:7). Shujtajcunapaj consejocunatapish minishtishcatami yuyarina cangui. Humilde cashpaca yaya mamacuna, experienciata charij huauqui panicuna consejota cujpica cushillami chasquingui (1 Pedro 5:5, 6-ta leyipai).

16. ¿Christoph huauquipaj ejemplomantaca imatataj yachanchij?

¹⁶ Christoph shuti jovenmanta parlashun. Bautizarishca qꞌuipaca gimnasiomanmi ri callarirca. Chaipica shujtaj jovencunaca shuj pugllaipi yaicuchunmi invitarcacuna. Paica chaitami shuj ancianoman huillarca. Ancianoca: ‘Chai pugllaicunaca pi ashtahuan yalli cashca yuyaillami pugllancuna. Chaiman rishpaca llaquicunapimi urmai tucungui. Manaraj decidishpami alli yuyana cangui’ nircami. Chashna nijpipish  cai jovenca chai pugllaimanmi yaicurca. Pero tiempohuanca chai pugllai peligroso cashcatami cuentata curca. Chaimantami huaquin ancianocunaman chai pugllaimanta parlarca. Paicunapish Bibliahuanmi consejocunata curca. Cai jovenca humilde cashcamantami chai consejocunata chasquirca. Y paica cashnami nin: ‘Alli consejocunata cuchunmi Jehová Diosca chai huauquicunata cacharca. Callaripi paicuna cushca consejocunata mana uyashpapish qꞌuipaca cazurcanimi’ nircami. ¿Shujtajcuna canman consejota cujpica cazushpa humilde cashcata ricuchinguichu?

17, 18. a) ¿Jehová Diosca jovencuna ima laya causachuntaj munan? b) ¿Qꞌuipa punllacunapi cambaj decisioncunamanta ama arrepintiringapajca imatataj rurai tucungui? Shuj ejemplomanta parlai.

¹⁷ Jehová Diosca:“Qꞌuipa huiñaicunalla, cancuna chairaj cashcapi cushicuichijlla. Cambaj shungu cushicuchun saquilla” ninmi (Eclesiastés 11:9). Paica can cushilla causachunmi munan. Cushilla causangapajca Diosta ashtahuan sirvina cashcatami ricushcangui. Ima decisioncunata japigricushpapish paita yuyaipi charina cashcatami yachashcangui. Chaitaca cunanmantami ña rurai callarina cangui. Chaimi Diosca cantaca achcata bendicianga, cuidanga, alli ñanta pushanga. Chashnallataj Bibliapi tiyaj tucui alli consejocunatapish yuyari. Eclesiastés 12:1-pi nishcatapish cazui. Chaipica “Chairaj cashpami, canta Ruraj Diostaca yuyarina cangui” ninmi.

¹⁸ Mana toda la vidachu joven causangui. Ratomi huatacunaca pasan. Achca gentecunaca joven cashpa mana alli decisionta japishcamanta o ima decisionta mana japishcamantami achcata llaquirincuna. Joven cashparaj Jehová Diosta ashtahuan sirvinata decidishpaca cunanpish shamuj punllacunapipish cushillami causangui. Mirjana panipish chashnami sintirirca. Pai joven cashpaca alli pugllajmi carca. Chaimantami Juegos Olímpicos nishcaman yaicuchun invitarcacuna. Pero paica Diosta ashtahuan sirvinatami decidirca. Ña 30 huatacuna pasajpipish paipaj cusahuanmi Diosta sirvishpa caticun. Cai panica cashnami nin: ‘Tucuicunapaj rijsishca cana o achca cullquita charinapish mana imapaj valinchu, yangallami can. Pero Diosta sirvina, shujtajcunaman paimanta huillanaca cushi causaitami cun’ nircami.

19. ¿Diosta ashtahuan sirvingapaj esforzarishpaca ima shinataj causangui?

¹⁹ Achca jovencunaca problemacunata charishpapish Diosta ashtahuan sirvishpami catincuna. Chashnallataj Diosmanta huillana importante cashcatami ricuchincuna. Shujtajcuna mana allita rurachun nijpipish Diosta cazushpami catincuna. Chaimantami paicunata achcata felicitana canchij. Joven, cambaj tucui esfuerzocunaca mana yangachu can. Tucui huauqui panicunami cantaca achcata cꞌuyanchij. Imata ruragricushpapish Diosta yuyaipi charingui. Chashnami cushilla causangui.