NOVIEMBRE de 1932 huatapajca ciudad de Mexicopica millón yalli gentecunami ña tiyarca. Cai llajtapica shuj semana huashallamanmi callecunapica semaforocunata churashcacuna carca. Gentecunaca cushillami carcacuna. Pero chai llajtaman Sociedad Watch Towerpaj presidente Joseph F. Rutherford shamugrijta uyashpaca ashtahuanmi cushicurcacuna. Chaimantami periodistacunapish huauqui panicunapish tren shayarinapi huauqui Rutherfordta shuyacurcacuna. Huauqui Rutherfordca quimsa punlla jatun tandanacuipi cangapajmi shamucurca.

The Golden Age revistapica (cunanca ¡Despertad! shutimi can) cashnami nirca: “Cai jatun tandanacuica México llajtapi Diosmanta gentecuna ashtahuan uyachunmi ayudashca. Chaimantami cai importante tandanacuitaca mana cungarishun” nircami. Cai tandanacuipica casi 150 gentecunallami tandanacurcacuna. Shinaca ¿imamantataj cai tandanacuica importante carca?

Chai jatun tandanacuita manaraj rurajpica asha gentecunallami Diosta sirvi callarishcacuna carca. 1919 huatamantami tandanacuicuna tiyarca. Pero qꞌuipa huatacunapica congregacioncuna mirashpa catinapaj randica ashacunallami saquirirca. 1929 huatapica ciudad de Mexicopica shuj sucursalmi tiyai callarirca. Cai sucursal tiyashcamanta gentecuna ashtahuan Diosmanta yachashpa catinatami yuyarcacuna. Pero huaquin problemacunami ricurirca. Por ejemplo, shuj colportor huauquica (cunanca precursor nishpami rijsinchij) huillacushpa negociota mana rurana cashcata yachaj chayashpaca dimastijmi pꞌiñarirca. Chaimantami Diosta sirvinata saquishpa Bibliata yachangapaj shujtaj grupota callarichirca. Shinallataj sucursalta pushaj huauqui mana allita rurashcamantami shujtaj huauquita pushachun churana tucurca. Chaimantami Mexicopi tucui shunguhuan sirvij huauqui panicunaca achca animota minishtircacuna.

Huauqui Rutherfordca cai visitapica huauqui panicunata achcatami animarca. Paica ishqui sumaj conferenciatami uyachirca. Shinallataj radiopipish 5 conferenciacunatami uyachirca. Huauquicunaca punta cutinmi radiota utilizashpa tucui Mexicopi Diosmanta yachachircacuna. Cai jatun tandanacui qꞌuipaca sucursalta pushaj mushuj huauquimi Mexicopi Diosmanta huillangapaj ayudai callarirca. Chai punllamantami tucui huauqui panicunaca Diospaj ayudahuan Bibliamanta yachachishpa catircacuna.

Chai huata qꞌuipaca Veracruzpi, ciudad de Mexicopipishmi shuj jatun tandanacui tiyarca. Huauqui panicunaca tucuicunaman huillangapajmi achcata esforzarircacuna. 1931-pica 82 testigocunallami tiyarca. Pero 1941 huatapajca ñami 859 testigocuna carca. Chai huatallapitajmi ciudad de Mexicopica shuj jatun tandanacui tiyarca. Chaipica casi mil gentecunami tandanacurcacuna.

1943-pica Testigocunaca shuj jatun tandanacui tiyagrishcata huillangapajmi callecunaman cartelcunahuan llujshircacuna. Chai tandanacuica “Nación Libre” shutimi carca. Mexicopica 12 ladocunapimi cai tandanacuica tiyarca * (urapi tiyaj notata ricui). Cai tandanacui tiyagrishcata huillangapajca huauqui panicunaca cartelcunataca shujtaca ñaupajpi, caishujtaca huashapimi aparijcuna carca. Testigocunaca 1936 huatamantami cartelcunahuan huillacurcacuna.

Cartelcunahuan huillanaca allimi carca. Chaimantami México llajtamanta La Nación revistaca: “Punta punllaca ashtahuan gentecunata invitachunmi mañarcacuna. Cayandijtaca yallitaj gentecunami shamurcacuna” nircami. Chaita ricushpami Iglesia Catolicapi cajcunaca pꞌiñarishpa Testigocunamanta mana allita rimarcacuna. Chashna jahuapish huauqui panicunaca mana manchashpami callecunapi huillashpa catircacuna. La Nación revistaca “tucui gentecunami Testigocuna huillacujtaca ricurcacuna” nircami. Shinallataj chai revistapica huauqui panicuna ima shina huillacujtami fotopi llujshichishcacuna carca. Ura chaqui fotopica: “Ñancunamanmi achcacuna llujshishcacuna” nishpami quillcashca carca.

Chai huatacunapica Mexicopica huaquinpillami jatun tandanacuicuna tiyarca. Chai tandanacuicunaman ringapajca mana jahuallachu carca. Achca huauqui panicunaca carupimi causajcuna carca. Ñancunapish mana tiyarcachu. Huaquincunaca trenta japingapajca mulapi o chaquillahuanmi achcata purina carca. Trenta ña japishpami tandanacui tiyashca llajtaman rijcuna carca.

Achca huauqui panicunaca tandanacuiman chayangapajllami cullquita charijcuna carca. Maijancunaca chai llajtapi causaj huauqui panicunapaj huasicunapimi saquirijcuna carca. Paicunataca cushicushpami chasquijcuna carca. Cutin shujtajcunaca Tandanacuna Huasicunapimi dormingapaj saquirijcuna carca. Shuj cutinca casi 90 huauquicuna panicunami sucursalpi saquirircacuna. Paicunaca cartón jahuapimi dormircacuna. Anuario libropica: “Paicunaca cemento pamba jahuapi mana dormichun saquishcamantami achcata agradicircacuna” nircami.

Huauqui panicunaca, “carumanta shamuna sinchi cajpipish ñucanchij huauqui panicunahuan cashpami cushilla sintirinchij” nijcunami carca. Cunanca Mexicopica casi shuj millón testigocunami tiyan * (urapi tiyaj notata ricui). Paicunaca cunancamami tandanacuicunaman rinata achcata munancuna. 1949-pica Mexicopi tiyaj sucursalca cashnami nirca: “Huauqui panicuna achca problemacunata charishca jahuapish cunancamami Diosta tucui shunguhuan sirvicuncuna. Jatun tandanacuicuna tucurishca qꞌuipaca imata yachashcatami paicunapura parlanacuncuna. Shinallataj ‘¿ima horataj caishuj jatun tandanacuita charishun?’ nishpami tapuncuna” nirca (De nuestros archivos en la sucursal de Centroamérica).