1. ¿Ima shinataj Dioshuan trabajai pudinchij?

JEHOVÁ DIOS gentecunata rurashpaca paihuan trabajachunmi munarca. Juchayujcuna cashpapish Diosta sirvijcunaca paihuanmi tucui punllacuna trabajai tucunchij. Por ejemplo, Bibliapica huillashpa, Jesusta catijcunata rurashpaca “Diospajta paihuan rurajcunami canchij” ninmi (1 Corintios 3:5-9). Tucuita ruraj Diosca chai importante trabajota rurachunmi ñucanchijta agllashca. Chaica shuj jatun bendicionmi can. Shinallataj shujtaj layapishmi Dioshuan trabajai tucunchij. Cai yachaipica ñucanchij familiacunata, huauqui panicunata ayudashpa ima shina Dioshuan trabajanatami yachashun. Shinallataj shujtajcunaman pozadata cushpa, Diospaj organizacionpi trabajashpa, Diosta ashtahuan sirvishpa paihuan ima shina trabajanamantami yachashun (Colosenses 3:23, NM).

2. ¿Imamantataj Diospajta ruracushpaca mana shujtajcunahuan compararina canchij?

² Cai yachaita estudiacushpaca cada unomi chꞌican chꞌican cashcata yuyarina canchij. Ñucanchij causai, edad, salud, ruraicunapish chꞌican chꞌicanmi can. Chaimantami Diospaj imata rurai  tucushcallata ricuna canchij. Ñucanchij ruraicunata shujtajcunapaj ruraicunahuanca mana comparanachu canchij. Apóstol Pabloca: “Cancuna ima shina causacushcataca, tucuicuna alli yuyarichij. Chashna tucui imapish cancunapaj causaipi alli cajpica, pi shujtaj ima shina cashcata ama ricushpa, quiquin ima shina rurashcallahuan cushi caichijlla” nircami (Gálatas 6:4, QC, 1989).

3. ¿Imamantataj familiata cuidajcunataca Dioshuanmi trabajancuna ninchij?

³ Diosca ñucanchij familiata cuidachunmi munan. Por ejemplo, huaquincunaca familiata mantiningapajca trabajanami canchij. Achca mamacunapish paicunapaj uchilla huahuacunata cuidangapajmi huasipi saquirincuna. Cutin huaquincunaca paicunapaj yuyajlla yaya mamatami cuidana can. Caicunata ruranaca importantemi can. Bibliapica: “Maijanpish quiquinpurapaj, ashtahuantajca paipaj huasi familiapaj imallata rurana cashcata mana rurajca, crishcata saquishpa mana crijtapish yallimi tucushca” ninmi (1 Timoteo 5:8). Familiata chashna cuidana cashcamantachari ñucanchij munashca shina mana tanto Diostaca sirvi pudinchij. Pero mana desanimarinachu canchij. Yaya Diosca ñucanchij familiata cuidachunmi munan (1 Corintios 10:31).

4. a) ¿Diosta puntapi churashcata ricuchingapajca yaya mamacunaca imatataj rurana can? b) ¿Diosta puntapi churashcamantaca ima shinataj yaya mamacunaca sintirishca?

⁴ Yaya mamacunapish ¿ima shinataj Dioshuan trabajacushcata ricuchi tucuncuna? Paicunapaj huahuacunata Diosta ashtahuan sirvichun animashpa. Achca yaya mamacunaca chaitami rurashcacuna. Huahuacuna huiñarishpaca Diosta ashtahuan sirvingapajmi caru ladocunata rishcacuna. Huaquincunaca misionero shinami sirvincuna. Shujtajcunaca mana tanto huillajcuna tiyan lugarcunapimi precursor shina sirvincuna. Cutin maijancunaca Betelpimi sirvincuna. Paicuna carupi sirvicushcamantami familiacunapish mana tanto visitai pudincuna. Pero yaya mamacunaca paicunapaj huahuacuna Diosta sirvinata puntapi churashcata ricushpami cushilla cancuna (3 Juan 4). Chaimantami paicunapaj huahuacuna maipi cajpipish Diosta ashtahuan sirvishpa catichun animancuna. Ñaupa tiempopi Diosta sirvij Ana huarmica ñuca churi Samueltaca Diosmanmi cuni nircami. Achca yaya mamacunapish Ana shinallatajmi sintirincuna. Pero Dioshuan chashna trabajanaca sumaj cashcatami ricushcacuna (1 Samuel 1:28).

5. ¿Huauqui panicunataca ima shinataj ayudai pudinchij? (Página 21-pi tiyaj fotocunata ricui).

⁵ ¿Familia ucupi mana tanto responsabilidadta charishpaca imatataj rurai tucunchij? Mayorlla huauqui panicunata, ungushcacunata o imata minishticujcunatami ayudai pudinchij. Cai huauqui panicunata cuidajcunatapishmi ayudai pudinchij. Ñucanchij congregacionpi pi ayudachun minishticujta ricushunchij. Por ejemplo, shuj panica paipaj mayorlla yayatachari cuidacun. Pero shujtaj cosascunata ruranatami minishtin. Chaicunata rurachunmi paipaj yayata cuidashpa ayudai tucunchij. Shinallataj shuj huauqui o panitami tandanacuiman pushashpa, familiata visitachun hospitalman pushashpa, o imata randinaman pushashpa ayudai tucunchij. Chaita rurashpaca paicuna mañashcata Yaya Dios contestachunmi ayudai pudishun. Shinami Dioshuan trabajacushcata ricuchicushun (1 Corintios 10:24-ta leyipai).

6. ¿Puzachijcuna cashcata ricuchingapajca imatataj rurana canchij?

⁶ Dioshuan trabajajcunaca shujtajcunaman pozadata mañachij cashcamantami rijsishca canchij. Mushuj Testamentopi “puzachina” nishca shimica “mana rijsishcacunahuan alli cana” nisha ninmi (Hebreos 13:2). Chashna alli cangapajca Bibliapi tiyaj huaquin ejemplocunamantami yachai tucunchij (Génesis 18:1-5). Ñucanchij huauqui panicuna cajpi o shujtaj gentecuna cajpipish ayudana oportunidadta charishpaca ayudanallami canchij (Gálatas 6:10).

7. ¿Tiempo completopi sirvijcuna congregacionta visitacujpica imamantataj ñucanchij huasipi chasquina canchij?

⁷ Dioshuan trabajangapajca tiempo completopi Diosta sirvijcuna congregacionta visitacujpimi ñucanchij huasipi chasqui tucunchij (3 Juan 5, 8-ta leyipai). Paicuna visitajpica caishuj chaishujmi sumajta animanacunchij (Romanos 1:11, 12). Olaf shuti huauquimanta parlashun. Achca huatacuna huashaman, pai joven cajpirajmi shuj soltero superintendente huauqui congregacionta visitanaman chayarca. Chai huauquimanca mana pi pozadata cui pudircachu. Olafca paipaj yaya mama mana testigos cajpipish “¿chai huauqui huasipi saquiri tucunchu?” nishpami tapurca. Yaya mamaca: “Ari, pushamuilla, pero canca asientollapimi dormina cangui” nircami. Olafca chaitami rurarca, mana malaya nirircachu. Chai semana superintendente huauquihuan pasashpaca Olafca sumaj experienciatami charirca. Paica: “Ñucapish superintendentepish tucui tutamantacunami utca jatarishpa desayunacushpaca alhaja yuyaicunata parlaj carcanchij. Chaipi achcata animarishpami Diosta ashtahuan sirvinata munarcani” ninmi. Huauqui Olafca 40 huatacunatami huaquin llajtacunapi misionero shina sirvishca.

8. ¿Mana pagui nijcuna cajpipish imamantataj shujtajcunamantaca allita rurana canchij? Shuj experienciamanta parlai.

⁸ Mana rijsishcacuna callaripi mana pagui ninata yachajpipish paicunamantami allita rurai pudinchij. Shuj experienciata ricushun. España llajtapica shuj panica Yésica shuti huarmimanmi Bibliamanta estudiota cucurca. Yesicaca Ecuadormantami carca. Shuj punlla Bibliamanta yachacushpaca Yesicaca achcatami huacai callarirca. Panica “¿imataj tucungui?” nishpami tapurca. Yesicaca: “Españaman manaraj shamushpaca pobremi carcani. Shuj punllaca ima micunata mana charircanichu. Ñuca huahuamanpish yacullatami cui pudircani. Huahuata dormichingacamaca Diostami mañai callarircani. Chai qꞌuipaca ishqui testigocunami ñuca huasimanca chayarca. Ñucaca paicunahuan pꞌiñarishpami cushca revistatapish lliquishpa ‘¿caitachu ñuca huahuamanca carasha?’ nishpa caparircani” nircami. Panicunaca paita ayudanatami munarcacuna. Pero paica mana uyasha nircachu. Qꞌuipaca panicunaca micunatami huasi pungupi saquishpa rircacuna. Yesicaca paipaj mañaita Dios ima shina cutichishcata mana cuentata cushcamantami cunanca llaquilla sintirirca. Chashnapish Jehová Diosta tucui shunguhuan sirvinatami  munarca. Panicunaca chashna ayudashpami allita rurarcacuna (Eclesiastés 11:1, 6).

9, 10. a) Israel llajtapica ¿imacunallapitaj voluntario shina trabajashpa ayudajcuna minishtirirca? b) ¿Huauquicunaca imacunallapitaj congregacionpica ayudai tucuncuna?

⁹ Ñaupa tiempo Israel llajtapica huaquinpica voluntario shina trabajashpa ayudajcunatami minishtircacuna (Éxodo 36:2; 1 Crónicas 29:5; Nehemías 11:2). Cunan punllacunapish ñucanchij tiempohuan, fuerzahuan, imata ruranata yachashcahuan o charishca cosascunahuanmi huauqui panicunata ayudana oportunidadta charinchij. Chashna ayudashpaca cushillami causashun. Achca bendicioncunatapishmi charishun.

¹⁰ Diospaj Shimipica cꞌaricunataca Dioshuan trabajachunmi animan. Chaipajca siervo ministerial o anciano cangapajmi esforzarina cancuna (1 Timoteo 3:1, 8, 9; 1 Pedro 5:2, 3). Chashna esforzarijcunaca huauqui panicuna Diosta alli sirvishpa catichun, imata minishtijpipish chaita rurashpami ayudanata munancuna (Hechos 6:1-4). Ancianocunaca ¿tandanacuiman shamujcunata chasquichun, publicacioncunata ricuchun o maipi huillana lugarcunata ricuchun ñucanchijta mañashcachu? Mana cashpaca ¿tandanacuna huasita allichichun, o chai laya shujtaj trabajocunata rurachun mañashcachu? Chashna trabajashpa ayudajcunaca cushillami sintirincuna.

11. ¿Shuj panitaca construccionpi rijsishca amigacunaca ima shinataj ayudarca?

¹¹ Diospaj huasicunata shayachishpa, allichishpa ayudajcunaca achca amigocunatami charincuna. Margie shuti shuj panimanta parlashun. Paica 18 huatacunatami tandanacuna huasicunata shayachishpa trabajaj carca. Shinallataj achca huatacunatami joven panicunamanca ima shina trabajanata yachachirca.  Paica shujtajcunahuan chashna trabajanami caishuj chaishuj animarinacungapajca alli can nircami (Romanos 1:12). Cai pani paipaj causaipi llaquicunata charijpica chai amigacunami achcata animaj carca. ¿Ñucanchijpish construccionpi voluntario shina trabajangapaj rishcanchijchu? Construccionpi mana tanto imata ruranata yachashpapish ayudashpa participanallami canchij.

12. ¿Jatun llaquicuna tiyajpica ima shinataj ayudai pudinchij?

¹² Jatun llaquicuna tiyajpica huauqui panicunata ayudashpami Dioshuan trabajacushcata ricuchinchij. Por ejemplo, llaquita apacujcunata ayudangapajca cullquitami shungumanta cui pudinchij (Juan 13:34, 35; Hechos 11:27-30). Shinallataj paicunapaj huasicunata cutin shayachishpa, chai ladocunata pꞌichashpami ayudai tucunchij. Polonia llajtamanta pani Gabrielaca pai causan lado inundarijpimi huasi illaj saquirca. Pero cꞌuchulla congregacioncunamanta huauqui panicuna ayudajpica cushillami carca. Gabrielaca imalla chingachishca cosascunamantaca mana llaquirinchu. Ashtahuanpish paica: “Cai experienciata pasashcamantami congregacionpi canaca achca valishca cashcata ricushcani, cushillami sintirini” ninmi. Achca huauqui panicunapish llaquicunata charijpi paicunata ima shina ayudashcata ricushpami alli sintirincuna. Paicunata ayudashpa Dioshuan trabajajcunaca achca cushillami cancuna (Hechos 20:35; 2 Corintios 9:6, 7-ta leyipai).

13. ¿Shujtajcunata shungumanta ayudashpaca ima shinataj Diosta ashtahuan cꞌuyashun? Shuj ejemplomanta parlai.

¹³ Pani Stephanie y shujtaj huauqui panicunaca Dioshuan trabajashcatami ricuchishcacuna. ¿Ima shina? Achca testigocunami paicunapaj llajtapi guerra tiyashcamanta pacatucushpa Estados Unidosman chayarcacuna. Chaimi huauqui panicunaca paicunaman huasicunata mashcashpa, huasipi imalla minishtirishcacunata churashpa ayudarcacuna. Cai panica: “Tucuicuna cꞌuyaita ricuchijpimi paicunaca shungumanta agradecircacuna. Chaica ñucanchij shungumanmi chayarca. Paicunaca ñucanchij ayudashcatami yuyancuna. Pero paicunami ñucanchijpajca achca allita rurashcacuna. Cꞌuyaita ricuchishcamanta, Diospi tucui shunguhuan crishcamanta, tandalla cashcamantami Jehová Diostaca ashtahuan cꞌuyashcanchij. Chaimantami Diospaj organización imallata cushcataca achcata valoranchij” ninmi.

14, 15. a) ¿Profeta Isaiasca imatataj ruranata munarca? b) ¿Isaías shina cangapajca imatataj rurana canchij?

¹⁴ ¿Jehová Dioshuan ashtahuan trabajanata munanchijchu? ¿Mana tanto huillajcuna tiyan lugarcunapi huillanaman rinata munanchijchu?  Cuj cashcata ricuchingapaj shujtaj ladoman rinataca mana minishtinchijchu. Pero huaquincunaca Diosta ashtahuan sirvingapajmi shujtaj ladoman rinata pudincuna. Paicunaca profeta Isaías shinami cancuna. Jehová Diosca: “¿Pitataj cachashari? ¿Pitaj ñucanchijpaj randi ringari?” nircami. Chaimi Isaiasca: “Caipimi cani, ñucata cachahuai” nirca (Isaías 6:8). ¿Diospaj organizacionpi ayudana oportunidad tiyajpica chaipi participanata pudinchijchu?¿Ayudana munaita charinchijchu? ¿Diospaj organizacionpi ayudangapajca imatataj rurai pudinchij?

¹⁵ Jesusca gentecunaman huillanamanta, paita catijcuna tucuchun ayudanamantami parlarca. Chaimantami: “Granocunata tandanaca achcami, ashtahuanpish tandajcunaca ashallami. Tandajcunata cachachun, Chagrayuj amota mañaichij” nirca (Mateo 9:37, 38). ¿Ashtahuan huillana minishtirishca ladocunapi precursor shina sirvi tucunchijchu? O ¿shujtajcunata chaipi sirvinaman richun ayudai tucunchijchu? Achca huauqui panicunaca Diostapish gentecunatapish cꞌuyashcata ricuchingapajca huillajcuna minishtirishca lugarcunapimi precursor shina sirvi pudinchij nincunami. Diosta ashtahuan sirvingapaj imallata rurai tucushcata yuyarishun. Shinami cushilla causashun.

16, 17. ¿Diosta ashtahuan sirvinata munajcunaca imallatataj rurai pudincuna?

¹⁶ ¿Betelpi o construccionpi huaquin punllacunata o huaquin quillacunata voluntario shina ayudanata munanguimanchu? Diospaj organizacionpica maipi cajpipish imata rurana cajpipish ayudanata munaj huauqui panicunatami minishtincuna. Huaquinpica ima ruraicunata alli yachaj cajpipish minishtirishca trabajopimi ayudachun mañancuna. Tucui shunguhuan ayudanata munajcunataca Jehová Diosca achcatami valoran (Salmo 110:3).

¹⁷ ¿Jehová Diosta ashtahuan sirvingapaj capacitacionta chasquinata munanguichu? Escuela para Evangelizadores del Reinoman ringapaj ñachari listo cangui. Cai escuelapica tiempo completopi sirvij huauqui panicunamanmi ashtahuan capacitacionta cun. Shinami imata rurangapajpish Diospaj organizacionpica paicunata alli utilizan. Cai escuelaman rijcunaca maipipish Diosta sirvinaman cachachunmi shuyancuna. Cai escuelaman rishpa ¿Diosta ashtahuan sirvinata munanguichu? (1 Corintios 9:23).

18. ¿Dioshuan tucui punllacuna trabajashpaca ima shinataj causashun?

¹⁸ Diosta sirvijcunaca mana mitsashpami shujtajcunaman imatapish cunata munanchij. Paicunataca cꞌuyashcatami ricuchinchij, ima allicunatapish ruranchij y tucui punllacunami paicunamanta preocuparinchij. Chaita rurashpami cushilla, sumajta causanchij (Gálatas 5:22, 23). Ima laya causaita charishpapish Jehová Dios shina mana mitsa cashpa, paihuan trabajajcunapurapi cashpaca cushillami causashun (Proverbios 3:9, 10).